الحريم عالم مغلق وسر غامض
اسمحوا لي بالبداية اني استخدم العاميه اشوي بهالموضوع وأعرفكم بنفسي
أنا عمري 35 متزوج وصار لي على زواجي تقريبا تسع سنين ومع هذا كله دايم أفكر بجنس الحريم اللي أفكر به بالضبط هو طبيعتهن ! إلى أي حد هن يختلفن عن جنس الرجال ! عندي بعض الأسئلة ودي أطرحهن عليكم بحكم خبرتكم بالتعامل معهن : وما يمنع تشارك الحريم أو البنات بالإجابات بس اللي يهمن هم الرجال بصراحة لأني ودي أعرف صراحة الرجال يفكرون مثلي ولا لا : 1_ إلى أي حد تعتقد انك فاهم جنس الحريم ؟ تعرف طبيعتهن وتحس انك فاهمهن بالضبط ؟ تعرف وشلون ترضيهن وشلون تزعلهن ؟ وانه بإمكانك تصير فارس الأحلام المنتظر ؟ ولا هذا أصلا شي مايهمك ؟ وإلى أي حد ؟ ولا هن بالنسبه لك عالم غامض وإذا كان غامض فهو غامض إلى أي درجة خل نقول من 100 ) 2_ من تعتقد عنده طبيعة قلقة ومعرض للاضطراب النفسي أكثر بحكم ظرفه الاجتماعي وتكوينه النفسي والعضوي ؟ الذكر ولا الأنثى ؟ 3- من هو أكثر وفاءا واخلاصا ؟ الرجال ولا الحرمه ؟ وإذا كانت الحرمه هي الإجابة فعلى أي أساس بنيت إجابتك ؟ ماتعتقد إن الظروف الاجتماعية المحافظه تحكم على الحرمة تكون أكثر وفاءا لو على الأقل من الناحية الظاهرية ؟ ولا هذا يرجع أصلا لطبيعة الأنثى ؟ 4- أنت في تعاملك مع الحرمة عموما مثل أمك , عمتك أو خالتك , بناتهن , أختك , زوجتك , بنتك , حبيبتك ...... من ما تكون ان شاء الله الحرمة اللي تمشي بالشارع هل يدخل في تعاملك معها عنصراعتبارها أنثى ؟ واحساسك بالأنثى ؟ وهذا العنصر إذا تدخل بتعاملك معها يدخل بشكل واعي ولا غير واعي ؟ يعني يجي كذا لا إراديا ولا أنت تستحضره بذهنك ؟طيب هذا العنصر يختلف معك بحسب طبيعة قرابتك وعلاقتك مع هالحرمة ؟ 5- إلى أي حد أنت جريء مع الحرمة ؟ تقدر تضرب لنا مثال ؟ طيب تقدر تتذكر أيام الزواج الأولى ؟ فرضا .... كنت تمشي بالشارع وشفت وحده زينه واعجبتك واغراك الشيطان والهوى إنك تتابع النظر لها ؟ وفجأة انتبهت لك وحطت عينها بعينك ! وش راح تسوي ؟ تطنبس لا إراديا ولا تتابع النظر ؟ وذا طنبست فهذا علشان الحيا اللي جبلت عليه ولا أصلا أنت تضيع مراجلك مع الحرمة باعتبارها سر غامض ولا تعرف وش اتسوي بمثل هالمواقف علشان الحريم بالنسبة لك سر غامض ؟ اسمحو لي اني أبدا بنفسي بالاجابات : 1- الصراحة الى الحين هن بالنسبة لي سر غامض وتقدرون تقولون اني فاشل بفهمهن بنسبة 20 بالمية ! أنا أتكلم عن جنس الحريم الحين موهوب عن زوجتي بالتحديد وقولت اني اتمنى اكون فارس الاحلام المنتظر هذي صارت معي لما وصلت 30 وبدى هالاهتمام ينقص همن ينقص لما وصل خمسة بالمية الحين وشكله باكر يبي يصير صفر . 2- أنا اظن الحرمة هي معرضة للقلق أكثر لكن على انه معرضة اكثر للضغوط النفسية لكنه اكثر استقرار وتماسك من الرجال ( وشلون قلقة أكثر من الرجال ومع ذلك أكثر استقرار من الناحية النفسية من الرجال ؟ ماقلت لكم سر غامض ) 3- بالنسبة لي يدخل بتعاملي معها اعتبار كونها أنثى بشكل لاواعي يعني غصبن علي ومع كل الحريم بداية من أمي لأبعد الناس عني ! 4- اظن مسألة الوفاء والاخلاص ماله علاقة بطبيعة الذكر ولا الأنثى من ناحية تكوينهم النفسي والعضوي لكن ظروف المرأة الاجتماعية عندنا تفرض عليه تكون أكثر وفاءا من الرجال . 5- بالنسبة لأيام زواجي الأولى لازم أعترف اني كنت أتصنع الجراءة واحاول اغيب عن الواقع اشوي علشان أأقلم نفسي مع الظرف الجنسي أو العاطفي الآني اللي ما تعودت عليه وجديد علي !!!!!!!!!! بالنسبه لي لو تعرضت لموقف بالسوق مثل الموقف المذكور راح اطنبس غصبن علي مادري وراه حيا ولا ان المراجل تضيع بس الغالب ان المراجل تضيع بدليل انه لاراحت البنت وانتهى الموقف اقول لنفسي ورا ماسويت تسذا ولا تسذا !ولو تكرر نفس الموقف برضه راح اطنبس واقول لنفسي مثل اللي قلته بعد مانتهى الموقف ! من يتجرأ ويجاوب على الأسئلة أوبعضهن ؟ إذا عندك معرف وتستحي ولاودك تجازف بوه ميخالف ادخل بمعرف جديد وجاوب ! أنا عاذرك لأن الأسئلة حساسة اشوي ! |
حياك الله ياخوي واول موضوع شرفنا ياخوي هالأسئلة عادية ولا تستاهل من يروح بمعرف ثاني بعدين ربعنا ماعليك كلهم بيجاوبون نفس بعض هي على الأول هع بالنسبة لي أشوف إنه فيه شيء من الغموض ولكنه لا يشكل أكثر من 20% عزيزي المرأة لا تحتاج من يسوقها بل تحتاج من يسوسها المرأة تأتي معك زي الفل بالطيب والإقناع والكلام الحلو ولاشك تعرضهم للضغوك أكثر من الرجل لكن بشكل عام المرأة تحتاج من يتقي الله فيها والله إن المرأة مهما وصلت من درجات الخبث فهي ضعيفه جبلها الله على هذا ولقد وصانا الله بحق الضعيفين والمرأة أحدهم أما بالنسبة للجرأة فأنا لست بجريء مع النساء تماماً لكني لست خجولاً أيضاً ولكن المهم هو الإحترام لها ككيان بشري لطيف وكما قال عليه الصلاة والسلام رفقاً بالقوارير عادي باقي أسالتك كسل كثار الله يهديك |
برأيي الرجل يحب المرأه الغامضه .. مو اللي تجي كلها جميع .. :)
|
مرحبا ..
و شكرا للسماح لنا بالمشاركة .. :) _ إلى أي حد تعتقد انك فاهم جنس الحريم ؟ تعرف طبيعتهن وتحس انك فاهمهن بالضبط ؟ تعرف وشلون ترضيهن وشلون تزعلهن ؟ وانه بإمكانك تصير فارس الأحلام المنتظر ؟ ولا هذا أصلا شي مايهمك ؟ وإلى أي حد ؟ ولا هن بالنسبه لك عالم غامض وإذا كان غامض فهو غامض إلى أي درجة خل نقول من 100 * لا تتعبون انفسكم .. ولا تنتظرون أحدكم ليقول // أنا افهم النساء .. صبح و مساء .. بنسبة تزيد عن الـ 70 % .. لأننا كائنات حية غامضة .. و نحن انفسنا لا نفهمــ ـنــــا !! حتى نجيب محفوظ .. ما قدر يفهمنا .. نعم .. فينا انطوى العالم الأكبر .. و لمن لم يفهم .. يمكنكم الاستعانة بالفيلسوف الزاهد المتورع والمترفع عن الرد علينا ( كمان ) .. 2_ من تعتقد عنده طبيعة قلقة ومعرض للاضطراب النفسي أكثر بحكم ظرفه الاجتماعي وتكوينه النفسي والعضوي ؟ الذكر ولا الأنثى ؟ * هه ! مايحتاج سؤال ياعمي .. طبعاً النساء أكثر قلق و زمل و أردى نفسية و اكثر اضطراب .. 3- من هو أكثر وفاءا واخلاصا ؟ الرجال ولا الحرمه ؟ وإذا كانت الحرمه هي الإجابة فعلى أي أساس بنيت إجابتك ؟ ماتعتقد إن الظروف الاجتماعية المحافظه تحكم على الحرمة تكون أكثر وفاءا لو على الأقل من الناحية الظاهرية ؟ ولا هذا يرجع أصلا لطبيعة الأنثى ؟ * لا مؤاخذة .. الاكثر وفاءاً .. هو الكلب .. _ اعزكم الله _ كذا حفظونا .. :) باقي الأسئلة .. ما أقدر اجاوب عليها .. لحد ما أصير ولد .. بس أعجبتني ألفاظك ( تسذا و تسذا .. و تطنبس ) هه ! |
باختصار ...لا يمكن فهم النساء او اتخاذ قواعد محددة للتعامل معهن او فهمهن...
لقد توقف العالم عند النتيجة اعلاه... أستطيع اقناع كل سكان الكوكب بمسألة معقدة..لكني اعجز عن اقناع زوجتي وأمي بمسألة واضحة..ولذلك اتبع منطق سمعنا واطعنا... |
اقتباس:
|
اقتباس:
يمكن أنا برأيي انه الغموض يمكن يكون سبب للجاذبية بس أهم شي لاتجي جميع ولاتروح جميع ! شرفن مرورك طال عمرك ! |
اقتباس:
شرفن مرورك طال عمرتس ! |
راح أرجع إن شاء الله لمواصلة الردود بس على فكرة وشلون الواحد يعرف ينسِّق بالردود ولايصير مثلي يحوِّم التسبد ؟
|
[align=center]
اقتباس:
اللي انا مقتنعة فيه ...... إن الرجل أكثر وفاءً في الحب ،، والمرأة اكثر إخلاصاً في الزواج !! لايروح بالكم لــ حب المراهقين وخرابيط هالمبزرة ( تلفونات وطلعات ومدري وش بعد ) ..... لا ! الرجل يحب .... ايه يحب ويمكن يعشق بينه وبين نفسه ( واذا عطى قلبه لإمرأة لايمكن يعطيه لثانية حتى لو كانت زوجته !! ) وليس كل البيوت تبنى على الحب ( لأنه اذا عدمت المحبة تتبقى الألفة والرحمة والإحسان ) !! واحياناً يكون العشق والحب والهيام لزوجته :) !! ميزة الرجل إنه يحفظ الحب ولو كان عمره 60 ( عكس المرأة واللي بمجرد ماتتزوج وتجيب عيال خلاص يصيرون هم همها وتفكيرها وتسحب على مندوب اي واحد كانت تبيه وتتمناه قبل ) وهذه طبيعة وتكوين المرأة - ولعلها رحمة من الله - لذلك كانت اكثر اخلاصاً في الزواج :) !! وياما شفنا شيبان سبق أن هاموا وعشقوا ( نساءً ) في زمنهم ، ولازالوا يتغنون بهن ويذكرونهن حتى لو هن ( عجز طايحات ) http://www.buraydh.com/forum/images/icons/icon10.gif !! اييييييييييييييييييييييه !! حاولوا تفتحون قلوب ماحولكم من ( الشيبان ) وستجدون اسرار وقصص لوسمعتموها لظننتم انكم عدتم لزمن قيس وليلى .... حب نظيف شريف عفيف - الوكاد إنه من طرف واحد - ولازالوا يحتفظون به !! دعوهم يتحدثون وستندهشون عندما تلمع اعينهم عند حديثهم عنهن << شغلتي بس افتح مزاليج الشيبان واخليهم يكببون عشاهم ( وتجيني حالة نذالة اهددهم احرش عليهم عند عجزهم ) يبه وش اخبار بنت قصراكم مزنة ؟!! :d4: وإلا العجز ماتقرب ارضهن ( انواع التكسيح ) ووش يدخلتس ؟! :for1: واذا بغيت تبسط العجيّز حش بحريم عيالها ورجال بناتها وتعطيك وجه :d1: !! [/align] |
8 8 نقد وفيتي وكفيتي ويمكن صدق هالكلام بس مشكله المره تسهج ابو مرسوله لا جابت عيال يعني تدعين للتعدد مثلاً ؟ |
[align=center]
اقتباس:
وشو تعدده وانت مابعد اعرست ولا على ( نص ) حرمة http://www.buraydh.com/forum/images/icons/icon10.gif !! الله من زين التخطيط للحياة الحالمة المستقرة ( قال تعدد قال ) << احلام معوقة :a1: !! احيانناً أحس إننا ( نحن شيبان المنتدى ) خطر على عقول الناشئة لأننا نفتح اذهانهم على امور مالها داعي http://www.buraydh.com/forum/images/icons/icon9.gif !! أجل أنا صرت ادعوا للتعدد .. هاه ؟! http://www.buraydh.com/forum/images/icons/icon8.gif عاد كونها تسهج وهو يسهج .. ذي يبي لها سواليف ثانية !! لافضيت جيت اكمل واحوس نظرياتك في الحياة :) ! [/align] |
اقتباس:
ياهلا بك عاد من اللي قالك إني اتحراك تدعين للتعدد ولا ماتدعين أنا خلين اظفر ولو بـكسرة مره وبعدين يحله الف حلال وصدقتي إنه عليكم الشرهه يالشيبان انتي ولمبه شكلكم بالستينات ياعيال اللذين عاد شوفي حنا يالشباب فاهمين أكثر منكم بس أنتي خلي أمورنا تيسر إن شاء الله أما التعدد وغيره مو الحريم اللي يتكلمون بهالسوالف خليكم بالمطبخ وحوله هذي امور رجاليه هع ترى هذا مهب سلب حق قانوني لا تذكير بإمكانيات شخص وحدود فنه هع هع الهعات وإن عدتم عدنا[/align] |
[align=center]باختصار شديد جدا
المرأة (أحيانا) تشعر أنها غير قادرة على فهم نفسها جيدا فكيف تريد أن تفهمها جيدا ؟!!! ولكن هذا لا يعني أن توقف محاولاتك الجادة في فهمها تحيتي لك[/align] |
الحريم اصلا مستحيل احد يفهمهن كل يوم شكل ومزاج زي المناخ..!!!
التطنيش الايجابي هو السلاح الوحيد لجعل المرأة تنضبط معاك ..!! لاتعطيها وجه والله ان تروح فيها..!!! لا والخافي اعظم..اذا بغت حاجة وانت مشغول شف الالفاظ..(والله لو انا فلان كان قمت مثل المقروص..!!) عموما دعونا نتخيل عالم بدون حريم ..الله..فلوسنا تكثر وروسنا مافيها صداع والسيارة يجلس فيها البنزين شهر..!! الكروش تروح...القعده تحلى...مافيه حنه ورنه... بس وين تروح امي ؟؟؟لا والله هونت يازين الحريم..!!! |
الساعة الآن 08:26 am. |
Powered by vBulletin® Version 3.8.8 Alpha 1
Copyright ©2000 - 2024, vBulletin Solutions, Inc. Trans by
موقع بريدة