يبه لايجي في خاطرك من زمانك ضيق
أنا جيت أفرج كل مافيك من ضيقه
أناخادمك عبدك أنا الصادق الصديق
معك لاغدر بعض العرب في مواثيقه
أنا اللي ليامن شاحب الهم يمك سيق
نطحته بنفسي عنك لو كنت ما طيقه
علي اليمين إن الله أعطاني التوفيق
وحبل المنايا ماشبكتني معاليقه
لخلي صديقي يحرق إيديه بالتصفيق
وأخلي عدوي يبلع الهم مع ريقه
يبه والشعر فيك يتباهى وفيك يليق
وأنا شاعر جاب الذهب في صناديقه
ومدامك كبير في عيوني بكبر طويق
أنا ليه مملي دلة القاف وإبريقه
يقولون شعر مايهز الحشا تلفيق
وأنا اأقول ياشعري حشا ماإنت تلفيقه
أنا ماكتبت الشعر بالقص والتلزيق
أنا ذبت فيه وجننتني طواريقه
كتبته وخليت القلوب النيام تفيق
وقامت تزامح في عيوني عشاشيقه
ولا ليت بعض الناس بين الضلوع يويق
عساه يعذرني لاتماديت بالضيقه
ولا يا عسى عفن تعود على التدنيق
يزوره رسول الموت في كل تدنيقه
ولا يا عسى قرم خذا الطيب فكة ريق
يجي دربه أخضر زاهيات زماليقه
يبه لايجي في خاطرك من زمانك ضيق
أنا جيت أفرج كل مافيك من ضيقة
`•.¸¸.•¯`••._.• الغــــــــــــــــالية بنت الغــــــــــــالي`•.¸¸.•¯`••._.•