أرجوك لا تطري علي جرح قد فات
خله سجين بحزن الأيام خله
خله يموت بداخل القلب بسكات
سيف الاسى بالجوف لا لا تسله
ماعاد ينفعني ملام وحسافات
الجرح جرح وعلة الكبد عله
ياما تجرعنا من الوقت حسرات
لكن ما دسنا دروب المذله
جرح الزمن وياك ينسى بساعات
وقلب ضماه الجرح وصلك يبله
قربك ينسيني تحاسيف وآهات
وبعدك علي ياشوق جسمي يشله
ليتك تشوف الطرف ساهر ولا بات
وليتك تشوف العين دمعي تهله
أنت الأمل عطني من الوقت لحظات
وخذ الوفا مني ودربي تدله
أجلس معي عطني كلام ومناجات
والشعر حطه فوق متنك وفله
أذوب في صوتك أحاسيس وأنصات
والعين شوفك يالغلا ما تمله
دامك معي غيرك من اعداد الاموات
أنت الوحيد اللي بقلبي محله
بينك وبين الناس فرق ومسافات
حيثك ملكت القلب واصبحت كله
أقضي معك أحلى مواعيد واوقات
وشوقك ثقيل الهم مني يتله
حيثك جمعت الزين منظر وعادات
ليت القمر يمضي وتبقى محله
بوصفك يتوه الشعر وتضيع الابيات
كلما وزنت القاف حسنك يزله
وأرجوك.. لاتحيي علي جرح قد مات
خله يموت بماضي الوقت خله