بيننا من يقتل ألف باء اتكيت رقي التعامل الانساني ويجعلنا نندم من ممارسة هذا الفن الآسر للقلوب !
مدخل/
لمن لايعرف في كل دائره عمل نسائيه ساعة كوفي غالبآ تكون في بداية الصباح
وبغض النظرعن مايدور في تلك الساعه من قبيل انتم وحنا ومجاكر اصناف الحلويات وتشويكلت الدايت
الا انه في اعراف الموظفات/
القهوه ومايقدم معها من مقاييس الحكم على سنع او الثقافه الاجتماعيه لصاحبتها
يعني بعضهن تكتفي ببرابيس الحليب والسميد المغموسه برخيص التشويكلت وتقول عليكم بألف عافيه
والكثير منهن تشتري دماغها وتمر باتشي وتغلف لها تشكيله وتدفع خمسمية ريال وهي تردد يارب سترك واستارك
حدثتني من آكل على كلامها النطيحه والمؤوده وماأكل السبع تقول :
منذ شهر حلت علينا موظفه جديده صامته محتضنه جوالها دائمآ
وكانت تلوذ معنا كل صباح بمحاريب القهوه للممارسة طقوس احتساء القهوه الحلوه والمره على مذاقات الشيكولاته البلجيكيه الداكنه والبيضاء والوسط المحشيه منها والمغموسه والمقطره !
ذات اربعاء ونحن نستعد للمغادره سمعتها تقول لا احد يجيب شي السبت انا ابقهويكم ..!
ويابطيك يالسبت متى يجي نشوف وش عندها الصامته وحل اليوم المنتظر والقهر جيت متأخره وسيدا على مكتبنا والحمدلله فاتني الكثير !
دخلت لقيت صينية بلاستك الارياف المضلعه الشفافه وفيها قطع بسبوسه غير منتظمة الشكل متثلمة الاطراف .,.
فوقها وردة بصل وطماطم من تلك المستخدمه في تجميل التبوليي !
قربت صاحبتنا الصحن لي وتعمدت ان ابدو منشغله بمكالمه ولما غادرتني صاحبة البسبوسه سألت الموجودات هل فاتني شي ؟ وشي هالبصله اللي بالنص ؟
جاوبتني احداهن يمكنهم عازمين كارول سماحه البارح وتحسفت بوردة التبوله !
راحت الايام /
وكنا نسولف بمدى سذاجة الانثى فيما يخص عاطفتها تكلمت الصامته وكأنها تذكرت شيء مخجل وليتها ماتكلمت !
اطرقت ضاحكه وقالت حللوني عن ذاك الحلى يوم احط عليه بصله
الصراحه كنت متراهنه مع اخوي طلبت منه يجيب لي تشويكلت من النوعيه اللي تحبون وقال الحريم كمخ مايدرن وش ياكلن وراهني على خمسميه ريال بحال اخذت بسبوسه عليها بصله وجبتها لكم وانا خايفه من ردة الفعل والحمدلله ماانتبهتوا !
ولما رجعت سألني وهو يضحك اذا انتن مو مبسوطات و عجبكن ستايل البسبوسه الجديد ؟ .. واخبرته ولا وحده منكن لاحظت شي !!
من بعد ذاك اليوم تم نقلها للصادر والوارد ببركات فهلوة اخيها و كماخة النساء !
لاأدري ايها المنصتين لحروفي ..
هل يتوجب علي ان اكون فضه وقاسيه ونشبه
حتى يأخذني الاخرون على محمل الأشخاص من فصيلة القشران اللي ماينضحك عليهم
رقي الاسلوب والمفاهيم صار راعيها يطق وراه بتنكه ؟
يعني لازم نجرح الاخرين علشان يبان لهم مدى فهمنا !
نصيحه لاتسمحوا لبصل ان يستقر أعلى بسبوسه