موقف طريف أو محرج مررت به .... ياحبذا المشاركة من الجميع

[السعودي]

أرجــو تثبيت هــذا الموضــوع وبشدة من أختنا الفاضلة ( مسافرة بلاد زاد ) فلعلها تجد في موضوعنا هــذا الزاد الذي تتقوى به لمواصلة أسفارها

فهذه فكرة من العضوين ( الأنيق + شواطىء ) وقد فوضاني لكي أكون الوسيط لدى مراقبتـنا الفاضلة ( مسافرة بلا زاد ) لكي تقوم بـتـثـبـيـت هذا الموضوع فلهم مدة وهم يلحان عليّ بذلك .... فلا تفشلوني معهم بإهمال طلبي وطلبهم

ونطالب بشدة مشاركة جميع الأعضاء لإنجاح هذه الفكرة لإدخال جو من الوناسة و الطرفة على هذا المنتدى المعطاء ، بشرط إلتزام جميع الأعضاء بحدود الأدب في الشيء المطروح وإختيار الألفاظ المناسبة والمباحة ، وعدم إضافة الصور المخلة كالصور أو التواقيع التي فيها صور نسائية

وستكون البداية من عندي


قصة السعودي وحمام النساء

ــ في أحد السفريات الصيفية ذهبت أنا وبعض الأصدقاء لمدينة أبها ، وصلنا هناك وجلسنا في مكان جميل ( منتزه السوده ) مدة ليست بالقصيرة ، ثم قال بعض الأصدقاء مارأيكم أن نقوم بجولة بالسيارة حول المنتزه .... فقلت أنا تمام والله رأي جميل ولكن انتظروني سأذهب للحمام للوضوء وأجيكم حالاً فبدأ بعضهم يجهز زمزميات الشاهي وكل ما يلزم للرحلة وما بقي إلا أن يمشوا فهم الآن في وضع إنتظار ( السعودي ) في الحمام ..... ( ولكن ماذا حصل للسعودي في الحمامات ؟؟؟!!!

ذهبت فعلاً للحمامات ووجدت الحمامات مقسمة إلى قسمين : قسم خاص بالرجال وقسم آخر خاص بالنساء ....... أكمل وإلا ما هــو لآزم ؟؟

ــ مالك بالطواله / دخلت حمامات الرجال فوجدتها سيئة جداً من ناحية النظافة ... فقمت بحركة ( بزعـه ) وذهبت إلى حمام النساء ولم أجد أحـداً هناك ، فقلت تمام الحين وبسرعة أتوضأولا يدري أحــد ، فكنت وقتها أحس أني أذكى واحد في العالم بهذه الحركة لأني تركت حمام الرجال الوسغ ودخلت حمام النساء النظيف
المهم دخلت الحمام وكان يوجد به حمامين ، فدخلت أحد الحمامين لأقوم بالوضوء فأثناء ما هممت بالخروج وإذ اسمع أصوات نسائية مقبلة للحمام فأحسست أني قد هلكت ورحت وطي فقمت بالرجوع وبسرعة للعودة مرة أخرى للحمام قبل أن يفتضح أمري ، فدخلت واحدة من النساء الحمام المجاور لي تماماً ، وأنا ما أدري ماذا أفعل ماغير أني مجلد بالحمام ، وأخذت النساء تتعاقب على حمام واحد حتى كثر عدد النساء وأنا في موقف لا أحسد عليه ، حتى أن بعض الفتيات كانوا يسلفون سواليف يحبها قلبك ( ولكني نسيتها من هول الموقف الذي أنا فيه ) فأخذت بعض الفتيات الريبة من هذا الحمام المغلق حيث قالت إحداهن ما تلاحظين يا فلانه أن هذا الحمام من يوم نجي وهو مغلق ولا حس ولا رس ، أنا أخذ قلبي يرجف من شدة الخوف وأخذ يزداد رجفاً عندما أخذت الفتاة ترجف الباب وتقول هل في الحمام أحد ، فقمت وشغلت مخي وفتحت بزبوز الماء وأبربس لكي أوهم من في الخارج أني مازلت محتاج للحمام ، فبدأ عدد النساء يخف شيئاً فشيئا حتى تم خروج آخر فتاة .... ففرحت أنها مشت على خير ... فعندما تيقنت أنه لا يوجد صوت فتاة ... أخذت افتح الباب بهدوء لكي أخرج وعندما قربت من الخروج بقليل وإذ بجمس ملىء بالنساء نزل يريدن الحمامات ... فرجعت بسرعة إلى الحمام مرة أخرى وبدأت الحرب من جديد ( حرب نفسية ) فتحطمت أعصابي من جديد وجلست حبـيس الحمام لمدة ، وتكرر نفس الموقف مرة أخرى معي تمامأ كسابقه إلا أنا أحدهن أخذت تطرق الباب بشدة ( يبدو أن حاجتها ضرورية ) وتطرق الباب بشدة وتقول بسرعة يا خالة .... بسرعة ياخالة ... وأنا ماغير شغال مع البزبوز سك وفتح ... سك وفتح ... فالحمد لله خرجت من كانت في الحمام المجاور ودخلت تللك المرأة المزعجة بطرقها للباب ..... انتظرت كثيراً حتى خرجت أخر إمرأة من الحمام ... فعندما أحسست أن الجو سكون ولا يوجد صوت ... خرجت من الحمام بسرعة ( 300 كيلو في الساعة ) صـــاروخ

ــ فأتيت لأصدقائي وكان الغضب واضح على وجوههم لأني تأخرت عليهم كثيراً ، فقال أحدهم / يا أخـي أنا ودي أفهم شيء واحـد وش تزين بالحمام كل هالمدة ... يا أخي قطعتنا الله يقطع إبليس العدو ..... وكان واضح على الإعياء والتعب ... فقال أحدهم لي : توضئت ..فقلت : ما أدري ؟! فأخبرتهم بالقصة فأخذ كل واحد منهم يفترش الشارع من شدة الضحك ... وإلا الآن وهم كلما تذكروا ذلك الموقف أصابهم موجة عارمة من الضحك .
======================================

[ماجد الأول]

الصراحة ... موقف صعععععععب .

ما أدري وش بسوي لو كنت مكانك !

إن شاء الله أشارك بس عسى الله يفتح علي بموقف.

[الرجل البسيط]

موضوع شيق بس لو الاعضاء يتفاعلون معه ويكفي انه من اخونا المبدع السعودي وعلشان نشارككم فهذا موقف حصل لي وانا في الصين .
كنا هناك لغرض التجارة وكنا ماخذين عدة الطبخ معنا وما كان ينقصنا الا الدجاج وكنا كل يوم في دوامة البحث عنها مو من قلتها ولكن من تفهيم سواقين التكاسي اللي ما يفهمون لا عربي ولا انجليزي . ومره من المرات حاولنا اولا بالصوت نقلد الدجاجة ثم بالحركات من هز اليدين الى اشارة الاصبع على الرقبة يعني الذبح ثم استخدمنا طريقة الرسم لعل وعسى ينفع . المهم وما اطول عليكم الصيني قام يضحك ويهز براسه يعني عرف اللي حنا نبيه فجلسنا ننتظر لكن آخر شي وين ودانا ؟
ودانا يا سامعين الى فندق اسمه .................. البطة....................

[محمدالمويعزي]

ألح علي أحد الزملاء إلا أن أذهب معه لمناسبة لدى أحد
أقاربه في أحد الرمضانات. (وياليتني مارحت!!)

بإختصار.

وفي المجلس الممتليء وكنا جلوس والجميع

يستمعون ومنصتين لقراءة إمام الحرم إلا أنا والعياذ

بالله كنت وقتها في (هواجيس!!)

وعندما قال:-

الإمام:- ولا الضاااااااااااااااااااااالين

قلت:- آآآآآآآآآآآآآآآآآآآآآآآآآآآآآآآآآآ مين!!!!!!!!!


ووينك ياراع الرديه!!!وضحك وضحك وضحك وأنا (.........................!!!!)


والكارثه زميلي ماتعشى هاكاالليله وفضحنا وافتضح
من كثرة الضحك!!!!!
وبالتالي قعدنا نضحك كلنا من ضحك زميلي اللي ماهوب طبيعي
تصدقون حتى أنا قعدت أضحك معهم!!(ماتسني سويت شيء!!!!!!!)

وأخيراً صاحبي قعد يناتع ويناتع يبي يموت وسريت به للمستشفى

وبعد ماشافه الدكتور .

قال:- هذا المريض من المحتمل إنه متناول حبوب (هلوسه!!!!)

وصرف له علاج ..ومراجعه!!!! والسبب!!!!!!!!!!!

[الانيق]

السلام عليكم

كنت في زيارة الى لندم( لندن ) انا واثنين من زملائي وكان واحد منهم يكره البريطانيين بالحيل ويحب سوي المقالب

المهم مادرينا الا ابعد عنا وخلا بيننا ناس من هالانجليز ثم قام يشر لنا وكنه يشر للانجليز كان واحد ملقوف منهم جا لمه وبنفس الوقت خويي الثاني راح لمه لاننا ندري وش يبي يسوي صاحب المقالب يوم وصل لمه الانجليزي قاله بالانجليزي
(NOT YOU I MEAN MY FRIEND) يعني ما ابيك انت ابي صديقي يوم صار وجه البريطاني تقل طماطة وشف البريطانيين يوم قاموا يضحكون على رفيقهم الملقوف وحنا سوينا نفسنا عاديين وحنا نبي انتقطع من الضحك

شكرا يخوي السعودي وعساك على القوة

[حامل المسك]

.......... مازال البحث جاريا عن موقف طريف .......

[شواطئ]

انقل لكم هذا الموقف الذي حصل لإحدى قريباتي على لسانها.......






تقول:في عيد الأضحى المبارك كنت في بيت عمي جالسه في الحوش

ومير أشوف ولد عمي الكبير يلحق اخوي الصغير(يلعب معه)......

ومير أقوم اركض ادخل بالملحق عشان مايشوفن .....

في نفس الحظه دخل اخوي الحمام ألي جنب الملحق......

ولد عمي التبس عليه الأمر سمع الباب تسكر يحسب اخوي دخل الملحق.......

وبداء يدفع الباب من الخارج وأنا ادفع الباب من الداخل وعلى هالحاله مده وأنا

أقول: فيه احد لكن هو من شده الحماس ما يسمع!!!!!

وبعدين بداء يدفع بقوه (شكله يقول بنفسه وش هالقوه مع انه صغير) أنا عجزت

أتحمل لأنه اكبر مني

ودخلت وراء الباب وغمضت(ما تدري وش تسوي على بالها انها إذا غمضت ما

راح يشوفها)ودخل علي!!!!!!!!!!!



وانتم تخيلوا الباقي؟!



تحياتي.....

[فريـــد]

والله اني يوم قريت مواقفكم نسيت كل اللي اعرف

ابتعصر وابحاول اتذكر موقف

وادعوا الله انه يفرجها

[فريـــد]

[mover]يامرحبا .. يامرحبا ..[/mover]

انا ابقول لكم موقف محرررررررررررج :

كنت واقف بالسيارة عند مطعم طالب منه عشاء سفري .. وكنت انتظر بالسيارة ..
وكان قدامي عربجية كبيرة .. ومالها مرايات جنب وواقف قدامي بشكل ازدواجي .... الشاهد : وانا واقف انتظر الطلب .. يوم دريت والا راعي العربجية يرجع وانا مطفي النور وقاعد اسمع الرادو .. والله وابلش بعمري مادري وش اسوي .. مايمدين اسوي شي .. واقعد اكبس له بالنور .. والله ماجاب خبرك .. واصوت قوة : ياشيـــــــــــــن اوقف .. هيـــــــــه .. يابو ز... اوقف .. الله يلعـ....... .. وبرضه ماجاب خبرك والحمدلله السيارة اللي واقفة وراي حس بالوضع فنزل بسرعة وقال له : حاسب الموتر وراك .. واشوى .. وقف

بس الصراحة .. اني بغيت اتهور هكااليوم

[gl]ننتظر مواقفكم الطريفـــــــــــــة أو المحرجــــــــة ..[/gl]

[البكيراوي]

موضوع رائع يا السعودي !!

وضحكنا كثير واستمتعنا بقراءة مواقفك ومواقف الاعضاء جميعا !!

وبالنسبة لي فعندي مواقف طريفة حصلت كثيرا !!

والصراحه ما ادري ايها اختار ولا ودي اقولهن كلهن حتى ما تضحكون علي !! تقولون وش هالدبشة !!

تبون موقف اللموزين والا موقف مع الدكتور بالجامعه والا مع رئيس القسم !!هذي قوية شوي ههههههههه

تدرون وشلون

ابقولكم موقف لطيف صار لي

مرة كنت عازم اخوياي قلطة عندي بالبيت بين المغرب والعشاء

بثاني العيد حتى نتعيد ونشوف بعض !!

المهم اهلي كلهم كانوا طالعين للبر متغدين هناك !! الا انا فليح زماني جالس !! لاني على موعد مع زملائي !!

وانا جالس بالبيت الحالي العصر وكنت اتمشى فيه !!

قلت وراه ما تطلع للحوش وتشم هوى وتوسع صدرك !!

وفعلا نزلت وفتحت باب الحوش وطلعت وابطرف الباب !! الا والباب انصك مرة وحده !! والله البلشه !!

طبعا ما معي لا مفتاح ولا شئ !!

والا علي الا لبس شباب القصمان المفضل ( سروال وفنيلة )

عاد تخيلوا الموقف !!

الساعه خمس العصر وزملائي يبي يجون المغرب !!وانا بالحوش وكل البيبان مصكوكه يعني ما اقدر ادخل البيت !!

وش تسوي يا البكيراوي وش تسوي يا البكيراوي

ما فيه الا جيراننا اطق عليهم واخذ منهم تلفون واتصل على اختي اخليه تجيب لي مفتاح !! وقلت بقلبي الحمد لله فرجت جيراننا وامون عليهم لو شافون بهاللبس اهون !!

طقيت على الجيران !! ما احد رد !! طالعين للبر الظاهر ههههه

والله البلشه صدق هالحين

رحت للشارع العام بلبسي الظريف !!( وتخيلوا موقفي وانا اركض بالشارع ) ورحت ادور كبينه تلفون !! حتى اتصل على اختي لانه معه مفتاح سبير للبيت !!

ويوم لقيت الهاتف ابتصل !! لكن نسيت الرقم ما ادري كم !!

ولا معي الدليل !!والكلام هذا مبطي قبل ما تنتشر الجوالات !!

قلت ما فيه الا ابو لوموزين !!

طيب والفلوس ؟؟؟ ما معي ولا ريال وش اسوي !!

والله البلشه !!

وقفت للموزين وقلت له ودنا الحي الفلاني ( اللي ساكنه فيه اختي )

وطبعا اللموزين يالله وقف لي !!

من اللي يبي ياقف لواحد لابس زي لبسي الظريف في ايام العيد !!

المهم يوم وقف لي

قلت له ترى ما معي فلوس ( انهبل اللموزين وش هالحرامي الصريح )

وقلت له سالفتي باختصار وقلت اذا رحت لاخوي ابعطيك من فلوسه واذا ما عنده يجي اللموزين معي واعطيه !!

المهم ابو لوموزين وثق بي ( طبعا صرت مذلول عنده )


ورحت لبيت اختي !!

ودخلت عليه وكان رجله عنده

ولكم تخيلوا الموقف !!

وش يبي ذا

جاء بنص العصر باللبس الظريف !!

المهم ماتوا علي من الضحك !! لين شبعوا !!

ثمن قالوا لي تعال تقهو معنا قلت واللموزين اللي عند الباب !!

قال عطه خمس ريال وخله يروح !! قلت ومنين يا حسره !!

المهم اخذ عشره ريال وعطيت اللموزين !!

ورجعن رجل اختي للبيت ومعي المفتاح !!

وانحلت المشكلة والحمد لله !!

اتمنى ان يكون الموقف اعجبكم

واشكر اخوي السعودي على هالفكرة الحلوة

[فريـــد]

البكيراوي

أمتعتنا الله يمتعك بالعافية

لكن

زوج اختك يقول

تعال تقهـــو عندي ؟؟

وش يقصــــــــــد؟

هو يقصد إنك تتقهوى عنده ..!!

وإلا يقصد إني أنا تقهــــو موجود عنده


وضح ترى صار عندي إلتبــــــاس ..!!

[خـــــــــــــــالـــــــــد]

مواقف تجنن........... تصدقون اول ما قريت العنوان بدت المواقف الظيفه تتهاوش كل وحده تقول انا انا, بس يوم قريت المواقفمت من الضحك ونسيتهن كلهن بس ابتذكر واكتب في المره الجايه.


السعودي محمد المويعزي مت من الضجك الله يرجكم على هالمواقف

[الكيميائي]

مواقف حلوووووه


لكن فيها مواقف اترجينا معها
مثل موقف شواطئ ....

موقف البكيراوي ...

موقف تقهو ...

موقف الانيق ...





الله يعطيكم العافيه

[أبوالوليد]

أما أنا فقد مر علي موقف أن شاء الله أنه ماهو راجع0....


مره أخوي عطاني سيارته عشان أوديها الوكاله طبعاً طريقي من طريق المدينه.

ومركب ثلاثه معي وأمشي 120 يوم وصلت الأشاره اللي تلفبك يسار لحي سلطانه وأعقد...........ححححححححوووووووء.

وادخل حي سلطانه وأعقد عقدتين الثالثه.......بالرصيف..

وأنزل أشوف الموتر خلاص مايمشي أنكسر المقص..

عاد هي كيا .... كوريه..

والله وهجو أخوياي وتركون لحالي وتجي الدوريات ياطويل العمر وتاخذن للقياده..يوم وصلت هناك ويدخلونن على الهباش...

طق طق<............. السلتوح

تفضل<................يحى الهباش

هذا هو طلال اللي مفحط<...............السلتوح

ليش تفحط<.................الهباش

تأ تأ تأ<...............طلال مايقدر إهرج
طقش طقش طقش<................الطراقات من الهباش...


وبعده حرمت أفحط ألا بسيارتي....لأن أخوي بعد طقش طقش طقش

[ابوتركي]

ياحبيلك يالمهندس والله انك أكه

انا مره كنت بالربوه واقف عند محل وقف عندي راعي سيارة شكله جنتل

والسيارة جديدة قالي انا منب من هالديره ومنقطع من البنزين وموال طويل

المهم الزبده يبي دراهم طلعت من جيبي المقسوم وانا مستحي

عقب كم شهر وانا امشي بالعليا على رجليني ولا نفسه ياقف ويظرب لي

بوري جيته وقام يقولي نفس الموال وانا كنت ناسي وهو يتكلم وانا

اتذكر وين شفت الرجال نفس الوجه نفس السياره والبانزين كان مصفر

ونفس الرجال الي كان معه راكب وهو يتكلم وانا استرجع الذاكره الين

قلتله انت الي ذاك اليوم بالربوه ولا امدان اكمل الا هو حاط رجله وفرك

الله لايبلانا,,,,,,,,,,,,,,,,,,,,,,,,,,,,,,,,,,,,,

والقف تحياتي يالغالي:1: