مطــــــــلع الشمــــــس ....

[مَطْلِع الْشَّمْس]

تصدقون أني من زمان ما ضحكت من قلب ...

كل ضحاتي تسميح خاطر أو إبتسامه ما تبين ولا طرف السنون

ما أدري وش متغير فيني .....!!!!

أول من كثر ما كنت راعي مزح و ضحك و هبال ...

كانوا أصدقاي ما يطلعون ألا وهم لازم يتصلون علي أجيهم ...

ودهم يضحكون وينبسطون ...

اما اللحين ,,, تبي تضيق صدرك ...

دق علي و أجيك بهمي و أنثره عليك

إنقلبت 180 درجه ...

صرت بدال ما أحب الضحك ,, صرت دايم مكتم و قافله أخلاقي ...

صرت بدال ما أضحك اللي حولي ... و أوسع صدورهم

صرت أنكد عليهم و أبط كبودهم ...

ما أدري وش اللي قلبني ...

ياليت من يعرف وش العله يتكرم و يعطيني الحل ...؟؟؟

..

[مَطْلِع الْشَّمْس]

^^^^

أيه رجعنا لـ سواليف الحزن و تقليب المواجع

...

خلها بـ القلب تحرق ما بقى :: عادتي ما أشكي على غيري عنـــآي ...

صح لسانك يا عبدالله السالم ....

...

[مَطْلِع الْشَّمْس]

الا به أحد يعرف عبدالله السالم ,,,

اللي أنا ذكرت أسمه فوق ..؟؟؟

هذا سلمكم الله مغني قديم من أهل حايل ...

لكن تاب الله عليه ,,, الله يثبته ...
و الآن هو إمام مسجد في حائل ...

و أشتهر قديماً بـ الأغاني الحزينه اللي تلامس القلب و المشاعر ..

الله يتوب علينا و عليه ...

و كان من الأغاني المشهورة له ,,,

1-

مشتاق لك بس المسافه طويله :: بيني و بينك مقدر آصلك و آجيك ...

..

2 -

ما دريت أنك بحبي مستصيب :: ما دريت أنك معنى في هواي ...

...

3 -

منتاب قد الغلا يا زين و أغليتك :: أغليت حبك و أحسب أنك بتصفى لي ...

...

4-

سافري ,,, خلي حبيبك ينجرح :: دوري ,,, حظك ترا حظي عثـــر ...


.....


.

[مَطْلِع الْشَّمْس]

هو صدز أذن ...

و الله يـ الليل من ذا الين مكه من طوله


.

[مَطْلِع الْشَّمْس]

خـــــــــــــــــــــــــــــروج ......................

[مَطْلِع الْشَّمْس]

صح نسيت أتذكر

...


الذين يشاهدون محتوى الموضوع الآن : 4 ( الأعضاء 2 والزوار 2) ‏مَطْلِع الْشَّمْس

آخر واحد منكم لو تكرمتوا يطفي اللمبات و يفصل الدفايه ...

جايبه معي علشان ندفى بـ الليله الجامده ذي

.

[مَطْلِع الْشَّمْس]

و هذاي رجعت لـ القرق اللي يوجع الرآس ....


,

[مَطْلِع الْشَّمْس]

برد أو أنا بردان ..؟؟؟؟

و الله يـ الجو مهب طبيعي ...

كل شوي أقرب لم الدفايه الين تسوي ركبتي همن أرجع متر ...

همن أبرد و أتزلحف شوي شوي الين أقرب قوة و تسوين ...

و أنط و ارجع

هذا أن دل ,, إنما يدل على أن الجو بارد مره ...

<<< اخس يـ الفاهم

[مَطْلِع الْشَّمْس]

انا ما أرحم الا اللي فقراء و عايشين بـ خرابة

لا بيت يغطيهم و لا غناة تسترهم من عصف البرد ...

الله يرزق كل محتاج ...

[مَطْلِع الْشَّمْس]

شفت أمس برنامج عن فقراء بـ مصر

قسم بـ الله أني خنقتن العبره

فقر و كثر بزران و قل والي ...

و برد عندهم مهب طبيعي ,, هماهم بـ الصعيد ...

و ساكنين بين مزارع

أنواع الصقيع ...

[مَطْلِع الْشَّمْس]

أغدين أروح أدور لي أحد من اهلي يسوي لي كاس زنجبيل مع حليب ...

أو ساده ,,, بس أهم شئ أنه يدفي ...

.

[مَطْلِع الْشَّمْس]

على طاري البرد و الشتاء و الطلعات ...

...

مره طلعنا للبر أنا و أهلي ....

و كان بعز البرد ,,,

المه أنا إستأجرت دباب ,,, و تعرفون كان الجو بارد وما تحس بـ الشمس و لا بحرارته ...

و أقعد لي ساعتين و أنا أدوج بـ الدباب ...

الين تفككت مفاصلي

,,,

عاد يوم رجعت للبيت و من زود الدباشه ...

رحت أتروش على طول بماء حـــــآر مره ...

و أطب سوفليكس خلفي على الفراش <<<< هذي حركات مصارعه

و أنام ذيك النومه اللي ما مثله ...

يوم صحيت آخر الصبح أبي أتوظأ و أصلي الظهر ...

و ما أنتبهت لوجهي

يو مطلعت و صليت ,, كان عند باب المسجد واحد يناظرن !!!!!

أنا أقول و ش يبي ذا ...

المهم طلعت ورحت للبيت يوم وصلت عند الباب ...

و أثاري ولد جيراننا عند الباب ...

ورحت أسلم عليه ...

قال لي : سلامات ,,, وش فيك ...؟؟؟؟

قلت له : ليش ما فيني شئ ..!!!!

قال ليش و جهك أحمر ...


و أجي المس و جهي قلت لا يصير به تلوينه أو بويه ...

بس ما فيه شئ ...

قلت له : أنت صادز أو تستهبل ..؟؟

قال : و الله وجهك أحمر تقل أنك مصخن أو بك حساسيه بخدودك ...!!!

أنا رحت أركض للبيت ...

و الله و أشوف الدعوى زيطه ...

أثاري جبهتي و خدودي كلها حمراء و الجلد متقشع ..!!!!

انا أنهبلت ...

و أاثاريه من الشمس يوم العب بـ الدباب ...

رحت للمستوصف و قال لي الدكتور أنك ما تتحمل أشعة الشمس

عاد جلست أسبوعين عذاب ...

الجلد يتقشع و يتزلغ تقل مسخن على مويه ...

و عقبها تبت ألعب بـ البر بـ الدباب أو كورة ...

الا البس طروش اللي يغطي الوجه كامل ...

أو آخذ كريم واقي عن أشعة الشمس

.

[مَطْلِع الْشَّمْس]

خروووج لكي أتسامر مع الأهل

<<< تذكرت كتاب القرآءة ههههههههه

[مَطْلِع الْشَّمْس]

صباحكم خير يا حبايبي ...

[مَطْلِع الْشَّمْس]

طلعت مع أصدقاي للبر ...

و الله يا هو صريمه

برد يشطب العضم ...

و الله لو أقول لكم وش أنا لابس ...

كان تضحكون ,,, و تقولون جوار و يحب نفسه ...

...

كنت لابس ثوب شتوي و تحته بيجامه ...

وفوق الثوب بلوزه صوف (( بلوفر )) ,,,

و لابس على رآسي طربوش و شماغ عراقي ...

و لابس بـ الأخير فروة

ومع كل هذا ,, بردان

عاد و الله يا أنا أتنافض و دي أرجع للبيت ...

بس جاين معي عيال و ما أقدر أضفهم و هم يبون يقعدون :/

عاد يوم دخلت للبيت و الله يا أنا خميت الدفايه ...

.