السلام عليكم ورحمة الله
كلام طويل شوي وفيه هذرة زايدة...اللي مايبغى يقرا مرخوص..
ياجماعة لماذا يتراجع المنتدى؟؟؟
متى يمكننا ان ننتدي بعيدا عن (تخطيمات )محرري صحف الحائط المدرسية ومذيعي برامج الاطفال الذين لايستوعبون مفهوم الانتداء ؟؟؟
متى يستوعب هؤلاء ان الاختلاف هو مبرر الحوار ؟؟ومتى نمتلك القدرة على تخيل انفسنا كنتاج لافكارنا وتجاربنا وقناعاتنا المختلفة والمتفاوته ثم نتعاطها هنا..ولسنا نتاج ما(ينبغي) ان نكون عليه من مثل عليا ..,متى ندرك ان كل ذلك لا يفسد للود قضية....
مالفائدة اذا حضر الواحد هنا فوجد انه يردد عناوين فارغة وشعارات مثالية فقط ليقول للآخرين انا كويس وحلو وطيوب مثلكم وكلنا حلوين وطيوبين وكل شي تمام...؟
الحقيقة ان اكثر مايصيب بالاحباط هنا هو الطرح حول قيمة يتفق الجميع تجاهها(مثل الصدق الكذب الامانة الصبر الكرم وما الى هنالك من عناوين فارغة المضمون ) ...إذ انها لايمكن ان تكون مساحة حوار....على ماذا نتحاور حولها.؟؟؟هذي اشياء يعلمونها الاولاد في الصفوف الدراسية الاولى لماذا نجترها هنا؟؟؟هل لنقول نحن اهلها ؟؟...
وبالتالي اقول ياجماعة ادركوا منتداكم فهو يواصل التسطيح وتشويه مفهوم الانتداء!!!
عجبا !!!
تخيل مجموعة من الناس قاعدين في مجلس او على طاولة اجتماعات ويتناقشون في الصدق وخيريته!! او في سوء الكذب وقبحه!!! ثم يقول احدهم للآخر شكرا ابو تماضُر على هذه الدرر !!!
بالنسبة لي سأخرج واطقطق نعالي وامشي !!!
ليش يالمبة؟؟
؟أبداً... حامت كبدي وطلعت!!
او تفتح قناة تلقى برنامج عن الكذاب !!وفي آخر البرنامج يقول المقدم : وشفتوا ياحبايبي ياحلوين كيف أكل الذيب الكذاب ولا ساعدوه اهل القرية وعشان كذا كلنا لازم مانصير كذابين عشان الذيب مايكلنا !!!
المشكلة في كل مرة يطرح هنا شيء جيد وساخن وواقعي ويلامس الحقيقة تحدث اشياء غريبة!!!! ...
اولا تكثر المعرفات البديلة!!!وهم نفس اصحاب الامس حقين المثل العليا...
ثانيا يحجم الكثير من المعرفات كثيرة التواجد عن التداخل !!!! طيب ليش انخرست هالحين؟؟؟يعني توحشت من السالفة وصار معرفك خيخة!!! ؟ أو يوم شفت فيها هوشة قلت خلني اتفرج وش يسوي فلان بفلان وفلانه بفلانه ومن اللي يفوز؟؟؟!!! أي يفوز وينهزم ؟؟هي مضاربة وإلا حرب ..!!هذا حوار ...تداخل فيه بكل ارتياح وقل ماتعتقد حتى لوكان لا يعجب احد ....
وليش المعرف البديل؟؟؟يعني يوم صرت على المحك راحت الاخلاق مع المعرف ذاك وجيت بهذا المعرف عشان ما احد يعرفك!!!! تلعب على مين انت...؟؟؟ انت تلعب على نفسك فقط!!!لأنك كذاب !!! بدليل إنك احد هالمعرفات اللي مشخصة في المنتدى وقاعدة تردد كلام حلو ومثاليات ..!! ويوم جاء الصدق طلعت على حقيقتك يبو اخلاق جنان !!ادخل وقل اللي تبي بمعرفك الاساسي !! واللي بيزعل منك يطق في راسه الشاشة !! .........وانت اذا بتزعل طق في راسك الجدار...
وكله كوم وتداخل مشرف غبي سامج ولايفهم شي كوم !!!
تقول له ليش يابابا حذفت وشلت وحطيت واغلقت ؟؟؟
يقول مايصلح كذا!!! يجب علينا ان نكون كذا وكذ وكذا !!! ثم يهذر بقائمة المثاليات والقيم الجميلة حقته اللي حافظها من آخر برنامج اطفال شافه. وصفوا طابور وصيروا اصحاب وحبايب وحلوين..مانبغى احد يطلع عن الطابور!!! الللي له كرش يشفطها !! علشان مانتفشل في الشبكة...!! واللي فيه عرج يعدل مشيته ويظهر كأنه سليم عشان مايختل طابورنا الحلو..!!!.....طيب يا ابن الناس احنا (مــــــــــــــــش) كذا....!!! صح المفروض نكون كذا بس احنا مش كذا!!! صح ودنا نصير كذا بس عاد الشكوى لله ماصرنا...!!
واللي يقول غير الكلام اعلاه يكذب..!! ايه يكذب !!!
لأننا في حياتنا العادية مش كذا ..يعني مش كلنا طابور صاف مايختلف عن بعضه..!!لاننا في حياتنا العامة مش كذا!! وهذا واقعنا عبرنا عنه في هذا المتصفح او ذاك وجاء واحد مايدري وش السالفة وخاااااااااااطم وقال وهو وينه عند روحه: لاااااااااااااااا
لا ياشباب هذا لاينبغي ..!! نحن نريد كذا وكذا...ومن انت اصلا حتى تريد كذا وكذا؟؟؟؟
اذا عندك وجهة نظر عبر عنها بمعرفك كعضو...واذا ماعندك شي لاتخطم على الناس ...واذا تبي تأدي واجبك الاشرافي راجع الردود واللي فيه مخالفة للقانون شيله ..!!! أو عدل فيه !! وانتهى دورك هنا وانت ساكت ولا لك علاقة بالمضمون المتباين في الرأي وطبيعة الاتجاه...
!! انت ايش حشرك وخلاك تلمس المتصفح مادام الدستور لم يمس !!! ؟؟
يقول ما ابغى حزازيات بين الاعضاء!!!!!!!!!!!
ماتبي حزازيات بين الاعضاء؟؟؟؟!!!!!!!!
الله اكبر ..وانت ايش دخلك !!! ؟؟وانت مصدق انك كذا مابتسوي حزازيات ...!! والله انك من هنا وفهم الحوار من هنا...
عيالك هم والا عيال اخوك ؟؟؟ والا طلاب في فصلك !!!هذا منتدى ديرة طويلة عريضة فيه آلاف المعرفات ..وآلاف الأمزجة وآلاف الطباع والخصائص والفروق الفردية..!!
يعني مصدق عمرك انت يوم تعتقد انه يمكن ان يتوافق الناس على غير المثل العليا..!! يعني نبتل نحكي عن الصدق والامانة والكرم وكل واحد يقول للثاني صدقت وسلمت يراعك وهالخرابيط!!
وبعدين اللي بياخذ حزازيات بكيفه !!! خله يحط حزازيات إلين يطق ظهره..!
واللي مش عاجبه ان الحوار ما جاء على مزاجه خله يطق براسه الجدار ..!! انت لست عليهم بكفيل!!!! والذين تحدثوا مادام لم يخرقوا الدستور تقعد ساكت وإلا تتداخل كعضو مثلك مثل غيرك .....واللي انت قاعد تقول لهم مايصير ومانبغى كذا هذولا هم فاهمين القانون والدستور اكثر منك !!
بعيدا عن هذه الجزئية بقول سالفة على انكشاف زيف المثاليات الرخيصة عند أي اختبار ممايدل على انتفاء قيمة نافعة من ترديد شعارات المثل العليا...
خوذو هالنكتة
واحد منزل في هالمنتدى 4 الاف موضوع عن الاخلاق والصدق والامانة والخير والطيابة والحبابة وذم الحقد والشر الحسد والكذب وما الى هنالك...
المهم مرة نزل موضوع وصار عند اخوكم لمبة شوية سوء فهم وعباطة من عباطتي المعتادة!! قلت له ياحبيب يالبيب مالها داعي الشدة!!
انفجر علي من أول رد وماخلا فيني شي إلا وشتمه !! <<<<<عادي الشتم بالنسبة لي لأنه نجاح في التقاط الحوار الحقيقي الذي يعبر عن ماهية الناس بعيدا عن التواري خلف عناوين رنانة وبنطات براقة.. وبغض النظر عن كون ذلك العضو لم يجد غير الشتائم عندما صار على المحك..انا لا اعترض على الشتم ليس لأن الشتم محمود بل لا اعترض عليه لانه يعبر عن الذوات الحقيقية بكل بساطة أما الشتم فهوليس مسؤوليتي بل مسؤلية المشرف المناوب ولا يعنيني بشيء حتى لوصفني بالكفر والالحاد فذلك خرج من كي بورده هو ...((الله يذكرك بالخير يا ابراهيم الفقي))
المهم قلت له..:
أفااااااااااااااااا
طيب ليش كذا ياطيب ياخلوق؟؟؟
افرض اني انا صرت شرير وسيء وغبي وقبيح وفهمت غلط !! يعني اخلاقك اللي منزلها وتحث عليها بـ 4000متصفح ماشفعت لك الحين انك تصير حليم صبور وتتحملني شوي ؟؟؟او تشرح لي بشوية حلم وتتجاوز دباشتي!!!
أنا لا أقول ذلك كتأييد للشتائم أنما اقوله كمثال على انعدام قيمة متصفحات الانشاء والمثل العليا في تهذيب سلوك الناس هنا..
ويجيك ثاني يقول لك عيب ...مايصير !!! العالم يتفرج عليكم لا تسووون كذا !!!
طيب عاد هذولا حنا على قولة نقد التعليم الله يمسيها بالخير !!!! اذا شافونا العالم كذا فإحنا كذا!! يعني ازور نفسي واتجمل على البطال؟؟!!!
اللي ما اعجبه الشيء اللي يقول عنه عيب بإمكانه انه يرد عليه ويحاوره....هنا لايوجد غير الحوار...لا يوجد املاءات من أي نوع!!!
اللي يبغى يملي يروح يملي على موظفينه وفي اطار الوظيفه فقط....
مش احنا نتاج طبيعتنا..ونتاج تكويينا الثقافي والاخلاقي والايماني .؟؟؟
يالله خلي الواحد يستعمل هذه الساحة الحوارية إما لأثبات صحة نتاجه أو لاكتساب نتاج آخر....
وكل ذلك لايتم إلا عبر الايمان بهذه الساحة كساحة حوار وليست ساحة انزراق وتميلح عمال على بطال...
او لا زم الواحد يتظاهر ويتميلح ويبتسم عشان الصووووووووورة تطلع حلوة في البومنا الحلو المزخرف بالورود اللي على شبكة النت؟؟؟!!
ينعل ابو الصورة اللي الواحد بيشخص ويكرب وجهه اربع وعشرين ساعة عشان تطلع حلوة...اما احنا فننطق عشان سواد عيون الصورة المزيفة المزورة التي اراد الجهل بمفهوم الانتداء ان تكون حلوة!!!
وتلقى المتصفح اللي يلامس الحقائق ينفتح باليوم الف مرة!!!
لأن اللي فتحه وتابع اللي فيه يشعر انه يمس شيء حقيقي ...وإلا وش يخليه مسنتر في ذاك المتصفح دونا عن غيره...مش واحد ولا مية !! كل المتصفحين تلقاهم هناك ..!!
والسبب انها تصفحات حقيقية والناس ملوا من المتصفحات الكربونية من بعضها
لا استبعد حظور قصير نظر يأتي ليقول هنا :يالمبة انت تريد ان تجعل الساحة مكان لتبادل الشتائم والسباب!!! وطبعا من الوارد جدا أن يأتيك احد ليقول هذا الكلام الصفيق...وهنا اقول له..
يا ابني هل الدستور يسمح بالشتائم والسباب؟؟طبعا سيقول لاء...وعندها أقول له خلاص ياسيدي اعمل بمقتضى الدستور وانتهينا !!!ولا عمركك تتدخل في اتجاهات الحوار وطبيعة الآراء التي تعبر عن المعرفات...
على كل حال لن اكتب المزيد من هذه السطور ...إن وجدتُ تفاعلا فعلى حسب التفاعل يكون التداخل ...
وقمة الاحباط ان يجيك احد ويقول (شكرا على هالموضوع).....!! ويييين اي موضوع يا ابن الناس !!!هذا ماهو موضوع هذا شأن منتدى يتعلق بترك الابتذال والتمثيل والصفصفة.. انت في وادي واحنا في وادي !!
كل الدنيا عندك مواضيع؟؟؟ رايحة جاية رايحة جاية !!!
يا خي تعال اهرج قل شي بس حافظ على الدستور وابدا ماراح يزعل منك إلا الغر اللي مايدري وش السالفة وآخر ماله بيتعلم ويفهم...والا يطق راسه بالجدار...
كتبت هذه السطور بعد ان قال لي راشد قبل بضعة أيام أنه اصبح لايتواجد هنا بعد تسجيله في الموقع الجديد اياه...جلست أتأمل فاكتشفت انني امارس نفس فعله دون ان انتبه...والقصد من هذه السطور هو الاخلاص لهذا المنتدى...
العرض الشجري