قـفـــــشات !! رائــــــــعه !!

[البكيراوي]

السلام عليكم ورحمه الله وبركاته ,,,

تحية طيبة للجميع ........!
واسعد الله اوقاتكم بكل خير .......!


هذه مجموعه من الطرائف اللي سمعت واعجبتني حبيت اني اسمعه لكم !!


وعنونته بـ (( قفشات )) مهب فقشات انتبهو !!

============================================

القفشة الاولى [/c]

هذا واحد من اهل القصيم جذع راح للحجاز يبي يطقطق بالتجارة يبع ويشري تخبرون اول اهل نجد داقهم الجوع.........!!

المهم راح للحجاز واغناه الله واستاسع صدره هناك يبيع ويشري ما عنده خلاف !!

وبدا يرسل لاهله مراسيل انه مستانس ومبسوط وامور مستورة !!

والرجال انشغل بتجارته واشغله ولهى عن اهله صار ما يجيهم ولا يسير عليهم !!


وانشغل بال اهله وابوه عليه !!

وبداو الناس يحكون يقولون انه فلان تغير يوم راح للحجاز وانه تطبع بطبعهم !! واخذ من عاداتهم واطباعهم وانه صار بعد ياكل معصوب ويشرب شيشة !!

واهل القصيم ما يعرفون المعصوب !!

ويوم سمع الابو هالكلام !! وكثر وانتشر على ولده !! ضاق صدره وما صبر !!

قال ما فيه الا اروح لمه واناظر !! وش عند الولد !!

والله ويشد الرحال ويمشي للحجاز !!

ويوم وصل لولده لدخل عليه وكان الوقت ليل !!ومير يرحب بابوه ويطير به من الفرحه !!

ويعشيه وينام عنده !!

ويوم اصبح الصبح !!

ويناظر الابو ولده والا هذا هو !! ما تغير قال خلن اشوف واقعد عنده كم يوم !!


وهو جالس يحكي روحه الابو قاله ولده هاك الفطور يبه !!

ويدق والله من هالفطور ويجوز له فطور ولده !!

ويقول له يا وليدي !! وش هالفطور !! وش اسمه ذا !!

قال هذا المعصوب يببه !!

قال هذا المعصوب !! قال ايه

قال اجل هات الشيشة !!

=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=

القفشة الثانية [/c]

هذا رجال حكيم !! عنده كومه عيال ما شاء الله تبارك الله !!

المهم هالعيال كبروا وصلوا حروة العرس !!

والابوا يلمح لهم بالعرس من اللي يبي يعرس !! ولا احد بدا بالهرج !!

قالهم مرة !! اسمعوا الي يبي يعرس منكم اذا جاء الليل يحط بشته على الدرجة !!

واذا جاء الفجر اشوف انا منهو بشته واعرفه !!

ويوم جاء الفجر ويلقى البنت حاطتن عباته !! هههههههههه


=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=

القفشة الثالثة [/c]

وهالسالفة صايرة بالقصيم مبطي كان بُــه اثنين من الشباب شياطين وبهم عياره بعد المهم هالاثنين راحوا يبي يتغدون عن راعي مطعم يماني وكان داقهم الجوع دق ..

بس المشكلة انهم مطفرين ما معهم ولا فلس ‍

المهم راحوا وطلبوا لهم نفرين رز ومعه دجاج يحبه قلبك

وبدا يدقون من هالرز البخاري والدجاج عاد معروووووووف رز اليماني ما يحتاج

المهم يوم جاء الحساب ويروحون لم اليماني ويتعازمون !!!!!!!!!!

كل واحد ماسك مخباته ويقول والله ما يدفع الا انا

وبدا يتهاوشون وطلعت اصواتهم الى اخر الشارع .............!

وباخر شئ قالوا لليماني اسمع !!

نب نقول لك حل زين .......!

قال يالله هاتوا خلصونا لانه ادبلت كبده منهم ساعه وهم يتهاوشون على الحساب

قالوا نبي نتسابق الى اخر الشارع روحه ورجعه واللي ياصل الاول هو اللي يبي يدفع

قالوا زين !!

قال اليماني زين وانا حكم بعد !!

ويبدا يعد لهم

واحد


اثنين


ثلاثة



ويروحووووووووون ما يشوف الا غبارهم

=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=

اتمنى انه هذه القفشات او الصيدات اعجبتكم

واللي عنده زود لا يبخل علينا



تحياتي لكم جميعا :1: [c]

[أبو بسام]

صراحة قفشاتن حلللووة بالحيل



وصراحة يوم قال: فين الشيشة......






وودي احط كم قفيشة بلس ما يحظرن الحين ولا شي ....غدين لامني تذكرت قلتهن

[المعيد]

إيش هالقفشات يالبكيراوي

وأحسن شي منها برأيي حطت العباة .

وعلى فكرة كثير من هالبنات اليوم ودهن يحطن عبياتهن .

لكن ما أحد قالهن من وده يعرس يحط لي بشته .

ما تلاحظ إن السؤال للعيال . يعني يستحون اكالوقت .

خذ هالقفشة على طاري القفشات

يقولك ..... هذه عجوز من عجز القصيم راحت تعتمر .

يوم خلصت عمرتها ونوت ... ترجع لبيتها وعيالها .. وكانت من العجز الهاي .

راحت لمحل النحاس وضفت له كم قطعه من هالنحاسيات .. اللي يلمعن ويبرقن برق ..

رجعت للبيت .

وبدت تحط بكل ربعه من زوايا البيت قطعت من هالنحاسيات

وبدت بيتها تلق لق من هاللي يبرقن ...

جا ولدها !!!!!!!

وشذا يمه = وشرايك يالويدي بالمزهريات هاللي يلمعن ...

صاح الولد قال لالالالالالالالالا يمه ذولي حقات الشيشه .اللي يبربرون بها أهل الحجااااااااااااااااااااااز

ضفتهن العجوز وبالزباله .




شكرااااااااااااااااااااااااا

[البارق]

قفشات حلوة يالبكيراوي00
وخاصة راعي المعصوب00
تسلم اخوي وألف شكر لك00
ونستنا بهذه القفشات00

ولك خالص التحية والتقديـــــــر000

[حامل المسك]

[gl]حبيبي البكيراوي[/gl]

قفشات ولا اروع فشقت بطني من الضحك

بس تدري إني إستنتجت أشياء من هالقفشات...(( والله مادري منين طلعت كلمة قفشات ))

يالله ما علينا نرجع للإستنتاجات:

القفشة الأولى :بداية دخول الشيشة والتتن بأنواعه ومشتقاته لبلدنا النظيف بريدة والله يجازي اللي كان السبب :3:


القفشة الثانيه:بداية معرفة كلمة (( تحويله ))


القفشة الثالثه:دليل على تميز أهل بريدة بالذكاء عن باقي البلدان ودليل على وضع البعض من أهل بريدة ــــ لاحظ البعض ـــ لهذه الميزة في غير محلها.

شكرا لهذه الروائع يالبكيراوي

[البكيراوي]

الاخ العزيز _ابو بسام _

حياك الله يا الغالي

و غاية السعادة اني أراك متواجد معنا وسعيد بما أكتبته


هلا بك يا الغالي وبانتظار قفشــاتك ..........!



========================
تنبيه بسيط اخي

لم أقصد في القصة الاولى التهاون في شرب الشيشة ولكن الذي اذكره ان الاب من فطرته وحسن نيته لم يفرق بين المعصوب وهي اكله شعبية وبين الشيشة فقط شاكر لك تلميحك .

[البكيراوي]

الاخ الغالي والعزيز _ المعيد _



هلا بك اخي اخوي وما شاء الله عليك عرفت تختار

وتبي الصراحه انه قفـشك اللي قلته غطت على كل قفشاتي

اجل هالعجوز يا حول موزعه رؤوس الجراك بالغرفة وتقول لولده وش رايك بالمزهريات ههههههههههه

تسلم يا عزيزي على تواجدك ومشاركك وما قصرت

[البكيراوي]

اخي العزيز البارق .........!

حياك الله يا الغالي

واكتب لك ليل ونهار اهم شئ اشوفك مستانس يا اخوي .!

وما شاء الله لو ما يجي منك الا توقيعك اللي يزن المشاركة ويخليه تهبّـل ......!

تراي قلت ما شاء الله هههههه

وتسلم

[البكيراوي]

الاخ الغالي والحبيب _حامل المسك _

اخي لا تعلم ما مدى فرحتي وسعادتي بتواجدك معي ..

.

وإستنتاجات رائعه منك وليست غريبة عليك فأنت أهل لها

لكن اخي الحبيب

انا فهمت الاستنتاج الاول وكان واضح

لكن الاستنتاج الثاني

والاستنتاج الثالث يا ليت تقول لي من اي قصة استنتجته


وبالنسبة للقفشات منين جت

القفشة من قفش الشئ يعني مسكهُ

يقول يا فلان اقفش لنا يعني امسك لنا او صد لنا

للمزيد من التفاصيل اسئل تقــهو !!

وحياك الله يا اخي الغالي :1:

[حامل المسك]

عزيزي البكيراوي

الاستنتاج الثاني يعني تحويله أي يايبه حول هالطريق ــ طريق العرس ــ من العيال للبنات.

الاستنتاج الثالث من هالشابين اللي داجين فالحاجة أم الإختراع احتاجوا وشغلوا مخهم بس على غلط.يعني على سرقة هاليماني وعدم دفع قيمة البلعه

[البكيراوي]

الاخ الغالي والحبيب حامل المسك !!!


اشكر لك توضيحك يا الغالي !! وإستنتاجاتك زادت حلاوة الموضوع !!

تسلم يا الغالي

واعتذر عن التأخر في الرد عليك

[صقار]

البكيراوى......
تحية لك..
تحية لفقشاتك.... قصدى قفشاتك... عجاز عجزن يغيرة..


فى رواية اخرى...
ان العائلة من القصيم والابن سافر الى الرياض...
فسمع الاب ما سمع عن فساد ابنة..
فلما زارة..
....
...
.




فى اليوم الثانى..
وبعد تناول الفطور..
قال الاب ما اسم هذا الفطور قال الابن هذا / فول..
قال الاب ... اذا كان هذا الفول الى يقولون..





قم ياوليدى عطنا التتن..
.


قمة الطيبة وطهارة القلب.... قبلة على جبين هؤلاء الرجال...


لك وللجميع تحية...

[البكيراوي]

أهـــــــلا بخالي صقار

توه تنور المشاركة يوم جييييييييت !!


وروايك اللي تقول كد سمعته !! وسمعت هالرواية اللي انا قلت !! والله اعلم بالصواب !!


بس اثر عندك سواليف طيّبـة

عطنا من سواليفك وقفشاتك !!

وحياك الله

[كرباج]

هلا بالشايب

اجل يقول هاااات الشيشه وعلى نياتكم ترزقون اقول

الله يرجك يالبكيراوي انت سواليفك الحلوه اللي مثلك

وبعدين تعال تراك كنت مواعدني قبل رمضان اننا نبي نجمعلنا كم شايب

باستراحه ونبي نستانس عليهم وقايلك على العشاء وانت عليك الشيبان

<<---- تراه ماينسى بعير مغطين وجه بكيسة رز ابو بنتين

اشكرك على القفشات الحلوه ياحلو


تشااااااااااااااااااااااااااااااو

[البكيراوي]

هلا والله وغلا


صدق اثرك بعيييييير ما تنسى !!


وانا على الوعد !! بس انت ضبط الاستراحة والعشاء !!

وانا علي المعازييييييييييم !!

ايه وش تبي بعد !! تحسب جيبه الشيباااااان سهله !!

يبي له قردنه ساعه وحبه رااااس وامووووووور واجد !! ماتصلح تنقال


وهاه اشهدوا عليه يا الربع !!

علشان ما يقول عقب البكيراوي اخلف الوعد !!