فز الخفوق وقلت يالله عسى خير
أثر الليالي عاد غايب قمرها
مع شوفته نشوه وفزه وتخدير
وعيون خلان تعانق نظرها
يفز له قلبي كما فزه الطير
والرجل كن الليالي تحتها غدرها
ياصبح عمري ياصباح التباشير
نوره ملا قلبي وروحي غمرها
عقب الفراق اللي تعدى المحاذير
يبس غصون القلب جافي دهرها
ربع بروحي عقب ماهي معاسير
سحابه هلت بقلبي مطرها
واسقى بها زرعه هوانا بتقدير
غراسه غرام بالمحبه بذرها
ياعاذلين العين والله مخاسير
واللي درى عن حال عيني عذرها
تشوم عيني عن جميع الغنادير
وإن ناظرت عيني فؤادي نهرها
ياناس أحبه والمحبه مقادير
هذا هوى نفسي وهذا قدرها
والحب ماله ياهل الحب تفسير
قلبين والله بالمحبه أمرها
لا جيت أصورحاله الحب تصوير
وأرد عن حالي لخلي خبرها
لقيت وجدي فوق كل التعابير
كل الشعر قطره وشوقي بحرها
العرض الشجري