البــيــوت والجــامعات مـليــانة بـنــات وش تـتـوقعون لهن بـعـد عـشــرسـنوات ؟؟

[راشد الصليحان]

ياناس وربي انا مذهووول من وضع بناتنا الله يستر عليهن

البيوت والمدارس والجامعات مليانة بنات عوانس ومطلقات وأبكار

والمجتمع للحين متمسك بعادات واهية وبالية ..!
انا خايف من إنفجار بالون البنات هل انتم مثلي ؟؟
طبعاَ (العاداتيون ) ماودهم طرق هذا الموضوع لأنهم السبب الأول والأخير
في تكديس بنات المسلمين

اطرح سؤااال عريض طويل
وش تتوقعون يصير للبنات بعدعشرسنوات؟؟
فيه حلول ؟ اوهناااك إنفجار بالون

انتظر توقعاتكم بامانة..فالمقصد وربي نبيل

ربي يحفظكم

[فور يو]

اتوقغ يحدث انفجار هائل بسبب بوتقه مليئه بالدخان والأتربه الجوفيه المنهاره من السحب الركاميه ....

ما سبق ممكن يطلع علينا (( محلل استراتيجي )) في علم الإجتماع ويتكلم بكلام غير مفهوم ...!

للأسف اخي الكريم راشد مازال المجتمع بمسئوليه يخططون للمدى القريب فقط والخطط الإستراتيجيه الحكيمه على المدى البعيد

مفقوده ومنسيه ...!

تبي الصراحه اتوقع ان البنات هن اللي بيدفعن المهور على شان الرجال يرضون بهن ...

[the-moon]

راشد
وش هالثوب الفضفاض
أنا معك الظاهرة موجوده
بس حبيت افهم وشي العادات اللي تسببت بهالشيء
أهم شيء لا يصير تقصد مسألة النسب
والله حبيبي المفروض يكون فيه تنازل
لكن كل فرد وعائلة يبون الآخرين يتنازلون وهم يبون ياخذون حقوقهم كامله
هذانا حنا يالعزاب مالين البر والبحر واللي صادق يزوجنا

[التلميذ]

الصراحه اول شيء النسب ثاني شيء المهر اللي يهد الحيل وثالث شيء ان اللي يصير هذا من علامات الساعه وذكره الرسول صلى الله عليه وسلم معنى الحديث انه اربعين امراه تلحق الرجل الواحد تطلب الزواج. والله يستر على بنات المسلمين واهلهن يتداركون الوضع ويتركون العادات اللي ماله داعي واشكرك اخوي راشد على الموضوع الحساس.

[$$ صقر نجد $$]

مشكور اخي على الموضوع الحساس

المشكله الكبرى برأيي انها غلا المهر وارتفاع الاجار
وتدلع البنات تبي على مواصفات الخيال
ومااقول الى الله يستر بعد عشر سنين وش يبي يصير للبنات؟

[راشد الصليحان]

اقتباس:  المشاركة الأصلية كتبت بواسطة for you     اتوقغ يحدث انفجار هائل بسبب بوتقه مليئه بالدخان والأتربه الجوفيه المنهاره من السحب الركاميه .... ما سبق ممكن يطلع علينا (( محلل استراتيجي )) في علم الإجتماع ويتكلم بكلام غير مفهوم ...! للأسف اخي الكريم راشد مازال المجتمع بمسئوليه يخططون للمدى القريب فقط والخطط الإستراتيجيه الحكيمه على المدى البعيد مفقوده ومنسيه ...! تبي الصراحه اتوقع ان البنات هن اللي بيدفعن المهور على شان الرجال يرضون بهن ...

اخي فور يو

لن تكون البنات وحدهن من يدفع الثمــن ..إذا استمرت الأوضاع تسير على مانحن عليه الآن ...!

بل المجتمع برمته ..سيكون ضحية للتجمد الإجتماعي إزاء التحولات التي تموج بنا ..!

فما يحصل ..نتجاهله ولايوجد سو إطلاق الشعارات ..(حنا أحسن من غيرنا )

اللهم ألطف يارب ...

شكرا لك ..

[جلوي العتيبي]

الله يستر ياراشد

بس منهم العاداتيون!؟

المشكله تكمن في عزوف الشباب عن الزواج وغلاء المهور أما الأمور الأخرى فأظنها أشبعت نقاشاً

شكراً لك

[مياسة]

مثل ما البيـــوت مليانا بنات .. بعد مليان شباب ..
يعني هد اعصابك يا راشد محد بيضــيع رزقه ... ربي ما يخلق ويضيع

وكلا له مكتوبه الي بيحصله مهما كان
لكن مساله العادات والتقاليد .. ايس منها .. ولو بعد سنوات وسنوات

[لمبة شارع]

لا أدري ياراشد...!!

كثيرا ما اقلق كلما تأملت المشهد...

والحمد لله الرؤوف الرحيم..

[هين هين]

انا اقلك السبب ياراشد حسب معرفتي المتواضعه

هناك عدت اسباب

1- البنت
2- الشاب
3- الأب
4- الأم
5- المجتمع

1- البنت السبب الرئيسي في تكدسهن في البيوت والحجج الواهيه

البنت ابي اكمل تعليمي الجامعي

ما ابي اتغرب ابي ديرتي

وين يشتغل وكم راتبه

ماابي اسكن مع حموله ابي بيت لحالي

امه حيه

اسمه شين

شعره عكاريش
وخذ وخل من الأعذار

الشاب
ابي بيضه ونحيفه وطويله وجميلة وشعرها ناعم ... صعب تجتمع

ابيها صغيرة وموظفه ... مدري شلون تيجي

ماابي من الأقراب

مابي اتزوج هلحين

العرس مسؤليه

يبيلي كم سنه اجمع روحي

وخذ من الشروط والأعذار

الأب منهي بنته ؟
بنت ابوفلان لالالا مايصلحون عمها اقشروالعرق دساس
وذولا ماهم من ثوبنا ولاحنا منثوبهم ... المسئله ثياب ومستويات

وهالعايله فوق شايفين ارواحهم... حرنابك

الأم

امها عقرب

اخاف بكره تطلع هدب عيون وليدي
البنت ماتعرف تطبخ يوقولون شغالتهم هي يلي تطبخلهم
وذولا بنتهم عصلا
وبنت فلان امها اجنبيه.. سوريه مدري مصريه غير عاداتناوتقاليدنا ماتصلح

وياكثراعذار الأم

المجتمع

هاذا حاجر على بنت عمه ... يعني ملكه

هاذا خطه غيرخطنا ... الدعوه كهرب

وهذا قبيلته معاديه قبيلتنا من قديم الزمان... يعني ايام داحس والغبره

هذا بااختصار شديد ياراشد على موضوعك الشائك

لك تحياتي

[مرأه من الشرق]

اولا : يا اخوان تفوق عدد النساء على عدد الرجال متلازمة دولية تعاني منها دول العالم اجمع بنسب متفاوتة !..
في ابريطانيا مثلا بلغ نسبة النساء للرجال اربع مقابل ذكر واحد !..
المضحك في الموضوع انتشار عادة عند البريطانيات تتمثل باصطحابهن كلابهن الى الحدائق العامة لجذب انتباه الذكور الذين يمارسون رياضة المشي !..


اما ما يتعلق بمجتمعنا المحلي فأن زيادة عدد النساء لا يعتبر مشكلة تحتاج الى حل على العكس من ذلك .. لان النساء تمثل ايدي عاملة قوية قادرة على البناء و التطوير و من الواجب علينا استثمارها بدلاً من اثارة الشكوك و المخاوف من كثرتها !..

فالمرأة السعودية اثبتت تفوقها على الذكر من الناحية التعليمية ... و ان كان هناك امتيزات اضافية يتميز بها الذكر ... الا اننا لا نستطيع انكار قدرة المرأة على العطاء في بعض المجالات التي تتناسب مع قدراتها و بتالي اعتبارها ثروة بشرية وطنية كبيرة و قادرة على العطاء و عن طريقها نستطيع تحقيق السعودة باعتماد اسواقنا على ايدي محلية !..

اما اذا كان مخاوفكم تتمحور حول مستقبل استقرار المرأة الأسري...فعلينا الايمان بأن النصيب من السماء !..يعني كل واحد بياخذ نصيبه الي الله كاتبه له !...

تحياتي ،،،

[لمبة شارع]

إنالله وإنا اليه راجعون!!!!


جت ام الدواهي ناسيتن البقشة!!!

اقتباس: بل تمثل النساء ايدي عاملة قوية علينا استثمارها بدلاً من اثارة الشكوك و المخاوف من كثرتها !..

بل تمثل النساء زوجات تعدد على كتاب الله وسنة نبيه بدلا من مناخ العمل المختلط الذي تهدفون اليه ايها العلمانيون المارقون....

[شمعة امل]

أهلاً بك أخي راشد .........موضوع حساس جداً

بما اني أشكل هذا الفئة التي تتحدث عنها وهي الفتيات .......راح اتكلم عن وجهة نظري

بالزمن هذا لابد لأي فتاة واللي انا منهم تتشرط ووتتطلب لانه مافيه شاب بالوقت هذا يستحق انك توافق وانت مغمض طبعا لن اعمم بكلامي لكن للاسف الاغلبية منهم ...

طبعاً تبي تقولون اني جالسة اكابر بكلامي واني جالسة اتمنى يجين الرجل اليوم قبل بكرى....مابي اكذب اتمنى هالامنية ولكن مع ذلك لن

اتنازل عن شروطي ومتطلباتي....

يعني تعال وشوف فضايخ اللي يخطبون عشان تعذر الاهل اذا بدو يتشرطون ويطلبون.....

اللي للأسف جالس يدور على فتاة وكأنه للأسف جالس يدور على وظيفة!!!! ....والادهى والاعظم انهم اللحين تطورو وصارو مايبغون

مدرسات البند يبغون وحده رسمية...

لاتخاف اخي من انفجار بالون البنات لانه ماراح يصير ابد بأذن القادر ..البنات اللحين اغلبهم متعلمات ومتثقفات وطبعاً ماراح يقبلو بشاب اقل منهم علم وثقافة وطبعاً قبل كل شي الدين!!!!

البنات قبل كانت طموحه بسيطة و تتباهى انها متزوجة لانه هذا طموحه بس!!! لكن اللحين وبالزمن هذا صارت البنت تتباهي بأشياء ثانية

بأشياء صارت لها سلاح تتسلح فيه بالحياة....

وشي ثاني اللي يشوف حال المتزوجات حالياً والمشاكل اللي صايرة بسبب جبروت الرجل ((وتفرعنه))>>أعذروني على الكلمة

طبعاً راح يخلي اي بنت تكره شي اسمه زواج ويخليها تفكر الف مرة قبل ماتقبل بالرجل!!!


وكمان الاباء اللحين اصبح تعاملهم مع بناتهم ارقى من زمان اول اللي كانو يخلون البنت كل تفكيره بس متى تطلع من الجحيم اللي عايشه فيه.!!!!الاب صار اقرب الى قلب ابنته من السابق...صار هناك تعامل خاص للبنات هذا التعامل يخلي البنت تفكر بالزواج مليون مرة عشان بس ماتترك النعيم اللي هي عايشه فيه!!!!!

يعني بالزمن هذا الخوف هو بس من انفجار بالون الشباب والله يستر!!!!

أخي راشد شكراً لك على هذا الطرح المتميز..واعذرني على تداخل الافكار بس اتمنى تاصل الفكرة

.

.

مع خالص الود والاحترام

[عيون الصقر]

مع احترامي لك يالمبة شارع لاتزال تحمل رهاب تقدم المرأة في المجتمع وتخشاه لاتخافون ماراح تطردكم المرأة وتستبدلكم بالسوري والمصري اذا اخذت مكانها على الساحة بما يتوافق مع امكانياتها فما تزال طاقة مهدرة ومن الظلم ان تبقى كذلك.

[المتزن]

تبي توقعي يا راشد ؟؟

أتوقع والله أعلم أننا سنرى خادمات سعوديات .. وسنرى دعارة مقننة ومادية قبل أن تكون عاطفية كما هو الحال الآن .. وربما نرى انتشاراً للتعدد وزواج المسيار أو بالأصح زواج فرند لأننا حينئذ لن نجد المرأة في بيتها تنتظر زوج المسيار بل ربما هي تذهب له !!

ممممممم .. وش بعد ؟؟!!

أظن يكفي توقعات .. صح ؟


الله يستر علينا وعلى ذرارينا .


وتقبل تحياتي 00
المتزن