【:::عَلَى كَفْ اَلْزَّمَنْ ,, حَفَرْتْ اِسْمِيِ ..

[جمان البحر]

اقتباس: الذين يشاهدون محتوى الموضوع الآن : 3 ( الأعضاء 3 والزوار 0) ‏جمان البحر , ‏ابوراشد..

ياحيا الله الموجودين ..

شكل أبو راشد فتح مدونتي وراح يصلي التراويح ..
من زمان وهو بذا ..

[جمان البحر]

الثمره الي في الصفحة السابقة هي ثمرة الفستق ..

بصراحه انبهرت كثير يوم شفتها .. ماتوقعت الفستق كذا ..

على اننا رحنا لسوريا من قبل كذا مره لكن ماعمرنا رحنا حول مدينة حلب وهالمزارع تابعة لحلب ..
هذا هو الفستق الحلبي الي ينباع بالاسواق ..


فديكا هي الي جاوبت على السؤال .. وماشاء الله عليها جاوبت صح ..

[جمان البحر]

قبل لا أنزل الصور وأتكلم عن مواقفنا ورحلتنا فيها ..

راح أذكر بعض الأمور الهامه لأن فيه ناس أرسلوا لي يقولون يبي يروحون لتركيا من بعد ماشافوا الصور ..

في البداية لازم تحط ببالك قبل لاتسافر الأمور التالية :

1- بعد المسافة حتى تصل للمناطق الخضراء .. وأقصد بذلك أن تكون الأرض نفسها خضراء كأنها مزروعة ثيل .. حنا قطعنا حوالي 2800 كم الى أن وصلنا الى وجهتنا التي نريدها ومثلها في العودة الى بريدتنا الغالية ..

2- غلاء سعر البنزين فاللتر مابين 9,30 ريال الى 9,50 ريال .. يعني سيارتنا كنا نفللها بالسعودية بأقل من 60 ريال وصرنا نفللها هناك بحوالي 1000 ريال ..<<<فرق جداً شاسع ..

3- حتى تصل بأقصر مسافة ستمشي مع طرق زراعية في أغلب المسافات داخل الأراضي التركية الاسفلت فيها غير جيد تماماً , بعض الطرق فيها اصلاحات فتضطر للمشي بوصلة من الطريق بدون اسفلت ,, عدد من الطرق تشابه طريق الهدا قبل تجديده ..من حيث اللفات وضيق الطريق ..
لكن اذا حريص تمشي بطريق سريع راح تقطع مسافة أطول من الي قطعناها بحوالي 500 أو 600 كيلو (على ماأعتقد) ..

4- محاولة بعض الأتراك (وقد يكونون القله) استغلالك لكونك سائح خليجي وهذا بسبب تفاهة بعض الخليجيين هناك ودفعهم للمال دون تفكير فيجب عليك أن تكون نبيهاً أثناء معاملاتك المالية معهم حتى لاتتعرض لعمليات النصب وإن كانت مبالغ بسيطه ..

[جمان البحر]

أول مادخلنا تركيا ..

قابلنا موكبين عرس .. عرس رايح معنا باتجاه شمال تركيا والثاني عكسنا رايح باتجاه الحدود <<ياحليلهم ماتدري وش وقت عروسهم بالضبط بيوم من الأيام شفنا 5 مواكب عروس شيء الصبح وشيء الظهر وشيء بالليل ..

وهذه صورة واحد منهن :



الغريب في تركيا انك أول ماتدخل ماتقابل الا الصفار جبال صفراااء تماماً والأراضي مازينها الا المزارع :



لكن الي يجمل المنظر هو مزارع القمح بلمعتها الذهبيه :



كنت أتمنى أصورها مع قدام وحنا راجعين والشمس كانت ساطعه فيها .. اللون كان مثل الذهب بلمعته ..
لكن ماحصل لي ..


وبعدين يبدأ الخضار بشكل بسيط ..



هنا وقفنا قبل الغروب (لأننا مانبي نتعمق بالداخل والوقت ليل) بقرية العنب (هاسا) قرية صغيرة وهادية جداً... دورنا على فندق ومالقينا الا مبنى حكومي مكون من 4 أدوار 2 تبع الموظفين و2 للتأجير ..



يوم نزلنا قشنا تلفتنا يمين يسار .. مافيه أي مطاعم مثل ماقلت لكم قرية صغيره ومافيها شيء يذكر ..
قلنا مافيها الا اننا نطبخ .. بس وين ؟!
حنا آخذين غرفتين بدون مطبخ ..
قال ابوي أنا شايف عند غرفة الرجال الي يشتغل بالمبنى مطبخ .. نستأذن منه ونطبخ ..
تكلمنا معه انجليزي ,, عربي ,, اشارات ,, فتحنا الشنطة وطلعنا عفشنا بالشارع والرجال يدهدر راسه ..
هو ضاق صدره وبدأ يتلفت علينا ويناظرنا كلنا حتى البزارين ..
لين طاحت عينه على اختي عمره 10 سنين حركت يده وكأنه تحرك شيء داخل قدر ..
هنا هو قال آآآه وهز راسه وانفرجت أساريره ..
وقال لنا نو بروبلم ..
قلنا وأخيراً .. يااخي تعبنا وحنا نشرح وآخرته تفهم من بزر ام 10 سنين ..
وصار كل مابغينا نتفاهم معه على شيء التفت لمه وناظره يسترجيه تشرح له ..
عاد هي وخشته مايبي له من ناحية الغرور أشغلتنا بدأت تردد شفتوا .. أنا خبيرة لغة الاشارات التركية ..
بس يوم رقينا وشفنا البلكونه ..وشفنا المطبخ بالدور الي تحتنا قالت امي : لا هونت نزلوا الدافور ..
ماانب قاعدة أنزل وأرقى ..
وغير كذا أخاف الرجال ينام مبكر وحنا نشغله .
وجبنا دافورنا وطبخنا عشانا :





يوم قمنا الصبح طلعت للبلوكنه وشفت هالمنظر الحلو ..:




وهذا منظر من شباك غرفتنا :




وهذه قهوتنا تطبخ .. ياحلو ريحتها الصبح ..





بعد ماطلعنا من القرية على طول شفنا أشجار العنب على يمين الطريق ويساره :



والبياعه كل باسط بضاعته اشي عنب أحمر واشي اخضر واشي حبه كبيره واشي صغيره .. عنب على كيف كيفك .. واشترينا هذا :





وبعدين ترجع للصفار مرة ثانية :


ونرجع نشوف أشجار خضراء وصوت نهر يجري .. تحمسنا نشوفه طول الطريق بين مدينتين وحنا نسمع صوته ..
لقينا منفذ صغير للسيارة ونزلنا وقابلنا أول نهر شافته عيوننا داخل الأراضي التركية <<<بآخر الأيام ملينا من كثرهن خخخخ .




وعقب قابلنا أول بحيرة .. والصفار مبين حواليها :



وبعدين صار الطريق كله مزارع دوار الشمس :












وش تشوفون ؟




نقرب أكثر ..




وجه صح ؟!

هذا طبعاً ظل السحاب على الجبل ..


الطريق صح طويل بس متعته باننا نشوف مناظر مختلفة كل كم كيلو ..
وشفنا زهور الخزامى بس ماحصل لي اصورهم ..


وصلنا قرية فيها مفترق طريقين كل الطريقين يوصلن لنفس المدينة الي حنا نبي لكن كل طريق يمر بقرى مختلفة ..
حنا سلكنا الطريق الي مايروحون معه الخليجيين .. ومرينا بقرية فيها عرس كل من بالقرية حاضر هالعرس ..
عاد يوم عبينا بنزين من عندهم قعدنا نتفرج شوي على عرسهم وعزمونا .. بس عيينا لأن ورانا طريق ..
بس حسينا أنفسنا تقل موكب الملكة اليزابيث ..
قاعدين بالسيارة والعالم كله عيونه علينا واذا رفع واحد منا يدينه يسلم كل الي يشوفونه يرفعون يديهم ويسلمون وهم متشققين من الوناسة

هذه صورة عرسهم :





واعذرونا على التأخير ..

بس ماادري وش فيهم اهلي حبكت طلعاتهم الحين ..
واذا صرت فاضية الموقع الي احمل منه الصور يصير متعطل .. ولا الموضوع مكتوب من زمان ..


الرد الجاي ان شاء الله بيكون فيه اللون الأخضر الي يرد الروح ..

بس بهالرد بغيت الجميع يعرفون انه مب بمجرد دخولك لتركيا راح تشوف الخضار ..
راح تقابل الكثير الكثير من المناظر والتضاريس المختلفة ..

[جمان البحر]

تعرفون نافورة الشوكولاته ؟!




أبي أستأجرها ليلة العيد .. خبروني عن محل ولا ناس يأجرونها علي ..

هنا :

http://www.******.me/JamoOon22

[جمان البحر]

نكمل صور الطريق ..

بس الحين مش أي طريق ..

الحين بدأ الجزء الأخضر الي يرد الروح ..

هالصورة قابلناها من بداية دخلتنا لتركيا في كل الطرق ..



بالله حنا وش عندنا بداله ؟!
صورة بعير ..

بدينا بجبال عليه عشب بس أخضر مصفر ومافيه الا بقع صغيره خضراء .. وضاقت صدورنا لأن الصور الي شفناهن غير وقلنا ليتنا جايين قبل شهر كان الدنيا خضراء ..




زاد العشب اخضرار :













واشترينا هالورد وعلقناه على سيارتنا من وراء نبيها تصير عروس ..




وشفنا هالبزران بمسجد وقفنا نصلي فيه الظهر والعصر ..
وأنا أصور وهم وراي قلت خل أصورهم .. التفت عليهم وأشرت للكاميرا وعلى طول صفوا وكل واحد وقف بطريقة تضحك ايقاله كاشخ قدام الكاميرا ..
الصورة تتكلم :



والبقر بكل مكان ..<<ولدنا صار مهبول بقر من كثرهن خخخخخخ ..



وبدأ الخضار يزيد ويزيد .. وفرحتنا معه تزيد ..
















تخيلوا أنفسكم ساكنين بمكان مثل هذا :



الصورة من مسجد وقفنا نصلي فيه ..


علشان هالمنظر بكل مكان نلقى اللوحة الي بأول صورة

لاحظوا الطريق كيف ردئ .. ومعظم الطرق عندهم كذا ..





وكمان خضار وخضار :






طريقنا شبه انتهى وقربنا نوصل للمكان المقصود ..
وان شاء الله بالرد الجاي الصور ..

[جمان البحر]

اقتباس: الذين يشاهدون محتوى الموضوع الآن : 2 ( الأعضاء 2 والزوار 0) ‏جمان البحر , ‏»•° عطر الليل °•«

ياهلا بمشرفنا عطر ..

اقتباس: الذين يشاهدون محتوى الموضوع الآن : 4 ( الأعضاء 2 والزوار 2) ‏جمان البحر

ياهلا بالزوار وبالمخفي كمان .. عسى الصور أعجبتكم بس !!

[جمان البحر]

نكمل نهاية الطريق ووصولنا لقريتنا الجميلة <<<صارت قريتنا

القرية الي سكنا فيها اسمها أوزنجول لها صور كثيرة في النت وحلوة ..
قبل وقت جيتنا كان الجو فيها كله مطر على عكسنا حر ..
بس ميزة وقتنا ان الخليجيين طلعوا منها فصار السكن متوفر ..
يعني تخيلوا قبل لانجي الناس استأجروا خيام وناموا فيها ..
لا وقبل اسبوعين من روحتنا بعضهم ناموا في سياراتهم حتى الخيام مالقوها ..
بسبب إن القرية صغيرة والبيوت فيها قليلة والخليجيين هالسنة رايحين لها بأعداد كبيرة ..
حتى الي مرتبين امورهم قبل وحاجزين ومحولين الفلوس يوم وصلوا لقوا بعض الخليجيين من الجنسيات المعروفة انها تدفع ولا تفكر بالفلوس مساومين أصحاب البيت ومعطينه دبل المبلغ الي مدفوع له ..
وراعي البيت يرجع له فلوسه ويقول له معليش غيرك دفع لي أكثر ..

وحنا بالطريق قابلنا يمكن 10 سيارات أو أكثر سعودية وخليجية راجعين من المنطقة الي فيها القرية ..

وقبل لا ندخلها بليلة ماكان يفصلنا عنها غير 150 كيلو بس قلنا مانبي ندخلها والدنيا ليل لأننا حول المغرب ..
وصدق الحمدلله اننا مارحنا سكنا في فندق مرتب ويطل على البحر .. جلسة الفطور كانت جداً رايقة ..<<للأسف مانزلت الكاميرا معي ولا صورت الفطور والاطلاله ..
ويوم رحنا للقرية جارنا الي تحتنا سعودي من المدينة يقول أنا دخلتها أمس بالليل ومالقيت سكن واضطريت أنام في خيمه ..
هنا حمدنا ربنا ألف مرة اننا ما دخلناها امس ..

نبدأ بالصور :

قبل مانفرق للقرية فيه مدينة اسمها ريزا معروفة بالشاي وهذه صور من مزارع الشاي الي لاحقتنا بالصيف من شرق آسيا لتركيا ..













والأنهار من دخلتنا لمنطقة البحر الأسود وهي تمشي بجنبنا ..










والشلالات ,,



وسيارات الخليجيين في كل مكان ,,


والخضار بعد في كل مكان ,,






^
^
ترا هالنوعية من الصور الي طالع به الشارع حتى لو ماكنت زينة أبحطه لأني أتعب لاجيت أصوره <<شباك السيارة حق المراتب الثانية ماينفتح الا نصه وأطلع معه والسيارة ماشية على أبو أصور صورة احترافية <<<زين الي ماطحت ولا جان شيء بسم الله علي ..
يعني باختصار اعرض نفسي للخطر كله علشان هالصور ..

[جمان البحر]

اقتباس: الذين يشاهدون محتوى الموضوع الآن : 3 ( الأعضاء 3 والزوار 0) ‏جمان البحر , ‏فديكا بريده

ياهلا وغلا بفديكا والمخفي ..


باقي صور القرية شوي بس وأنزلها ..

[جمان البحر]

ونبدأ الحين بقريتنا ,,

القرية تتوسطها بحيرة بجانبها جامع كبير تنقسم مساكن القرية لقسمين مساكن جبلية تطل على القرية كلها وبحيرتها ومساكن تحت بعضها مطل على البحيرة ..
تحتوي القرية على كل الخدمات المطلوبة من بقالات ومغسلة ومخبز وقصاب وانترنت موجود في كل بيت ..

صورة من الجبل المطل على القرية :



صورة من جانب الأكواخ المطلة على البحيرة :





صور من جانب البحيرة :










صورة لمنتدى بريده من جلستنا الخارجية :




يمكن أحد بيقول وش الشراشف الي بجنبك ؟!
هذه الله يسلمكم يوم قعدنا وعينا من الله خير وفلينا قشنا وبدينا نطبخ قهوتنا ..
وأنا قاعدة ماعلي الا جلالي جاء شباب للبيت الي بجنبنا ونزلوا ودخلوا وطلعوا فرشتهم وقعدوا قدام بيتهم ..
طرت لم اهلي <<<الي يسبح والي منسدح
قلت لهم جيراننا شباب ..<<معناتها اننا بنضطر نلبس نقاباتنا أو مانجلس بالبلكونة من الأساس ..
قالت أمي :بسيطة .. خوذي الشراشف من على السرروانشريهن على الدرابزين وبكذا ماراح يشوفوننا ..
طبعاً للأمانة هم ماناظرونا بس ولو الوحده لو جنبه رجال أعمى تبي تتحقرص ومب قادرة تأخذ راحته ..
وأماجيراننا التحتيين كلهم عوائل حجازيين ..
واحد منهم ماشاء الله كل يوم يصلي الفجر بالمسجد ..<<به سالفة أبقوله عنه بعد شوي ..

هذا صورة الكوخ ..



الي تحت هذولي شقتين فيهم الحجازيين ..
والي فوق شقتين الي يسار لأصحاب البيت والي يمين ولها درج هذه حقتنا .. بس البلكونة الي قدام مع الغرفة الي تفتح عليها مب لنا ىخذينها أصحاب البيت .
يعني حنا نجلس بالجلسة الي عند الدرج ..
والسيارة الكشـــــخــــــة لراعين البيت ..


وهذه صورة عشانا :



كبسة دجاج تحبها قلوبكم ..

[جمان البحر]

اقتباس: الذين يشاهدون محتوى الموضوع الآن : 4 ( الأعضاء 2 والزوار 2) ‏جمان البحر

يا أهلاً وسهلاً ..

اقتباس: الذين يشاهدون محتوى الموضوع الآن : 2 ( الأعضاء 2 والزوار 0) ‏جمان البحر , ‏•»pµяเтЎ«•

أهلاً أهلاً ببيورتي ..

[جمان البحر]

نأخذ فاصل ونقول سالفة جارنا الحجازي ..

أول يوم جلس مع أبوي سولف له عن رحلته وعن نفسه وعن القرية وقال اني أصلي بالمسجد الي جنبنا حتى الفجر ما أفوته .. ماشاء الله عليه ..
(القرية فيها 3 مساجد والجامع الي بالصور) .
عاد عقب كم يوم جاء لم ابوي وهو يضحك يقول تخيل اليوم رحت للمسجد الفجر كالعادة أبي أصلي يقول قعدت وقعدت وقعدت أحتري أحد يجي ولا شفت أحد أبد حتى الإمام ماجاء ..
يقول : تلاحقت عمري وصليت لحالي قبل ماتشرق الشمس ورجعت للبيت وأنا مستغرب بقوووه ..

بصراحة غريبين يعني ماأحد قام يصلي ؟!
اذا الإمام غاب وين الجماعة ؟!

لكن بجد لاحظت بمساجدهم المسجد وش كبره ومايصلي فيه الا 10 رجال وأقل حتى مايملون الصف الأول .
وبمجرد مايسلم الإمام كلهم يقبون ..

[جمان البحر]

يا أنا مليت من هالصفحة ودي أفتح صفحة ثانية

[جمان البحر]

http://www.obamafreehomaidan.com/index.html



كلنا بنتوحد ونشترك بهذه الحملة ..

أرجوكم ..
لأجل العدالة ..
لأجل أبناء تيتموا ووالدهم حي دون سبب مقنع ..

[جمان البحر]

يالله كلكم تحمدوا لي بالسلامة ..

http://www.******.me/JamoOon22

اليوم الدكتورة منخجرتن برجليني لما قلت العيد الليلة ..

والحين منسدحة ومخدومة بس أتأمر جيبول لي ماء تعالوا عضدوا لي أبروح للغرفة الثانية

بس ما أدري وين عقلي يوم طعت الدكتورة وخليته تلعب برجليني كلهن .تسيف ماقلت له تكفي رجل وحدة بس اني قلت اعرف روحي ان طلعت ماانب راجعة لمه الا عقب سنه .

بس قسم تحسفت كثر شعر راسي خاصة اني متعودة بالعشر الأواخر السحور يصير علي علشان أمي تروح تصلي بالمسجد واليوم حرمته من الصلاة بسبب رجليني ..