×× أخواان وأخواات بالأسم فقط ××

[>ريانه<]

مرااحب بالطييبين ..

بدخل بالموضوع دغري^_^

كثيير ماننشااهد انعزال بين الاخوان والاخواات العلاقة بينهم علاقة اوامر وتنفيذ طلبات
الاخ روحي جيبي ماء صلحيلي عشاء ومن هالاوامر
البنت وصلني للسوق للخياط للمشغل وعلى هالمنواال..

او حتى قد يصل الامر الى انه مافيه اي علاقة حتى بالاوامر هو يأمر الشغالة وهي تأمر الساائق..!!

مافيه حاجة اسمها جلسة اخووية وقهوة وحلا وضحك وسووالف..
ياترى السبب من الاخ او الاخت..؟
او
المسئولية تقع على عااتق الاب والام الي مازرعوا هالشي في نفوس ابائهم؟؟


كثيير الان نسمع من شكوى الاخواات من قسوى اخواانهم ياترى مالسبب هل الزمن المخيف يجبره على القسوة واستخدام اسلوب العنف ليحد من انجراف اخوااته
وكأنه مافيه اساليب للتربية والتوجيه..!!؟

يصل الامر ان تقول الاخت أكره اخوي مصييبة ..او ان الاخت او الاخ لايعلمان باي مرحلة دراسية تدرس او يدرس ولا اخبارهم ..شي مذهل..

وكثيير من الاخواان بعد زوااج اخته لايعرف عنها شي وكأنه ماصدق تزوجت..
الاخت للمعلومية تريد ان تشعر زوجها بأن لها عزوة وسند تبي يزورها بيتها حتى الروحات والجيات المفروض يعرض عليها يوصلها لاي مكان خصوصا لازااراتهم في بيتهم..
صحيح عنده زوج لكن الاخ اقرب من الزوج لان الزوج يتعوض لكن الاخ مايتعوض بعض الاخوان يقول عندها زوجها ماعلي منها ليش جاية من الشارع هي؟!!

حتلى اتعجب لاما بنت متزوجة وتجي تزور اهلها مايعرض اخوها المتزوج يعزمها في بيته على عشاء او حتى قهووة اعرف بنات ماقد راحن لبيوت اخوانهن..!!
هل هي قلة سنع؟ او ماخطر على باله؟ او يرى ان هالشي مالها داعي؟؟

ياترى الفجوة الحااصلة بين الاخوان والاخواات اسباابها ايش؟؟


صحيح فيه أخواان ينحطون على الجرح يبرى يشاركها همومها والله اذكر بنت تتكلم عن اخوها وكيف وقف مع اختها يوم طلقها زوجها وقدر يطلعها من الي هي فيه ..
وحدة ثانية كان لاحس انها متضايقة اخذها مكان برى البيت وخلاها تقوول الي بخااطرها فعلا ماشاء الله تندر هالنماذج بهالوقت الي كلن نفسي نفسي..

وتتعجب من وااحد مقتدر ماليا ولا قد عطى اخته لو مبلغ رمزي بسيط بعيد فطر او اضحى او مثلا لاوصلها للسوق او حتى كذا بدون سبب يكون هو مكان شغله بعيد مايشوفهم الا ب4 شهور مرة ماراح يضره شي لو عطاها مبلغ بسيط..!

يمكن أكوون ركزت على الاخوان اكثر من الاخواات لان الي اشووفه ان الاخوات مايقصرن ومستعدات يقدمن لكن مافيه خطوة تشجيع من الاخ ولان الاخوات اكثر سنع واهتمام من الاخوان خصوصا لاتزوجت الوحدة لو على كيفها كل يوم اخوها عندها..

ياترى هل من اجاابات لتساؤولاتي؟؟ او اني باالغت بالمووضوع ؟؟؟ وصدقووني اتكلم من اشياء شفتها وسمعت فيها وكثيير نخاالط بناات ونشعر بلي يحسن فيه..

سلام تفوح منه عطر برائحة الخزاامى,.

[سهود™ ومهود®]

هيك وهيك .. فيه طيب وفيه ردي من كوول الجنسين .. بس البنات اكسر حنيييه بحكم الانوسه

والعاطفه .. والجذاعين دفشين وجفسين ..

[مشقاص]

ريانه
للأ سف هذا الي حاصل في مجتمعنا الصحراوي مفقود الحنان ,, جفاء بشكل غير طبيعي ..
عدم وجود ترابط أسري ..

الأخت تسأل عن أخوانها والأخ في وادي أخر ..

المفروض الأخ يسأل عن أحوال أخته ويشوف أحتياجاتها الماديه حتى لوكانت في دار زوجها يفتح ثلاجتهم ويسألها هل قاصرها شي ؟؟

يجلب الهدايا لأبنائها يشعرها با لأخوة الحقيقية بكل معانيها ...

[&نجدية كووول&]

طبيعه الحياة والصحراء تحكم الكثييير من العلاقات
بالنسبه لي واحد من أخواني ينحط على الجرحى يبرى
أذا تضايق من شي جاء لمي يفضفض لي يشاورني بكل أمورة
أما أخوي الثاني الحمدلله والشكر شايفن بروحه شوفه
الغالب على السعودين الجفاسه نادر من تلقين مع بعض
تشكــــــراااات

[>ريانه<]

اقتباس:  المشاركة الأصلية كتبت بواسطة سهود™ ومهود®     هيك وهيك .. فيه طيب وفيه ردي من كوول الجنسين .. بس البنات اكسر حنيييه بحكم الانوسه والعاطفه .. والجذاعين دفشين وجفسين ..

الله يهديهم بس احنا مانبغى هيك وهيك ع كلامك
بالعكس نبغى من كلا الجنسين عشان الواحد يحس بحنان الاخوان
شاكره مرورك

[>ريانه<]

اقتباس:  المشاركة الأصلية كتبت بواسطة مشقاص     ريانه للأ سف هذا الي حاصل في مجتمعنا الصحراوي مفقود الحنان ,, جفاء بشكل غير طبيعي .. عدم وجود ترابط أسري .. الأخت تسأل عن أخوانها والأخ في وادي أخر .. المفروض الأخ يسأل عن أحوال أخته ويشوف أحتياجاتها الماديه حتى لوكانت في دار زوجها يفتح ثلاجتهم ويسألها هل قاصرها شي ؟؟ يجلب الهدايا لأبنائها يشعرها با لأخوة الحقيقية بكل معانيها ...

هذا المفروووض لكن وين اللي مثل كذا
شاكره مرورك

[>ريانه<]

اقتباس:  المشاركة الأصلية كتبت بواسطة &نجدية كووول&     طبيعه الحياة والصحراء تحكم الكثييير من العلاقات بالنسبه لي واحد من أخواني ينحط على الجرحى يبرى أذا تضايق من شي جاء لمي يفضفض لي يشاورني بكل أمورة أما أخوي الثاني الحمدلله والشكر شايفن بروحه شوفه الغالب على السعودين الجفاسه نادر من تلقين مع بعض تشكــــــراااات

هذا حال الاخوووه بعضهم
ياحلوو النفوووس اذا كانت نفوس صافيه خاليه من المشاااكل
شاكره مرورك

[بريده ام الدنيا]

اتوقع بسبب التربيه
لو عودوهم اهلهم على الشي هاذا اكيد ماراح تتغير

[بسومة بريده]

صدز ورانا نغلين على بعض كبيرنا وصغيرنا....ومع الناس وش حليلنا...

الله يهدينا ويألف بين قلوبنا...

[أبو الريش]

والله صدقتي,,,

بعض الحريم ودّه تحس ان له أهل وأخوان وقرايب يعزمونه هي ورجله ويكون تواصل قوي بينهم

لأنه لاصار بكرى مشاكل بينهم صار الزوج يسب الزوجه ويمسك عليها أشياء من ضمنهم عدم التواصل بين اهلها وذويها

[رحيل]

في الغالب يكون السبب من الأهل لايربونهم على الترابط والتألف ومن هذه الأشياء التي تقرب الأخوه من بعضهم
وأحيانا يكون من الأبناء أنفسهم
البعض يكون تعامله سئ ولو سألته عن أحواله لرد من طرف أنفه
ويحسسك أنه غير راغب بحديثك أو مجالسك
وقد ترى شقيقه الآخر حسن التعامل بشوش يبادلك الحديث والمزاح
يبادر في خدمته لك ويقدر خدمتك له
في هذه الحاله يكون السبب من الأبناء وإختلاف شخصيتهم

[الاطلال]

بالعكس

حنا والعياذ من قوول حنا لنا جلسات عائلية وفيها كووول مي قصدي كووول شيء من الفرفشاات

بس يمكن بعض الشباب تعود على اصدار الاوامر وتلقيها وصار يكش من البيت وقلل دخلاته

بس لازم تتعودوا وتكون فيه جلسات عصرية او مسائية لهيك ونااسة

وترى ماهنا باحسن من جلسات العايلة


وان ماتعودتوا عودوا عيالكم بعدين


بس هذا اللي عندي وسلامتكم