معاناتي مع الفنادق والشقق المفروشة

[جاكوب]

السلام عليكم جميعاً من مدنيين وعسكريين

من العنوان يتضح انو فيه معاناة مع اهم رافد سياحي في اي بلد في العالم وهي الفنادق والشقق المفروشة او ماتسمى (الموتيلات).

اكاد أجزم(وش عنده سيباويه).. اقصد متأكد ان فيه منكم احد احتاج انه
يحجز شقة او فندق وهو مسافر باحد مدن المملكة
( ما اتكلم عن اللي يحجز أونلاين من النت) لان العادة ان الواحد يقعد
يلف ويدور لين يحصل فندق او شقق ويفق خشته من الوناسة انه
حصل شئ ويبدأ يدور موقف للسيارة عشان ينزل ويسأل اذا فيه والا لا..
واحيانا مايحصل مكان للسيارة يضطر انه يلبق بعيييييد او يوقف خطأ
ويقفل على واحد عشان ينزل ويسأل بس..

المصيبة انو وبعد هالمشوار هذا كله والتعب والمرمطة تتفاجأ يقول لك
الرسبشن او موظف الاستقبال: والله الشقق كلها فل!!!!!!!!!!!!!
وانت بقلبك ودك تعطيه لكمة قاضية بسبب كل هالمشوار واخرتها بكل برود
يقول والله مافيه مكان!!!!!!!!!!

الكثير منكم سافر للخارج واقصد بالخارج الدول الاوروبية والامريكية المتطورة
واللي فاهمة وتقدر شعور الناس..

واكيد شفتو لوحة كبييييرة اكبر من لوحة الفندق او الموتيلات مكتوب

VACANCY أو NO VACANCY

ومعناها انو (يوجد مكان) والثانية ( لا يوجد مكان) او بالترجمة الحرفية لا يوجد شاغر..



وبكذا يكون الزبون يعرف انو فيه او مافيه مكان وهو بالطريق
يعني ما يحتاج ينزل ويتمرمط...

مرة من المرات حصل معي هالشئ في بريدة هنا كان عندنا زواج
واضطريت احجز لضيوف وكل ما انزل عند أحد يقول والله مافيه مكان فل...
فقلت خليني اقول له مسألة اللوحة التوضيحية فرد علي
وقال يارجال تراك بالسعودية!!!! قلت طيب لأني بالسعودية لازم نسوي
هالشئ لانها اضافة جيدة اولا للزبون ثانيا للبلد ممثلاً بالسياحة عندنا ثالثا حاجة حضارية تعكس التطور الحالي بالسعودية ولو كل واحد منا قال تراك بالسعودية
ما طورنا بلدنا ... وبعد هالكلام قال والله كلامك مقنع خلاص بكلم صاحب
الشقق بالموضوع..

بخليكم مع صور حقيقة تمثل نماذج للفكرة

وفكرتها مثل ماتشوفون في الصور لوحة توضيحية عبارة عن
سلك توضيحي منور...
يكون كلمة(NO) لها مفتاح تشغيل للكهرباء عشان
يشغل ويطفي.. وكلمة (VACANCY )مفتاح مختلف لتشغيل السلك..





لاحظوا الصورة اللي تحت ان كلمة (NO) مطفية يعني فيه مكان



وهذا مبتكر طريقة جديدة انه اضاف كلمة ( YES )تأكيدا على انه يوجد مكان
يعني ماعليك الا انك تولع ال(YES) او (NO)




عندنا نبدل الانجليزي بالعربي ونكتب (لا) بفيش كهرب نشغله اذا صار مافيه مكان ونطفيه اذا فيه مكان وتصبح ( يوجد مكان )


اتمنى وضحت الفكرة واتمنى من الجميع يوصلها لكل من يملك فنادق او شقق مفروشة..

واي ملاحظة او عتب او اعتراض على الفكرة انا اتقبلها بصدر رحب.. وليعلم الجميع اني حريص كل الحرص على تطور ورقي بريدة وشبابها..

دمتم في رعاية الله