.
.
يقول ابن خلدون
عالم الاجتماع الشهير -بتصرف-:
أنه يلاحظ أن الشعوب والأمم المغلوبة
تنزع إلى تقليد الأمم الغالبة بطريقة لباسها وكلامها
وتقاليد حياتها وتعاملاتها ، ظناً منها أي المغلوبة
أن هذه الأشياء هي سبب قوة تلك الأمم وعزها وتمكنها
.
طبعاً ابن خلدون ما قال عن نفسه إني عالم اجتماع
بل تكلم بعدة أمور في معرض تاريخه الشهير ومقدمته
وكانت نابعة من نظرة وتجربة ، وجت الناس من بعده
ووضعته في علماء الاجتماع مثل ما وضعوا غيره
.
ما علينا .. مهوب هذا همي .
همي وهمكم هالموضات واللبس والحركات
الممعوطة بالقوة من الغرب ، حتى هم من كرههم لنا
يصرحون أنهم لو يعلمون باتباعنا أو سماعنا أو محاكاتنا لهم
.
لاعتزلووووووووووووا .
تخيل
.
يكرهون كل ما هو عربي مسلم
.
وحنـا نركض وراهم بالنواظير
علشان نصير مثلهم بل منهم
وهم يركضون منّا .. وحنا وراهم والزمن طويل
.
.
طَـيّـحني موضة زنجية من سجون أمريكية
يصرف للمساجين سراويل كبيرة الحجم كمقاس واحد
تحولت لديهم بانسلاحها لموضة القوييييين
جوك ربعنا مدرعمين .. وهاااتك يا سلح .
بابا سامحني .. السحاب من الخلف وليس من الأمام
.
يو يو يو .. زنجية من أغاني وطريقة كلام
ارتبطت برداء وكاب وراب .. والحين قائمة على قدم وساق
.
أحياناً ما ودك تروح مكان عام
أو مضمار أو نادي أو مجمع أو تجمع
بسبب المشاهد المقززة .. والتنازلات عن القيم السامية
لآثار دامية .. .
.
.
إلا
على طاري المجمع ..
.
تراي أدور محامي شاطر
خلاص أبودع الوظيفة ، خلااااص وجتني .. لحد عندي .. يا غناة الذيب يا فقره
.
.
خلال هالشهر ..
كنت رايح أرجع ملابس لأختي من مول
وياااااا كثر ما ترجّعن يالحريم .
ولقيت ركن
عليه هيصة وجمعة .. مريت وطلطلت
وإلا أحد الشركات الشهيرة عندنا
تروج لمنتج جديد .. أكل طبعاً ما عندنا غيره
بس أكل خفّافي ..
.
لزّم علي وعلى غيري حق التسويق نذوق
.
والظاهر كان هناك تغطية من الشركة نفسها
وتصوير وطاخ طيخ
.
قلت خل أذوق بدل هالفر بهالمول اللي كسر كعيباتي .
وأذوق شوي .. والمصور .. يقول : بص هنا يا باشا
وألتفت ... وطرااااااع .
.
ما لـقّيـت بال
وأمشي .. وقبل كم يوم .. يتصل علي واحد من الشباب
.
تررررررن تررررن
.
الحكواتي : هلا
أبو علي : هلابك .. وشلونك
الحكواتي : اخلص ... متصل بالقوايل تقول وشونك أبنام
أبو علي : أكيد تتغلا .. صرت مشهور
الحكواتي : بالحيل .. وش تبي
أبو علي : اقعد يا فتاة الغلاف
الحكواتي : أبسكر السماعة .. اخلص
أبو علي : نازلة صورتك بالجريدة وتسوي دعايات من ورانا
الحكواتي : وش دعايته غربلك الله
أبو علي : دعاية (...) ، كم عطوك
الحكواتي : أبو علي : ألو .. نمت ، العشاء عليك الليلة
.
انفجعت .. وطرت العصر منب مصدق
وشريت جريدة (..) وفتحتها ، وإلا صورتي
أعوذ بالله ، وش هالنكبة .. وين أودي وجهي من جماعة المسجد
.
الصراحة أحس إنه تم استغلالي
وأحس إني صرت مستهلك .. خلاص .
مرة أبي أبلعها وأسكت .. ومرة أقول خل أجرب أقاضيهم
بس أخاف يقولون : من قال لك تاكل عندنا
وتصير فضيحتي مثل اللي .. بأمريكا
صوروه بوضع محرج .. ونزلت بوسائل الإعلام
ولا أحد درى عنه ، وقام قاضاهم واشتهر ولصقت به معيارة
وطلع يد من ورى ويد من قدام
.
.
اللي غابنن إني ما استعديت .. بس .
وريت الصورة أمي قالت : رح صل بس أبرك لك من الترزز .
.
.
وش السواة ، وش تشيرون علي ...
.
.
.
.
((أقول ما تخبرون منتدى فيه تفاعل ننقل له))
ما خلاص فاض بيه ومليت