هلا الشماسي :)

يالله أنك تحييه :)

شوف إختلافك معي ما يسبب لي حساسية ولا يسبب لي زعل .. ولا إحراج :)

(( ورحم الله إمرء عرف قدر نفسه )) .. وهالقدر ماهوب أنا أحدده .. بل الأعضاء هم من يحددون :)
والواضح قدامي .. وبكل موضوع أكتبه (( ولله الحمد )) أن الأعضاء أغلبيتهم (( وأقصد فيهم اللي يردون على مواضيعي )) تتفق معي .. أو حتى تختلف معي هم متابعين لما أكتب .

بالنسبة أني كنت معروف .. والحين نكرة ما أحد يعرفني .. وأني جالس أسوي دعاية لنفسي ..
بقولك كلامك هذا مردود عليك .. لعده أسباب ..

السبب الأول : توني بلير جلس فترة ما تجاوزت الشهر .. بعدها غيرت الأسم إلى إقلاع وبرضه الإقبال على مواضيعي كان بنفس القدر وأكثر من الإقبال على مواضيع توني بلير .. لأن الأسلوب نفسه ما تغير .
السبب الثاني : اللهجة العامية اللي أكتب فيها .. والطريقة والأسلوب سواء بالنقد أو أختيار المواضيع ..
السبب الثالث : قوة العناوين هي اللي تجذب الزوار والأعضاء .. وأسم الكاتب له بريقه ما ننسى (( وانا مازلت على نفس الأسم )) .. لأن الكاتب له جمهوره ومتابعيه (( سواء أختلفوا معه أو أتفقوا )) ..

وبالنسبة أني أترجى الناس عشان تدخل لمواضيعي ...
أحب أقولك .. من لحظة ما دخلت لمنتدى بريدة .. كان حرصي على العناوين القوية .. لأنها هي الجاذب الأكبر لقرآءة مواضيعي .. (( مثل ما ذكرت لك )) .. (( ولا أنكر أني أخذت شهرة على حساب المشرفين والمشرفات )) .. لأن أسلوبي يختلف عن بقية الأعضاء .. (( لكل عضو أسلوبه الخاص )) .. ووممكن هالشي ساعدني أكثر ..



التهجم أعترف أني كنت أتهجم .. وذكرت هالشي (( وقله من المشرفين يعدون على أصابع اليد والواحدة سلموا مني )) .. بس طبعا مو كل مواضيعي على المنتدى .. فيه مواضيع كثيرة كنت أنتقد تصرفات وسلبيات أجتماعية .. مثل موضوع (( ما بقى إلا فصخ السروال )) .. وهالموضوع كان عن تفتيش صار لي في أم سدرة من أمن الطرق .. وكان معي وقتها (( عبدالله الحلوة )) .. وكان فيه موضوع لو تذكر (( تكفون أبي سلف تعطوني ))

http://www.forum.buraydh.com/showthread.php?t=46912

وهذي بس عينه ما جبت الباقي ..

شووف لو كان صحاب الموضوع مكروه من الجميع .. ما كان الإقبال على مواضيعي سواء من قراء أو ردود لها ..
(( وبدون غرور كانت أغلب كتاباتي عليها أقبال شديد )) .. ممكن قصدك مكروه من المشرفين وبعض الاعضاء هذا معك حق .. لكن الكل (( جانبك الصواب )) .. وكل كتاباتي تحظى بشعبية (( بغض النظر عن ما اكتبه )) ..


لو المجرم يحاكم على أسمه كان الحين بلاوي صايرة .. يعني مثلاً .. (( فيه واحد سروق ..حاكموه على السرقة ويحاكمونه على تهم ثانية ماله علاقة فيها ؟! :) ))

الطرد كنت أستحقه مافيه شك .. والرجوع للمنتدى كان بطلب جاني من أشخاص لهم مكانة عندي ..
وطبعا الذنب أعترف فيه .. والكرامة محفوظة سواء لي وللجميع .. والرجوع كان من اجل ناس تتابعني (( حتى لو كانوا أربعه )) .. (( وأيضاً لحالة العشق لمنتدى بريدة )) ..


بالنسبة للموضوع اللي كتبته عن المشرفة (( بنت الشرقية )) .. كان فقط لتشفي منها .. (( وكنت أحتريها على الغلطة )) وما صدقت على الله أني شفت موضوعها ذاك (( إلا وحورته ولفيته .. شيطان بعيد عنكم )) .. طبعا لأن بنت الشرقية وقتها كانت أكثر وحدة تحرر وتحذف مشاركاتي .. وعشان كذا كانت حرب بيني وبينها .. حتى لو كان لي موضوع جدي لازم أدخل أسمها سواء بتلميح أو تصريح (( وأعترف أني سببت بلبلة لها في هاك الموضوع وجندت للموضوع كل طاقاتي وأهتمامي .. وأيضا من كانوا معي للهجوم عليها .. وأذكر معها مشرفة نالها نصيب من الهجوم ما أذكرها )) .. (( وإذا كانت تقرا هالموضوع .. أنا أعتذر لها )) ..



إذا أنت تعتبر أن نقدي للمواضيع المكتوبة في منتدى بريدة .. شيء مخجل .. لكوني توني أو إقلاع .. فهذا دليل على ضيق أفق عندك .. أو فكر سطحي ما يشوف إلا أسم توني وإقلاع الماضي ..
(( النقد إذا كان في محله .. ويلمس جرح فيك أو غيرك .. أكيد رايح يتألم ))

لك كل التحية بدون زعل :)

اخي اقلاع حتى الضياع .... توني بلير!!!!


يالله ياقدمك


يحيي العظام وهي رميم


تدري وش احسن شيء


هو انك ركدت وعقلت لانك موهبه وقلم يجبر على المتابعه ويثير النشاط حيثما حل

و خساره ان تضيع هذه الموهبه وهذا الحضور في مهاترات لانفع فيها


سعداء بهذا الخبر و ننتظر عطاءك

نقد التعليم .. :)

ردتس هذا أوفى من ردي على الشماسي :)


(( كنت على خطأ .. وش المانع من الإعتراف بالخطأ .. مع الإعتذار ))




أي منتدى .. إذا قصدك على الإقلاع انا ما زلت فيه إلى الحين ومتواصل ..



ردودتس أصلاً كلها ممتازة :)
ورهيبة .. ومافيه مثلها بالوجود :) (( مجاملات هه )) :)

ألف شكر لك وبإنتظارتس :)

يا الله للحين تذكر موضوع صور المشرفين :)

الموضوع كان بتدبير من السكب .. عطاني الصور وقالي أنشرها وعلق عليها (( عاد انا شراني ما أصدق أحصل مثل هالمواضيع )) .. نشرتها وجلس يوم الموضوع طيروه لي .. وطار معي السكب :)

وكل المشرفين أعترضوا على نشر الصور .. بس الغريب وأن صورهم الحين منشورة في المنتدى :)

(( شفت وشلون )) :)


الرمادي الله يسلمك .. صديق شخصي .. وكان أحيانا يؤيدني ويقولي أكتب وأكتب .. ولما أكتب يحذفه (( لعانه بس ))
عشان يبين للمشرفين والاعضاء أنه ضدي :) .. وبصراحة وقف معي كثير بس أحرجته :)

أبو الطيب .. كان يرسلي على الخاص (( قبل ما يراقبونها :) )) يؤيدني من بعيد لبعيد ومثله كثير من الأعضاء :)

السكب عطاني الصور وطار من المنتدى ورجع (( له واسطة )) :)



العلوم هذي سمها (( جلد لذات )) ..


ألف تحية وشكر على مرورك الرائع :)

خالد هذا أنت خالد اللي انا أعرف :)

يالله حيه (( مغبر :) ))

بس انا أستغرب أن فيه من المشرفين القدامى يرحبون فيني (( كنت عدوهم اللدود :) ))


الله يسعد أيامك .. وأشكرك بقوة على كلماتك بحقي .. أحرجتني فيها .. وتبي تخليني أركد اكثر وأكثر :)

ألف تحيه لترحيبك ودعمك :)

يا جماعة الخير :)

أكثر الردود ما تناقش الفكرة الأساسية للموضوع :)

انا ما كتبت ذكرياتي إلا عشان أبين لكم أني كنت على خطأ ..


تحياتي لكم

بس انت اللي كنت على خطأ اخوي اقلاع ؟؟!!

وهل هذا هو الخطأ الوحيد ؟؟!!

====

وبعدين وشي الفكرة الأساسية للموضوع ؟؟!!

أنا ما شفت إلا فضايح ( وهذي علقنا عليها على خفيف )

واقتراح بإلغاء قسم السوالف والطرائف ( وبهذي أتفق معك 100% )

بس عاد يبي يسمعون لك ؟؟

احلق اظافري .

وعلى فكرة :

سبق ونقدت أقسام المنتدى نقد لاذع .. بس ماش ماجاز لهم واغلقوه قبل ما أكمل !! :)



وتقبل تحياتي 00
المتزن

دخل الرمادي وقرا الموضوع أكثر من مرة :)

ورد أخيراً .. وناوي له على شراً مستطير بعيد عنتس (( بالرد طبعاً )) :)

أكيد كل رأي له أهميته ولا وشوله انا حاط هالموضوع :)

المتزن :)

انا دايم بكل كتابة أكتبها لازم أجيب سوالف .. عشان تعطيني مدخل للموضوع :)

يوم قفلوا موضوعك أكيد أنه ما أعجبهم .. أول لازم دهن السير (( طبعا بالمدح لهم مثل ما سويت انا في البداية )) :)
ثمن تعرج على اللي تبي تقوله .. :)

شف بس وشلون أبي أرد على عبدالله الحلوة :)

تحياتي لك

عبدالله الحلوة ..

(( جيت برجليك .. أجل قدرت أستدرجك .. جاك الموت يا تارك الصلاة )) :)

(( وقسمن تمسح الرد .. أشكيك عند الرمادي .. )) :)



************************************************

صح ما تعرفني بذاك الوقت .. وانا أستدركت الأمر .. :)


صح انا أقترحت هالأمر .. وقلت إذا تبون تحطون صور أفتحوا قسم جديد لألبوم الصور .. وما أنكر أني قلت لك رايح أشارك فيه بكل الصور اللي عندي ..
بس أنتم رفضتم وقتها فتح قسم لصور .. (( وبعدين ما كملت عندكم بسبب الإيقاف عشان أقدر أنشر الصور )) :)
(( أحرجتك صح :) ))


ما سبق أني كتبت بقسم الطرائف إلا موضوعين بس .. وكان لهم هدف أكيد .. وعلى فكرة هالموضوعين فكرتي انا مو منقول .. ماهوب مثل كل المواضيع اللي فيه كلها ملطوشة ومكررة .. وفارغة من أي مضمون :)
أما بقية المواضيع اللي موجودة لي في الطرائف نقلت من قبل المشرفين (( حاقدين علي بعيد عنكم )) :)

أيه صح تذكرت .. انا حطيت موضوع عن (( طرائف من شعر العرب )) ... وأعتقد أن هالموضوع له قيمته ..


من ناحية تورطت صح أنت تورطت .. وأحرجتك معي .. بسسسسسس (( بقية البسسسس في آخر الرد )) :)



ما فهمت قصدك من عبارة (( كل مااستطيع قوله بأنه شخص يقول مالايفعل !! ))

إذا كان قصدك على مطالبتي بإلغاء قسم الطرائف من منتدى بريدة .. بغض النظر عن المنتدى تبعي .. أكيد فيه فرق .
وأنت قلتها في عبارة (( هذا منتدى بريدة )) ..
إذا كنت تعتقد فيه مقارنه بينه وبين أي منتدى ثاني .. هذا هو قمة الفشل و (( دفن الرأس بالرمل )) ..
بكل بساطة اجاوبك ..
(( منتدى بريدة هو الصورة لمدينة بريدة .. واجهه له .. وبما أنه المنتدى الرسمي .. أكيد لازم تكون نوعية الأقسام والمواضيع اللي فيه تكون ذات مضمون له قيمته .. بعيد كل البعد عن مواضيع تافهة مالها أي قيمة تذكر .. ))
لازم يكون هالمنتدى له تميزه عن بقية المنتديات الثانية .. اللي مالها هدف إلا جمع أكبر عدد من المواضيع والمشاركات ولا يهمها المضمون ولا المحتوى ..

وبما أنك تقول أني أكتب بأسمي الصريح في منتداي .. وبكل أتزان وعقلانية .. أكيد لازم أكتب فيه بأسمي الصريح وبمواضيع ذات طابع جدي .. بعيد عن اللهجة العامية . لأني انا المسؤول عنه .. قدام الأعضاء أكيد ..
وطبعا أشارك بكثير من المنتديات الثانية بأسلوب مختلف وأغلبها بنفس أسلوبي في منتدى بريدة ..
واعتقد أن اللهجة العامية محببة أكثر من النحوي والفصيح .. أسلوب مبسط مافيه أي تعقيد ..
ونقطة ثانية ومهمة جدا .. كل منتدى يخاطب عده شرائح بعده دول ..
ما أجي مثلاُ في منتدى فيه اعضاء وزوار من عده دول عربية واكتب لهم مواضيع عامية .. لأنه يتخطى النطاق المحلي ..
عكس منتدى بريدة مثلاً .. تقريباً كل الأعضاء سعوديين وقله خليجيين ..

عرفت الفرق الحين :)


قسم الطرائف جاوبتك عليه مافيه داعي لتكرار :)

لكل شخص أسلوبه وطريقته بطرح الموضوع .. مثلاً انا يوم ذكرت هالشي كله على شان أدخل للموضوع الرئيسي ..
أنت تسميها سوالف مالها (( داعي )) .. وانا أرد عليك أن هالموضوع كتبته على شان (( أعترف أني كنت على جانب كبير من خطأ كنت أسويه ..وبعد على شان أعتذر من اللي صارت لهم مواقف (( بايخة معي )) .. وبعد كيف تعرفت على منتدى بريدة .. مافيها شي .. وأعتقد أن الموضوع متصل في بعضه البعض ..كتبت موضوع ثانوي عشان أصل للموضوع الرئيسي .. هذا كل مقصدي )) ..


أحسنت على الرد الأخير ..



أجي الحين لتورطك معي على قولتك :) ..
بعض المواضيع كانت بدعم منك .. انا أطرح عليك الفكرة وأنت توافق عليها ..
وبعدين أستغرب أنك أنت أول شخص يعترض عليها قدام المشرفين .. ويوقفني بسببها :)


(( وش تسمي هذا .. تناقض !! ))


(( تهقون أني زودت العيار حبتين :) ))

عبدالله الحلوة .. تحية لك .. ولردك ..
وأعتز بمعرفتك ...

شفني رديت عليه .. :)

يمكن أنه كان ناسي وذكرته :)

بس أغلب الظن أنه يبي يهرب من اللي صار ..

وقلت وذكرت أن الرمادي كان من حزب إقلاع مو توني بلير :)

تحياتي لك يا طيب :)