|
ثورة السيراميك... !!
كل ما مررت بطرقات حارتنا وجدت امام احد البيوت كوما من الكراتين وعامل باكستاني ..داخل طالع...
وبحكم خواصي الشهابية اقول في نفسي: ايييييييييييييييه هذولا الفلان شالوا الموكيت ويبي يحطون سيراميك !! والحقيقة ان حمى السيراميك اصبحت تجتاح الكثير من جوانب حياتنا ...فقد اصيب أئمة الكثير من المساجد بهذه الحمى (النغرية) واصبحوا يستجدون جماعة مساجدهم لترميم صدر المسجد!!!! أي ترميم ياشيخ !! كل مافي الامر انك نغرت من مسجد ابو محمد وتبي تطق سيراميك ومكيفات سبليت مثله.!!! .... وبما ان ثورة السيراميك اصابت حياتنا بالكثير من المتغيرات الـ (تمدنية) فقد زاد الطلب في الاسواق على الملاعق والشوك وطاولات السفرة....(بحكم ان الاكل باليدعلى الارض صار يفشل !!! بعد المرحلة السيراميكية من تاريخنا المجيد..) وبحكم ان بيوتنا تحولت الى (مستوصفات اهلية) بنفس أسيابها الباردة ومنزلقاتها الخطرة.. فقد اشتهر اسم الدكتور سالم الزهراني كطبيب غضاريف وانزلاقات عمود فقري ارتبط اسمه بالعصر السيراميكي المجيد.... وعلى كل حال فقد تفاجأت اليوم بعد ان مر حين من الدهر لم يكن فيه الدخول الى المنتدى شيئا مقدورا اقول تفاجأت بأن عبد الله الحلوة اصابته حمى السيراميك و رمى بكل موكيتنا وقراشيعنا الغالية في براحة النت المجاورة .. وقام بتركيب سيراميك من الباب للباب!!! وتركنا ندخل بشكل انفجاري مثل اطفال مقدمة البرنامج الشهير افتح ياسمسم ... الامر الذي ترتب عليه الكثير من حالات التزحلق والتصادم (وجه بوجه) !! ولا تزال فوضى مابعد التزحلق ..مستمرة!!! بالنسبة لي فقد دخلت اليوم مدري وش السالفة!!!ولا ازال حتى تحريره ما أدل غرفتي!!! ولولا وجود المفتاح في ميداليتي !! اقصد الرابط في مفضلتي... لكنت في عداد التائهين في صحاري النت الى ان يعثر علي احد الاخوة في الكينود.. اقصد المسنجر.. كل شيء اختلف علي بشكل جعلني اشعر اني قروي دخل لوبي فندق الفورسيزن!!! قاتل الله ثورة السيراميك..!!! |
الله يجزاه بالجنة اللي مخترع السيراميك
صحيح اننا تجمدنا بس يالله من فضلك ريحة نظافة ونظرة نظافة واكلف ما علينا لي الماء وتلقى البيت يلمع في الضوء يسطع ،،، اما المنتدى انا ما حبيته ابد فاهي "اعرب فاهي ولك ريال اتصدق به عنك". ولا اشوف شيء كني توي قايمة من النوم كلش موب واضح ،، الحين يومه رمادي وانا اصيح عليهم اقول حامت تسبدي من الرمادي رجعونا للأخضر ومخلينه رمادي ويوم تعودنا على الرمادي قشعوه وحطوه فاهي ماله لون !!! يبي مغذي الين ينقع فيه الدم ويبين له لون !!! منتدانا ذكرني امه الله يجزاها بالجنة نركض في بيتنا وندهر والى راحت لأم الجيران قالت ما شاء الله حاطه وشايلة ومبلطة وصابغة وحنا يا يمة حطينا وشلنا وبطلنا وصبغنا وراه مهوب ما شاء الله علينا!! تقولو ولوووووووو هي غيرررر !! يالله الجنة ورضاك |
خابرن لك سراميك رخيص يالمبة عند العامر !! لاتهمك فشخرة الفدا !!
|
ألا على طاري السيراميك , وشو أحسن المحلات التي تبيع السيراميك ببريدة من حيث السعر
لاحظ ,, من حيث السعر فقط ولا المحلالت كثر التراب وكلن صار يبيع سيراميك حتى بقالتنا اقتباس:
اقتباس:
|
أهلا لمبة شارع00
المساجد السنوات الماضية حمى تغيير القبلة00والحين السراميك والمكيفات 0 والبيوت تعيش حاله تمدنية واسعة تشمل كل أجزاء المنزل ماعدا ساكنية!! قصور وضخامة ويطلع عليك بزر نصه سعابيل بسراويل بدون فانيله ولا فانيلة بلا سروال!! حتى منتدانا تغير وضيعنا ادروبنا 00عندي اني منول بالصندوق وهالحين بالغماره ولا أدري وش السالفه اخاف اضظط زر وبلش!! تحياتي |
التغير مطلووووب
لكسر الروتين وهو مطلب ضروري للترويح عن النفس البشريه شكراً لكم |
[align=center]
الا خ الغاااالي : لمبة شاارع الثورة طغت في كل مكان فلمااااذا لا تصل الى هنا ؟؟؟؟ لكن اسأ ل الله الا تطغى تلك الثورة على عيو ننا فتكون المصيبة اشد واعظم !!! وعندما نذهب للعلاج من هذه الثورة سوف نجدهااا تتنتظر نا في مد خل ذالك المسشفى الخا ص لتعمي عيو ننا من جديد لمبة : حمى الله عينك وعيو ننا ايه الصد يق [/align] |
السيراميك ماخلي الا للفقرا
لان السجاد اغلى والرخام اغلى واغلى واتوقع ان اللي صاب عبدالله ووالمنتدى انه طفر بسبب الاسهم وقرر يبيع الموكيت ويستيفيد من الفلوس والسيراميك ارخص |
اقتباس:
اخشى ما اخشاه ان يأتي اليوم الذي نرتدي فيه اثوابا من السيراميك !!! ثم تأتي ربة بيت مثلك وتقول جزى الله مخترع ثياب السيراميك كل خير!! فقد فكنا من الغسلات والصابون واللينور والمكوى !!كلها رشة ماء ومسحة ويطلع الثوب يلمع كأن لم يتسخ من قبل.. عاد الواحد يميده يركب خلاط حار بارد !! ويركب علاقة للمناديل على جنب!! ويحط رف للجوال .. ورف للنظارات !!! ورف للزوائد والمتعلقات..!! والحريم عاد يمديهن يشكلن !! يعني بلوزة بلاط كاروهات..!! والتنورة بورسلان سادة ..!! والمحلات في قبة رشيد تصير محلات الحمندي للسيراميك والحرير والقيطان..!! ويطلع سيراميك شيفون!!! وسيراميك دانتيل!! وسيراميك سترتش!! والحريم يتفنن بالتطقيمات ..!! إيه مهوب هذا عبد الله الحلوة الله يمسيه بالخير تفنن في تطقيمة المنتدى !!شوفي المنتدى صاير كأنه معرض الفدا اللي بطريق المدينة..!! |
والله انك جبته يالمبة
من حيني مالي خلق السيراميك بالبيوت وشعاد يوم وصل المنتدى ؟!! |
الصراحة دخلت مزاجي فكرة ملابس من السيراميك
لا شغالات ولا شيء نغسل ثيابهم وهم لابسينها ،،، الله يجعلهن نافعات غير ضارات من خير لا مضرة ويعجل بهن علينا يارب |
اقتباس:
من يوم سرمكوا المنتدى واحنا تقل معزومين على عرس وغلطنا بالقصر!!! لا الوجوه هي الوجوه ولا المكان هو المكان ..!!! اول اعرف ردود الاعضاء من خطهم ومن لمحة سريعة على التوقيع او المعرف هالحين تقعد لك ساعة وانت تركز وتبحث عن الجماعة والاعضاء والمواضيع كأنك ماشي على توصيف ... سقا الله يوم انا افتح هنا 12 صفحة في آن واحد وانا عارف كل صفحة وش فيها ومن كتب ومن رد ومن تداخل اليوم وامس...!!! بلا فدا بلا عوض...!! |
المنتدى والله حلووو وتتأ قلمون عليه ان شاء الله
الأول كئييييييب مرة ....... وعلى طاري السيراميك الصراحة راحة أهم شئ انه مابه كنس ياسلااااااااااام ......... |
ههههه سالفة واحد الله يذكره بالخير يقول منتالي كل مااامريت من عند بيت ناس لقيتهم يسرمكون ويركبون المجد
وبصرااااااااااااااحه الستااااااااااااااايل موب حلو ابد ولا دل الزين يحوم الكبد الواحد يبي خلفيه حلوه وخط عريض ومتوسط ويبي اطار تحسه مرتب الصفحه الله يهدي الي غيره يقولون امسك امهبولك لايجيك اهبل منه الشكل الوا مش ولابد وجا هاذا وخربهااااااااااااااا |
صدقت والله يا لمبه
الي أعرف إن السيراميك مريح جسديا ونفسيا << التخلص من المكنسه بس سيراميك عبدالله الحلوه أتعبني جسديا ونفسيا إذا دخلت الأقسام الختااااريش الي فيها كثيره عوووووووووووورت عنوووووووووني يسلموووو لمبه كلااااام ناااااااااايس |
اقتباس:
هلا شخصية.... غريبة ماقلت انتم معقدين يالرجعيين انتم وهيئتكم اشغلتونا حتى السيراميك حرام!!!! بس الظاهر انك ملقيت مدخل على الهيئة والا كان ماتقصر على العموم اذا بغيت سيراميك رخيص وكويس رح للعوض اللي في شارع دار التربية او هضاب الخليج اللي جوار مكتبة الرشد ولهم فرع في طريق عمر بن الخطاب ا والمحلات كثيرة لكن هالاثنين من حيث المبدأ واذا بغيت فخم وغالي رح للفدا بطريق المدينة او الحجر الازرق بطريق المدينة برضوه واذا بغيت شي نظيف وظريف ومتعوب عليه واسعاره مدروسة وذوق معقول وعصري جدا رح ل ماتي في تقاطع اشارة الريان مع عمر بن الخطاب ... وهذا الكلام مش دعاية بس بحكم تعاملي في الفترة الاخيرة مع هؤلاء هذا اللي خرجت فيه |
مرحبا لمبة شارع الموقر .. بصراحة السيراميك جيد إذا كان البيت جديد و لسه تحت الإنشاء .. و لكن أبداً ما حبيت فكرة ترميم المنازل القديمة و استبدال الموكيت بالسيراميك .. يطلع البيت كأنه عجوز ( عزبة ) توهم مكيجوها عشان يزوجونها .. بس ولو الاسنان طايحة و البشرة نص نص .. و الشعرات مقعرطين .. إلخ إلخ .. بالمناسبة .. تصميم المنازل الحديثة و بما فيها أرضيات السيراميك و غيرها أحس إنها تفقد العائلة جو الألفة و الدفء العائلي .. :) عشان كذا بيتنا موكيت و ما عندنا نية نستبدله .. |
[align=center]تصدق يا لمبة ان فرشة المنتدى الأوله أزين من هالسيراميك ..
لكن الميزة الوحيدة بهالسيراميك انه ناعم قوة ويزلق <<<<<<<< يفتح المواضيع بسرعة .[/align] |
[quote]
اقتباس:
اقتباس:
لا وتلقا ابوه قاعد بالسيارة (ينقم فصفص) او (يسوي مساج لخشمه من جوا)!! اقتباس:
ياشيخ تقل محجوبين عن الملح والدهن!! لا غدانا غدا.. ولا عشانا عشا..!! لكن مانقول الا سقا الله زمان الموكيت الرصاصي والتبطح على الارض بكل ربعة...!! |
اقتباس:
قل كسر النظارات !!! قل كسر الشاشة !! قل كسر الخواطر!! سقالله الروتين وايامه ...!! بس تدري عاد؟؟؟ التغييرات اللي صارت اليوم في التقسيمات ممتازة وكأن الضباب بدأ ينقشع !! يعني صرنا نشوف شوي ..! وابشرك بديت ادل .. وكلها كم يوم ونتعلم لغة برايل ابشرك.. |
ليتهم يالمبة شارع .. شاورنا قبل مايسرمكون
السيراميك والبرسلان .. ممتاز في الاماكن العامه .. وممرات المنازل .. اما في غرف النوم والجلوس في المنازل .. يبدو لي انه متعب وغير مريح .. الآن بدا يشيع استخدام ( الباركيه ) الارضيات الخشبيه .. حيث يجمع بين ميزه السيراميك من حيث الشكل وسهولة التنظيف .. وميزة الموكيت من حيث الالفة والراحة في الاستخدام .. بالاضافة الى ان حرارته ثابته وما يتأثر بحرارة الجو .. ولا يتسبب في تكوين ازعاج وصدى للصوت مثل السيراميك .. |
لمبة ...... اسعد اللهه أوقاتك
وانا اقرأ موضوعك..... تذكرت تلك الدعوة التي اكرمنا بها أحد الاصدقاء عندما ولجنا الى منزله بعد التغييرات السيراميكية على أرضيته, والا صديق لي ينزلق من أول المدخل الى أن وصل الى الباب الفاصل بين صالتي الرجال والنساء, لولا هذا الباب لوجدناه في اقصى غرف المنزل بعدها قضينا ساعات من وقتننا الذي من المفترض أن نقضيه في الفرفشة والضحك, قضيناها في احد المستوصفات فصديقي اصيب باصابة بالغة في المفصل على أية حال التغيير مطلوب, وقد عملوا المسئولين على المنتدى خيرا بهذا التطوير, فقط نريد العمل بالملاحظات التي ابدوها الاعضاء. وسلامتكم,,, |
العزيز : لمبة شارع
ثورة السيراميك أصبحت واضحة جليّة .. لكن ثورة قلمك هذه .. ممتعة ولذيذة .. ويومًا بعد الآخر تجذبنا إلى قلمك .. بالفكر الراقي .. والأسلوب المحبّب . دمت لمّاعا <-- علشان السيراميك :a1: |
[align=center]اهلا وسهلا بالغالي لمبه
شكل العمار والتشطيب لخبط افكارك , انت تسمرك هناك والحلوه يسمرك هنا هقوتك لمبه سرمكتك هناك بتكون مثل اللي هنا ..؟ الجديد لذيذ و كلها كم يوم ومن حلاة السرمكه الجديده بتمشي فوقها وبعز البرد حافي ... الغالي لمبه حفظك الله ورعاك وحقق لك مبتغاك ... على فكره تراي مانسيت بس كل ماخشيت هناك مالقيتك .[/align] |
اقتباس:
اهلا بالغالي انسان ثاني .. هل تذكر مشكلة الحساسية واحمرار العيون التي اصابتك قبل بضعة اشهر؟؟ عندما سرمكو المنتدى تذكرتك وقلت في نفسي : هالحين انسان ثاني ما ارتاحت عيونه رغم الستايل القديم فوش يبي يصير عليه اذا فتح الجديد؟؟؟ شكله يبي يزلق من المنتدى السياسي ولا وهو واقف الا بمجلس النساء اللي اسمه منتدى المرأة ...!! لكن الظاهر يا انسان ثاني ان الله سلم !!! على العموم يا اخي الغالي لاحظت من امس انهم ركبوا (احزمة وفواصل) بين المواضيع المثبتة وغيرها وبدينا نعرف المجلس من المقلط من غرفة لمبة من غرفة انسان ثاني ..!! |
اخي لمبة شارع في ظل هذا البارد القارس
كرهنا السراميك وموضته أفشل موضه أنتشرت في بلدنا <<<<كل يوم يردد هالجمله وإلا في المساجد !!!تخيل جاي والإمام راكع وتوك متوضي وتمشي مليون والله مايردك إلا الميكرفون أما المنتدى انا اقول وراه هاليومين بارد شوي وإذا جيت أدخل تلبست أبشر بعزك أفضل موكيت لعيون لمبه جاي طلبيه بس على الله ما يتأخر دام هذا التواجد بدون سيراميك |
اقتباس:
|
ههههههههه والله انك صادق
عاد تدري يالبمة انا احسبك من المبلطين لسرميك المنتدى .. وثر مالك دخل يعني انا بشوف الطرقه الي تتبعها انت وبشد وراك المقاسات والله اني مضيع ومن شدة التضييعه صار مالي خلق ادخل .. احس اني غريب الله يعين يارجال فارس |
يالمبة الحين وش فيك أشغلتنا بالسراميك ؟
اكيــد مالقيت سراميك على كيفك ! لاتكون تعمر ؟؟ تخيل يالمبة الحين أنك مبلط ومليص في هالبرد ؟؟ تلقى حالك حالة الأيدين والرجلين شهب واطرافك مثلجة ! كسافة الله يعين العمال ! احمد ربك يالمبة إنك تمر عليهم وانت داق اللطمة دقايق وتهج وتخليهم !:10_1_12v[ |
من الطرائف عن السيراميك
جدتي الله يطول بعمرها تسميه... الرماتزم... بس التغير مطلوب ... وخصوصا نحن نعايش الان عصر التطور و..و...و.. |
اقتباس:
يارجال السيراميك من صالح الحريم اللي بالمنتدى تدري ليش؟؟؟ اولا ماهنا كنس مثل ماتقول اختنا شقردية ..والمشرفات يبي يرتاحن من الكنس والحذف والتحرير!!! يعني المشرفة تمر من هنا ونفخة وحدة والى المنتدى يلق..!! ثانيا الحريم يحبن الخرفشة والدندشة والزبرقة والتميلح !!!واذا قلت لهن :وشوله الانزراااااااااااق؟؟؟ قالن حنا نجاري التطور والحضارة ومدري ايش ومن هالرخيص اللي يسمعن بتمثيليات زينب العسكري وطقتها... بس عاد كأن الامور بدت تمشي من تالي !! وعسا الله يرزقنا بكم سجادة بكل قسم نقدر نمشي من فوقهن بدون ما نخاف من انزلاق غضروفي.. |
اقتباس:
أما نتأقلم يامي فمالنا الا نتأقلم وإلا نطق روسنا بسيراميك الجدار... أما حلو... فما كل حلو موافق !!! يعني الشيرة مثلا.. حلوة ... بس ماتصلح عصير ... وعلى طاري الشيرة ياليت من جاب برميل شيرة وكبه باسياب المنتدى واقسامه ومتصفحاته !!! كلها كم دقيقة ونبدا نعرف نتمشى ..! |
اقتباس:
يعني مدرعمة بالحكي واخرتها شف الزلقة.. اقتباس:
|
اللهم انزلنا منزلاً مباركاً وانت خير المنزلين 000
داخلين تهاوشون ولا واحد جاب نزاله 00 |
لمبة شارع
ظلمتني عندما شبهتني بأولئك !! مافعلته انا كان بعكس مايفعلونه فالمظهر هنا ليس هو الهدف وانما اللب هو مااجبرنا على تغيير المظهر فكم كان بودي الأبقاء على الموكيت السابق لكن كنا مجبرين على تغييره اتمنى ان يكون السيراميك الآن قريب إلى درجة التوأمه مع الموكيت السابق :) تحياتي |
لمبه شارع
تراي مب داخل عشان لا السيراميك و لا البويه تمنيت الموضوع ما انتهى <<<<<<< مستمع جدا بالقراءه اسلوبك روووووووووووعه الله معطيك تمكن وقدرة على التعبير عن الفكره بشكل جذاب و كذا من الله احس انك قلم مالوف لكن بـــ غير لمبه شلرع اعترف و الا تراي ابتتبعك لين اطلع من انت:c9: |
اقتباس:
هل لا حظتي في الايام الاخيرة كأن عفشنا الثمين القديم عاد الينا فوق ارض سيراميكية صلبة !! لقد اعادت لنا الادارة الكثير من اشيائنا التي افتقندنا واصبح الواحد منا يتمشى في المنتدى دون أن (يتنحنح) خشية الدخول في (الرونق سايد) كما حدث في الايام الاولى لا اعادها الله من ايام ... |
مرحبا أخي لمبة . راح أقدر و أحترم " إعتراضك " على التغيير المفاجيء أو ( الغير مريح ) لأنني مررت بمثل هذه المعاناة في إحدى المنتديات الشقيقة . و التغيير حلو وكثير يرغب به إذا كان عن قناعة و رضا تام . |
.
. رأيت هذا المتصفح منذُ اول يوم لهـ وقد كنتُ فضلت القراءة فيهـ دون الكتابهـ ... المتحدثون كلهم اجدهم تكلموا بلسان حالي بما فيهم حرفكـ اخي لمبة شارع اُفَضِل ان اعتمد الرد الآن وشكراً لكـ . . |
اعتذر عن تجاوز الاخوة والاخوات المتداخلين هنا لأقول لاختي الموقرة ابعاد ...
لقد انكمشت حروفك بحلول الشتاء.. كأن لم تغن بالامس .. تبا لبيئة السيراميك ..لاتُسمع من اصوات الناس الا صداها... |
| الساعة الآن 08:46 am. |
Powered by vBulletin® Version 3.8.8 Alpha 1
Copyright ©2000 - 2026, vBulletin Solutions, Inc. Trans by
موقع بريدة