قصة تجديد رخصة بلديه
 

حصل لى شخصيا ان انتهت رخصة البلديه لمكتب لى شخصيا

المهم اننى اخذت الملف الخاص وذهب للبلديه للتجديد قبل اسبوعين

ودخلت الكاونترات السفليه واعطونى استماره نموذج وعبيته واعطونى موعدا بعد يومين للمعاينه
وجائو بعد يومين للمعاينه ووقع على المعامله وقال اذهب بكره الى البلديه وذهبت صباح الى هناك
واعطونى خطاب للدفاع المدنى وذهبت هناك وارسلو مندوب للمعاينه وقالو جب فواتير تعبئه الطفايه
وراجعنا بكره جبت الفواتير وراجعتهم بكره وقالو الضابط ليس موجود تعال بعد الظهر وجيت بكره
الصباح وعطونى كرت اصفر اننى ملتزم بمعايير السلامه الدوليه
المهم ذهبت الصباح للبلديه وقالو هذى ورقه لقسم الاستثمارات فى الدور الثانى وقالو نبى نطلع
لجنع معاينه للوحه وجو بعد يومين وشافو اللوحه وقالو ادفع الرسوم دفعنا الرسوم وراجعنا باكر
وجيت بكره وقالو الطابعه خربانه تعال بعد الظهر وجيت بعد الظهر واعطونى ورقه
ورجعت للموظف اللى بالكاونتر وقال استريح سرا وجلست ثلاث ساعات وقال ناقصه اوراقك
رح كمله وتعال باكر جيت من بكره قال بالسراء الى الساعه 11 ثم قال ادفع الرسوم عندك غرامه تاخير
ادفع مئتين دفعنا الغرامه قال تعال بكره تلقاه جاهزه جيت بكره قال تلقاه عند الموظف الثانى
رحت للموظف الثانى جلس يدور قال مهيب عندى رح للموظف الاول رحت قال تلقاه عند الريس
طلعت للريس قالو الريس مشغول قلت عندى استماره قالو تعال بعد الظهر جيت بعد الظهر
طبعا الريس رئيس بلديه بريده الجنوبيه المهم لقيت عنده اكوام اوراق قلت عندى استماره قال اصبر ندوره
جلس موظف يدوره مالقاه قال تعال بكره جيت بكره قالو الريس مهوب موجود رجعت الكونتر قال
ماجتنا والى هذه الساعه نبحث عن رخصتى!!!!!!!!!!!!!!!!!!!!!!!!!!!!!!!!

ياجماعه اقسم هذا ماحصل معى ونحن فى عهد التطور التقنى والادارى
تحصل هذه المرمطات والتسحيب والفساد الادارى
انا كتبت هذى المئساة لابين التخلف الادارى وتذكرت ان بلديه دبى اصدرت قرار
من بدايه 2006 يمنع التواصل الا عبر النت لاى حاجه كانت و المعاملات تتم الكترونيا بين المراجع والبلديه

بحق ان هناك موظفين متفانين منهم مثلا على الخفاجى يعلم الله اننى لااعرفه لااعجبنى بحسن استقباله
وكميه انجاز عمله

مكمن الخلل فى البلديه هى فى النظام الادارى وعقليه المركزيه فى الاداره التى اثبتت فشلها
وعدم وضوح النظام للجميع موظف او مراجع

عموما اتمنى ويتمنى اى مواطن غيور ان نرى التطور الادارى والانجاز والابداع
لامانه منطقه القصيم00000000000


اتمنى مزيد من المشاركات ودمتم

اخوكم الراى الاول00000000000000

ياخي حظك زين؟؟

صديق لي انتهت رخصه وهي عندهم تحت التجديد للمره الثانيه ؟؟

وصديق اخر يقول اذا جاك مراقب البلديه نافخ خشته وشايف روحه اضرب له الارض وقله سم طال عمرك
وامورك تمشي على الاقل وقتها ؟؟؟؟

ياعزيزي
للاسف موظفين البلديه مازالو ينظرون للمستثمر نظره سيئه

والا ماجزاء من يعمل مشروع يكلف اقل تقدير 2 مليون يخدم المنطقه ومع ذلك يتهافتون عليه جيوش البلاديه لتعقيده ؟؟

سمعت ان في مدينه مجاورة لديهم قسم خاص للمستثمر يتم استقباله وتسهيل جميع الاجراءات له وتذليل كل الصعاب

موضوع عاجبني جد

يا رجال البلدية قاطين معنا بحلالنا منشار رايح اكلين منك وجاي اكلين منك .........

حظك زين والله انا اخوي له شقق مفروشه وجلس

اكثر من اربع شهور وهو وياهم شيل وحط على الرخصه

وقسم بالله انه اخر شيئ فتح الشقق من غير رخصه ودقوا عليه

وراح اخذها بعد غرامات وبلاوي صارت على راسه ..

اشكر كل من قراء الموضوع

وعلق عليه


تحياتى واتمنى مزيد من المشاركه

أذا ارت أن تشاهد قمة الفوضي والتعقيد من أجل التعقيد قم بزيارة بلدية بريدة فوضي وعدم وضوح وأرتجالية وخصوصآ أقسام الرخص المهنية والعمرانية ولم توفق بلدية بريدة بشخصية قيادية تسهل على المواطنين والمستثمرين أمورهم من خلال محاسبة موظفي البلدية والنزول لمكاتبهم ومتابعتهم وخصوصآ الذين همهم الوحيد تأخير معاملات المراجعين ؟

للاسف لدينا خلل بالاجراءآت المعمول بها في البلدية ، واتصور ان مكمنه بالمركزية والقبض على الصلاحيات من شخص واحد فلازال الروتين يسيطر على الاعمال الادارية بالبلدية ويقضي على مستوى الانجاز وسرعته نتمنى من المسؤولين في الامانة النظر في الاجراءات المتخذة وتأسيس لجنة من ضمن لجانهم الكثيرة لتتولى التطوير الاجرائي حتى تساهم في التخفيف من معاناة المواطن مع البلدية عند قضاء مصالحه لديهم.

المفروض ان البلديه جهه تنظيميه ..فقط
لا ..تقاسم بالمحل ..واخذ ضرائب على المستثمر الصغير ..
وباي حق تأخذ فلوس على اللوحه..تقول اللوحه مركبه على حساب البلديه..
تلقا الواحد معصر نفسه ومجمع قرشين يبي يفتح محل وما يدري إلا والبلديه نافضه جيبه وحادته للدين..
وياليت الاجراءات سهله ومرنه ..إلا مواعيد وانزل واطلع ..ينقطع نفسك ما أخت الرخصه وانت دافع لهم فلوس
الطاسه ظايعه ياناس...لا نظام واظح ومهما جبت الاوراق سليمه يصعب اصدار الرخصه من البدايه وبسهوله
يحسون ان المسأله فيها شي ان اوراقك مجهزه وكامله ..الله يعين اللي يبي يفتح محل والله يبي يتعب ..ويضرب هم

السلام عليكم ورحمة الله وبركاتة
موضوعك روعة لكن اسمها التعقيد وليست البلديه

اليوم رحت لمهم من الساعه ثمان وقالو لى استرح الين يجى الموظف

يوم جت ثمان ونصف رحت لمدير القسم قال خل الزحمه تخف وندور لك رخصك

المهم طلعت وجيت بعد ساعه قالو الموظف ماجاء اليوم اصبر نجيب مفتاح الدرج من رئيس القسم
ملفى الحربى

طلعت له فى الدور الثانى قال تعال بعد الظهر ماعندنا مفتاح للدرج

قلت انت رئيس القسم معقوله ماعندك مفتاح قال تعال بعد اظهر

وتلقاه جاهزه وابجيهم بعد الظهر ونشوف!!!!!!!!!!!!!

سمعت ! واتمنى أن لاصحة لما سمعت ! أن الأمور في البلدية تدار من تحت الطاولة !! خاصةً لمن يعملون في الميدان !!
كان الله في عونك وعون الجميع .

اشكر اخى عين الواقع

اختصرت واصبت وابدعت

كل الشكر لقلمك ورايك

تحياتى

هااااااا بشر اخوي الراي الاول وش صار عليك بعد الظهر عطوك الترخيص ؟

قسم اني على اعصابي ومنتظر وش يصير عليك :for4:

قد يكون السبب ان البلديه الفرعيه في طور التنظيم والكادر الذي يعمل اكثرهم غير مؤهلين وقليلون اذا تمت مقارنتهم بافواج المراجعين الذين قد يوجد فيهم العجل والمطفوق ولا شك ان الاجراءات المعمول بها بموجب لوائح ونظم لا بد من استكمالها ايضا الله يوفق الجميع للخير