حكم علي القاضي بــ (قطع اليد والسجن 20سنه ومصادرة جميع الأموال المسروقه)
 

ياجماعة الربع الله لايعيدها من ليلة نمت وأنا شبعان والحمدلله .
أنا رجل فقير وعلى قد حالي وأباري الساس على قولتنا ولي أمنيات دايم أتخيلها قبل النوم .
مرة اتخيل اني وزير ومرة أمير ومرة مليونير وهمن أنام وهمن اصحي وافطر خبزه صامولي مع شاهي وادق الددسن سلف واروح لشغلي وراتبي 3200ريال وعلي قسط 500ريال حقات ثلاجه وفرن .
المهم ذيك الليلة المشؤومه نمت وانا شبعان وحلمت إني مسؤول كبير بأمانة منطقة القصيم وضربت علينا سيول اربعة ايام وهي تمطر وغرقت البيوت والشوارع ومات ناس .
وأمر الملك الله يحفظه بتشكيل لجنه تقصي وجاءت اللجنه وحققت معنا كلنا وإكتشفوا سرقات بالملايين من الكبارين بلأمانه وأنا واحد منهم طلعت سارق (سبعة ملايين) من الإعتمادات حقات الصرف الصحي وهالسبع ملايين اشتريت (قصر) بمليونين وإشتريت (إستراحه فخمة ) بمليونين وإشتريت بانوراما ورانج روفر ولعيالي على لكزس .
والباقي خليته رصيد بالبنك ..المهم صادوني وإعترفت بالسرقه والتسبب بالكارثه اللي حصلت بالمنطقه وحكم علي الشيخ الله يوفقه ويخليه بقطع اليد والسجن 20سنه وإرجاع المبالغ المسروقه .
صدقوني دعيت للشيخ لأني كنت اتوقع (السيف) يطير رقبتي لأني تسببت بقتل المئات من سكان المنطقه .
ويوم صحاني ابوي لصلاة الفجر وأقوم وأنا أرجف من الخوف وأقوم وأسجد سجود شكر لأني فقير ومنب مسؤول كبير .
مجموعة خن بط تتمنى للجميع السلامه

خن بط هالحلوم ماهي حقت عشاء فقير
الاحلوم هوامير يتعشون مفطح ويكبون الباقي
الله يخليك عيد الحلم مره ثانيه غديك تشوفن معك واحصل كم مليون

سرقة ! عادي السرقة بهالوقت

اغدي حلمك المرة الثانية يصير اقل من الحلم الكبير هذا ولا شف شي ثاني يمكن يتحقق

ماهو من المستحيلات السبع عشر ....؟؟


بس فلة حلمك

ا يحتاج تلف وتدور وتكذب بالحلم ممكن تسدها هنا على بلاطة وتقول يجب محاسبة المسؤول ولا تخاف عقب قرار خادم الحرمين كل اماء المناطق كل واحد يقول جايني الدور وتلقاهم يستغيثون الله ان يوقف المطر حتى لا ينفظحون على الهموم بارك الله فيك

رسالة جميلة تحمل فى طياتها الشئ الكبير,,,,,,,,,,,,,,,,
وياليت يتعض المسئولين فى ادارات القصيم

كل الشكر والتقدير لكم على حسكم الوطني وشعوركم النبيل حيال مايحصل من سرقات وتلاعب بأموال المشاريع من أناس باعوا دينهم وأخلاقهم بدراهم معدوده وهؤلاء بحول الله سيقطع دابرهم وسيفضحون في الدنيا والآخرة .
دمتم في رعاية الله . مجموعة خن بط تشكركم مرة أخرى

رسالتك وصلت.