وين البلدية والهيئة عن صالونات الحلاقة التركية ..؟!!!!
 

مساء الخير على الجميع


بصراحة ... فيه شيء قاهرني ومنتشر في بريدة وفي غيرها من المدن بعد :(

وهو تلاعب الحلاقين الأتراك بالزبائن:eek:

ليش البلدية تحط تسعيرة إن كانت ماهي مطبقته ولاهي مراقبة صوالين الحلاقة

والله أنها قهر الواحد يحلق راسه وياخذون عليه عشرة ريال ولا أكثر ..!!!!

لاتقولون ... لاتدفع أكثر من التسعيرة .. أو لاتروح للأتراك :mad:

القضية مو على نفسي .. القضية على هالناس اللي يهملون هالأمر ويخلون

الأتراك يتمادون في استغفالنا ... ونهب مافي جيوبنا :mad:

بعدين شيء ثاني ... ليش البلدية ماتمنع السخافات اللي يسوونها الأتراك

من صنفرة وغسيل وجه ... وغيرها من الأشياء اللي مامنها أي فائدة أبد

لأن التملح والعناية بالبشرة بدرجة مبالغ فيها من أمور النساء :(

ياناس الموضوع والله يقهر ... لا واللي يزيد الطين بلة بعد .. إذا دخلت عند

صالون تركي ... كنك داخل مرقص والعياذ بالله ... موسيقى وأغاني

ودخان ..!!!!!!! :(



ياليت يكون للبلدية والهيئة دور في حل مشاكل صالونات الحلاقة

المتلاعبة والمستهترة ... من أجل أن يبقى شيء من كرامة المواطن

تحياتي لكم

شكراً أخي حمادة على إثارة الموضوع
بصراحه أنا أوافقك الرأي كنا مانشوف هالتلاعب إلا خارج
مدينة بريدة ولكن وللأسف الشديد أنتشرت عندنا بشكل غير
معقول والبلدية ماكأنه يعنيها الموضوع اطلاقاً !!!!
والمصيبه أغلبهم يغلق على نفسه المحل أثناء تأدية الصلاة
( من أمن العقاب أساء الأدب ):for1:



:x3:

ههههههه انتقلت العدوى من الرياض إلىالقصيم أجل كيف لو تزور أماكن الحلاقة عندنا وش كنت تقول!!!
ليس لك الحق أن تنكر عليهم !!بأبسط الحال أن يقول لك ممكن تغادر المكان إذا ما أعجبك وكأن المحل (محل أبوه) :for1:
هذا غير ماترى من الجشع والاستغلال المادي في تسعيرة الحلاقة:for9:
المضحك في الأمر أن (أبو هنود) لحق بالركب من الأتراك فصار يقلد فعلهم ونحن صابرون على مانحن فيه والله المستعان:(

وتقبلوا تحياتي...

اشكرك اخوي على هالموضوع ...................


اما من ناحية الاسعار ...فأحب اقولك :نحن السبب لاننا (دلعناهم) فوق اللزوم لانهم ادركوا اننا نأتي اليهم هربا من (ابو هنود) فإذا جلس الواحد منا يحلق بدأ يثني ويمدح ......ويسب ويشتم (الهندي )فهو يطلب منا ضريبة ذلك(اي في قرارة نفسه يقول انا لابد ان اخذ مقابل هذه الميزه التي ميزوني اياها)


اما من ناحية (التملح ) والصنفره ....فما اتوقع فيه شي يااخي من حق الواحد (يتملح) بس بحدود.............


اما من ناحية الغناء والمجلات فأنا اشطارك الرأي .ولا بد وقفه جاده ..وشكرا

السلام عليكم
 

شكرا على طرح هذا الموضوع والمشكله راعين لف ودوران مع المردان وليت الدعوى 10ريال إن ما كانت 50ريال

والسلام خير ختام

:mad: <<<<<< له ساعه يكتب رد سريع واخرتها يروح :(

اول شي احييك اخوي على سدح الموضوع لانه موضوع ذو فتون ( لاحد يشره متابع مسلسلات ) قصدي ذو شجون <<<< يامصلك الفجر

اعتقد وانا اخوك ان البلا منا موب من الحلاقين او البلدية لان البلدية ابرت ذمتها وحطت اسعار معروفه وانت منت ملزوم تدفع للحلاق اكثر يعني البلا منا <<< تصلح تجيب كور :D
الحلاق التركي او غيره بعذره يمحط بالسعر اللي يبي لانه لاقي ناس ماعندك احد تدفع ولا يهمها حتى لو انه يدفع اللي بجيبه كله :cool: <<< لزوم التشخيص قدام الزباين اللي وراه :D

قد جربت طريقة المرتدات وقلبت الطاوله على حلاق تركي قبل كم شهر ومن عقبها موب يواطن يشوف كشرتي بالمحل بس موب بكيفه انا جاي بفلوسي :cool: <<<<< ياها الفلوس كلها 5 ريال ومتشرحه :D
مره كنت احلق عند ها التركي وابو الشباب ماخذ راحته بخشتي اللي كنها مراح بعارين :D
ويوم خلص بعد نص ساعه من الاخذ والعطا والهجمات المرتده مع الحبوب اللي بخشتي ويوم مل لطس وجهي بكل شي حوله وقال خلصت المهم قلت له كم تبي الحين على انه الحساب بيكون 15 ريال .... قال اللي يجي منك ..
قلت كم يعني .. قال كلك نظر
قلت طيب دوك 5 ريال وفمان الله :for6:
8
8
ماحد قال له يتميلح عندي

المهم اللي ابي اوصله ان البلا منا موب منهم

وعلى فكرة نسيت شي وودي اضيفه لو يسمح الوقت :D
بالنسبة لموضوع الاغاني والبلاوي اللي تحصل اعتقد انه من الواجب على الشخص اللي يشوف الشي هذا حتى لو هو يسمع الاغاني انه ينصحهم لان اللي يسكت كأنه مشترك معهم بالذنب :mad: واذا ما فاد بهم يشوف له اقرب مركز هيئه ويبلغهم وهم اللي يعرفون له

:for3: <<<<< شخمطه وكتبته الفقير إلى عفو ربه برطوم

اولا اشكرك على انتقائك لهذا الموضوع الذي اكثرنا يعاني منه..؟؟؟

وزي ماقالو الشباب احنا اللي عطيناهم وجه حتى تمادو واللي يقهرني انه اذا خلصت محلق وقضا ((من تلييص الوجه)) وعطيته خمسين مثلا يطلع لك خمسين صرف ويعطيك عشره عشره ((تحلف انه ابوك)) يبيك تستحي وتقول له خذ عشرين ودايم هالحركه تحصل قدام عيوني:for7: :for7: ((عاد صرت ذهين اجي معي ريالات علشان مايطمع بي;) ;) ))

فيه حركه بايخه اذا بدا يمون عليك الله لايوريك يقول لك كلام يلوع الكبد من شينه وتبتسم مجامله همن عاد هو يستانس وياخذ عليك ...؟؟حذاري لا احد يعطيهم وجه الله الله بالكده عليهم تراهم ماينعطون وجه:g3: :g3:



عموما المشكله عويصه والحل بيدين الشباب بس كل يقول فشيله بس اقول اللي مايستحي منك لا تستحي منه.........


وبالنسبه للبلديه لو هم حريصين كان زينو زي المرور بحزام الأمان تربطه والا قسيمه تلوطك (( بس جيدين علينا اذا بغو فلوس ))

والهيئه ما تقصر لو تبلغ احس انهم بحول الله يبي يتعاونون معنا.....


واخير اشكر الجميع وتقبلو تحياتي
:for12:

تحياتي اخي حمادة

واشكرك على إثارة مثل هذا الموضوع الحساس0يااخوان المشكله ماهي في التركي ولا في البلديه المشكله فينا انا من زمان محارب الأتراك ولا احلق عندهم بسبب جشعهم لأنني اشوف التسعيره [5] ريال والكل يعطيه [10] ماهو معقول والعالم تدفع ولاهامه0


اتركو الأتراك وتشوفون ويش يسوون 0 لكن0000






اخوك00000 ابو سليمان

شكرا على الموضوع الجيد

واقول الحل بأيدينا نحن الشباب فقط


بمقاطعة تلك المحلات وهناك بدائل كثيرة








السمووووووووووووووووووووووووحه:for6:

السلام عليكم ورحمة الله وبركاته

ماقرأت كل الردود لكن بقول موقف كلنا يشوفه ليلة العيد

قص الشعر للولد لو تخفيف بعشرة
والبنت بعشرين >>>>> شوف عيني ما يقول يقالي

تحياتي للتسعيرات
اخوكم
المطنون

أخي حمادة


المشكلة وكما عرضها الأخوة من قبل !!

هي في تعاملنا مع الأتراك !!

فللتركي في الحلاقة ما ليس لغيره من الهنود !!

والحق يقال : فإن التركي من ناحية النظافة لا يبخس له حق !!

وهذا ما يجعل الناس تطأ ( الخمسة ) وتدفعها ضعفاً له مقابل ( الهجّة ) من أوساخ بعض محلات الهنود !!

وليس للهندي يد بل هي في يد مراقب البلدية !!

فلماذا السكوت والتغاضي ؟!!

وهناك أمر آخر وهي ضخامة محلات الحلاقة التركية !!

وذلك عائد إلى العقد المبرم بين الكفيل والمكفول !!

وهذا يصعّب من عملية التقاء تقديم خدممة الحلاقة بين الهندي والتركي !!

وفي هذه رجحان لكفة الأتراك !!

وهناك أمر لا يخفيه الكثير من الشباب !!

ألا وهو ارتياحهم من التركي فأنفاسه و( وسوالفيه ) أفضل من الهندي !!

ومشكلة الهنود أنهم لا يتعطرون وأنفاسهم تغلب عليها الحرارة والفلفل !!

وبهذه ترجح كفة الأتراك !!

أمور كثيرة تجعل أسعار الأتراك مرتفعة في نظير المنافس الآسيوي القانع بوضعه وكانه في احد شوراع بومباي !!

أما عن المجلات والغناء فهذا نرده لأصحاب الشأن !!

فجزاهم الله خيراً على ما يقدّمون !!

ومن عنده ملاحظة تمس المجتمع والدين فأرقام الهيئة معروفة !!


تحياتي للجميع

التاج

لا اللي قاهرني .....اول ما تجلس على الكرسي يسألك وش تشجع ؟ اذا قلتله :مثلا (نادي الهلال) صار اقاله فاهم ويقعد يخربط وعدد لك لاعبين من سدوس....


اذا شافك (اميل العقال )ونازل من حوض قعد يسولف معك عن البر وهو والله (ما عنده ما عند جدتي)...................


وعلى فكره اغلبهم الديــــــانه(مش ولا بد)فأنتبهوا ..................وشكرا للجيع

حمادة

ايووه يا حمادة هازي الموازيع زإلا فلا .... :rolleyes: على بالي انك مصري



خلاصة الكلام ...:D


لو كل واحد ما يدفع إلا حسب التسعيرة تسان مشو الاتراك عدال بس لا قين من يدفع .... واذا قلت شيء قال حنا اتراك والاسعار عندنا مرتفعه :mad:

:for1: حنا نكد على ابووك بعد :for1: يقال انه عصب



تحياتي



.

هل تعلمون أسباب تمرد العمالة التركية في صوالين الحلاقة؟؟؟
لأنهم يتمتعون بحصانة دبلوماسية تمنع عنهم اي ملاحقة قانونية او تطبيق مخالفات على تجوزاتهم !!!!!!
حصانة دبلوماسية ؟؟؟؟؟!!!!!!!!!!!!
نعم ...........حصانة دبلوماسية من سفارتهم بالبلدية
فهم احرار بالاسعار والأخلاق التجارية
لأن جميع صوالين الحلاقة مملوكة لموظفي البلدية
كيف؟؟؟؟
باسم امه.. ابوه.. اخته.. اخوه...........والا زوجته وهي الغالبية
طبعا مملوكة صورياً.....والا ماهم بكفو يديرون التركي
يستقدمونه ويؤجرون عليه المحل
ويتوازعون المدينة بينهم بشكل مناطق نفوذ
واللي بامه خير يرفع برطمه بوجه التركي
ولا تهون المطاعم ومكاتب الهندسة والمساحة
والضحية ؟؟؟
أنت وأنا

اخي التاج

والحق يقال : فإن التركي من ناحية النظافة لا يبخس له حق !!

وهذا ما يجعل الناس تطأ ( الخمسة ) وتدفعها ضعفاً له مقابل ( الهجّة ) من أوساخ بعض محلات الهنود



اخي وهل تسعيرة البلديه معناها [5] ريال من دون نظافه و[10] ريال مع النظافه


بل يجب عليه ان يقبل خمس ريالات وعليه ان يكون نظيفاً وخشمه يدق القاع0


فالنظافه مطلب اساسي 0

وغريبه منك ياالتاج0





اخوك00000 ابو سليمان