منتدى بريدة - نــــــــوييــــــــير

[size=4[grade="8B0000 8B0000 8B0000 8B0000"]]السلام عليكم هاذي قصة كتبتها في احدى المنتديات وحبيت اجيبها ورعصها بجداركم اتمنى تعجبكم[/size][/grade]

نوره....بنت من أجمل بنات زمانها بنت تعلمت من أهلها الصبر وتحمل المسؤولية منذ نعومة أظلافها<<صارت عنز :18[1]:
بيتهم من طين قديم...وبوسطه نخلتن وش طولها وبجنب النخلة زير وتحت الزير جحه ملفوفة بخيش...
.....
أبوها أحسن واحد يعرف للنخيل , يخرف, ويلقح, ...يقلع...ويغرس...من خبرته يعرف نوعية التمر وهي فرخ<<<أي نبته صغيرة.... مثلآ
يقول سكري هذي برحي هذي مكتومية هذي الفنخاء<<نوع من انواع التمر كبيره الحجم تسد عن خمس تمرات سميت الفنخاء لان الزمع حقه غايص وهي منتفخه... تمت الترجمه :36_2_1[1]
شغلته شاقه,, لكنه ممتعة وسدتن حاجته

تلعب نوره كل عصر مع بنات أقصراهم<<جيرانهم) دبـــــــــق<< الدبق كسرة بلاستيك او مسمار مصنق او شياء صغيره ودقيقه... تمت الترجمه)) :36_2_1[1]

الله يذكر ذاك الزمان بخير يازين الدبق:: والعبيب منول<< العرائس أللي من القماش...))
نورة.. كل مسيان<< قبل المغرب بساعة)) تمحط بيتهم بعرجد<<مكانس زمان من قنا التمر ) والقنا<<<هوعذق التمر) ترش الحوش ماء عشان يبرد وتفرش ألمده<< الزوليه وتحط المساند قبل مايجي أبوها

يدخل أبوه وتأخذ منه المحدر يشيل به عدت العمل))العدة هي محدر+مجرر+مطحن+وكرر... وغيرها))) وتحب رويس أبوه<<راس ابوها.. وتعلق المحدر بنخلتهم...ثمن<<من حروف الجر؟؟
تجيب له ماء بغضاره من غرش متقشع نصفه ويشرب ويجلس يحتري الأكل,,
عشاءهم قبل صلاة المغرب
تجيب السفرة من خوص معلقينه بنخلة بيتهم
وتنسب<< تغرف,, أمه العشاء وتنادي أخوانه ويأكلون
يتعشون وبعد صلاة العشاء ينامون

أكبرت نوره كل ماله تزيد جمال بدت ماتطلع خزيه ألحقت خلاص<< أي بلغت؟؟؟)

يعرفون الناس أذا ألحقت البنت ما تطلع من دار أهلها إلا الى بيت زوجها ا لله يكفينا شرالدنيا بنات الحين تدور السوق مامعها إلا شنطتها حسبي الله على اهلهم الي مهيتين البنات بدون حسيب ولا رقيب :for9:

يوم تمت أربعطعش سنه جاها واحد يخطبها كامل والكامل وجهه بس عيبه شي واحد
انه مهوب من أهل ديرتهم ديرته بعيييده لكن تحسفووبه؟؟

وتزوجت بسرعة وأخذها إلى ديرته البعيده
وقال تراني أنا منيب أحب تردد البنت على بيت أهلها.. من الحين علمهاوانذرها قالت سم وبشر<< بنت مشاالله تربت على الاخلأق والطاعه .أييييه راحت الأيام والشهور
تعوودو اهلها على بعد بنتهم قعدت عنهم قد سنتين به الفترة أنقلت
من بيت إلى بيت اكبر وازين سهت نوره بزوجها وبيته وجابت منه ولد رفض تولد عند بيت اهلها <<حريم منول مايولدن إلا عند ارجالهن خاصة لا صارت في بيت لحالها.... راحت الايام
جاء يوم قاله
تولمي<< تجهزي

انشاالله عقب باسر نبي نمشي لديرة اهلك؟؟؟ أنا عندي اشغيل
وأنتي تشوفين اهلك<<زينه منه اشوى اللي ماقال ابروح وقعدي انتي هنا
فرحت وطارت من الفرحة ودهرت وتزهبت
ومشو... وصلو بيت أهلها الضحى

أدخلت استقبلوها أخوانها وفرحو بها طارو من الفرحه بعذرهم لهم سنتين ماشفتهم... تلفت نوره يمين؟؟ ويسار؟؟ وتدور وتلفت
ماااش؟؟؟؟؟ وين أمي
اسكتوا ماردو عليه؟؟؟يمه يمه يووه تنادي وهي تدور بيتهم وتحكي بنفسه
وش جاءه منحاس بيت أهلي تقل مآبه مره<<<بفتح الراء
([grade="8B0000 B22222 8B0000 8B0000"] البيت آلي مآبه مره مآبه أثمره[/grade])
أ نغص قلبه وطارت تركض لغرفة أمها ماااش حتى الغرفة
تقل مااحد يدخلها وين أثياب أمي وين مطرحته(( الشال كي))
((( الشال الكي نوع من انواع القماش بارد وغسل ولبس ماتغير ؟؟ تمت الترجمه))
به ألحظه,,أبو نوره مثل عادته جاء من شغله
وتجي تركض وتسلم عليه بكل شوق وهو طار بها من الفرحه
حست نوره بعيون ابوها شي وشو ماتدري
سألته وين أمي قاله هااه بتردد
أمك؟
آمك؟ قالت ايه امي
آمك أتعبت بالحيل علينا من بعد مارحتي بسبع أشهور
أمك يابنيتي
تطلبس الحل!!!! نوره ماردت ولا كلمه سمعت الخبر :for13:
أغمى على البنت وتمرض من شدة الصدمة
وتقعد له كم يوم تعبانه جاء زوجها
قاله أبوها ..طلبتك طلب
قال زوج نوره سم أمر,,
طالبك ياوليدي تترك نوره عندنا لمين ترد عافيته
وانشاالله أنا ألي بجيبه لك لديرتك
وافق الزوج
بعد تردد
قعدت نوره فتره مريضه....و بعد ايام
بدت ترجع لها عافيتها على اشوي اشوي
تعافت وردت صحتها الحمدالله
قامت على البيت رتبتها وعلمت أخياتها الصغيرات
الطبخ وتنظيف البيت
واقترحت على أبوها انه يتزوج راحمتن حاله
تبي البيت يحيا وينتعش....
بعد إلحاح على أبوها أخطبت له أرمله وزجته بسرعه
وتزوج...آطمأنت
على بيت أهلها
طبعا به الفترة أللي مضت ارسل زوج نوره
برقيتن يطلب حضورنوره
يرد عليه ابوها يتعذر له لاسباب خارجه عن ارادتهم

رد في برقية الأولى ...انه مازلت تعبانه
وفي البرقية الثانية ...منشغلتين بتزويج أبوها
هبط الرجال ماعاد يرسل برقيات وسكت الله يستر مايدري وش ورء الصمت
ولا جاء ولا حضر العرس
نوره تحاكي نفسها
وش بلاه عسى ماشر وش قصته ماعاد ارسل ولا حضر :12[1]:

تبي تروح له
وقلبها يبي يطلع من صدرها
من شدة الشوق والقلق
قالت لبوها وش رأيك يايبه
نمشي لديرتي خلاص ماعاد إلا خير تركنا الرجال
قال ابوها
خلاص يابنيتي نمشي باسر قبل صلاة الفجر
وصلت نوره وابوها قبل الظهر بيتها
وطقت الباب طقت وطقت
افتح الباب وتدخل
وتفتش غطوتها وش تشوف
حرمه غريبه؟؟؟في بيتي ؟؟
ظنت انها غلطانة بدت تلفت بالبيت
قالت الحرمه من أنتي
قالت نوره أنا راعية البيت
أنا نوره
قالت الحرمه أيه!!!أنا بعد راعيت البيت
عرفت نوره انه تزوج عليها
اطلعت لبوها قالت يبه لا تروح اصبر أبرجع معك
قال ابوها...ليه عسى ماشر
قالت ابد خير.بس زوجي مسافر ولا هوب رادآ من السفر إلا بعد شهرين
ارجع معك لين يرد ...وان عمته هي الي افتحت لي الباب
وتقول انه يبي يلفي عليكم لاجاء من السفر قالت الكلام ماتبي تضيق صدر ابوها
سكت ابوها صدق كذبتها وشك ان فيه شي مغبيته عنه
راحت الأيام وجاء الزوج يطلب زوجته نوره
دخلت نوره عليه بمجلس الرجال وطلبت من ابوها ان يتركهم
وحان وقت العتاب :c4:
قالت له ترأ ابوي مايدري عن شي وسكتت ورجعت وهومايدري عن شي
سألته ليه تزوجت علي
قال انتي ابطيتي عند اهلك
قالت انت جيت ورديناك
قال لا
قالت انا قعدت عند اهلي غصبآ عليك
قال لا
قالت انا قعدتي عند اهلي على غير سنع<<من غير ضروره
قال مادري عنك؟؟
قالت انا مااقبل لنفسي ضره
لو انك قايل لي انك تبي تزوج علي
كان جيتك وانا ازحف
والرجال التي ما يراعي امور زوجته بكربتها وبحلوه ومرها
مهوب قادرآ يحميها من شرور الدنيا؟؟انتهى كل شي واللي بيننا هالولد
اخذته العزه وطلع ولا عاد جاء

[grade="32CD32 32CD32 32CD32 32CD32"]الهدف من كتابة القصة [/grade] :12[1]:

1) إعطاءكم فكره عن عادة أهلنا وشلون كانو يربون بناتهم..... وكيف كانت عيشتهم من البساطه والقل بالحال
2) تعليمكم عن اسماء آلات عدة اصحاب النخيل
3) لمس الحكمة اللي في نوره والثقل رغم صغر سنها
4) اهمية وجود المراه في البيت

حقوق الطبع محفوظه لزلعبوط :20[2]: