%% الاربعا 10:30 الصبح %%
لليوم الثاني على التوالي و اليوع يلعب فيها لعب و مب مخلنها تركز في الحصص ... بس شو بايدها تسوي غير تصبر ... اخيراً دق الجرس معلن عن نهاية الحصه و بداية الفسحه ... وكالعاده ما وحالها تلم اغراضها الا و ميثا واقفه ع راسها ...
امل: ميثوه بليز تعبانه ومالي بارض للحواطه ... سحبيلج كرسي و تعالي يلسي ...
ميثا: لا عيوني انا ما ايلس ف الفسحه ... قومي نشي و خلي عنج الكسل ...
امل: والله تعبانه مالي بارض ...
ميثا: اخبرج عن الدلع الزايد ... روحها الفسحه قصيره خلينا نغير جو شوي و نفتك من نظرات بنات صفج ...
امل: اففففف يالله مشينا ...
ظهرن امل و ميثا من الصف و توجهو لمكانهم المعتاد عشان يسولفون على راحتهن ...
ميثا: انتي شو قايله حق سعّود؟؟
امل: ولا شي ... ليش؟؟
ميثا: عيل ليش متزاعله وياه؟؟
امل: لا زعلت ولا شياته ... منو قال لج؟؟
ميثا: هو روحه يقول ما تبين ترمسينه ...
امل تنهدت: قلتله مابا ارمسك ف رمضان و بس ... هاي هي السالفه ...
ميثا: ههههههههه ... جيه شيطان هو؟؟ احيد الشياطين يحبسونهم ف رمضان ...
امل: عن الطنازه ... والله اذا انتي تبين تشلين ذنوب انتي و ربيعج انا مالي خص ...
ميثا: انزين رمسيه ع الاقل عقب الفطور مب شرط و انتي صايمه ...
امل بضيج: ميثوه الله يخليج فكيني من هالسالفه مافيه ع الحشره ...
ميثا: والله عاد ربيعج و انتي حره وياه ... بنجوف منو اللي بيصبر عليه شهر ...
امل: انزين يصير خير ...
هني دق الجرس معلن انتهاء الفسحه ... امل ما صدقت دق الجرس عشان تفتك من حشرة ميثا فنشت من مكانها بتسير الصف ...
ميثا: انزين اقولج ...
امل: قولي ...
ميثا: نوروه عازمتني ف بيتهم عقب صلاة التراويح شو رايج تين ويايه؟؟
امل: لالالالا ما فيه الصراحه ... ابعديني عنهم لا لي خص فيهم ولا لهم خص فيه ...
ميثا: ليش؟؟
امل: مابا اسير ... مابي اجوف خالي هناك ولا ابا اجوف نوروه عقب كل اللي صار ...
ميثا: انزين هي تباج تين ...
امل تنهدت بضيج: قوليلها امول مب فاضيتلج ... انزين؟؟
ميثا: هههههههههههههه ... انزين خلاص عن تموتين علينا برايج انتي حره ... يالله باي ...
امل: باي ...
دشت امل الصف و على طول توجهت لمكانها و وخت ع الشنطه تظهر اغراضها منها ... رفعت عيونها عقب ما ظهرت اغراضها و تفاجأت بالبنت اللي مجابلتنها و هي تراقبها من بعيد و من عيونها عرفت انها تبا تقول لها شي بس متردده ... توها البنت بتي صوب امل الا و الابله تدش و البنت من جافت الابله غيرت رايها و ردت مكانها ... كل هذا و امل عشرين الف سؤال و سؤال يدور ببالها عن فاطمه اللي كانت تطالعها من الصبح ...
*~*~*~~*~*~*
%% الساعه 11:20 الصبح %%
"تراه رمس هله قريب و ان شاء الله عقب العيد بتسمعون خبر خطوبتي"
قالتها بكل فخر و بصوت عالي لدرجة انه كل اللي موجودين في اللاب سمعو صوتها و من ضمنهم جليثم و الريم اللي ما قدرن يركزن ع البروجكت اللي يالسات يسونه من كثر ما تنغزهن بالرمسه ... تضايجت الريم وايد من نغزاتها على عكس جليثم اللي على الرغم من انها تأذت منها لكنها كانت مطنشه ... اخرتها الريم ما قدرت تستحملها اكثر و طلبت من جليثم يظهرن من اللاب ... جليثم رضت على مضض و هي مب مستوعبه سبب ضيجة الريم الزايده عن اللزوم ... و من ظهرن من اللاب سارن يتمشن في الكليه ...
جليثم و هي تطالع الريم اللي الين الحين الضيجه ما فجت عنها: انزين خلاص ظهرنا عنهن اشحقه مبوزه بعد؟؟
الريم: قهرتني الـ ... "قطعت رمستها قبل لا تكمل" استغفر الله ...
جليثم: ما عليج منها ما تستاهل تضايجين عشانها ...
الريم: ودي ازغدها ع الرمسه اللي قالتها ... "قالت و هي تقلد هند" اون عقب العيد بتسمعون خبر خطوبتي ...
جليثم: هههههههههههه نفاد ينفدها ...
الريم: ما جفتيها كيف تستهزئ ولا جنها مطلقه من اول يوم مالت عليها و ع ويهها ...
جليثم حست سجاجين تقطع قلبها: الريم خلاص ما يحتاي تحرين نفسج عشانها ودريها عنج ...
الريم تنهدت بضيج: محد قاهرني الا هالغبي اللي يودر الناس السنعه و يراكض ورى وحده مثل هاي ...
جليثم باستغراب: شوووو؟؟
الريم و هي تحاول تتهرب: ولا شي ولا شي ...
جليثم: بلاج رمسي تراج خوفتيني ...
الريم: والله ما فيه ... تعالي ندورلنا مكان هادي نقرا فيه ولا نضيع وقتنا في الرمسه اللي ما تفيد ...
جليثم تنهدت: على راحتج ...
*~*~*~~*~*~*
%% الساعه 4:00 العصر %%
نش اعتدل بيلسته و غمض عيونه بالقو على امل انه ينسى التفكير في هالسالفه اللي هدت حيله من كثر التفكير ... اليلسه في البيت بليا شغله ولا مشغله مخبلتنه ... نص ربعه اشتغلو و البركه بالواسطات هالشي اللي كان قاهرنه ... الواسطه ... مع انه عايشه كانت عندهم في البيت امس و بغا يذكرها بسالفة الشغل اللي الظاهر انها نستها بس نسى يذكرها بهالشي ... تنهد بضيج و التفت صوب السنطور الميلس ع الكوميدينه ...
علي بخاطره: ما بقى شي على الاقامه ... يالله الحق ع الصلاه ...
توه بيدش الحمام سمع صوت هرن عند باب البيت ... شك انها ممكن تكون عايشه يايه ويا ريلها ... دش الحمام يتيدد لبس ثيابه و ظهر ساير برع ... و هو ظاهر تفاجأ بسياره غريبه موقفه عند باب بيتهم و امه عندها ... شوي الا يجوف حميد نازل من السياره و ابتسامه عريضه مرسومه ع ويهه ... قرب صوبهم علي و علامات الاستغراب باينه ع ويهها ...
حميد بوناسه: شو رايك بالسياره؟؟
علي باستغراب: سيارة منو هاي؟؟
ام حميد قطعت على حميد قبل لا يرمس و وجهت رمستها لحميد: ما خبرتني من وين لك الفلوس تشتري سياره يديده؟؟
حميد تحرطم بصوت واطي و رد على امه: انزين دشي داخل بفهمج كل شي ... تبينا نتم واقفين جي برع؟؟
دشت ام حميد البيت و هي تفور من الغيض على حميد اللي كل يوم يفاجئهم بشي يديد و كالعاده ما يطيع يخبرهم من وين له الفلوس عشان ياخذ كل اللي يباه ...
علي: انا بسير اصلي الحين بيقيم الصلاه ... بتي؟؟
حميد: لا سير انته بصلي في البيت ...
علي: انزين برايك ...
سار علي المسيد بسرعه لانه قام الصلاه و هو بعده واقف عند باب البيت ... تم حميد يتبع علي بنظراته و هو مستغرب من التحول المفاجيء اللي طرأ عليه في الفتره الاخيره ... تنهد بضيج و دش داخل و هو يدعي انه تمر الازمه بينه و بين امه بسلام ...
*~*~*~~*~*~*
%% الساعه 5:55 المغرب %%
دارت بعيونها على كل الموجودين و لاحظت غياب واحد فيهم ... هو كان وياهم و هم يفطرون من ردو عقب ما صلو المغرب و هو محد ... ثواني الا و خالد داش عليهم ...
شمسه: وينك انته هالكثر تصلي؟؟
خالد: توني ياي من المسيد ... ليش فيه شي؟؟
شمسه: لا ماشي بس استغربت ما شفتك موجود ...
خالد ابتسم بهدوء: لا تستهمين عليه تراني جي ولا جي بردلكم ...
شمسه: احطلك شي؟؟
خالد: لا بروحي بغرف ...
ساد الصمت فتره ... نوف ضربت ريل اليازيه اللي كانت عدالها عشان تنبهها ... اليازيه التفتت صوب نوف و هي مغيضه بس ما بغت تنازعها جدامهم ...
نوف و هي تصاصر اليازيه: شو بلاه خالد؟؟
اليازيه: و انتي اشلج؟؟ كلي و بلا سخافه ...
نوف: والله صدق ما اتمصخر ...
اليازيه و هي تطالع امها اللي خزتها بنظره: بس صخي ما فيه شي ...
شمسه لعايشه: شحالها امج؟؟
عايشه و علامات الاستغراب على ويهها: بخير الحمدلله ... سلمت عليج ...
شمسه: الله يسلمها من الشر ... رديلها السلام ...
عايشه: يبلغ ان شاء الله ...
شمسه: شو الصيام وياج؟؟ ان شاء الله زين؟؟
عايشه بدت تستغرب اكثر و اكثر من اهتمام عمتها المفاجئ: تعب شوي بس الحمدلله مب لذاك الزود ...
شمسه: لا تصومين دام انه تعب عليج ...
عايشه: ما يخالف عموه اقدر اصوم ...
شمسه: على راحتج بس ديري بالج على نفسج و ع الياهل زين ...
عايشه ابتسمت: ان شاء الله ...
من عقبها ساد الصمت و الكل ارتسمت على ويوههم ملامح الاستغراب من صفوة النفوس بين شمسه و عايشه و خصوصاً سالم اللي كان متوقع انه امه تنجلب عليها في أي لحظه لكن كل توقعاته خابت عقب ما صخت امه بدون لا تقول شي لعايشه ...
عقب ما خلصو الكل من الفطور انسحبو لحجرهم يريحون بلا ازعاج و صريخ و الفضل طبعاً لخالد اللي تمت نوف تحايل فيه عشان يعطيها وايرات التلفزيون لكن بدون فايده ...
|| في حجرة سالم ||
تمت عايشه تتأمل سالم و هو غارق في افكاره ولا منتبه لنظراتها الموجهه له ... بغت ترمسه ف موضوع علي اللي نسته من زمان و هي مب عارفه كيف تبدا بالموضوع ... سالم التفت لها و لاحظ التردد المبين على ملامحها ...
سالم: امري تدللي ...
عايشه: اممممم الصراحه بغيتك ف موضوع مهم ...
سالم: و انا بعد اباج ف موضوع وايد مهم ...
عايشه: انزين قول ...
سالم: لا اول انتي ...
عايشه بتردد: انزين ... اخويه علي ...
سالم بقلق: شو بلاه؟؟
عايشه: من فتره رمسني و قال لي انه يبا يشتغل و مب عارف وين يسير ... يقول قدم ف وايد اماكن بس محد رد عليه ... و انته تعرف مب بسهوله الواحد يقدر يحصل شغل و خصوصاً بشهادة الثنويه ...
سالم ابتسم: افا عليج يام خليفه وصلت الرساله ... و اذا يبا يشتغل وياي ماعندي مانع ...
عايشه: تسلم يا بو خليفه ...
سالم: يسلم عاليج و مغليج ...
عايشه: انزين الحين دورك ... قول اللي عندك ...
سالم اعتفست ملامحه: انزين ... شو رايج نطلع ف بيت بروحنا؟؟
عايشه باستغراب: ليش؟؟ و بيتكم بلاه؟؟
سالم: ما بلاه شي ... بس انا اباج تاخذين راحتج اكثر ...
عايشه: بس انا مرتاحه هني ...
سالم: أي راحه هاي اللي ترمسين عنها ... ادري انه وجود ...
عايشه قاطعته: محد مضايجني ... انته تتوهم اشيا من عندك ... و بعدين يهون عليك تفرني ف بيت بروحي؟؟
سالم اونه زعل: افااا و انا وين سرت؟؟
عايشه: انته اكيد بتكون لاهي ويا شغلك عقب ... و انا ماحب ايلس ف مكان بروحي ...
سالم: انزين ما يخالف ... الصبح تسيرين بيت امج او حتى تين هني مافيها شي ... تراني الا الصبح مابكون موجود ... و انتي تدريبي ماظهر وايد المسا ... شو قلتي؟؟
عايشه: انا اقول لو تأجل هالسالفه شوي وايد احسن ...
سالم تنهد: خلاص على راحتج ...
*~*~*~~*~*~*