[القنصل السوري]

اقتباس:  المشاركة الأصلية كتبت بواسطة الجبل الاسود     القنصل السوري لو هالمقالة كتبتها سعودي ضد مصر كان شفنا ردك غير وجلست تهاجم السعوديين وتطلع فيهم عيوب وبلاوي وجلست تعارض المقالة وبعدين مو هذا المصري كتب الاحقد على السعوديين ولمعلوميتك المصريين مايرضون احد ينتقدهم حتى لو كان فيهم عيب فهم يشفون نفسهم الافضل

[align=center] يالجبل الاسود اسمح لي اني احييك على غيرتك على وطنك انت الحقيقه انسان متحمس وهذي ماهي عيب بلعكس هي شي يشرف وانا اذكر موضوع الخادمات المصريات اللي ناقشناه انا وانت وبعض الاعضاء وكنت خير انسان واختلفنا في شي كثير بس هذا لايفسد للود قضيه بس الله يرحم والديك ويجمعنا بك وبهم في جناته..
اسمح لي اني اطلبك طلب انك تحكم عقلك قبل عاطفتك وتنظر للحياة كلها من منظار العقل والتفكير السليم بعيد عن العواطف والتشنجات اللي بتتعبك انت اولاً ومارايح تطلع منها بنتيجه
مو مهم وانا اخوك من اللي كتب عن الثاني المهم انا انظر الى الكتابه هل فيها شي صحيح او لا اذا كان صحيح وكلام واقعي اعترف بالكلام واحاول اني اتجنب كل مايسيئ لي اولاً وقبل كل شي واذا كان الكلام غير صحيح فلايضر غير نفسه وديننا ياغالي هو مقياس التعامل بيننا ...
(رحم الله امرء اهدى الي عيوبي / والمسلم مرآ ة اخيه)
اخوي
المشكله انك لو تبغى ترد عليه الإساءه طبعاً رايح تقول له انتم يالمصريين فيكم وفيكم صح؟؟وانت الحين تقول المصريين مايبغون احد ينتقدهم لانهم يشوفون انهم افضل الناس طيب بس طبق هالكلام علينا وتلقانا مثلهم او اشد منهم مانبي احد يسبنا ونعتبر انفسنا شعب الله المختار
الشخص اساء الى نفسه قبل يسيئ لك يعني حنا بنصير نطبق المثل اللي يقول
((الا لايجهلن احد علينا ...فنجهل فوق جهل الجاهلينا))
ثانياً هل تتوقع ياغالي ان هذا الرجل عندما اجبرته الظروف للغربه لقى معامله كريمه وتقدير واحترام وعاش بسعاده وراحه هنا وراح يسب ؟؟
اكيد ان الاغلب انه لقى معامله اقل وصف لها انها غير طيبه وهنا المشكله اننا لازلنا ننظر للاخرين انهم اقل منا وحنا احسن منهم والامثله كثيره
اذكر اننا صلينا على احد الطرق وكان اللي بيصلي فينا مصري وقال له واحد من ربعنا من الباديه لاتصلي انت مصري وحالق لحيتك والانسان هذا رد عليه بكلمتين بس قال انا خريج الازهر واحفظ القران احسن منك والاسلام ماهو لك انت و..... وشد الكلام لولا ستر الله وتدخل الناس وهذا الرجل رفض يصلي خلف المصري
تعرف ايش اللي صار الناس كلها صلت خلف المصري وثلاثه ارباعهم سعوديين وبعد الصلاه المصري سلم وشاف الناس كلها خلفه ووالله انه لم يملك نفسه ودمعت عينه ..
بالله عليك لو ان المصري غلبته العاطفه وكان غير عاقل وغير حكيم هل تتوقع انه بيصلي على الاقل يطلع من المسجد وممكن يترك الصلاه نهائيا وهنا المشكله فالدين المعامله وانا اخوك ..وحنا نعامل الناس للاسف على انهم درجه ثانيه
تصدق اني قريت ان فيه شيخ مصري تحول الى احد المذاهب اللي تسب الصحابه بسبب انه لقى معامله سيئه من ربعنا عندما حضر لطلب العلم ببلدنا ورجع لبلده ومن هناك تعرف على ناس واقنعوه انه يروح يدرس في قم المذهب اللي قلت لك عليه ولقى معامله روعه وتقدير واحترام وبعدها تحول لمذهبهم و اصبح من اشد المدافعين عن هذا المذهب ؟؟ بالله عليك من السبب في اننا خسرناه بل كم من انسان انكفئ على نفسه وكان من الممكن يكون شي نافع للاسلام والمسلمين بسبب سوء معامله ..؟
اسف على الاطاله بس عموماً الموضوع بسيط ولايحتاج الى كل هذا التشنج ياغالي


لي عوده ان شاء الله اذا لم يقنعك كلامي ونتناقش حسب ماتحب
دمت بود[/align]