[أمــ الحب ــير]

[align=center]
مراحب خيووو عاشق ..

تصدق كنت من زمان أبغى أفتح موضوع مثل كذا بس خايف تصير فيه مشاكل وعصبيه من الأعضاء
لأنو مر علي السؤال هذا أكثر من مره وغير السؤال هذا فيه سؤال بعد مولاقي له اجابه ..

أنا ياعاشق لما كنت في أولى ثانوي جيت من الدمام و درست في بريده عشان ضروف صحيه صارت للوالده ولازم يكون أحد موجود معاها طول الوقت ومافيه غيري يدرس من أخواني ذاك الوقت ..
شائت الأقدار ودرست في ثانويه في الفايزيه 80 % فيها بدو يمكن عرفتها انت ..
المهم جلست في فصل متعدد القبائل وكل قبيله متشعبه بعد ..
اللي جالسين وراي كانو 2 واحد عنزي وواحد حربي واللي على يميني عتيبي واللي قدامي شمري
واللي جنبه رشيدي .. وربي كل اللي قلته حقيقه والله على مااقول شهيد ..
كيف أجتمعو مدري ..؟؟

أذكر العتيبي كان مقرود مره وكل حاجه يتدخل فيها ..الله يذكره بالخير..

لما صارت ميانه بيننا سألني سؤال بصراحه تفاجأة منه قال لي أنت منو ..؟؟
قلت فلان بن فلان ..
قال ونعم .. قلت ونعم بحالك

قال من وين ..؟؟ قلت له من الدمام
قال من وين يعني .... وشنت؟؟<< أنا على بالي كان يسأل من أي حي << صدق على نياتي ..

أنا على طول فهمتها وابتسمت ..
قلت له مدري ..!! ظحك بوجهي قال لاصدق قول وشنت ..

قلت له جد ابوي عتيبي وجدي عنزي وابوي شمري وانا حربي وفي الليل اقلب رشيدي ..

قال لي مجنون انت ولا بتجنني صدق قول وشنت ..
قلت ليش تسأل طيب ؟؟..<< أنا مومثلك ياعاشق أستحي لا اللي مايستحي لاتستحي معه ..

قال بس كذا .. قلت له كيف بس كذا ..<< مااخذت منه اجابه

المهم تعب وانا احوس له مخه قال تكفى بجد خل عنك المزح وقل لي وشنت ..؟؟

(قلت أنا من قبيلة الهواء) ...

قال كيف ..؟؟
قلت مدري أسأل وتدري كيف.. واذا عرفت تعال جاوبني على سؤالي .. اللي هو (ليش تسأل)..؟؟

راحت الأيام والرجال ماحصل أجابه مني وانا ماحصلت أجابه منه ...!!

المهم درست في المدرسه الترم الأول وبعدها تحسنت حالة الوالده و رجعت للدمام ..

مع انو أتوقع أنا أكثر مخلوق ينسى بالعالم لاكن ذالموقف مانسيته ..

لانو أول مره يواجهني ذالسؤال .. وغير كذا ليش سأل .. يعني لا أنا راح أفيده بحاجه او يستفيد مني ..

أرجو أني عطيتك حل لمشكلتك مع انو أنا متأكد السؤال هذا ماله حل بس أتبع طريقتي يمكن
تفك نفسك من اللي يسألك ..

تحملني شوي بقولك موقف صار لي ماراح تصدقه ..

كنت في سوريا قبل 3او4 سنوات تقريبا مع اهلي واخواني ..
المهم وقفنا راعي تكسي انا واخوي وزج اختي وركبنا معه ..
طبعا بعد السلام سألنا ..أنتو من وين .. وجلس يمدح ويعطينا من ذالمصريات باقي يقول السعوديه
أقدع ناس وهو سوري ..
وربي سألنا سؤال ماتوقعناه يسأل السؤال هذا أنا جلست أطالع زوج وأنفجرت ظحك ..
قال وش قبيلتكم ..؟؟
انا ماقدرت اسكت من الظحك صارو اللي معاي يظحكون علي ..
قال السوري شوفيه صاحبكم عم يظحك .. قال اخوي اساله ..؟؟

قلت أحنا كنا أوروبيين بس بسبب عوامل التعريه صرنا افارقه... قال كيف يعني ..؟؟

قلت له احنا من قبيلة الهواء .. قال شو هاد اول مره بسمع فيها ..
قلت له أحنى كنا بالمنفى لأنو جدي كان ملك وقلبو عليه الحكم مثل الملك فاروق ..
وذبحو كل قبيلتنا ماخلو فيها غير جدي وجدتي ورزقهم الله ابوي وبعدها توفو ورجع ابوي
من المنفى بعد ماسمحوله مجلس الشيوخ بدخول الدوله وتزوج وجابونا وبس هذي كل السالفه ...

أنا عارف انو طولت عليك وقلبت مخك بهذرتي وأرجو انك تعذرني ..

أيه نسيت أقولك أنا من قبيلة الهوا فخذ بريجستون ..هه

أنت ياعاشق وشنت ..؟؟؟هه

تحيتي لقلمك الرائع
[/align]