[شديد الملاحظة]

الأخت الكريمة : قصمنجية ..

اقتباس: بالنسبة لك أخ شديد .. أولاً مبروك الضيف و عساه خير خلف .. .

الله يبارك فيك ..

اقتباس: و الله يطلع أمه من باقي شرّه..

آمين .. ولو إن وقع هالدعوة كان قاسي شوي على نفسي .. لأني بصراحة طايرن به وجالس أكتب به قصيدة بعد .. هــه

اقتباس: بالنسبة للأسم خصوصًا ( الذكر ) خل الأسم ثقيل يستطيع ( شيله ) فيما بعد

اقتباس: بعدين فيه حاجة في كثيرًا من الأحيان قبل التسمية, لا يستطيع الشخص تقبل أي أسم خصوصًا إذا ما شاف المولود( يعني المفروض يجزم الواحد قبل يجيء) يبدأ كل أسم يظن أنه ليس مناسب له,

المشكلة عندي إن الاسم يتنازع تسميته أكثر من شخص .. أنا وزوجتي وأبوي وأمي .. وطبعا الملاقيف إخوتي والعيارين أقاربي وخوياي ..كل واحد يبي نصيبه من الكعكه .. طبعا راح تقولين لي أجل أنت وين دورك يالثور .. ! أنا دوري طال عمرك أغتصبه أبوي بتسمية الولد الأول وهذا الثاني .. الأول صراحة ماكنت مستعد أزعل ابوي ولا حتى أخالف رغبته بتسميته .. أما الثاني قلت خلاص أبي أمارس دوري ...اعترضت زوجتي علي وطبعا هالاعتراض مستمر حتى قبل ماتحمل به .. طبعا راح تكلمينن عن أهمية التوافق بين الزوجين واتفاقهما على اسم معين لكن وش الدبرة إذا ماحصل التوافق على الاسم !؟ أفرض رأيي بالقوة !؟ طيب وذا ماكنت واثق من سلامة اختياري وخايف يجي احد يوعوع به وخاصة زوجتي اللي راح تعتبر اني اغتصبت حقها بالتسمية بعد ماعطيتها وعد أنه راح يكون لها الدور الأكبر بالتسمية !؟ أكيد ماراح ترحمني من الزن على الدماغ خاصة بعد تجربتي مع ولدي الأول ..! وهي كوم وشلة الملاقيف كوم .. خليه على ربك بس .. تقولين الولد ولدهم ! يحددون لي اسم ويقولون وراه ماتسميه تسذا وش تبي بهالاسم !؟
وععع !؟

اقتباس: هو مناسب في كثير من الأحيان و لكن يحتاج جزمة..

فعلاً ... خاصة لما تكون مقاس 48 على روس العيارين ..

اقتباس: بالنسبة للمدة الناس هالحين هابين بتطويلها و أنت ناوي تقصرها ..؟!

اللي إيده بالماء موهوب مثل اللي إيده بالنار ..

اقتباس: لكن إذا كنتم تنوون تقصير المدة جيب لها خادمة _ إذا لم يكن عندها في الأساس _ و إذا في حالة وجود الخادمة

موجودة ...

اقتباس: و أم العيال ترغب في التواجد عند أهلها فالأمر لها لأنه كما يقال ( ريحة الام تلم ) يعني المرأة تمر بحالة نفسية بعد الولادة أظنك لا تجهلها , هي أشد من الآلم العضوية, و هو ما يعرف طبيًا ( اكتئاب ما بعد الولادة)

المشكلة في هالاكتئاب ان الزوج يدفع ضريبته أحيانا حتى وهو ببيته .. يالله سترك ! تعال ودن .. ودي أطلع .. مليت ...! أحس صدري ضايق وماغير أصيح .. تعال در بي بالسيارة على الأقل مادري وش بي !

وبالنسبة لريحة الأم . مو مشكلة نطلب من الأم ماتسبح كل الأسبوع الأول لما تطلع ريحتها . حنا مانقول اسبوع واحد . خليها اسبوعين ..

اقتباس: لا تحسبونهن رايحات يتونسن و ألا يطقنها سواليف مع اهلن, اسألوا الحريم ترى أكره ما يشوفن فترة (النفاس) لأن حنا بصراحة لدينا جهل عظيم في التعامل مع الأمهات في مشاكلهن ما بعد الولادة, و أول هالجهل اللي يحطون دورية الخميس عند النفسا..!!! و الداخل و هالطالع ..!!! الغريبة أن كل الحريم ما يحب أحد يزورهن, و كل الحريم يزورن ..!!!!!!!!!!

يُنقل للمعنيين بالأمر لإبداء وجهة نظرهم أو بمعنى أصح وجهة نظرهن ..

اقتباس: و من ناحية الزيارات لا تصير لزقة, ترى يضايقونن بعض الرجال خواتي, خل بالفترة ثلاث مرات و صلى الله و بارك ..بعدها بينكم اتصالات..

أوف ! على هالحالة أنا باتيكس لأني قضّيت كل هالزيارات بأول اسبوع .. هـه ! مافي خيارات ثانية طال عمرك !؟

اقتباس: و لا تقطع من ناحية الصرفية عليها و على عيالك أكرمهم عند خوالهم..

أبشرك ماعليهم قصور .. بس اشلون تبين أنفذ طلباتهم المستمرة واليومية وبنفس الوقت تحصرين زياراتي بكل الفترة ثلاث مرات بس ؟

اقتباس: الوالد عندنا يسفل برجال بناته اللي يجيب شيء

حتى انسباي يبدون رفضهم خاصة وأنهم أثرياء .. بس المشكلة إن العادة تحكم وبعدين اشلون ما أجيب لهم وعدلاي كلهم يجيبون !؟ الناس ماترحم وعيونه نقّاده ! خاصة وانه بعد الله مغنيني ! لكن العادة السيئة هذي ترتب التزامات مادية حتى على المعوزين علشان يجارونها !

اقتباس: في المقابل أخواني أوقات سفرهم ناهيك عن فترة الأقامة الأربعينية.. يكون أجود من الريح المرسلة عليهم .. يعني كل الأمر أنه يبي يكرم عياله ... أحس المسأله هذي فيها أكرام .. أنا أأيدها أكثر من الهدايا و غيرهن.. بعدين عيالك لا قالوا هذا من أبوي ترى له لذة لو هي كيسة فيشار.

فعلاً ... كلامك صحيح لكن في نقطة مهمة هنا أحب أشير لها .. إن غالبية شيباننا يتعاملون مع المولود القادم إلى بيتهم على أنه ولد الناس مو ولدهم يعني الاحتفاء بالمولود الجديد احتفاء قاصر ( هذا إن وُجِد )باعتباره ولد بنت وليس ولد ولد .. واللي راح يشيل اسمهم مو مثل اللي ماراح يشيل اسمهم ..

يقول شاعرهم :

بنونا بنو أبنائنا وبناتنا ...... يلدن أولاد الرجال الأباعد

اقتباس: نرجع بعدين لباقي النقاط, بصراحة مهمة ..

بانتظارك ..

تقبلي تحياتي ..