[آمـــال]

الأخ شديد الملاحظة

ألـــــــف مــــــــــبروك المولود اللي بدون اسم



بالنسبة للفترة هذي والعادات المصاحبة لها حبيت أقول لكم عن وضعي

فأنا لي أخوات متزوجات نصف درزن >>قولوا ما شاء الله

وأحيانا تكون فترات الولادة متقاربة.. يعني قد صار النفاس ثمانين يوم >>ليتنا على أربعين

بعد ما طلعت وحدة وراحت لبيتها ولدت الثانية..


وحسب ما تعودنا إنها تجي من بيت زوجها بثيابها وثياب عيالها بس

يعني سرير أو مفرش أو قمصان الرضاعة هذا كله علينا وكل وحدة مفرشها يختلف عن الثانية>>الله يعين

ولا يهم أفرح والله إني أخدمهن لكن .. حالي أنا بالفترة هذي

ما أفكر إني أطلع من البيت لغير الدوام لا عزيمة ولا سوق ولا غيره >>تقل أنا اللي والدة

ولا بد تكون النفسية زينة يعني أضحك وأسولف لو ما ودي علشان أختي الوالدة ما تضايق

وعادي جدا تجين هوشة بدون سبب لأن النفسية تعبانة وهي بحاجة لراحة

وطبعا عيالها أحيانا وخاصة الأيام الأولى يصيرون بحلوقنا يعني نبعدهم عن أمهم علشان ترتاح


طيب... أنا متى أرتاح..!!!!؟؟؟؟؟؟


إذا جيت من الدوام أبي أرتاح آخذ عيالهم وألبسهم وأحيانا ينامون عندي لكن بعد جهد جهيد وفك هوشات وغرابيل

وبعدين.. العصر لازم أقوم بدري ويصير كل شي جاهز

ألبس أنا وألبّس الصغارين

وأجهز القهوة والحلا والشاهي وووووو......

وبعدين.. أجلس أنتظر الضيوف وطبعا الضيوف قليل منهم اللي يعرف الأصول ويكلم قبل ما يجي

يعني ما ندري يبي يجي أحد وإلا لا..؟؟

والمعتاد عندنا إنه كل يوم فيه ضيوف حتى وقت العشاء >>هذولا بس اللي يبي يسيرون

وقت الضيوف لابد من التقديم اللي على سنع يعني وقّافي على روسهم وهم يتقهوون أصب لهم وأشوف رغباتهم شاهي زنجبيل نعناع سكر أو بدون


وطبعا لازم أكون موجودة علشان أضيفهم

وبعدين.. العشاء وبعد العشاء غالبا يجي زوجها ويبدأالاستعداد له قهوة أو عصير مع شي يحرك الضرس ويجلس لحد ما يطيب خاطره

وبعدين.. يجي وقت النوم يلبسون الصغيرين وينامون

أبدأ أنا بأشغالي يا إما أشغال الدوام أو أشغال البيت ولا أنام إلا بعد منتصف الليل

هذا إذا كان الضيوف اللي جايين مسيرين فقط وإلا لو كانوا يبي يتعشون اختلف الوضع..>>اضطر للغياب

يعني حالة استنفار بالبيت..

وبآخر أيام النفاس تبدا تطلع للسوق وطبعا البزارين تخليهم وكل يوم سوق لحد ما تنتهي الأيام

وبعدين.. تروح لبيتها..الله يساعدها..

وبعضهن إذا جت تسافر أو تروح لعزيمة جابت الصغير عندنا لأنه ما يفهم ويبلشها وأريح لها إنه تخليه عندنا..


طيب وأنا ..؟؟؟!!!!!!!!!!!!

لا أحد حس بمعاناتي ولا أحد داري عني..


يعني إذا كنتم (يالرجال) تعانون .. فأنتم فيه مقابل جاكم عيال

بس حنا نعاني دون مقابل إلا من رب العالمين

** لم أكتبه تذمرا وإنما وصفا للحال فكلانا يعاني..


ترا جاني ما جا شديد الملاحظة بديت أهذر وهذيت المسبحة..

لكم خالص امتناني وشكري


أستودعكم الله.