[align=center]والان كما وعدتكم .. راح تكون ضيفتنا لهذه الليلة هي المتألقة ( جندوانا ) .. [/align][align=center]
وهذه هي أجوبتها :[/align]
[align=center]
1 / كيف تقضي يومك برمضان ..؟ بإختصار
انام بعد الفجر ثم اقوم الساع 2 ونص لان المطبخ ينادي اول مااقوم اقعد اقرأ شوي بعده ادخل المطبخ ومااطلع منه الا المغرب ونفطر تمر ومويه وقهوه واالي يبغى الشوربه .. بعد الصلاة نحط السمبوسه وخواته.. بعده جلسه مع الاهل .. ثم انام لمين بعد التراويح والسنه هذه جايه ع بالي اصلي التروايح بالمسجد .. لاني عارفه لو اقعد في البيت كان قعدت ع النت بعده اجي من الصلاة واقعد شوي اسولف بعدين امسك لي كتاب اقراه لمين اشب ع العشاء إذا كان يومي وإذا مو يومي اكمل الجلسه مع اهلي ونتعشاء بعده ادخل شوي ع المسن لزوم الحبايب نسلم عليهم من شان مايزعلون بعدين لا قرب السحور اقرى كمان
2/ ماهو الطبق المفضل لديك على مائدة رمضان ؟
والله مافيه حاجه محدده .. بس احب تكون ع السفره السمبوسه والشوربه والتوت لو انه يجي ايام واحيانا يمر رمضان كامل مااكلت فيه السمبوسه .. بس احبه يكون ع السفره
3/ موقف حصل معك "طريف" وأخر "محرج"..في رمضان اللي راح ؟
والله المواقف كثيره . بس اغلبهن مشفره .. واخاف اقولكم مواقف همينن ماتضحكون بعدين اقعد القط وجهي
خذ هذا طازج
المحرج /امس كلم اخوي فواز يسلم ويهنينا برمضان واول ماقلت نعم واقعد اصيح ع قوله الماما كأنه مقطوع منك لحمه .. بصراحه انا مافشلت من فواز لانه متعود .. الفشيله من اهلي قاعدين نتقهوى واسولف واضحك واول ماسمعت صوته بكيت ..
الطريف / رمضان اللي فات واشوف الجوال 3 ونص
وافز لان امي لو مااقوم كان تسوي عني الشغل .. واقوم واغسل وجهي وانزل ونصي نوم عين مفتحه والثانيه مغمضه وانزل بالصاله اثاري نايف فيه جالس .. واقعد ع الكنب اتمغط وثواب يجي وثواب يروح ونايف يأشر لي شوي انا مدري وش السالفه عيونه صارن حمر من الحراره .. يوم ناظرت ودققت وش يبي ذا بس يأشر .. اثاري بالصاله واحد يسوي المودم والاسلاك .... ونايف يأشر مايبي الولد ينتبه اني بالصاله يخاف يلتفت .. انا اول مانزلت احسبه فواز لان من ورى كأنه فواز .. واجي والله وانط من مكاني وادور اقرب فتحه بالصاله واثاريه دورة المياه الله يكرمكم وادخل فيه حوالي الساعه .. المشكله عقب ماطلعت وشف الساعه اثاري توه تتم ثنتين يعني المنبه مخترش
الولد احس انه مستحي مرررررره هههههههههه
4/ وين تقضي رمضان هذه السنه ؟
اممممممم شف هذي السنه ببريده مو مثل كل سنه بالهند ............< كذابه
5/ هل محدد لك وقت لدخول النت في رمضان ....؟
والله ع حسب الفرغه لاني محدده وقت للقراءه بالكتب بدل النت
6/ شخص وجوده على سفرة رمضان غير..من هو؟"غير الوالدين..لانهم هم الاساس"
يوووووووه اكيد فواز يابعد طوايفي .. مشتاقه له .. ومشتاقه لحركاته بالشوربه .. لابدا يتفنن ويرسم بالشطه ع الشوربه قلب او حرفه او وجه ..
ع فكره تراه هو استهتاري بس وقت الجد يعجبكم
كمان كان يدخل معنا للمطبخ ويساعدنا انا وخواتي ..
7/ وش هالطبخه اللي تعرفين تطبخينها وتحبي دايم تطبخيها برمضان ..؟
اعرف كل الطبخات بس انتوا طبوا وتخيروا .. بس اهم شيء مايكون بالكاتم ولا يكون مطازيز او جريش
8/ ماهي الوجبه المفضله لديك عند السحور ؟
مويه وتمر واحيانا قهوه
9/ ماهو افضل برنامج إذاعي أو تلفزيوني لديك .؟
بصراحه حاليا مافيه شيء محدد
10/ماذا تتذكري من ايام الطفولة في رمضان .؟
كانوا اهلي لاقيننا انا واختي وعمتي وعمي اللي كبري .. كانوا يخلوننا نعبي ترامس للتراويح والقيام .. اذكر انهن 12 ترمس يعني لاصار بالعشر يصيرن 24 ترمس المشكله انهن كبار .. كنت ازمل لرمضان من شان الترامس .. بس اهلي كانوا يزرقوننا ويشحطوننا وجدي يعطينا خمسه اللي يشيلهن .. همينن انا اشيلهن وانا احلطم .. رحمةٍ من ربي اللي ماشرقوا الجماعه
11/ وجهي الدعوه لثلاثة اعضاء من المنتدى للفطور معك ؟
والله كل الاعضاء والعضوات .. تعالوا اباص عاشق
12 / ما هي احلا لحظآت الصوم ؟
تبون الصراحه .. قبل الاذان بشوي هذا خلاص افقد السيطره ع نفسي من الجوع بس بعد ماافطر احس بلذته
13/ كم ختمه من القرآن تستطيعي ان تختمها خلال الشهر الفضيل ؟
وحده الله يخلف ..
14/ هل تتذكري اول رمضان قمتي بالصيام فيه ؟
والله انواع الدجه بي بس الله يتوب علي .. اذكر اني اصوم همينن اقعد ورى البراده واشرب ما .. شيء بالنفس ..كذا بليس لاعبن علي .. طول اليوم صايمه بس لاقرب الآذان شربت ملا البياله ماء .. كذا عناد
حتى الصلاة اصلي همينن بالركعه الاخيره اتلفت واقطع صلاتي ... هههههههههه
15/ كلمة أخيره تودي التكلم بها ..؟
عاد جينا للجد .. نعدل الجلسه ونبعد الخصله كنايه عن الشماغ هههه
تبيقى الكلمات عيوننا التي نطل بها على احبابنا ولغة تواصل بيننا وبينهم فنحن مجرد ارواح تتلاقى حيث لاوجود لاجسادنا بينهم فإن كانت هناك من كلمة فأقول فيها : هنيئا لكم شهر الرحمة والغفران شهر العتق من النيران.. فقد روي علي قال : كونوا لقبول العمل اشد اهتماما منكم بالعمل .. الم تسمعوا الله عز وجل يقول ( إنما يتقبل الله من المتقين )
فرمضان فرصه للتغير من السيء للحسن ومن الحسن للأحسن .. وهذا لن يكون إلا لمن عزم الامر واجتهد وبادر .. فهو شهر القرآن فلنغتنمه بكثرة تلاوة القرآن وتدبره .. ولا نضيع تلك الفرصه بمشاهدة مسلسلات او سماع مايغضب الرب .. فالنفس إن لم تشغلها بالطاعة شغلتك بالمعصيه .. .. فوالله اننا لنحسد على ادراك رمضان فغيرنا ممن هم تحت الثرى يتمنون لحظه يذكرون بها الله ويستغفرونه .. فقد روي ان النبي صلى الله عليه و وسلم صعد درجات منبره الثلاث وكان في كل درجة يقول آمين فتعجب الصحابة رضوان الله عليهم وسألوه فقال عليه الصلاة والسلام: أتاني جبريل فقال يامحمد: رغم أنف عبد أدرك رمضان ولم يغفر له ....الخ
فها نحن ادركنا رمضان .. لكن أي نية بويتت لقضاء اوقاته ..؟!
فكلما خبت همتكم فتذكروا قوله (ايام معدودات )
وكل رمضان وانتم قناديل تضيئ في حالك الدرب [/align]
[align=center]*********************[/align]
أشكرك جندوانا على تلبيتك لدعوتي .. أتحفتينا بالاجوبة ..!