مدري وش جاني الايام هذي بكثرة الاحلام
قبل خمس أيام حلمت أنه أحد الاعضاء أنتقل و الى رحمة الله ..! عاد انا كل ما اشوف المعرف موجود بالمنتدى من ضمن المتصلين .. أقول بيني وبين نفسي ما يدري أني محلم فيه أنه ميت ههه .
وقبل يومين حلمت أن اثنين من أصدقائي وبنفس الوقت يقربون لي .. أنه دخلوا الجنه ..! بس ما راح كامل الحلم لان الحلم طويل وما يصلح اقوله علشان محد يفسره ..! هههه
وأمس حلمت بجدي الله يرحمه اني جالس عنده وكان معنا عمي مفسر الاحلام وكانت عمتي جالسه معنا .. عاد الحلم طويل ما يصلح أنه أقوله .. علشان محد يفسره ههه .. عاد متردد أقول أتصل على عمي وأقوله اني حلمت فيك انت وجدي وعمتي .. لكن متردد .. اخاف يكون الحلم تفسيره شين .. عاد معروف ان الحلم غالبا أذا فسر يقع .. لكن أبعد عن الشر وأغني له .. ما يحتاج أفسره ههه ..
أتذكر قبل 9 سنوات بزعت وقلت لعمي حلم .. عاد يوم فسره لي .. قال تراك تبي تخسر بحدود 2500 ريال الى 3000 ريال خلال الشهر هذا .. وجي صدق يقع تفسير الحلم .. ومن بعدها قلت التوبه أني أفسر حلم ..!
والشئ المضحك . أنه قبل خمس سنوات كان فيه زواج أختي وكان واحد من أصدقائي جالس عندي بقاعة الزواج .. عاد جاء عمي وسلم علينا .. عاد يقولي صديقي محلم انا قبل كم يوم وودي اخليه يفسر الحلم .. وجي أقول لصديقي شوري عليك لا عمرك تفسر الاحلام . ولا تقوله الحلم .. عاد هو بزع وجي يروح لمه ويقوله الحلم .. عاد يوم فسره صار تفسير الحلم شين .. ههه .. وجي يتحسف أنه قاله الحلم ههه ...!
نصيحه مني لكم لا أحد منكم يفسر أي حلم يحلم فيه ..! علشان ما يصير تفسير الحلم شين او يصير تفسيره ضدكم ..!
[align=center]******************[/align]
[align=center]
أمس وأنا أتابع طاش ما طاش .. جلست أضحك عليهم وعلى العجوز ( رقيه ) حتى مطبق لهجة العجوز .. وصاير ابو مزيني يتكلم لهجة عجوز قصيميه ههه
وبعد ما خلصت .. فتحت على قناة المجد .. ولقيت برنامج أسمه ( أكثر من أسره ) لكن صدق عجبني البرنامج هذا .. كانوا مستضيفين . الدكتور ( عادل عبدالجبار ) الاعلامي والتربوي المعروف ... وكانوا بعد مستضيفين . الدكتور ( غازي الشمري ) المستشار الاسري ..
وكان اللقاء جميل وممتع .. كان مقدم البرنامج مره يسأل الدكتور عادل ومره يسأل الدكتور غازي . وكانت كل الاسئلة أسئلة عامه ..!
عاد من ضمن الاسئلة اللي سأل فيها الدكتور غازي .. قاله المقدم اللحين الناس اللي تشوف برنامجكم وتشوف مشاكل الناس اللي يسألونكم فيها عن طلاق وعن ضرب وعن عدم نفقه وعن عدم ظلم .. ويقوله الا ترى أنه أصبح عند بعض الناس الاحباط .خاصة الناس اللغير متزوجين .. خوفا من الحياة اذا كانت كلها مثل هذه المشاكل ... قاله الدكتور عادل .. أيه لاحظت هالشئ هذا .. ويوم لاحظت الشئ هذا يقول حاولت أني أحط حلقات عن التفاؤل بالحياة وعن أيجابيات الحياة .. علشان ما يصابون الناس بالاحباط .. عاد يقول الدكتور عادل .. يقول كنت قبل لا أملك المال حتى أأكل .. لكن من بعدما أصبحت مستشار أسري وبديت أنفع الناس .. يقول جاني رزق من غير ما أحس .. كلها من فضل الله ثم بفضل دعوات الناس لي .. ويقول حتى أنه أصبح عندي المال الكثير . ويقول حتى أني اصبحت أملك اكثر من بيت وسيارتي اللي أسوقها الان مشتريها ب 400 الف ريال .. كلها بفضل من الله ثم بفضل دعاء الناس لي .... طبعا فيه أشياء كثيره مثل مواقف وأشياء ثانيه لكن ما أتذكرها ..!
ومن ضمن الاسئلة التي سئل فيها الدكتور ( عادل عبدالجبار ) .. طبعا ابكتب مقتطفات عن بعض الاجوبة اللي قالها ... يقول كنت يوم أنا صغير كنت أشوف بقناة الاولى برنامج للشيخ اللحيدان ويقول وجي التفت على أمي الله يرحمها وقلت لها قولي امين أني اصير أطلع بالتلفزيون .. يقول وجي تقول أيه بس ما تحس أنه صعبه تطلع بالتلفزيون .. يقول يا يمه مب ضارك شئ أنتي بس أدعي الله .. يقول دعت لي .. يقول دخلت للمتوسطه ولا تحقق هدفي ودخلت للثانوي ولا تحقق هدفي ويقول ودخلت للجامعه ولا تحقق هدفي . ويقول لمين الحمد لله بعد ما تخرجت ومرت السنين تحقق هدفي وأصبحت أعلامي ..!
ومن ضمن الاشياء اللي قالها .. يقول كنت قبل يوم كنت أدرس بالمعهد العلمي .. يقول كنت أرى مع تحريم جميع التصوير بجميع أشكالها .. وكنت أحارب اللي يصورون وأقولهم حرام .. ثم مع مرور الوقت تغيرت قناعاتي .. حتى عرفت أن التصوير هو رسم الانسان هو المقصود بالتحريم .. ويقول حتى أني سألت أحد المشائخ ورأى أن التصوير الكاميرا عادي ..!
كانت الحلقه طويله وفيه أشياء قولوها عن حياتهم وعن مواقفهم .. لكن لو قلتها تحتاج لوقت .. وطبعا بعض الاشياء ناسيها ..!
لكن مثل هذي القاءات دايم أستفيد منها ..! وأستمتع فيها
أنا من زمان كنت أقول لو خيروني وقالوا لي أيش ودك تكون .. كنت أقول ودي أكون مستشار أطباء .. أحس أن المهنه هذي قووووية ..
وعلى طاري مستشار الطبيب .. أتذكر وحده مستشاره سعوديه مستشارة ولاده بالرياض يعرفونها أهلي .. ويقولون وظيفتها غالبا تكون على الهاتف وهي جالسه بالبيت يتصلون عليها الطبيبات ويسشيرونها وهي تعلمهم الطرق الصحيحه .. هي جالسه بالبيت .. لكن تروح أحيانا أذا كان فيه عملية طارئة .... ( أحس أن المهنه هذي . له أهميتها . يكفي أن الواحد أذا صار أستشاري طبيب . يكفي ان الطبيب هو اللي يبي أستشارتك .. وأذا شافوك الناس تحس بأهميتك كمستشار )
وفيه المستشار الاسري .. احس أن المهنه هذي حلوه لانك راح تكسب الاجر من دعوات الناس .. لكن أحس أنها مهنه صعبه صعبه صعبه وأنا أحيانا أذا دخلت لقسم الاستشارات أبقرأ المواضيع اللي في المنتديات .. عالطول أطلع لاني أشوف مشاكل الناس ثم يضيق صدري وأطلع عالطول من الصفحه اللي أنا داخلها ..!
[/align]
**********************