[align=center]مساء الخير للجميع :
اليوم كان موعدي مع أحد الأعضاء المحترمين .. لكن نظرا لأنشغاله راح تكون أستضافتي مع ( فديكا بريده ) .. وكانت أجوبة كلها تتسم بالصراحه .. وكم نقطة من أجوبتها شدت أنتباهي ..![/align]
[align=center]وأليكم هذه الأستضافة :[/align]
[align=center]بالاول اشكرك على الاستضااافه ويعطيك العافيه
وثانيا تقبلوا بساطتي بالردود لاني لو بهمق بنام يومين[/align]
[align=center]1 /كيف تقضي يومك برمضان ..؟ بإختصار
طبعاً سهره وهذا المعتااد اتسحر واصلي وانااام الى 4 ونص العصر اللهم اقوم اصلي وارجع اكمل
بعده اقراء اللي يتيسرمعي من القرآن لحد وقت الفطور قبل بنص اقوم اشرف وش نوع الفطور
لاننا موجهين الشغاله قبل رمضان ومعلمينه سالفتنا ولله الحمد مااخالفت التوجيهات للحين
ايه صح وابوي يكزن اجيب علاجه الله يشفيه هذا اهم مابالبرنامج خخخخ دايم انا اصير بوجهه
ومايقصر بالكز عاد بعدالفطور نشوف المسلسلات البايخه ماهنا تفرج بزياده لكن من عرض هاللي يتفرجون
واويتز على المنتدى ..
وبعده عاد صلاة تراويح ونقراء لنا كم جزء ونجيب باقي الفطور نلخف اللي ماانلخف
وباقي الوقت تسدح ماعندنا لاشغل ولا مشغله وقرق بالتليفون والا نطلع وينعاد اليوم ...<< ايقاله ماقرقت
2 / ماهو الطبق المفضل لديك على مائدة رمضان ؟
سمبوسه جبن .. وبيتزااء .. وتانج ثلاث ارباع الكاس ثلج ... اهم شي وغيره مايهم وجوده او عدمه عدمه ...
3 / موقف حصل معك "طريف" وأخر "محرج"..في رمضان اللي راح ؟
ممابالي شي والله خليته اخر سؤال ايقالي بتعصر بس مهنا شي ...
4 / وين تقضي رمضان هذه السنه ؟
واهنا غيــره...؟؟
القصيم _بريده _بيتنااا مهنا ولا نفكر بغيره ولو نصوم بغير ديرتنااا مايعتبر صياام بنظر الباشا ..
5 / هل محدد لك وقت لدخول النت في رمضان ....؟
تقدر تقول محدد مهنا وقت اصلا بالنهار مستحيل وبالليل الجدول مزحوم ندخل موايتز مهناااا دخلتن تسوى ...
6 / شخص وجوده على سفرة رمضان غير..من هو؟"غير الوالدين..لانهم هم الاساس" ولو تقدري صور لنا فطوركم ؟
اخواني هم اثنين مهنا غيرهم وحدن متغرب الله يرجعه بالسلامه ووحدن موجود احب يكونون متواجدين علشان يمدحون طبخي
هههههه لانهم شباب ويحبون الغريب فااتحمس لهم ..
والصوره اعفيناااا منه لان احس لو بصور بذاك الوقت بيجين طنازه
7 / ما هي الوجبة اللي تجيدين طبختها ..؟
بيتزااا .. بس احب الطبخات الخفيفه يامعجنات ياحلا وغيره مااهتم بطبخه ...
8 / ماهي الوجبه المفضله لديك عند السحور؟
يازبادي وخيااار والا لبن وتمر هذا سحوري ... << والا وش ناويه ..
9 / ماهو افضل برنامج إذاعي أو تلفزيوني لديك .؟
احب برنااامج خواطر على الـmbc هذا على الفطور ومسلسل ليلة عيد وغير مااشوف مااحب ارتبط بالتلفزيون لان طلعاتنا كثير ..
10/ ماذا تتذكري من ايام الطفولة في رمضان .؟
اللي اذكر اني اتعب بالمخمخه وين اتغبى علشان اكل مابي اللي كبري يشوفونن وانا مشخصه قدامهم اني صايمتن كل الشهر<< حتى الصيام به مزابى
11/ وجهي الدعوه لثلاثة اعضاء من المنتدى للفطور معك ؟
موب اشويه ثلاثه ..؟؟ اسمي طابخه ومدهره بخليه يوم مفتوح لو تطيعن ..
بس اول من بعزم صاحب الاستضافه يستاااهل مثل مااستضافن لزوم نعزمه قل تم
وبندر الحمر علشان يصور فطوري ..
وحي المنتزه وعاشق ديرتي يسولفون علينااا يوسعون صدورنااا بس بدون أكل ..
وهين البنات كلهن الا العيال اللي بمعرفات بنات لايحسبونهم تبع العزيمه << الظاهر بيطيح نص البنات ...
12 / ما هي احلا لحظآت الصوم ؟
لحظة الدعاااء بانتظار رفع آذان المغرب ..
13/ كم ختمه من القرآن تستطيع ان تختميها خلال الشهر الفضيل ؟
على حسب ماقدر احدد اقله مرتين ..
14/ هل تتذكري اول رمضان قمت بالصيام فيه ؟
لا والله عساي اذكر عشاي امس ...
15/ كلمة أخيره تودي التكلم بها ..؟
احب اقول استغلو اوقاتكم باللي ينفعكم دنيا وآخره محد يدري يمكن اخر رمضان يمر عليكم والله يجعلنا وياكم من صوامه وقوامه و يعيده علينا وعليكم سنوات عديده ..
واتمنى من الاعضاااء مايتناقلون اي هرج الا بعد التاكد منه اسلم لهم وللعضو
لاني الاحظ اشاعات المنتدى اكثر من اعضائه وعاد ياكثر اللي مايصدقون خبر ..
واتمنى محد يحمل بقلبه علي اي شي ويسامحن والله يعطين على قد نيتي ..
يعطيك العافيه عادل على هالاستضافه وانشالله تكون خفيفه مثلي << تبي تسطر ههههه...
.............................سلملم ....[/align]
[align=center]أشكرك على تلبية الدعوة .. وعلى أجوبتك الصريحة ...![/align]