[عادل الحبيتر]

مدري أقول للجميع صباح الخير .. او أيش لان اللحين قرب اذان الظهر ..! لا خلاص صلينا الظهر
لكن شكلي أبقول صباح الخير للجميع لا خلاص اذن الظهر وصلينا ..
اليوم صرت عكس الناس . صاحي بدري على الساعه 7 . فيه أحد يصحى بدري يوم الخميس . لكن الليل طويل . والواحد يصير يشبع من النوم .. صحيت قلت علشان أجلس . تذكرت أن فيه غرض . جلست ثم تذكرت فيه غرض أبشتريه . قلت كلها نص ساعه وأبرجع علشان أجلس جلسه صح على النت . طلعت وما رجعت الا بعد ساعتين ههه . تقريبا على الساعه 11 الا ربع .. يوووه ياخسارة صبح يوم الخميس راح وأنا ناوي أجلس . لكن خيرها بغيرها . أجمل وقت أني اذا صرت رايق أبدأ أتصفح النت على راحتي . ومدري وش جاب موسيقى أغنية أنت عمري حقت ( أم كلثوم ) .. طبعا أعرفها . لكن طحت على موسيقى حديثه للاغنية هذي . لكن صرت أسمعها وأنا أتصفح .. يوووه مقاطع موسيقيه مجنونه .. ذا الموسيقار محمد عبدالوهاب مدري وشلون يلحن الأغنية . أحس أنه ما يلحن الشئ الا أذا صار رااايق . أبدور له لحن شين ما لقيت . عليه فلسفه بالتلحين ومقاطع الموسيقى اللي يقدمها . خاصة أغنية ( دارت الأيام و أنت عمري ) لأم كلثوم . وخاصة لأغنية ( نبتدي منين الحكاية ) حقت عبدالحليم . وخاصة حقت الفنانه ورده أغنية ( أنده عليك _ وفي يوم وليله ) .!
في القديمات أحب ألحان ( محمد عبدالوهاب و بليغ حمدي ) ..!
لكن فيه ملحنين في وقتنا هذا .. أعشق ألحانهم ... لكن بعدين أبذكرهم ..!

************************************************** ********

شيئين لا أستغني عنهم .. هم ( القهوة والشاي ) مدمن أنا على شرب القهوة يوميا .. أكره القهوه اللي فيها خلطه كثير .. وأحب أن تكون قهوتي فيها ( قهوه وهيل وأشوية مسمار ) . فقط ...! وأحب يكون معها بسبوسه أذا كان متوفره البسبوسه . أو أحب تكون معها أحد حلويات روز
أما بالنسبة للشاي .. لي طقوس خاصة مع الشاي . أنا أحب يكون سكره وسط أو أقل من الوسط .. لكن اللي سكره كثير ما أحب أشربه ..!

************************************************** ******

تامر حسني و الممثل الخلوق أحمد عز والأعلامي طارق علام ( ما شاء الله رايحين للحج ) طبعا هذي الصوره لقيتها بأحد الصحف هنا ..!
بحس أن احمد عز يشبه الممثلين الهنود

أول مره أشوفه بالاحرام .. أنتبه مب بعدين تجيب أغاني مثل ( بنت الايه ) أو تمثل مثل فيلم ( عمرو وسلمى ) ... أبدأ صفحه جديده وجب شئ يحترمه الذوق العام ههه ..!

تامر حسني هو وأخوه ... ما شاء الله محلقين قرعه .
أنا اللي أذا حجيت أو أذا أعتمرت أحلق شعري تخفيف . بحياتي كلها ما حلقت شعري قرعه الا مره وحده . قبل 6 سنوات . لأني ما تعودت .. كود أعود نفسي . علشان أكسب الأجر ..!
صورته هذي كان يوم ياخذ عمره بمكه قبل سنه ونص تقريبا . أتذكر بعد ما أخذ عمره . بعدها بيوم واحد راح للكويت يغني . عاد يوم دخل على المسرح علشان يغني .. كان لابس قبوع على رأسه .. عاد يقول للجمهور .. أعذروني حاط ديا على رأسي علشان بأه واخذ عمره في مكه ههه .. ! وقبل ما يغني طارت لمه أحدى المراهقات . وخربت عليه حجته .. ههه ..!

************************************************** ********

يا حلو اللي يعود نفسه على ذكر الله وعلى الأستغفار .. أتذكر واحد من أقاربنا كبير بالسن .. ومتوفي له 8 سنوات .. أتذكر أذا جاء قب ما يدخل لأي مجلس يقول ( لا اله الا الله ) .. ثم جميع اللي بالمجلس يدرون أنه جاء .. ثم يذكرون الله .. لأنه ذكرهم بذكر الله ..
وربي يرحمه كان معود نفسه على ذكر الله . أذا جلس وهو يسولف مع الناس أذا خلص مسولف يعيد ويقول ( لا اله الا الله ) وأذا جلس لحاله . قال لا اله الا الله ..
ما شاء الله لسانه رطب بذكر الله ..
ومتوفي قبل 8 سنوات .. يوم كان عمره 90 تقريبا ... حتى ما شاء الله عنده ولدين أعمارهم بالخمسينات . متعودين مثل أبوهم أذا أقبلوا على أي مجلس فيه ناس يقولون ( لا اله الا الله ) ... تعودوا مثل أبوهم .. وصاروا يذكرون الله في مجالسهم وفي مشيهم وفي جلوسهم .. مع أنهم مب مشائخ أو طلبة علم .. هم عاديين . لكن سبحان الله لأنهم تعودو على هذا الشئ ...!
وياليت نعود أنفسنا مثلهم .. حتى تكون ألستنا رطبه بذكر الله ...!

************************************************** *******

أعتذر منك يا سيدتي ..!
ما كان لي ان اخطف قلبك منك ..!!
وما كان لي .. ان اهيم في روحك ..

عذراً سيدتي ..!!

منذ أن أخدني قلبك الى عشقك الرائع
لم استطع أن أضع ناظري عنك
ولم أستطع أن أوقف دقات قلبي عن حبك
فأنا اصبحت عاجزا عن كل أموري ..!

عذراً سيدتي ..!!

ما كان لي أن أصمت عن مغازلة عيونك
وما كان لي أن أوقف قلبي حتى يذهب الي قلبك
فحبكِ سكن عقلي وقلبي وروحي
سكن جسدي وسكن حياتي ..
فجمالك وعيونك .. لم يبتعدو عن خيالي
فكيف لي أن أعيش وأحيا خارج عيونك
وكيف لي أن أصبر على بعادك وغيابك عني ..!!

عذراً سيدتي ..! وألف عذرا أرددها ..!!
لذلك القلب الذي أستطاع أن يسجن قلبي بداخله
ولتلك العينتان اللؤلؤتان الذهبيتان ...!
اللتان أحيو قلبا كان ميتاً ..
أصبحت عيوني .. هي عيونك اللامعتان ..
فاصبحت أرى العالم بأجمل ما يمكن أن أراه ..!