والله أن نفسـي خفيفـه يالحمـامـه
جربـي كانـك قدرتـي واحملينـي
أحمليني وابشري بْـزود الكرامـه
وان جَهَدتك يالحمامـه سامحينـي
لابذلتـي الجهـد عــدّاك المـلامـه
يالحمـامـه لانخيـتـك ساعـديـنـي
ويش أسوي يكسر الخاطر كلامه
والظروف العوج عيّت لا تزينـي
عيّت ظروفي تواكب مـع دوامـه
اكسبي الناموس والمعروف فيني
قـال كابـوس العـنـا كــدّر منـامـه
و حال مكتوب القدر بينـه وبينـي
قلت أزوره بس من باب الشهامه
وقبل صبـح الفجـر بالله رجعينـي
حطـي لجـدول زياراتـي عـلامـه
ورتبي حالك علـى وقتـه تجينـي
كل ماجا العصر طرنـا يالحمامـه
وُلاظهر نـور الصبـاح مْعودينـي
توحش الوحده مع الليل وظلامـه
سهلّـي دربـي فديـتـك وانقذيـنـي