مدخل
ساري وأصوّت لك أبيك
النظرة في عيوني تبيك
والرعشة في قلبي تبيك
ساري
شعوري ذا الليلة غريب
كيف الحبيب يشكي حبيب
أنا ملكتك
وأنا فقدتك
ليتني لمّا عرفتك
ما تركتك
ساري
مالي مكان بغرفتك.
.ولو صغير؟!
مكان صغير..
حتى ولو ممكن اصير..
مابين فساتينك
ويشْرَبْني.. الحرير!
ولاّ انتي خلّيني على..
تسْريحتك
غرشَة عطِر
قلم كحِل
أو.."رُوج"..
مابقّاه حي
غير إنّه في مرّه..غفى..
فوق شفّتك.
مِنْ بَعْدَها ..
عِفْتيه لمّا شاركك..
كاس العصير!
ولاّ أصير..
تطريز دانتيل ..بشراشف السرير!
أبي مكان بغرفتك..
حتى ولو مَنْسي
ولا تشوفينه
ويمْلاه الشتا..
عِزّ الهجير:
مجلّة أزياء قديمه..مهمله!
"سي دي" أغاني مالها..
لون ..وطعم
ولا..ضمير!
أو حتى ورده ذابله
الشاهد الباقي على
موعدنا .. يوم جيتي دفا
والليل وحْشَه..
وزمهرير!
أو لو تَبيْن
خلّيني ياعمري
دريشه
تْصبّحين كل يوم عليّ
وفْراشك العاشق ..يغير!
ومرات أقول: ياليتني...
.."روبك" أصير!!!!
وأشاغب غيرة لحافك
ومشْطِك
والقطا..اللي ربى على الغدير
اللي بقى من غيمتينك.. كل ما..
جادَت على السجاد..
باحباب..
وعبير!
وأجنّن اللوحات
والجدران ..
هذي الصامته
اللي إذا لمسها ظلك..
أشْرقَت
ماتدري وين..من الفرح..
تقْدَر تطير!
خبيني تحْت وسادتك!
ولاّ بكتاب..
تقْرينه قبل النوم
أنا
راضي أكون
لو كلمه ..فـ السطر الاخير!
حبيبتي..
أبي أصير..
أي شي أنا في غرفتك
حتى ولو..
أي شي ..صغير!
مخرج
لمّا عيوني عانقوك
في غمضة وحده ضيّعوك
اسأل زماني و المكان
واجمع سواليف الحنان
أنا ملكتك
وأنا فقدتك
ليتني لمّا عرفتك
ما تركتك
ساري
قلبي و ليلي به سرى
و اللي جرى لي ما جرى
أمشي وأدور في الوجوه
تايه عيونك توّهوه
ساري