[حسآيف]

حبيبي والشتا واقف على صدري وخلف الباب
ولا ادري لو ترك صدري بيرحل من ورى بابي ,؟


ثلاث سنين أدفّيني بذكرك يا أول الأحباب
ثلاث سنين تذكرني ببردك يا آخر أحبابي

ثلاث سنين أدوّر لك حبيبي في طريق غياب
ثلاث سنين اضيّعني ولا ألقى بك ولا ألقى بي

سوى ما ينثر حضورك بِ ( قلبي ) من ندم وعتاب
سوى ما ينثر غيابي بِ ( قلبك ) من بعض ما بي

ثلاث سنين وعيوني وقلبي زاخرة بَ ( أصحاب )
تنام بها ولا اصحى بي سوى لا ناموا أصحابي

ثلاث سنين أذكّرهم : تراكم ( حسبة الغيّاب )
ثلاث سنين أنسيّهم من اللي غيّب حسابي

ولا أدري لو تجي بكره تلاقي لك بعض ترحاب
بِ ( قلبي ) ، ولاّ ما تلقى سوى اللي البرد خلى بي

بعض حب وكثيرٍ من سواد وخوف و إستغراب
الأول منّها بِ قلبي ، وباقيها على أهدابي

كذا سوّى غيابك في حبيبك ليت قلبك غاب
قبل يذبل زهر شوقي عليه وتتلف أعصابي

قبل لا أمدّ له قلبي وأحاسيسه بدون حساب
قبل لا أذكر ارحّب به وينسى لا يتحفّى بي

عليه الحب من أوّل وقوف البرد عند الباب
إلى آخر ما وقفت أرجي رحيل البرد عن بابي