[عمآآآد]

المهم إجتمعنا كلّنا قدّام أمي بنعرف وش السالفة وليش يصارخون وخايفين ؟!
قالت أمي ياعيالي قبل شوّي وأنا أسولف مع حريم الجيران بالغرفة دخل علينا جرذي كبير كبير بالحيل ..وهبلنا وخفنا منة.. فاللّي أبية منكم ياعيالي تجيبون لي هالجرذي حياً أو ميتاً قال أخوي الكبير سمّ يمّة تآمرين أمر وهالجرذي إزهلية ولا تشيلين همّ مالك إلاّ اللّي يجيبة لك فاطسنّ قبل يأذن المغرب...

إلتفت أخوي الكبير علينا أنا وأخواني وطلب إجتماع عاجل جداً ولا يحتمل التأخير لوضع الخطة المناسبة للقضاء على الجرذي وإراحة البشرّية من شرّة...,

........

دخلنا الملحق وصكينا الباب وبدأ أخوي الكبير الإجتماع قائلاً ..........

وش إقتراحاتكم ياأخوان وخططكم للقضاء على هالجرذي القلق ؟؟..........
قال واحد من أخواني أنا أقترح طال عمرك نحطّ الحباّلة ذيك اللّي مصنوعة من شبك ونحطّ بوسطها أكل ونحطهّا بطريق الجرذي ليقع في الفخّ
قال أخوي الكبير إقتراح معقول وأنت ياشين الحلايا يقصد أخوي الثاني وش تقترح ؟
قال أنا أقترح نحطّ خشبة ونحطّ فوقها صمغ ونحطّ فوق الصمغ طماطة
المهم إن كل واحد من أخواني جاب إقتراح .....
قال أخوي الكبير طيّب بنحطّ خشبة وفوقها صمغ لكن وش تقترحون نحطّ أكل فوق الصمغ ؟! <<< لا بصراحة هذي مشكلة عويصة مرة مرة أخوي ذا يسمع بالإجتماعات الظاهر ........
قال واحد من اخواني انا اقترح نحط فشفاش !! يوم طالع فية أخوي الكبير وهو كاتم أم الضحكة وبنفس الوقت قافلة معة وقال فشفاش هآآآه ..!! فشفاش !!
إلاّ وش رأيك بالمرّة بعد نحطّ للجرذي بجنب الفشفاش عصير سنتوب وريموت الرسيفر
ياخوي أنت جاي بتمسك جرذي وإلاّ داخلّن سينما بالبحرين
لاااا لاااا عطونا أكل يجيب خبر الجرذي من أول دقيقة
قال واحد من اخواني تبون رأيي حطوّا للجرذي جبنة أو خيارة بس قبل ماتحطوّنهنّ لة فوق الخشبة قطعوّهنّ قطع صغار عشان مايقعد الجرذي لا شاف الجبنة كبيرة كذا شال همّ وشلون بيآكلها !! <<أخوي ذا من طلعتة للدنيا وهو أتيكيت ويآآآآي ومهب يآكل إلاّ بملعقة ويحسب الجرذي ماشي على مودة
المهم جبنا خشبة كبيرة وحطينا فوقها جبنة وحطيناها بطريق الجرذي وإنتظرنا يومين بعدين رحنا فتحنا الغرفة اللّي حاطينّ فيها الخشبة بنشوف وش صار على الجرذي هل وقع بالفخ وإلاّ ماوقع ؟!!
يوم دخلنا للغرفة وإلاّ وش نشوف !!!! لقينا الجرذي مآكل الجبنة اللّي فوق الخشبة ولا وقع بالفخ ؟! وأستغربنا غريبة ليش مالصق الجرذي بالصمغ!!!! يوم قرّبنا للخشبة وأثاري أخواننا بالله هالكمخ وأنا أولهم نسينا نحطّ الصمغ فوق الخشبة ومن زود الفداغة والكماخة والطفاقة حاّطين الجبنة فوق الخشبة بدون صمغ !!!

يتبــــــــع ...