[تركـي]

الاخت / نسرين ..

الشغالات تساخير ..
فيه شغالات جلسن سنين وآصبحن من آهل البيت
وفيه شغالات تكون ردة فعل لهن بالمصايب اللي يسوونها بالبيوت ..
والمعاملة .. هي من تحكم ..
حتى الحيوان ( لكم الكرآمه ) إذا عاملته زين بيصير مسخر و حليل
وإذا آهنته بيصير عدائي ..

مشكلتنا ببعض الحريم ..
ماترحم الشغاله .. كل شيء عليها
تطبخ وتنفخ وتغسل وتنظف ولا تبيها تستريح آبد
وهي تبطح حق زيادة هالشحوم والآمراض من قل الحركه ..
وبعض المسكينات تعتبرها وجاهه بأن عندها شغاله .. على بالها بأنها هالشغاله
جاريه عندها ..

والبعض بالفعل هم بحاجه للشغالات ..
مثل المرأة الكبيرة أو المريضة أو العامله ..
ولكن آرجع وآقوول ..
ترجع للمعاملة للشغاله كونها بشر لها إحاسيس وشعور
لكن بعض البشر معتبرها نكره ..


وآبذكر حادثه ..
بيوم من الآيام كنت مسافر من القصيم للرياض ووقفت عند محطة ساسكو للصلاة .. ومريت من عند سياره وآشوف شغاله بجمس صالون ..
حاطينها مع العفش بشنطة السياره والمسكينه لاصق وجهها بالقزازه من قوة آنه حاشرها راعي السيارة مع العفش ..
انا صراحه رحمتها يوم شفت نظراتها وكأنها تبكي ..

صليت ورجعت والآ آشوف صاحب السيارة ذآآك الملتحي
وسلمت عليه .. وقلت ترآآ ياعم صلاتك ماتجوز ..
رد السلام .. وقال ليش ..
قلت ماتخاف من العقوبة في الطريق ..
قال ليش ..
قلت تعال ومسكت يده ووريته الشغاله ..
هو حس من نفسه باللي آقصده ..قلت معك آحد بالمرتبه الخلفيه ..
قال انا وزوجتي بس ..
وانا آبعدت الشغاله لأن المدآآم تقوول كذاا ..
قلت له .. آنتبه لا تجيك عقوبة أو دعوه من كبت هالشغاله .. بها الصورة وكأنها شاة لا حول ولا قوة لها ..
حتى الشاة ترآآ نقليات المكيرش حااطين لهن ماء وشعير وتهويه ..
وهذي إنسانه انت المسئول عنها وبذمتك .. لو جاها شيء أو توفت تراها برقبتك يوم القيامه..
وشكله تقبل الكلام و شفته نزلها وخلاها تركب قدآآم
وودعته وهو يتشكر
.......

مشكلتنا الأساسيه ..
نعاملهن بأنهن جوآري من البعض ..