شراهت القصمان؟؟؟؟؟؟؟؟؟

[بنت جدة في بريدة]

اهلين
معليش لاتفهموني غلط بما اني جديد في القصيم
لاحظت شي من خلال جولاتي فيها وهو شي واحد يربط اهلها
اول مرة رحت فيها للمستشفي عشان ولدي الصغير كان تعبان وانا في الانتظار سالتي وحدة قالت (مبين عليس مو من هنا) بس تسمعني اتكلم مع ولدي وبصوت واطي بعد
هذي الاولى الثانية لما كنت في حديقة الاسرة النسائية كنت استني ناس بنات وكنت العب اولادي جو عندي بنات وقاعدين يسالوني عن لبسي ويقولون انة غريب فقمت وقلت لهم انة من جدة وكذا الا شوي وحدة تسال عن اشياء في جدة وانها نفسها ومني عينها تروح لجدة من دون لاسالها بس بعد ماجو يبغون يروحون قالت وحدة معليش يابنت جدة ترا القصمان كذا عندهم شراهة مادي شرافة واللة مادري نسيت قلت لها يعني ايش قالت يعني زي اللقافة تقدرين تقولين وراحت وهيا تضحك وتقول مع السلامة

عاد انا قاعدة افكر يعني صح معناها واي الكلمة الصحيحة شراهة او شرافة

وبالخير ياخوان وياخوات ارجو انكم لاتزعلون واللة بس حاجة كان نفسي افهمها

[عجوز سمنسي]

والحين فهمتيها ؟

يسمونها شرافة

وبعدين مادام عندك عيال المفروض ماتسمين روحك بنت جدة

قولي عجوز جدة خلاص راحت عليك البنوتة

<<< هذي شرافة جديدة من قصيمي

هلا فيك وترى الشرافة اللي تقولينها نابعة من طيب في القلب ليس الا

حب التعارف والاندماج مع الاخر سمة تميز اهل القصيم عن خيرهم وتجعلهم اكثر قبولا للاخر من غيرهم

انا شخصيا اعتبرها ميزة

بس احيانا تزود الشرافة وتتعدى الى مرحة اللقافة والتدخل بشؤون الغير وهذا امر بغيض

حياك الله يابنت جدة بين اهلك وناسك وربعك

[....الأمير....]

وهذا الي يحببني في أهل القــصــيم وخاصة بـريدة


هو بساطتــهم وسرعة اندماجهم مع الآخريــن

طبعاً الناس يختلفون

منهم من يتقبل هذا الشي ويأخذه بسعــة صــدر
ومنهــم من يعتبرهــا لــقافة أو شــرافة

وأيضاً الــقــصمــان يخـتــلفــون

منهم من تكون هذه الــصفــة نابعـة من طيبة قــلب

ومنــهم من يــكــون حب إستطلاع

دمتم بــخير

[مخي وحده لا يكفي]

دخلت احسبك تقصدين
شراهة بالاكل
اتمنى ان تنهوا مهمتكم في بريدهـ
متمنيا لكم طيب الاقامة
اتمنى ينال هذا الموضوع مزيدا من الردود تصب في مصلحة الكرم القصيمي
والترحيب بالاغراب وسياسة كسر الحواجز وآسر القلوب
لتجدي ان أهل بريدهـ كسبوا عقول الاخرين وآسروا تفكيرهم
بتعاملهم البسيط بعيدا عن المصالح والاغراض الدنيويه
وليس كالاخرين اللهم عافنا

[نـدى الـورد]

شرافه ما عرفتها الا ب المنتدى

وانا مثلك جديده علي

بس على فكره الشرافه الي هي اللقافه عندنا

تكون بين ناس وناس ومو شرط تختصر على مدينه معينه

ولا كان سموو اهل القصيم اهل الشرافه


,

[عاشق ديرتي بريده]

زين طحتي ببعض البنات ولاطحتي بعجوز تهوشك !!!!
ترا عجزنا اذا شافتك لابسه شي غريب وشبه عاري على طول تهوشك وتقول تستري وجع عساك للماحي !!!

بس مااعتقد ان بنات بريده تكلمك وهي ماتعرفك !!! صح يمكن تطنز بك مع صديقتها بس تسولف معك اعتقد انها صعبه شوي !!!!

عاد يالله اشرحوا لها تطنز !!!!!!

تبين الصراحه القصمان وخصوصا اهل بريده يحبون لهجة الحجز يمكن سولفن معك عشان لهجتك !!

[نـدى الـورد]

اقتباس: اهل بريده يحبون لهجة الحجز يمكن سولفن معك عشان لهجتك !!

ههه ياويلكم من الله


.

[سارة عبدالعزيز]

الشرافة يا أختي أحنا شربناها مع حليب أمهاتنا
فلا تشرهي علينا ,, عديها ميانه حبتين
هذا طبعنا يالحريم مباشرة ندخل في أي حرمة فنحن نملك نفسية مفتوحة أكثر من الرجال
الرجل لما يقابل رجل غريب عنه تجدين فيهما ثقل طينة مع بعضهما والكلام الذي يخرج منهم
كا خروج الروح !!!
وكذلك تجدين الحديث الذي يدور بينهم سطحي .

[عجوز سمنسي]

[align=center]

اقتباس:  المشاركة الأصلية كتبت بواسطة عاشق ديرتي بريده     زين طحتي ببعض البنات ولاطحتي بعجوز تهوشك !!!! ترا عجزنا اذا شافتك لابسه شي غريب وشبه عاري على طول تهوشك وتقول تستري وجع عساك للماحي !!! بس مااعتقد ان بنات بريده تكلمك وهي ماتعرفك !!! صح يمكن تطنز بك مع صديقتها بس تسولف معك اعتقد انها صعبه شوي !!!! عاد يالله اشرحوا لها تطنز !!!!!! تبين الصراحه القصمان وخصوصا اهل بريده يحبون لهجة الحجز يمكن سولفن معك عشان لهجتك !!

تبي لها دورة علشان تفهم مصطلحات العجاير

اجل لو وحدة قايلة لها : عسى ربي وناساله انه بعطيك الصمرقع

من يبي يترجمها ؟

شكلها تبي تروح تدور بقاموس اندونيسيا ويمكن تلاقيها هناك

نسيت اعلمك يابنت جدة ترى اللفظ عندك غلط اكتبي ( شراهة ) وليست شراهت

كما عقبت مسبقا اقول :

ان القصمان ميزهم وادخلهم كل المجتمعات بسبب ظرافتهم واندماجهم مع الجميع بكل فئاته المتعدد

بالحجاز تجدينهم وبالشرق تجدينهم وبالجنوب والشمال

استطاعوا ان يسيطروا على كثير من الامور بسبب حكمتهم وعبقريتهم في معرفة مداخل الناس ومخارجهم فلهم السبق في الترحال قديما بما يسمى ( العقيلات) [/align]

[خبي أنيق]

اقتباس:  المشاركة الأصلية كتبت بواسطة بنت جدة في بريدة     اهلين معليش لاتفهموني غلط بما اني جديد في القصيم لاحظت شي من خلال جولاتي فيها وهو شي واحد يربط اهلها اول مرة رحت فيها للمستشفي عشان ولدي الصغير كان تعبان وانا في الانتظار سالتي وحدة قالت (مبين عليس مو من هنا) بس تسمعني اتكلم مع ولدي وبصوت واطي بعد هذي الاولى الثانية لما كنت في حديقة الاسرة النسائية كنت استني ناس بنات وكنت العب اولادي جو عندي بنات وقاعدين يسالوني عن لبسي ويقولون انة غريب فقمت وقلت لهم انة من جدة وكذا الا شوي وحدة تسال عن اشياء في جدة وانها نفسها ومني عينها تروح لجدة من دون لاسالها بس بعد ماجو يبغون يروحون قالت وحدة معليش يابنت جدة ترا القصمان كذا عندهم شراهة مادي شرافة واللة مادري نسيت قلت لها يعني ايش قالت يعني زي اللقافة تقدرين تقولين وراحت وهيا تضحك وتقول مع السلامة عاد انا قاعدة افكر يعني صح معناها واي الكلمة الصحيحة شراهة او شرافة وبالخير ياخوان وياخوات ارجو انكم لاتزعلون واللة بس حاجة كان نفسي افهمها

[align=center]هناك مصطلحان :
الشرهه...
الشرافة ...
أما الشراهة فهي اللوم مثال يقال بنت جدة شرهة على صديقته بنعنى أنها تلومها كونها لم تخبرها بزواج او غيره وتأتي بمصطلح التشره او تراه شروهه .
اما الشرافة فهي استطلاع وهي استشراف لما وراء الشئ ومثاله في حالتك واضح فالنسوة يردن التعرف من أين أنتي حيث لفت انتباههن وجود الإختلاف
والمصطلحات عموما ليست قاصرة على منطقة معينة وإنما حتى في جده نجدها واضحة جلية حينما نجتمع مع أهلها في مناسبة اوسفر او غيره
قد يبدو للقادم الى بريدة وجود ذلك لكنه لايعمم على الجميع بالتأكيد ,
ما يميز أهل بريدة هو تكيفهم السريع وبساطتهم وعدم تصتعهم لأوضاعهم والمحيطين بهم وأيضا رغبتهم الجامحة في خدمة الآخر إذا تأكدوا حاجته للمساعدة ..
اذا كنتي جديدة ولديكي تعايش مع اوساط نسائية مختلفة فستجدين ما ذكرت واضحا جليا وستحسين بنقلة حضارية بين ثقافة الكبار "العجز" والبنات "الإتيكيت" وقد تجدين "العجز المتبنتات" واللاتي يجمعن بين تلك الخصائص..
قد تواجهك مصطلحات اخرى مثل "البحلقة" و"مطيرتن عيونه" و "وش دبته" وغيرها كثير لا تترددي في السؤال عن معناها حتى تكوني قصيمية الثقافة جداوية المنشأ .
أسف للإطالة ودمتي بود.[/align]

[إلينـ اليوم]

المشكله مو واقفه على البنات حتى الرجال
في بريده فيهم شرافه مو معقوله الحين اذا
صارحادث يدقون على بعض ويتواعدون
عندالحادث وكلام قمه باالشرافه الله يهديهم .

[مخي وحده لا يكفي]

اقتباس:  المشاركة الأصلية كتبت بواسطة سارة عبدالعزيز     الرجل لما يقابل رجل غريب عنه تجدين فيهما ثقل طينة مع بعضهما والكلام الذي يخرج منهم كا خروج الروح !!! وكذلك تجدين الحديث الذي يدور بينهم سطحي .

[align=center]السطحية"تسمى لباقة وكياسة وحسن تعامل"
ويمكن ما تدرين ان الرجل البريداوي عندما يقابل اي غريب "سعودي" يدعوهـ للقيام بواجب ضيافتة وتناول وجبة حسب وقتها واحتساء القهوه والشاي وهذا ديدنة حسب ما توارثناه من الاباء والاجداد
وقد يكون ذلك غريبا عليك او مستغرب لان طبائع اهل بريدهـ حديثة عليك ولم تتشربيها
ولم يفسح المجال هنا لذكر مساؤي البريداوي لان بنت جدة ذكرت موقفها مع نساء بريده وهو ما استنكرناه وأيديتيها على كلامها في اساءة على بناتنا والتي انتي منهن براء [/align]

[بنت جدة في بريدة]

شكرا اخواني واخواتي علي المرور
واخص بالشكر الاشخاص الي وضحولي وساعدوني
اما الاشخاص الي اتهجمو عليا اقول لهم اللة يسامحهم
واقدم للجميع اعتذاري اذا انا كنت غلطانة بشي والمقصد من الموضوع هو توضيح بعض الامور فقد لاغير

[Queen of buraydh]

لا شرافه ولا لقافه


بساطه وطيبة قلب وسرعة اندماج ...


وياهلا فيك بديرتك الثانيه بريده ..

[ابو ريما الخالدي]

الشرافه والشهابه شيء مخلوق مع القصمان
لايمكن أن تعمل له Delete