السكن مع الزوج في بيت بيت أهلـــه

[سيف وفيصل]

في الأمس القريب
كانت العائلة تسكن في منزل واحد
المتزوج له
غرفة خاصة به
والباقون ينامون في غرفة واحدة أو في السطح!

كانت الزوجة عندما تأتي إلى بيت أهل زوجها

تقوم بأعمال كبيرة بكل
فرح وسرور

ولم يكن يحلمن ببيت مستقل ،،

نرى اليوم الوضع اختلف تماما

نجد الفتاة ترغب في سكن مستقل ،

لتكون أميرة وآمرة هذا المنزل الصغير،،

والسؤال / هل تشترط البنت منزلا مستقلا أم تقبل أن تعيش ببيت العائلة؟
وهل يقبل الشاب ذلك بصدر رحب أم يفعل الأمر متضايقا؟

أم ماذا؟

تحياتي

[أبو الريش]

[align=center]هذا يرجع للبنت الأصيله اللي تتبع كلام زوجه وتثبت حبها له تطيعه بكل شيئ

قالو: لازم الزوج يحاور زوجته وكثرت المشاكل

اول مافيه محاوره ولاشيئ ترضى باللي يصير وتعيش حياة سعيده

لكن فيه بنات ماشالله ترضى بكل شيئ وهذي بحد ذاته شبيهه بالصحابيات

اما اللي تبي ببيت لحاله هذي شبيه بمخلفات القنوات الفضائيه

ياكثر اللي تزوجو وسكنو بيوت اهلهم وافرجه الله عليهم بعد كم سنه واستأجرو بيت لحالهم او شقه

بس بعض الحريم ماعندهن صبر ماتخلي الرجل يفكر ويخطط ويرسم الحياة الزوجيه على كيفه [/align]

[عزازيل]

لا بأس من سكن الزوجة مع أهل زوجها فهذه من الأصول التي تربينا عليها و المرأة الطيبة تجمع و تلم الشمل لا تفرقه ، و فيه خير لها و لزوجها لو تعلمه لما طالبت بالانفصال لوحدها ، فمالمانع أن يخصص لها جناح مستقل في نفس المنزل و تشارك أهلها الجدد في أفراحهم و اتراحهم و تكون واحدة منهم !؟ و بالمقابل ستسعد أم زوجها فتربية ابنائها و حفظهم بعد الله في غيابها ساعات عملها أو سفرها أو خروجها ، و اعتقد أن موضة السكن لوحدها قديمة استحدثت من عشرين سنة تقريباً اما اليوم أشاهد حالات كثيرة لا يكون هذا الشرط متوافر على الدوام .

[ونة خفية]

زمن أول غير ومختلف
زمن أول كل من كان فيه حشيم قنوع راضي بالقسمة إللى قسمها رب العباد لهم
ومع تقدم الزمن واختلاف الظروف المعيشية والأنفتاح على ثقافة الشعوب المجاورة
خاسة نفوس الناس
وصارت ارواحهم راس مناخيرهم يقوم الواحد من النوم يبغي يضارب
عذرا عن الأسهاب
على العموم اهل الزوج وبالذات الوالدين لهم الصدارة في كل شيء حتى بالمكان
ولكن تفادين لحدوث أي مشاكل وخصام وقطيعة رحم بين العائلة
من قاصرها يطلع الولد برا يسكن هو وبلوته (زوجة)
ويطل على أهله خلال ايام الأسبوع ماعليهم قاصر
ويجتمع مع العائة كل يوم جمعة يتغدى ويوسع صدرة معهم
كذا افضل واسلم ويشتري يافوخه على قوله المصارية

[أســماء]

بالعكس ,,

الاستقلاليه بالحياه أمر يطلبه الجميع وخصوصاً الزوجه ..لانه فيه استقلال بكل الحياه ! الا في حالات شاذه عندما يكون الوالدان كبيران او مريضان ولايوجد من يعوله غيرهم ! فيلزمه البقاء معهم ....

وعلى الزوج ان يزور اهله كل يوم من غير ان يجلب زوجته للسكن مع اهله وغالباً ماتجلب المشاكل لاحصر لها ! وماحولي يثبت ذلك فأبعد عن الشر وغني له !

وجه نظري

[قـتـالـه]

الله يرحمكم ياالاولين ,,
بذيك البيوت كان الصبخ واصل للسما
لاتتوقعون ماكان فيه مشاكل ..اسمعوا حكي الجدات وتنهداتهن ,,
بس اول الرقاله هماهم صدتزيين مايعطون الحريم وجه فالحريم بيناتهن يدمدمن السالفه
والا الهواش بينهن والمهازب كان على ودنوه !
مكائد وشدلي واقطعلك بين حريم العيال والخاله ,,
الحين اتوقع النفوس بين الحموات اهدأ بسبب البعد,
اقصاها حلا بالاستراحه وماعلى احد من احد مفيش تدخلات ولاسيطره ,,

[لعيون دودي]

عزيزي...
لم شمل الاهل مسلك طيب وكون"زوجه الابن" تجمع ماتفرق كذلك منحى جيد..
لكن الآن الزمن تغير والانفس تغيرت ومبدأ"الغيره" بين ام الزوج واخواته من لدن "البعض"
امر يحسب له الكل الف حساب.. وما يجره من مشاكل الجميع في غنى عنها
لذلك خروج الابن من البدايه "أسلم" الا اذا كان هو"العائل" لاهله فلها ان "تلزم" طاعته وتعي ان "والديه" بمثابه اهلها.. وتكون خير معين له في وصلهما لان ذلك حتما سيعود عليها في "ابنائها"
دمت برعايه الله

[بنت منيره]

لا والله تسكن بالحاله

المثل يقول ابعد عن الشر وغني له

[أحـمـد]

[align=center]يـازيـن الســكن عــند الاهــــل

أولاهـ لـو يحصــل

بس عـاد الشكوى لـله ، حكـم القــوي

--[/align]

[زمن الغرباء]

الله يعين
حتى البيت تبونها تتنازل عنه

وش بقى
يالله ان الشكوى لك

عموما
البنات يختلفن .. فيه منهن عادي عندها تسكن معهم رغم المعاناة لكنها تصبر وتحتسب
وفيه منهن ماتبي
وما تعتبر متمردة او مسرفة لأن البيت من أتفه حقوقها ..
لكن وش نسوي العادات غطت على الدين ..

والشباب اللي يقولون عادي
يمكن عشان الشباب ماجربوا الشي هذا
حتى أنا ماجربت لكن أشوفهن قدامي

تدري وش معنى انها تسكن مع أهله ؟
يعني ماراح تنفك من جلالها الا في غرفتها ..
يعني ماراح تنادي أهلها وصديقاتها
يعني تلبس اللي تبي وتتمتع بحريتها
يعني ماراح يكون لها نهج خاص بتربيتها لعيالها لأن كل اللي بالبيت يبي يتدخلون بالتربية
يعني راح تكون كل تصرفاتها ونومها وقومها ملاحظة
وووو

يشهد الله ماأقصد أزيد معاناة الشباب اللي ودهم يتزوجون
وما يقدرون على الاجارات لأن الله يبي ييسر
ومثل ماقلت فيه بنات عادي عندهن وياكثرهن

وجهة نظري

الله يكون بالعون
شكرا لك

[هواي اكورد]

السـلام عليـكم ورحمـة الله وبركاته جميـعا


اشكرك اخي الكريـم على ما تفضلت به .. موضوع جميل جداا ويستحق .. الشكر عليـه


...........

بالنســبه .. لمتطلبات الحيـاة بالوقت الحــاضر .. ولشـبابنا العصريين .. لابد . من الاستقلاليــه

وضعيـة الفتـاة داخل المنزل .. تتضايق بمنزل الأهل . كـ وجود الخمار عليـها دائمـا ..

تعاني . من مضايـقات في هذا المبدأ . من الأخوه . من الزائريــن .. تريـد بأن تختصر نفسـها لزوجـهــا .. تتقدم بتلبيـة احتياجــاته.. ولهـا اختصاصاتها . في ذلك الشأن

في الزمن الماضي.. يقتصر على الشـاب .. حصولـه على منزل مستقل . لعدم القدر عليـه تقريبــا .

ومن الجانب الاخر . يوجد تقبل من الفتــاة . بأن ترضى العيش مع اهلــه


لـكن الان اختلف الامر ..

فـ الشـاب . قبل الفتــاة .. يأيد الأستقلاليــة بزوجـته . في منزل . صغير يلمهما جميـعا

تأخذ الفتــاة . خاصتها وكامل راحتها . في اللبــٍاس لزوجهــا ما يحبـه .. تظهر له بأي شكل

ينغمسون .. بالوحـده . والخصوصـيه . جميـعا .. وأنا شاب . أييد وبشكل .. كبير لهذا الشأن


...............

وبالنسبــه لسـؤالك اخي الفاضـل .. نعم في هذا الوقت .. الشرط يسجل اولا في عقــد النكــاح ..


.. اسأل الله العلي القدير . بأن . ييسر الأمور . وأن يجعل من بعد العسر يسرا ..


. تقبل خـالص تحيــاتي . واشـواقي

اخوكم ابوفارس

[>ريانه<]

مابقى الا ذي بعد

عسانا نسلم وحنا لحالنا

[تذكار العمر]

لالالالالالا والف لا ارفض السكن مع اهل الزوج ومن البدا يه بيت مستقل مصيرالايام تصير مشاكل مهما كان وابعد عن الشر وغني له

[قـتـالـه]

السكن خارج بيت اهل الزوج لايجعل الايام خاليه من المشاكل
بالعكس تبدأ مشاكل اخرى وخاصه لو كانت الزوجه موظفه ,,
ولكنه ادوم لصفاء نفوس نساء الاسره مع بعضها ..
بعدين الرفلا ودك تسكنها مع اهل رجلها استرلها ,,
بعض عزايم الرفل تفشل ,
مازلت اتذكر خيبة املي في قريبه كنت احسبها من السنعات
يوم طلعت ببيت وشفنا الخمال واثرالبركه بشغالات اهلهم وخوات زوجها !

[Miss Tala]

والله فيه بنات تبي تسكن عند اهل الزوج عشان يخدمونه خصوصا اذا كان المعرس واهله ماعليهم وربي رازقهم خدم وحشم ....وش تبي تجلس لحاله غسل وطبخ وشغل وحوسه...
ويظل الافضل بيت مستقل ...راحه وكل شي تحت ايديها لا آمر ولا ناهي ...
واذا الرجال مايبي يفارق اهله الله موسعه يروح يزورهم كل يوم ...



الله الله بس بالبيوت السنعه...