بسم الله الرحمن الرحيم
السلام عليكم ورحمة الله وبركاته
أسعد الله أيامكم
موضوعي عن مشكلة موجودة من بداية خلق آدم
الحسد و الغيرة و الحقد
ثلاثي دايم يجتمع و طبعاً يورث قسوة بالقلب و يعمي عن التفكير بعقلانية
مشاهد أشوفها قدام عيوني تتكرر أشبه بالخيال
و أغلب ما تتواجد هالمشكلة عند الحريم صح فيه عند الرجال لكن مو بالشكل اللي عندنا
عجوز قارب عمرها الستين ولازالت تخطط كيف تفرق فلان عن زوجته
و كيف تخرب سمعة بنات فلانة عشان ما يتزوجن قبل بناتها
و كيف تخرب الحمولة على فلانه
ثانيه سوت ايميل و انتحلت شخصية قريبتها و صارت تكلم فيه أبناء العائلة لغرض تشويه السمعة
ثالثة كانت ترد بكلمة محجوزه إذا احد سأل عن قريبتها بغرض الخطبه
رابعة انفقت كل مالها و من ساحر لساحر عشان تصرف فلان عن زوجته
أحد صريح بالوجه ينغزك بكلماته و أحد من تحت لتحت يستقبلك بأعرض ابتسامه
و من وراك يطعنك بأبشع الأوصاف و الكلام
بعضهم وصلوا للتشكيك بالشرف و البعض استخدم وسائل التقنية الحديثة لانتحال الشخصيات
و تشويه السمعه و البعض تجرد من كل معاني الانسانية و اتجه للسحر عشان يرضي ضميره الميت
ناس غريبين ما تدري أي عقول و أي قلوب يملكون
كثير ما كنت أتساءل ما يخافون يوم من الأيام تدور عليهم الدنيا و يلاقون عقوبة أفعالهم
يعني معقولة ما يخافون من ربهم ؟ ما تأنبهم ضمائرهم ؟ ما عندهم احساس ؟
لين مرة وحده من هالنوعية كانت تتكلم عند الحريم أم عيال و عليه الشرهه
تقول : إن بعض الذنوب مثل الأغاني و المسلسلات يغفر للإنسان إذا تاب منها
و يغفر الله للزاني ولا يغفر للمغتاب >> المشكلة هي راعية غيبة و نميمة و كل ما تبون
( الله يهديها ولا يبلانا ) بس كانت تنصح عن الغيبه موب جود بس شاكه في نفسها
بعده بديت ما اشره نهائياً اللي هذا تفكيرها
تأذي خلق الله و تتوب و يغفر لها الله
تخرب بيوت و تتوب و يغفر لها الله
تفرق بين الناس و تتوب و يغفر لها الله
أي عقيدة ذي ؟ و أي تفكير هذا
تبي دينها زي ما تبي تاخذ اللي يعجبها و تترك اللي ما يعجبها
الكلام مو عن مشكلة نادر ما تتواجد لا
أجزم إن اغلب العوائل يعانون من هالأشكال
والمشكلة ما ينفع معهم اسلوب نصح ولا محاولة كسب الود بل يفهمونه غباء و غفلة
نصائحكم ؟
تجاربكم ؟
حلولكم ؟
وشكراً
العرض الشجري