ثقافة التسوق ( ثقافة على البركة )!!!

[ضمير بريدة]

تدخل على بعض أسواق المواد الغذائية للتسوق وقضاء حاجات البيت ، يمر بك الكثير من الرجال والنساء ، العربات تستنجد من كثرة ما فيها ، والمرأة تمر على الرفوف وتأخذ منها كلها !! وكأنه محلوف عليها أو مشاركة في مسابقة جمع البضائع !!!!
والرجل المسكين ينظر لها ولا حول ولا قوة له ، تريد الفخر على حسابه ، أ تفكر بعقلها الكبير أنها ربما تحتاج لهذا الشئ بعد شهر وربما سنة !!! وفي نهاية الأسبوع تبكي ذهاب الراتب ، وقلة البركة !!!!
في المقابل تجد الأجانب لديهم ثقافة في التسوق ، يأخذ أحدهم ما يحتاجه ، ويقلل الكمية حتى لا تفسد ، ويراعي الأسعار والحاجات .
الراتب قليل ولكن يكثر بحسن التصرف .
كم نحن بحاجة لثقافة في التسوق وخاصة من النساء

[مخملية روح]

ليتك شايف اللي أمس ...... يتسوقن بهايبر ..... وبعد ماخلصن اتجهن للسلمان..
بيآخذون غرض واحد ... وعبوا لهن سلتين .... و فاضت السيارة اكياس كلها ...
بسبب الجوع ذذ....
طبعاً ...الثقافة مطلوبة وموجودة .... لكن لما الرجل يزعل حرمته مالها... الا تضف كل السوبرماركت ... يمقن تعوض المغثه ....

[امرؤ القيس]

الغريب أننا كلنا ضد هذا التصرف ومع ذلك لا نطبقه !


أنا دائما آخذ ورقة الطلبات من أم عدي وأزيد عليها مايمرّ علي من بعض المواد !!

[هلاوين]

يادخلنا هذا والله زين وهذا عليه عرض

وهذا ابجربه وهذا يمكن نحتاجه

بالاخير 70% سلة المهملات .


يقال ان الغربيين قبل مايدخل كاتب طلباته في ورقه

ياخذها ويخرج بسرعه >> مايقعد يتمشى مثلنا يمكن احصل شي يجوز لي

بس زي مايقال مامدفون معك شي طرب نفسك واهلك دام الله منعم عليك من غير اسراف .


شكرا لك ضمير

[بي اتش]

اذا تتكلم عن المواد الغذائيه ففعلآ اشوف تبذير بشكل كبيير داخل السوبرماركات
كانهم ياخذون مأونه حرب !
بس مافي اي وجه مقارنه بيننا وبين الاجنبي لعده اشياء
اهمها حط بعين الاعتبار عدد اسره الاجنبي وعدد اسره السعودي
بتلاحظ فرق كبير
وهالشي يشفع لتصرفاتنا بالسوبرماركت
اما الاسواق العاديه فحدث ولا حرج
جد اشوف نساء مبذرااات بشكل رهيييب وليته على سنع

[bant tamim]

وليش خلوهم ياخذون اللي هم يشتهون التعب عليهم ماامتلت العربيه الا الجيب مليان..فاليش اخلي ع نفسي قاصر...اذكر انا واخوي نتسوق يهايبر بنده..في مصري ورانا وهالمصري طايرة بوهته من الاغراض يوم حاسبنا وخلصنا سأل المصري اخوي ..من بعد ازنك دول كلهم اغراض اسبوع كده راح يبوصو..قال اخوي لا نصفهم للجيران<<خايف يصكه في عين
الرجل يمكن يكتفي في الاغراض اللي يحتاجها ولو زاد شي بسيط الحرمه هي اللي كل شي تجمعه..مافي امل تتغير هالعاده اللي تعودنا عليها..

[طـمـوح]

اقتباس:  المشاركة الأصلية كتبت بواسطة دلوعه بكيفي     وليش خلوهم ياخذون اللي هم يشتهون التعب عليهم ماامتلت العربيه الا الجيب مليان..فاليش اخلي ع نفسي قاصر...اذكر انا واخوي نتسوق يهايبر بنده..في مصري ورانا وهالمصري طايرة بوهته من الاغراض يوم حاسبنا وخلصنا سأل المصري اخوي ..من بعد ازنك دول كلهم اغراض اسبوع كده راح يبوصو..قال اخوي لا نصفهم للجيران<<خايف يصكه في عين الرجل يمكن يكتفي في الاغراض اللي يحتاجها ولو زاد شي بسيط الحرمه هي اللي كل شي تجمعه..مافي امل تتغير هالعاده اللي تعودنا عليها..

اذا كان الجيب مليان الواحد المفروض يحمد الله ويشكره على النعمه ولا يبذر .. والمفروض يشتري حاجته واذا كان لازم يخفف على جيبه يعطي المحتاجين .. تراهم كثارين مره !

والعاده هذي تغييرها من أسهل ما يكون .. بس تحتاج واحد عنده دبره ويعرف يتصرف ..

[bant tamim]

اقتباس:  المشاركة الأصلية كتبت بواسطة طـمـوح     اذا كان الجيب مليان الواحد المفروض يحمد الله ويشكره على النعمه ولا يبذر .. والمفروض يشتري حاجته واذا كان لازم يخفف على جيبه يعطي المحتاجين .. تراهم كثارين مره ! والعاده هذي تغييرها من أسهل ما يكون .. بس تحتاج واحد عنده دبره ويعرف يتصرف ..

انا الحين ماقلت يبذر اناقلت مايخلي ع نفسه قاصر اذا ربي منعم عليه. واللي كثارين مره مافي احد ينساهم.لالا كل شي تقدر تغيره الا العاده اللي تعودت عليها..

[قـتـالـه]

شف ياحيي
ترا حنا يالحريم نتعالج بمشترواتنا
بكل مره اروح للسوبرماركت بمعدل مره بالأسبوع
انحر القسم حق الشامبو والكريمات والمنتجات الصحيه
غصب علي أقش من غير شعور
وعندي مايفي بالغرض وأحسن بالبيت بس بذيك اللحظه
انا محتاجه لشوية رضا عن نفسي .. فهمت علي
اما الأكل ومالأكل اشوف الحريم صار عندهن وعي
والاسعار اجبرتهن يدقن ريوس :|
قوطي جبن ازرق بسبعه ريال اشوفهن يقلبنه ساعه وآخر شي يرجعنوه .. هذاك منول يضفن كل اللي بالرفوف
الحين تاخذلك اشياء بسيطه حيل واذا حاسبت
واثرها خمسميه وانت مااخذت لا لحم ولا دجاج ولا رز ولا سكر

[فديكا التميمي]

انا ماقد ابترم راسي غير ذيك المره قدامي ناااس طلع حسابهم
1500 يوم دققت بمقاضيهم واثره بالحبات مافيه ولا انصاص درازن
اعنبوهم حنا بيت كامل حموله وش جابنا لهم ونتقضى بـ 600 ريااال
وبالكراتين اجل احد يتقضى للبيت من بنده وين راحن له المستودعات
والله إني ودي ماسكتن المره وهايشته بس قلت لدام الرجل يتدهدر وراه ماعليه شرهه ,,,,

يعني يالضمير حتى الرجال لكم عليهم ...

[الـــفـــ@ــــد]

اقتباس:  المشاركة الأصلية كتبت بواسطة فديكا التميمي     انا ماقد ابترم راسي غير ذيك المره قدامي ناااس طلع حسابهم 1500 يوم دققت بمقاضيهم واثره بالحبات مافيه ولا انصاص درازن اعنبوهم حنا بيت كامل حموله وش جابنا لهم ونتقضى بـ 600 ريااال وبالكراتين اجل احد يتقضى للبيت من بنده وين راحن له المستودعات والله إني ودي ماسكتن المره وهايشته بس قلت لدام الرجل يتدهدر وراه ماعليه شرهه ,,,, يعني يالضمير حتى الرجال لكم عليهم ...

بس 600 وين حنا فيه شكل كل مقاضيكم شابورة

[فديكا التميمي]

اقتباس:  المشاركة الأصلية كتبت بواسطة الـــفـــ@ــــد     بس 600 وين حنا فيه شكل كل مقاضيكم شابورة

لا بسكويت أبو ميزان .....

[عزف الحقيقة]

أهلا أخي

فعلا لدينا عدم ثقافة تسوق نحن ونساءنا

كثيرا ما يحدثني الاصدقاء عن المستودعات

بس عجزت اروح لهن واكتفينا بالسوبر ماركت

وتضف الزوجة وهي مغمضة ماتناظر ولا للسعر

وتطلع بعربية مليانه والمشكلة انك اذا جيت للبيت

وتبي شي من اللي جبت مالقيته ! كل اللي شريت مالهن

فايدة ! هذا غير البقالة وتوصيل الطلبات واخر الشهر

تلقاه مسجل عليك ثمان ميه ماتدري من وين جت !

[فديكا التميمي]

اقتباس:  المشاركة الأصلية كتبت بواسطة عزف الحقيقة     أهلا أخي فعلا لدينا عدم ثقافة تسوق نحن ونساءنا كثيرا ما يحدثني الاصدقاء عن المستودعات بس عجزت اروح لهن واكتفينا بالسوبر ماركت وتضف الزوجة وهي مغمضة ماتناظر ولا للسعر وتطلع بعربية مليانه والمشكلة انك اذا جيت للبيت وتبي شي من اللي جبت مالقيته ! كل اللي شريت مالهن فايدة ! هذا غير البقالة وتوصيل الطلبات واخر الشهر تلقاه مسجل عليك ثمان ميه ماتدري من وين جت !

الظاهر انت اللي طاحت عليك عيني وشبيت تسبدي

[فسقــان]

قبل كم يوم رحت لسوق عشان اشري ملابس تليق بشكلي (( يافسقان خل عنك التسذب . وعلمهم انك رحت الجمعيه الخيريه عشان يعطونك ملاابـس )) يوم تقضيت الملاابس رحت لسوبر ماركت شفت رجل معه ورقه مقاضي عريضة المنكبين من عرضه ومسبله من طوله قسم طويله مره حسيت اننا مقبلين على حرب على الي يبي يشري لفتت انتباهي الورقه .. وبرضه في شي ثاني لفت انتباهي بنته الصغيره موووت حسناء .. حتى اني فكرت اسوي نفسي اغمى علي حتى تجي وتسوي لي تنفس صناعي