لعبة خطرة والمشكلة ما نحس في خطورتها!!!!!

[صدى الإسلام]

السلام عليكم ورحمة اللة وبركاتة:
اخواني في لعبة عندنا منتشرة في المجتمع السعودي صحيح ان اللعبة حلوة ومسلية
ولكن لها اضرار كثيرة مما تفرق بين العوائل وتفرق بين الاصدقاء وبعض الاحيان
تتسبب بالموت الحين انتم تقلون وش ذي اللعبة المهوية الا وهي ((البلوت)) والبلوت
هي لعبة ورق تتكون من 32 ورقة وهذي اللعبة جات فيها مشاكل كثيرة
تصدقون اني امس اللعب البلوت مع شباب وكان في اثنين يعزون بعضهم معزة قوية
يعني تقول مستحيل الاثنين يفترقون عن بعضهم المراد انشد اللعب وانشدت الاعصاب
شوي واحد من الاثنين عصب وقط الورق في وجة خوية اللي يعزة وانقهر هذاك وكانت
جنبة دلة قهوة صقعها في وجة خوية وشق راسة وقام الدبج ما بينهم شوفو كيف
تسببت الورقة في تفرقتهم وفي سالفة ثانية ان ولد مقابل ابوة في هذي اللعبة وانشدت اعصاب الولد
في العب وصقع ابوة بالورق مع وجهة وقام الابو ودبج ولدة ما بين الرياجيل والى وقتكم الولد
مطرود من البيت وفي سالفة ثالثة قوية واجد بس صدقوني تراة صدق
تخيلو خال يتم عيال اختة بسبب الورقة ولعياذباللة كان الخال مقابل نسيبة في العب
وقام النسيب يحرج على الخال وانقهر الخال وطلع من المجلس وراح خذا سلاحة ورجع
وطلق على زوج اختة وذبحة شفتو كيف الورق يشتت الاسر ويفرق بين اعز الناس

ونصيحة ياشباب ان كان بتلعبون هذي العبة هدو اعصابكم شوي تراة ورق لاقام ولا قعد ولا راح ولا جاء
راس مالة ورق بخمسة ريال وترا الشيطان موجود في هذي العبة ولا يوسوس فيكم

منقول

[الكوماندو]

ما اقول الا اصحاب العقول في سلامه

لكن اتوقع كل هالي قلته موجود في فئة معينة من البشر

انت تعرفهم وانا اعرفهم

هالناس هذي فيهم من الجهالة و العصبية الشيء الكثير , المهم ما علينا

الانسان يكون عاقل ويعرف نفسية اخوياه , والاهم من هذا كله انه يعرف ينسحب بالوقت المناسب ويوزن رداة فعله بميزان دقيق.

ما اقول الا الله يخلف على هالامثلة المئساوية الي طرحتها


وشكرا جزيلا على هالمشاركة القيمة

اخوك الكوماندو