أكاديمية المجد للطقاقات

[الكربوني]

يمكن يزعل كلامي بعض الاخوان
وهذا من حقهم لكن الي مو من حقهم (تصنيف) الأشخاص وإلحاقهم بتيارات ربما لاعلم لهم بها إلا مايسمعونه في المجالس ... وعذري لهم هو عدم لباقتي باستخدام الألفاظ اللبقة ..

معروف عن راعي إسهاب بالكلام ولأجل كذا كنت آخذ امتياز بمادة التعبير ..
ومعروف في المنتديات عدم رغبة القراء لرؤية المواضيع ذات الكلمات الألف والألفين .. ولأجل كذا باجتهد باختصار وش براسي من كلام والله يعيننا واياكم ..

بعد هالمقدمة أقول والله يرحم أمٍ جابتني :

**

أكاديمية المجد للطقاقات

أكاديمة : أي مركز تجمع يضم منتجين كبار في فن من الفنون سواءاً كان مدرسة عليا أو معهد متخصص أو (قناة المجد )

المجد : قناة فضائية تصنف من القنوات الإسلامية المجتهدة بالتوسط ..

للطقاقات : جمع ومفرده طقاقة ، والطقاقة هي من تقوم بالطق والرزح بالحفلات والمناسبات سواءا كان الفعل براحة اليد أو بمد اللسان بالونونة أو بهما معاً ..

* طبعاً التعاريف اجتهادية مبنية على رأي شخصي يؤخذ من قوله ويرد .

مايحتاج أتكلم عن قناة المجد وفرحة كل من يبحث عن الخير والصلاح لبيته وأنا كنت منهم ودخلتها في البيت .. فهذا أمر آخر .. وجهود القائمين مشكورة ومقدرة والله يوفقهم
لكن كلامي بيكون حول صيحة كانت مستحية في باديء الأمر ثم أصبحت الآن ذات فنون وأصناف في هذه القناة ..

أمرٍ يجرني للإستغراب : شخص أول ماجيب كان مقدم أو مذيع (( يااادوب )) يكون مقبول على قولة أهل الحجاز وهالحين (يلعلع )صوته في بداية برنامج أو نهايته ..يعني المقدمة والنهاية الموسيقية للبرنامج أو الفقرة ...
كل ذا مايهم يمكن يكون عنده موهبة انشاد وماطلعت الا البارح ..؟!!
لكن شخص واضح إنه ماله بالإنشاد والتغني لا حس ولا خامة صوتيه همن يحوم أسبدنا بلعلعته ...
يعني بالعربي العربجي ( مووووهق )

استغرب غالب من بالمجد من الشباب كلهم ( منشدين ) ..؟!!
سبحان الله ..وش هالصدفة ذي الي ماتجتمع ولا بموعد ..؟!!

حتى تستغرب حين تجد عندما يكون برنامج استظافة ويكون الضيف له بالونونه وكأنهم يعرفون ربعهم وتلاقي التعريف بالضيف حدر اسمه يكتب( ..... ومنشد )
( محامي .. طبيب .. طيار ..سباح ...شاعر ..كاتب ..مخرج .. ممسرح ... و منــــشد )>> فيها مبالغة ولكن لابد حتى تجرح حبتين

ماعليش يالمجد
تحسبوننا دافعين (أكبر مبلغ اشتراك بقنوات ) علشان نشوف ونونة (مراكز صيفية) .. أو إن الهم هو تجاري ومكسبكم رضا عينة من المجتمع تميل لهالونونه ...

**
حتى البرامج الجادة ماسلمت
تبي تسمع الأخبار كود(تقصرله)لما تروح( عجعجة الحناجر )الي بالمقدمة ...
مادري مهندس الصوت (به صقه )..؟!! أعوذ بالله (أفلام رعب )مهيب اخبار ..

**
كشتااااااات وماأدراك ماكشتاااات
( والله إنهم أجواد .. وحبايب .. وواضح ودهم بالخير )
بس سامحوني سامحوني
البرنامج هذا أعتبره (تخصص طقاقات وعرض أزياء)... أما عرض الأزياء فهذا ماودي أدخل فيه ( التشيك تختلف وجهات النظر حوله ) لكن ( برنامج من أوله لأخره لالالالالالالاليييي لالالالا ...) خير إن شاءالله ..
وليت الي يلاليها صوتن مقبول .. واحدن البارح ثقل ومحترم ومابه خلاف واليوم يونون ويتغصب التلحين ويالله يالله مع فزعة المونتاج يصير مقبول عند - الرضاعين - )

**
زبدة الهرج
ترى القبول عند الناس
والمرح المباح .. مهوب كله طقطقة وونونه وأناشيد وفيديو كليب عند رمثه ولا قدر عشاء
ولولا إن عليكم الشرهة كان ماتعنينا بــ(الطنزة الهادفة)>>لعلها

وقهر إن الفرق بينكم وبين روتانا ذولاك بموسيقى وأنتم بدون ..؟

[align=center]
**
الملاحظ لــ(خريجي)هذه القناة يجد مابين منشد ومونون
فما بين دفعة وأخرى من الوجوه الجديدة تجد أن تخصص
(الطقطقة)هو صاحب المستقبل لحاجات السوق(العقلية الطربية)
**
[/align]

وبكلامي أتمنى رؤية التقدم وأتطلع إليه لهذه القناة ولايختلف هدفي هنا عن ماسبقه عندما تكلمت أيضا حول جزئية في هذه القناة عبر هذا الرابط ::
http://www.buraydh.com/forum/showthread.php?t=79720

**
.. ولااااااا غيبة لمجهول ..

[علشانك بس]

كل هذا وطنزة هادفه .. !! انا احس اني فشلت وانا مالي دخل ,,
فيه ناس حارمين انفسهم من الاغاني وبيعوضونها بالونونه ,,
والمجد بدورها كـ قناة اسلامية تقدم المونونين وتحفزهم على الونونه اياً كانت وبأي برنامج كان ,,
عشان تكسب أجر اللي مايبي يسمع اغاني ,, يجي ويعوضها بالونونه <-- الي يقولي كم مره قلت كلمة ونونه بعينة مشرف بقسم المقتطفات ,,
المهم اني لي سنة ونص تقريبا مافتحت المجد ,, يعني مالي علم بالونونه حقتهم ,,
ايييييه مااقول الا ياونتن ونيتها تالي الليل ونة غريب راح لدختور نفسيه ,,
فوووتك بعافية ,,

[الكربوني]

اقتباس:  المشاركة الأصلية كتبت بواسطة علشانك بس

اقتباس: كل هذا وطنزة هادفه .. !! انا احس اني فشلت وانا مالي دخل ,,

ههه شفت وشلون الأهداف بالتالي صارت خراااص
الطنزة إذا ماقصد أحد منه ماهنا فشيلة ...

اقتباس: فيه ناس حارمين انفسهم من الاغاني وبيعوضونها بالونونه ,, والمجد بدورها كـ قناة اسلامية تقدم المونونين وتحفزهم على الونونه اياً كانت وبأي برنامج كان ,, عشان تكسب أجر اللي مايبي يسمع اغاني ,, يجي ويعوضها بالونونه

وانت حطيت إن غالبية الي عنده مجد راعين اغاني ..؟؟ مع ان العكس هو الصحيح لأن الغالبية الساحقة لمشتركي قنوات المجد هم الأجواد أما راعين الاغاني ماظنيت ان المجد بتسد فراغ عندهم إلا لو معه غصب واحد واثنين ...
وترى الونونة مايطربله الا فئة عمرية محددة ومشاهدين المجد متنوعي الطبقات ... فليش تغلب هذا على حساب ذولاك

اقتباس: المهم اني لي سنة ونص تقريبا مافتحت المجد ,, يعني مالي علم بالونونه حقتهم ,,

ايييييييييييه قل تسذا
اجل لاوصيك رح ونون وشف المونونيين

[Queen of buraydh]

والله يا اخوي الكربوني المجد وما ادراك ماالمجد
المجد بكبرها حايمة كبدي منها !
بدايتها كانت قووية جداً , وبرامجها كثير حلوة ..
لكن هالحين ومع تكرير البرامج نفسها اللي من يوم حطيناها وهي هي ما تتغير وان تغيرت زادو فيها انشودة والا حبتين ديكور

عن جد الفترة اللي راحت حامت كبدي منها , والبرنامج ينعاد من بكره 3 مرات
بدلنا المجد بالفلك وصارت امي الله يطول بعمرها ماتقوم من التلفزيون كل ما خلص برنامج بدلتها بالثانية ..
بصراحة انصح بالفلك وبقووة ..

[الكربوني]

اقتباس:  المشاركة الأصلية كتبت بواسطة queen of buraydh     والله يا اخوي الكربوني المجد وما ادراك ماالمجد المجد بكبرها حايمة كبدي منها ! بدايتها كانت قووية جداً , وبرامجها كثير حلوة .. لكن هالحين ومع تكرير البرامج نفسها اللي من يوم حطيناها وهي هي ما تتغير وان تغيرت زادو فيها انشودة والا حبتين ديكور عن جد الفترة اللي راحت حامت كبدي منها , والبرنامج ينعاد من بكره 3 مرات بدلنا المجد بالفلك وصارت امي الله يطول بعمرها ماتقوم من التلفزيون كل ما خلص برنامج بدلتها بالثانية .. بصراحة انصح بالفلك وبقووة ..

هم مشكلتهم
يعتقدون أنهم سيطروا على السوق
وكسحوا المنافس
فأصبحت البرامج تعاد دون احترام للمشاهد

طبعا ولأجل الحقيقة والصراحه
إنهم بالتالي باديين يزينون ويضبطون برامجهم
بس هالونونة بالنسبة لي محومتن سبدي

والفلك باقة متمزية من القنوات

[الثور]

فرحنا لكن الفرحة ماتمت وعوضنا على الله

[الكربوني]

اقتباس:  المشاركة الأصلية كتبت بواسطة الثور     فرحنا لكن الفرحة ماتمت وعوضنا على الله

على قولة القايل : فرحة أم بنت

[Šiļểηţ ● «]

(( رضى آلناس غآية لا تدرك ))
( )

[الكربوني]

اقتباس:  المشاركة الأصلية كتبت بواسطة يجيب الله مطر     (( رضى آلناس غآية لا تدرك )) ( )

صدقت

صح لسانك وحرفك

[عبدالله الحلوه]

الكربوني


قناة المجد تلعب على وتر حساس واستطاعت الدخول إلى البيوت بإسم المحافظه وبعد أن وصلت لم يعد من اهتماماتها ان تقدم مايشفع لها البقاء في منازلنا

قبل سنوات كانت تمثل الخيار الأول وتنافس قنوات سبقتها بالخبرة والأنتاج واليوم لاارى من يهتم بوجودها في حال وجود غيرها وربما اصبحت في مصاف قنوات الغصب


تحياتي

[رحّــال]

وفيه احد الحين عنده المجد ؟؟؟

ومنه المجنون والمهبول اللي بيدفع 1700

على مجموعة شلة بكل برامج القناة اللي يعيدونه كل شوي تلقاهم

نفس الوجيه نفس المواضيع نفس الحكي تلقاهم بالاخبار وبرامج المسابقات والبرامج الثقافيه وكل شي
صايرين بتاع كله

واللي مستغربه ان فيه ناس يتابعونها ..!!!!

ومسألة أنها قناة اسلامية

الحمد لله ما اكثر القنوات الاسلامية الان ومجاناً ..

وبصراحة اذا انت تشبههم بروتانا

انا اشبههم بستار اكاديمي خاصة برنامج كشتات

مادري اذا هم يجيبونه الي الحين او لا ...

[الكربوني]

اقتباس:  المشاركة الأصلية كتبت بواسطة رحّــال     وفيه احد الحين عنده المجد ؟؟؟ ومنه المجنون والمهبول اللي بيدفع 1700 على مجموعة شلة بكل برامج القناة اللي يعيدونه كل شوي تلقاهم نفس الوجيه نفس المواضيع نفس الحكي تلقاهم بالاخبار وبرامج المسابقات والبرامج الثقافيه وكل شي صايرين بتاع كله واللي مستغربه ان فيه ناس يتابعونها ..!!!! ومسألة أنها قناة اسلامية الحمد لله ما اكثر القنوات الاسلامية الان ومجاناً .. وبصراحة اذا انت تشبههم بروتانا انا اشبههم بستار اكاديمي خاصة برنامج كشتات مادري اذا هم يجيبونه الي الحين او لا ...

واويلي بس يارحال
أنا هالحين يقالي مخربها وأثرك انت بس تحتري من يقدملك ..

بالنسبة لما تكلمت انت عنه من برامج وغيرها .. هذا ماتراه ..
لكن طرحي كان عن نقطة الونونة الي بهالبرامج ومابينهن ..

[الكربوني]

اقتباس:  المشاركة الأصلية كتبت بواسطة عبدالله الحلوه     الكربوني قناة المجد تلعب على وتر حساس واستطاعت الدخول إلى البيوت بإسم المحافظه وبعد أن وصلت لم يعد من اهتماماتها ان تقدم مايشفع لها البقاء في منازلنا قبل سنوات كانت تمثل الخيار الأول وتنافس قنوات سبقتها بالخبرة والأنتاج واليوم لاارى من يهتم بوجودها في حال وجود غيرها وربما اصبحت في مصاف قنوات الغصب تحياتي

مثل ماقلت استاذي ابوفهد الأن دخلت من ظمن قنوات الغصب ..
وذكرت في كلامي إنه مايشفع لبقائها سوى قناة الاطفال الي الواحد يقوم عن عياله وهو مرتاح ..وبسسسسسسس ...
ويمكن بعض البنوتات الي اشغلننا بالشريط ....وععع عليهن >>مع احترامي

[مياسة]

اقتباس:  المشاركة الأصلية كتبت بواسطة الكربوني     تبي تسمع الأخبار كود(تقصرله)لما تروح( عجعجة الحناجر )الي بالمقدمة ... مادري مهندس الصوت (به صقه )..؟!! أعوذ بالله (أفلام رعب )مهيب اخبار ..

هه
الله ياخذ شيطانك ,,
تدري,,, صرت أكره أنشودة متفائل <<- لانها تجي بعد الاخبار مباشرة.. كروتين!

باباتي ما يهناله إلا جدران البيت ترقص على (افلام الرعب ذي)
<<- اول ما يسأل,, وين الريموت كنترول, مووووتفائلووووون طول السنين !!
عذاب ,,!

تخمّرت في جعبتي... لييين صرت>> لمني سمعتها أصاب بغثيان..
تقل وحم هه <- اتذكر ولدي فصولي

عاد كشتات .. حوّمت كبدي قسم ,,
لو هي كشتتنا كان أحسن .. هه!!
اشكالهم يتنططون... وين الرجولة بهالمخفة ..؟ ما تقضبهم ارض
يستخفون بأذواقنا ذولا
لكن الشرهة مو عليهم ... الشرهة علينا اللي فاتحينها ..
هذاني بقوم احذفها من الرسيفر ,,<<- هه
استغفرلله والشكر

* ذاك أول يوم للمجد طفة... الحين خسروا,, طلع الفلك,, هه
مع السلامة ,’,

[الكربوني]

اقتباس:  المشاركة الأصلية كتبت بواسطة مياسة     هه الله ياخذ شيطانك ,, تدري,,, صرت أكره أنشودة متفائل <<- لانها تجي بعد الاخبار مباشرة.. كروتين! باباتي ما يهناله إلا جدران البيت ترقص على (افلام الرعب ذي) <<- اول ما يسأل,, وين الريموت كنترول, مووووتفائلووووون طول السنين !! عذاب ,,! تخمّرت في جعبتي... لييين صرت>> لمني سمعتها أصاب بغثيان.. تقل وحم هه <- اتذكر ولدي فصولي عاد كشتات .. حوّمت كبدي قسم ,, لو هي كشتتنا كان أحسن .. هه!! اشكالهم يتنططون... وين الرجولة بهالمخفة ..؟ ما تقضبهم ارض يستخفون بأذواقنا ذولا لكن الشرهة مو عليهم ... الشرهة علينا اللي فاتحينها .. هذاني بقوم احذفها من الرسيفر ,,<<- هه استغفرلله والشكر * ذاك أول يوم للمجد طفة... الحين خسروا,, طلع الفلك,, هه مع السلامة ,’,

أجل متفائل ... بصراحه استغربت يوم جابوها على ايام غزة(وثقة تصفيق بصراحة المجد ماقصرت ذيك الأيام) بس تقل يوم جابوها وكأنهم يدرسون نفسيات المجتمع ويشوفون ان العاطفه هاليومين شغاله فخلونا نكسبهم ..

هم إن ماعدلوا وجهتهم وطريقة استهدافهم لطبقات البيت راح يخسرون جمهورهم ... >>رأي شخصي