لا يُطــــــَـــاق ...!!

[" TWIX "]

أصدقائي..
أحدهم راح فيها في حادث مروري وجه بوجه مع وايت ماء..
والثاني في السجن متورط بسرقة أسطوانات غاز ..
والثالث سلفته فلوس وزاعلني بعدها ولا عاد شفته ..
والرابع أنحرف وصار شبهه الكلاب ما تجالسه..
والخامس شرب بانزيم .. يحسبه توت ما شفته إلا مرة بشارع الخبيب يبيع مساويك و تتن ..
والسادس دخل سوق الأسهم وانهار عليه والآن هو في اقامة جبرية في غرفة خضراء ..
أما السابع (سفن أب) ..( والبتكس ) و ( لصقة أم أسد ) سمّه ما بدك تسميه
صديق ليس كل الأصدقاء ..
صديق تجاوز اللامعقول .. جميع البلاوي والمصايب مرت به ومازال عالق بي ..
لا يريد الإنفكاك مني كأنه أرتباط الريال بالدولار ..!!
هذا الصديق ..
فيه خصلة لو مزجت بماء البحر للوثته وأصبح كبحيرةالمسك..
عندما يتكيء على أريكته ممسكا بكأس شاهي خادر وأنت امامه يصب
عليك سيلا من الأسئلة وكأنك امام قاضي أرتكبت جريمة لا تغتفر
بين كل سؤال .. سؤال
لا يجعلك تستعيد أنفاسك ..
يسأل عن الصغيرة ولا يترك الكبيرة ..هذه طباعه..
وعندما تسأله عن أحواله وآخر أخباره وتريد أن تغوص بخصوصياته
لا يعطيك فرصة ..
يريد من الناس أن يكونوا امامه كتبا مفتوحة وهو للغموض أقرب
وعندما تنتهي اسئلته .. يرسل إليك كلمة لتلقف ماخلفته اسئلته :
" وش جديدك "
فهذه العبارة كالمنخل لما فات من الأسئلة .. يا سبحان الله عليك ...
لا يريد شيئا يفوته وكأنه وصي على خلق الله
قيل :
اربعة تيبس الوجه وتذهب ماءه وبهجته :-
من ضمنها : كثرة السؤال
يعني أنتبه لا ييبس وجهك وتصير محنـّط يا سين سؤال ..
ونشوفك بكرا في متحف مصر للآثار ..
ما رأيكم بهذا الصديق .. وهل عندكم هذا المنتج الغثيث ...؟!!

[قـتـالـه]

ثكلى صاحبات ,,
قتاله الثكلى تنعي حضها كلما داهمها حديث اصحاب زمن ولو شئتم الاخدود!
بعضنا كتب عليه ان تغيب الاقدار مسمى الخل الوفي في صحيفته ..,
في عالم الانثى الصديقه هي مثل تسابيح الكهان
لاتعلم جدوى نفعها من ضررها !
وبهالديره بالذات تعودت ارتداء الحداد على من اشهق وازفر همومي بين محانيها ..

تويكس !
احب مواضيعك بس هالمره أوجعتني يامال الصلاح
وبالنسبه لخويك ماله مثل الدقم والتحلي بأخلاق البومه :/
يعني تدخل عليه وانت شاقص كل عضلات جسمك لين تحس
ان عصب العراقيب مشتبكات مع عصب الرقبه
ولمنه استلمك بمحضر س/ج
عطه ذيك النظره البارده ابد تسنك بومه متشلبيه لها اثله قبل صلاة الفجر !
وهو لشاف استعدادك بيقمط ويقول اللي بعدوووو

[" TWIX "]

قتالــة ..

اقتباس: ثكلى صاحبات ,, قتاله الثكلى تنعي حضها كلما داهمها حديث اصحاب زمن ولو شئتم الاخدود! بعضنا كتب عليه ان تغيب الاقدار مسمى الخل الوفي في صحيفته .., في عالم الانثى الصديقه هي مثل تسابيح الكهان لاتعلم جدوى نفعها من ضررها ! وبهالديره بالذات تعودت ارتداء الحداد على من اشهق وازفر همومي بين محانيها ..

كسّرتي قلبي .. وانقبض وأشوي وإلا ينفجر ..
ويقول : بووووووو ..
بصراحة ودي بمجتمع تركي وإلا فرنسي كان أصادقك وآخذ أجرك..
لكن خبرتس عارف إحنا ببلد اللهم لك الحمد (بنت .. بنت , ولد .. ولد .. زوج .. زوجة .. زنقة .. زنقة .. )
ما فيه عشيق عشيقة .. على طول جمس الهيئة ..!!
أحس إن صداقة البنات ..
مثل صداقة عيال الحارة هشة .. لو تآخذ منه فيشار قلب الدنيا
وصداقة مؤقته زواج خلاص الوجه من الوجه أبيض

اقتباس: تويكس ! احب مواضيعك بس هالمره أوجعتني يامال الصلاح

أحبك الله كما أحببتي مواضيعي ..

اقتباس: وبالنسبه لخويك ماله مثل الدقم والتحلي بأخلاق البومه :/ يعني تدخل عليه وانت شاقص كل عضلات جسمك لين تحس ان عصب العراقيب مشتبكات مع عصب الرقبه

أخاف يجيني شد عضلي ..وأطيح عنده ..
وبكذا بيآخذ راحته بالأسئلة ..

اقتباس: ولمنه استلمك بمحضر س/ج عطه ذيك النظره البارده ابد تسنك بومه متشلبيه لها اثله قبل صلاة الفجر ! وهو لشاف استعدادك بيقمط ويقول اللي بعدوووو

من كلامك واضح إنك مولودة على جذع نخلة بأحد سواقي مزارع العاقول أو القصيعة ..

[غَسَقْ,]

مَدري كَل مَا أَقول إني عَرفت الدنيا , وبخصتها
أرجع كما ولدتني أمي .. " twix " أَبشرك أنا فقدتهم كلهم !
عليك فيه لا تخليه , وزي مايقولون عض عليه لاتخلّيه يفلت

منك ما صفا لك من أخوياك إلا هو .. بعدين إذا
تبي صديق تراي حاظر

[التنين الصيني]

والله ياهو .... نشده

ورى ما تعلق بوجهوه .... شكله يابس

.....

بس .... عساوه يفزع لبغيتوه .... !

[" TWIX "]

التنين الصيني ..

اقتباس: والله ياهو .... نشده

أحيانا يجي ضيف للاستراحة وأروح للمطبخ اصلح شاهي لا جيت اسمعه يقول :
كم علاوك ..؟!!
يعني سؤال الراتب فاتن وأنا بالمطبخ ..

اقتباس: ورى ما تعلق بوجهوه .... شكله يابس

مرة نايم بالاستراحة وجيت أبشب فيه خلصت 17 دسته كباريت وهو يشخر ويبتسم
شكله يحلم إنه يسأل أحد ..

اقتباس: بس .... عساوه يفزع لبغيتوه ....

الحق .. حق .. حمار كده
والولد ظليمته شينة عليه طاقة أفغاني ولو تجي يمه آخر الليل مثل اول الصبح
دايم أوفر المزاج ..

[عذبـــــة]

اقتباس: بعدين إذا تبي صديق تراي حاظر

قتلتل شوفي تويكس يبي صديق ضايقة فيه الدنيا .. كل اخوياه مسجونين هالدشير
مابقى له الا هالنتفه اللي ناشب في حلقة وماخلى شي ماسأل عنه
احجزي مقعد مع حرف لايعانقة الجفاف يمكن يزهد بهالنتفة ويرسمك مع بداية السنة الجديدة

[قـتـالـه]

اقتباس:  المشاركة الأصلية كتبت بواسطة عذبـــــة     احجزي مقعد مع حرف لايعانقة الجفاف يمكن يزهد بهالنتفة ويرسمك مع بداية السنة الجديدة

تحرينوه ؟
يااخت الرجال ماهي شينه خوتهم يالله من فضلك عديهم خويا حملة حج هه
يقولتس راعي الطرب خوة الرجال عدها شروة الذهب
احط اللي قلتيلي او لا << متوحشه وتحس بشي ماتدري وشو

[عذبـــــة]

اقتباس:  المشاركة الأصلية كتبت بواسطة قـتـالـه     تحرينوه ؟ يااخت الرجال ماهي شينه خوتهم يالله من فضلك عديهم خويا حملة حج هه يقولتس راعي الطرب خوة الرجال عدها شروة الذهب احط اللي قلتيلي او لا << متوحشه وتحس بشي ماتدري وشو

هذاك اول خوة حملة الحج كلها براءة
الحين خوياك بحملة الحج .. اول ماترجعون تلاقينه داق عليك يخطبك مسيار
عاد انتي وضميرك توافقين وتيتمين عياله .. ولا توطين على قليبك وتعدين انهم خويا بحئ وحئيئ

اقتباس: احط اللي قلتيلي او لا << متوحشه وتحس بشي ماتدري وشو

لاتحطينه كان الدعوى فيها خويا حملة الحج هه

[" TWIX "]

قتالــة..

اقتباس: تحرينوه ؟ يااخت الرجال ماهي شينه خوتهم يالله من فضلك عديهم خويا حملة حج هه يقولتس راعي الطرب خوة الرجال عدها شروة الذهب

شوفي يا تحرينه ..
أنا ما أبي صداقة حج وإلا مركز صيفي وإلا قروب
أنا أبي صداقة مرجلة وفزعات ومعَنَى ومهايط وعلوم رجال
عادي يوم من الأيام اتصل عليك وأقول أنتظرك أنتِ والعجرا عند الباب فيه
كم واحد نبي نواسيهم بالأرض ..

اقتباس: احط اللي قلتيلي او لا << متوحشه وتحس بشي ماتدري وشو بدينا بالحياء ..!!

ق
ولي .. لا يصير بتحطين وردة وإلا قلب حب وإلا تبي تقطين الرقم
وإلا تبين تصارحينن عادي قوليها ..
قولى احبك .. كي .. تزيد تعاستي ....فبغير حبّك .. لا اكون ... تعيسا ...



يارب تآجرني على هالورد

[" TWIX "]

عذبــة ..

اقتباس: قتلتل شوفي تويكس يبي صديق ضايقة فيه الدنيا .. كل اخوياه مسجونين هالدشير مابقى له الا هالنتفه اللي ناشب في حلقة وماخلى شي ماسأل عنه احجزي مقعد مع حرف لايعانقة الجفاف يمكن يزهد بهالنتفة ويرسمك مع بداية السنة الجديدة

وأنتي في ذا المنتدى صايره مثل أبو 77 رجل ..
بالنهار بوظيفتك .. والظهر تصلحين كليجا .. والعصر تبسطين به عند الجامع الكبير .. والمغرب خطابة ..
وبعد الأخير بمشغل نسائي .. ومن 11 بالليل لين الساعة 2 طقاقة بأحد القصور ..

خلينا منك ِ ..
يقولون إن قتلتل ..
تنتظر القذافي على أحر من الجمر يجي لـ جدة وأنها فاتحة له محل لبيع الخيام والخلاقين تبي تغريه ..
كان تمونين عليها ..
وصفي لها محل فرزة للنظارات .. شكل نظرها 2 من 6 وإلا خلي نتقاط ونشطب لها
على شان ما تتوهق مع خبل ليبيا ..

[مريااان]

اجل هذا ختم بريده الاصلي (كاالمنخل )

[" TWIX "]

اقتباس:  المشاركة الأصلية كتبت بواسطة مريااان     اجل هذا ختم بريده الاصلي (كاالمنخل )

هذا طبعنا .. ولكل منطقة طبع معروفة فيه بزود عن المناطق الآخرى
إحنا ماهنا حليلنا وحبوبين لكن بنا أننا ( نحب ندري )
حتى نكتة حادث الحمار اللي جاء واحد يقول : أخوي .. أخوي يوم شاف وش يشوف حمار
يقولون إنه قصيمي ..
والعهد على الراوي وما أكذب الرواة في هذا الوقت ..

[آنثى آستثنآئيّه]

من جد يانا ما لي خلق اللي كذا
الله يعينك عليه ...

[" TWIX "]

اقتباس:  المشاركة الأصلية كتبت بواسطة آنثى آستثنآئيّه     من جد يانا ما لي خلق اللي كذا الله يعينك عليه ...

انا الآن بصدد اتصالات مكثقفه مع العقيد معمر يرسل لي واحد
من هالمرتزقة يشوف شغله معه والآن هو بها الوقت بالذات رافض الفكرة
والسبب :
يقول إن مرتزق من المرتزقة يسوى الذهب والألماس الآن ولا عدت الأزمة
ببيعه عليك بشسع نعلتك ..