في المتوسطه الثانيه الان بدءا الترم الاول لمادة الانجليزي!!!

[سراب(h)]

الترم بدء من اكثر من ثلاث شهور و على وشك ينتهي و المسكينات طالبات احد المراحل المتوسطه في المتوسطه الثانيه للبنات بدء الان فقط شرح منهج مادة الانجليزي!!

طوال الترم و هم بلا معلمه !


و الان على غفله جتهم معلمه , يوم مابقى الا اسبوعين ومندوبه بس يومين بالاسبوع متى بيخلص المنهج ؟؟


اسئله كثيرة تدور
اين مديرة المدرسه ؟ اين ادارة الاشراف ؟ اين مشرفة المادة ؟ اين ادارة التعليم ؟ اين خريجات الانجليزي المنتظرات و تعيننهن على البند ؟
ماذا بشان المنهج ؟ هل سيُنهى في هذين الاسبوعين ؟ هل سيرحل باقيه للترم الثاني ؟ هل سيكون هناك امتحان لهذه الماده مع ان ماسيشرح لا يعد الا جزءا يسيرا من اصل الماده؟ كيف سيتم تقييمهن و كيف ستوضع درجات المشاركه ؟ كيف و متى سيختبرن اختبار اعمال السنه ؟هل سيشرح يوميا 6 حصص خلال هالاسبوعين لانهاء المنهج ؟ واي مخ سيستوعب ؟ هذا انجليزي مش مطالعه يعني تاسيس ؟

مااقول الا الله يخلف على تعليمنا و يسمونه تعليم!! المفروض اسمه حشو ?

[نقد التعليم]

[align=center]

اوووووووووووووووف

معقوووووووووووووووووولة ؟؟


وقسمن بالله إنها كاااااارثة بكل المقاييس – إن صحت الرواية –

خاصة إن مناهج الإنجليزي لهالسنة متغيرة وصعبة وتبي مجهود مضاعف !!




[/align]

[نبض القلم]

عفوا .. وش بكم مستغربين ؟؟؟ كأن الأمر جديد علينا؟؟؟؟؟؟؟

أنا بكل بساطة مستعد أعطيكم السيناريو المتوقع بعد هالفضيحة نظرا لتكرارها واستمرارها دون علاج :

أول كبش فداء يبي يدورونه ويلصقون التقصير فيه هو ( معلمة المادة ) !!!

يدورونه ويسألون عنه .. يجيهم الجواب ( إجازة أمومة أو استثنائية أو رعاية .... ) !!

أخ .. والله بلشة !! طيب من المسؤول الحين ؟؟

ايه .. صح.. لقيناه .. المديرة الدبشة الي مخلية المنهج قاعد كل هالمدة ( أخيرا فرجت ) !!!

تجي المديرة وبكل أسف تقول لهم : شوفوا خطاباتي للاختيار والتوزيع .. مليت من كثر ما اتشحدهم وما كزوا لي أحد!!!

الكورة الحين في ملعب الاختيار والتوزيع ..

بكل بساطة يقولون : والله حنا ندبنا فلانة بنت فلان .. بس انه ( عيّت ) !!!

بس والله اننا توعدناه بالحيل .. وقلنا له ترى الوعد أدائك الوظيفي ومديرتك مهيب سامحتن لك توقعين ويمكن تنقلين نقل تأديبي !!!!
والله والله ما خلينا عقوبة ما هددناه به !!! بس ما رضت .. راسه يااااابس !!!

يروحون لأم راس يابس حتى يلصقون الدعوى به يلقونه ( مسنووووووودة ) !!

يلملمون الدعوى .. ويدورون لهم ( ضعيّفة ) مضغوطة بالحصص ومضيّق عليه من كل جهة , ويرسلونه للمدرسة عقب ما يورونه العين الحمراء !!!

ويقولون : يالله.. ورينا همتك وخلصي المنهج (كلللللللللله ) !! باسبوعين !!!!!!!!!!!!!!!!!!!


بذمتكم مهب هذا الي يصير مع كل حدث مشابه؟؟؟؟؟؟؟؟

هذا طبعا إذا فاحت الريحة وطلعت الدعوى خارج السيطرة وذاعت بعد أن كانت طي الكتمااااان !!! ( أهل بريدة يعزوووون الجحادة وااااجد )!!!

[خـــــــــــــــالـــــــــد]

اختي سراب


اين تامين حاجة المدرسه عن طريق الندب ؟ لماذا المعلمه لم تاتي الا في نهاية الترم ؟

صح النوم .


لكن الضحيه الوحيده الطالبات


حتى لو تتبع المخطىء و عوقب من سيتدارك الخلل و الفجوة التي ستحدث عند الطالبات ؟

و اين دور اهالي الطالبات كيف سكتوا و مر اسبوع واسبوعين و شهر وكما قلتي ثلاثه اشهر بلا معلمه .

اختي الكريمه انا لا اشكك في روايتك لكن 3 اشهر بدون معلمه و لا احد يتحرك حتى الاهالي .. صعبه شوي , فربما التبس الامر عليك و لايعدو كونه تاخر انهاء المناهج فقط لا غير , و عموما اقبلي اعتذاري

[alkzama]

غريبة ثلاث شهور ولا احد تكلم من اولياء الامور وينهم عن بناتهم

وبعدين يانبض القلم الندب ليس من صلاحيات الاختيار والتوزيع
هو من صلاحيات الاشراف التربوي وماشاء الله اشوف الاستاذة حسناء ما قصرت اضغطت على الادارة لدرجة اسمحولة بالندب من المندوبيات والقرى البعيدة

اكيد الموضوع فيه لبس
نتمنى احد له علاقة بالموضوع يرد

وفعلا يا اخ خالد الضحية في النهاية الطالبة

التي ستخرج من ذلك دون فائدة ونسال لماذا بناتنا واولادنا مستواهم التعليمي وقبل ذلك التربوي متدهور

؟؟؟؟؟؟؟؟؟؟؟؟؟؟؟؟؟؟؟

[الفجر]

البلا ان فيه عدد كبير من الدكتورات اقصد المعلمات مامعهم الا تسع و ست حصص قال ايش نادبين

الكل واحد يحوووول سبيل للتعليم مادري وين العدل

[بنت الديرة]

ليتهم يفتحون مجال التوظيف بس...


اعرف مدرسة انجليزي بقريه بعدها 300 كيلو وشوي وكل هالمسافه عشان طالبة واحده بفصل

بس نجاسه مايبون يقربونهم

[سراب(h)]

نقد التعليم .... ان ( صحت الروايه ) اذا الروايه مب صحيحه وش يخليني اكتب هالموضوع ؟ ادور الشهره والا ابزيد عدد مشاركاتي ؟ اللي خلاني اكتب ان الروايه صحيحه الف بالميه و لانه يجب وضع حد لهذه المهازل وابسط مايقال عنها ( فضيحه ) مش مجرد غلطه و مثل ما قلت المنهج متغير و اصعب من السابق كما اكدت لي معلمات يدرسن هالمنهج .





....................



نبض القلم ... تكرار الفضيحه ايضا فضيحه وين اللي بيردعهم , وين مصلحه الطالبه ؟ تقول يلصقونه في معلمه الماده اصلا ليش يخلون طرف المعلمه او يعطونها اجازة بدون مايامنون بديل . والخطا مشترك من الجميع المديره صح النوم بس خطابات و ين التنسيق و ين الاتصال و اذا ماسووا لها اللي عندهم الموضوع ليش ما طرقت ابوب الاداره حتى لو تاصل للمدير العام . و لو رفضت المندوبه و اوقع عليها عقاب يؤمن لهم من البند , المعلمات ينتظرن لو اشاره و في انتظار الدور لماده الانجليزي طابور طويل.
وين مشرفة المادة المسؤله عن المدرسه انا خابره ان المشرفه اذا كان فيه نقص مطالبه تسدد العجز و تشرح . وين مسؤله القسم المتوسط و الا مسؤله بالاسم فاي نقص في سير العمليه التعليميه مسؤله عن تصحيحه.

و مصيبه اذا بيكون الحل زي ما قلت ( يخلص المنهج في هالاسبوعين ) هذي حصص بدينه مش حصص انجليزي!!



............



خالد.... نعم ؟ صعبة شوي ؟ انا ماجبت شيء من عندي المدرسه بسهولة يقدرون يتصلون عليها ويسالون عن وضع الماده . و ليش حتى انقل روايه فيها شك و اقولك مثل ما قلت لنقد التعليم ايه مصلحتي في نقل روايه وتضخيمها اذا القصه بس .. تاخر انهاء المنهج ؟ وفيه فرق بين انهاء منهج وتعطل المنهج لا ابي شهره و لا ابي ازيد مشاركاتي شوف متاي مسجله عندكم واقدر اكتب كل يوم قصه مفبركه ازيد فيها مشاركاتي . لكن لان هذا فضيحه و يجب تدارك الوضع كتبت لعل الوضع ( اللي صار له 3 شهور ) يصل للمسؤلين و تحل مشكلة هالطالبات المسكينات ويردع كل من اخذ مسؤليه و لا هو قدها. اعتقد هدفي صار واضح مايقعد كل واحد ناط لي مشكك في القصه ايوالله كن تعليمنا ذابحته المثاليه لذلك((((((((((( احلف بالله العلي العظيم على صدق مارويت من واقعه ))))))))))) و ليت احد الاطراف يفيدنا بزيادة معلومات .

[سراب(h)]

الخزامى ....شفتي شلون 3شهور من قبل رمضان و لا احد من الاهالي تصرف او حرك ساكن و ياناس والله العظيم الموضوع مثل ماقلت لكم وين بيكون اللبس فيه مادريوا ان المدرسه مافيها معلمه ؟ او مافيها اداره ؟ او مداومين بالعطله مافيه من يمشي امورهم ؟ والطالبه ما احد جاب همه واتاكدي النتيجه بيقولون يشرح المنهج في اسبوعين و سلام عليكم وعليكم السلام والبنات مب لازم يفهمن اهم شيء المنهج ينتهي حتى لو ذوبنا الكتب بالماء وسقيناهم الطالبات!







........

وله ....مافهمت كلامك



....





بنت الديره .... صادقه مادام فيه وظيفه شاغره في هالمدرسه ليش مايندبون من معلمات القرى لها حتى تبدا حركه النقل و توجة لها المعلمة بشكل كامل

[نبض القلم]

الخزامى :

طيب .. وش تغير يعني؟؟؟

بس شيلي ( الاختيار والتوزيع) من السيناريو السابق , وحطي بداله ( الاشراف ) !!!!!!

يعني باختصار ( صبّه .. احقنه ) !!!!!!


يا سرااااااب :

من غير حلفان .. والله مصدقينك ..

أصلا مفروض الي ما يصدقون هم يحلفوووون انهم مهب مصدقين !!!!!!!

قسما بالله اني متعجب منكم ... وشلون انقلب الحال ؟؟

كأن هالحادثة غريبة عليكم أو نادرة من النوادر !!!

أنا شخصيا وقفت على مشاكل توقف المنهج مع كل قريباتي !!!!

يقعد بالشهرين والثلاثة !! وخير يا طير ؟؟

نهايته تعاقب ( الضعيّفات ) .. ويحشون الكوسة .. قصدي المنهج باسبوعين !!!!

[زائره]

السلام عليكم ورحمة الله وبركاته

الى الاخت سراب

لماذا لم تثار هذه القضية وتصعد في الانترنت الا في هذا الوقت بالذات ؟؟
هل هو تصفية حسابات مثلا ؟؟
ولماذا لم تشفق كاتبة الموضوع على الطالبات الا بعد ان فوات الاوان ؟؟
وماعلاقة سراب بالمدرسة المذكورة ؟؟
هل هي معلمة بالمدرسة ؟ ام معلمة المادة ؟ ام ولية امر ؟ ام ماذا ؟ ؟
اسئلة يقوي بعضها بعضا لتكون سند متصل لمن هو وراء نشر هذا الموضوع
يبدو ان الاخت سراب كشفت عن شخصيتها بطريقة او باخرى
موضوع في مدرسة معينة وفي مادة معينة ونزل بوقت معين لابد ان يكون وراءه طرف معين!!
خاصة اذا علمنا ان هناك قضية قائمة في المدرسة المذكورة وربما كانت سراب احد اطرافها! !

والسلام عليكم

[alkzama]

فعلا كلام الاخت زائرة صحيح

ليش ينفتح الموضوع بعد ثلاث شهور من توقف المنهج وبعد ان سدد العجز

فعلا وين الاخت سراب يوم المنهج له 15يوم او شهر او شهران او ثلاثة وهو واقف ؟؟؟؟؟؟؟؟؟

نبي رد من الاخت سراب

هل فعلا هي معلمة في المدرسة ؟واذا كانت ولية امر طالبة اين هي طول هذة الفترة ؟

ولماذا لم تتحرك وتحن على الطالبات وتشرح الموضوع الابعد تسديد العجز؟

ان الهدف من هذا المنتدى الخاص هو العلاج والبتر لامراض التعليم
وليس فقط التشهير عندما يحدث احتكاك مع مسئول او غيرة ويصبح الانتقام للنفس فقط
ويهمل الجانب المهم الذي هو ابنائنا وبناتنا الطالبات ......................

[نبض القلم]

طيب وش دواعي التشكيك بنوايا سراب ؟؟؟

وش علاقته بالمشكلة من وجهة نظركم؟؟ وكيف يعني تصفي حساباته؟؟ وضد مين بالضبط إذا كانت المشكلة أصلا عايمة ؟؟؟ ومهيب ضد جهة معلومة مسبقا؟؟؟

تتساءلون : ليش الحين بالذات طرحت الموضوع مو قبل!!!!

طيب : ما فكرت بطرح الموضوع الا هاليومين .. غلط ؟؟ حرام ؟؟ ما ينفع ؟؟

أنا مثلا من عرفت الدنيا وأنا أعاني من مشاكل الرئاسة .. بس ما طرى لي أطرح الا بمحض الصدفة !!

وين الغلط؟؟؟

[اكتشاااف]

اختي سراب أؤيد كلامك ولم تقولي غلط
وللتأكيد زميلاتي معلمات انجليزي معهن 6 أو 8حصص فقط بس ندب بين مدرستين أو ثلاث .
واعرف مدرسة اظنها مجمع البطين فيها ثلاث معلمات انجليزي وملاكها وحدة , ومدرسة بقرية بعيدة فيها خمس معلمات انجليزي تقاسمن المنهج كل اسبوع اثنتين يشرحن والباقي ينامن ثم يتبادلن , ( هذا قبل سنة ) وعندما اخبرت مشرفة بالاختيار والتوزيع قالت : ايه ماتقدر نقربهن تعتبره الوزارة تحايل !!!! قلت ومناهجنا المتعطلة ببريدة ؟؟ قالت عاد وش نسوي .

اختي زائرة وخزامي ترى طرحكم للاسئلة على سراب في غير محلها .
القضية ان هناك منهج متعطل منذ 3شهور .
اما سؤالكن لماذا طرحتي الموضوع الان ؟؟ واين انت قبل اشهر من توقفه ؟؟ وووو؟ تختصر بإجابة انها علمت الان بالموضوع .ثم طرحته طلبا لحله .(
( اكيد تبون تقولون انت سراب 2 ب_ سبب ظاهرة كل من اتفق في الرأي اعتبروه شخص واحد _ جهزت العصابة قبل الفلقة ))
وياليت نترفع عن استفزاز كل من طرح موضوع أو رأي فأنه لابد له ضلع فيه وانه احد الاشخاص المعنيين .

نبض القلم يازين ردودك وبس

[المنجطل]

الأشكال هو الرأس والاساس (وزارة التربية والتعليم) التي كانت بقيادة المدعو/الرشيد.
حينما اراد ابراز اي نجاح يشفع له،، فقام بهذه الخطوة من غير تخطيط لذا فإننا نجد في اوساط المدن الكبرى في مملكتنا النقص الكبير،، حتى ان اثنتين من قريباتي من معلمات اللغة الانجليزية منتدبات الى مدرستين او ثلاث فلماذا نلوم المعلمة وهي كل يوم في صقع من اصقاع المدينة،، فهي انسانة وليست آلة ،،،

((( هذه خاطرة جاءت على البال على هذا الموضوع المتميز )))