يـــــا لـــيــتــنـــي ولــــد؟!!

[الكشميري707]

يـــــا لـــيــتــنـــي ولــــد؟!! ياليتني!((مالذي يدفع البنات لقول هذه الكلمات))

اتعلمون لماذا تقولها البنت لانها تجد اخوه يمارسون طقوس تلك الكلمات انزلعي اقلبي وجهك مو فاضي لك روحي نامي بالغصب لا يا شيخه..!!
اتقوا الله عليهن.. ورفقاً بالقوارير ام ان البنت فقط عند الزوجة تتغير المفاهم وتتغير طقوس تلك الكلمات ونسمع يا قلبي وين انتي به اجيك هوا ولاتتعبين نفيستك .. ويا عيوني تبين تسهرين اسهري خذي راحتك يا ليتن لمبة لك...وتبين تطلعين ميخالف اصير سواق لعيونك...
وتبين شوربة اصير اندومي لك...واذا بغيتي شئ لا تتكلمين بس انتي اشري وانا رهن اوامرك... سبحان الله
سؤال موجة للذكور اسئلك بالله جاوب على سؤالي هل اهديت لاختك هدية ولو كانت عطر ابو عشرة اريل
اتحداكم بل ان لم ابالغ 100 تمساح تجد منهم 30 وهذا هو الصدق,,,
ياخي حتى امك متعيجز تشتري لها ؟؟..
ولا لا صارت تهون لها مئة والف وجوال ولاب توب < تراه ما يقصد شئ

علشان ما تقولون اني بالغت باحصائيتي البعض من اصدقائي باغتهم بالسؤال ولو انه عيشهم هذا السؤال باحراج لكن والله ما فيه احد منهم اشترى لاخته هديه ..؟؟
ولا لا صار الواحد مع صقيقة بداءت تتغير الاخلاق الى الاجمل والاحسن..والله لو يجرب كل واحد منكم ان يجلس بالبيت ويعمل عمل المرأة من طبخ وغسل
وتكنيس وتنظيف وتصليح للقهوة والشاي كل شوي والله لسجد شكر لله انه ولد

فيه بعض الناس عقولهم مساحتها 3 في 4 ويقول لك يعني تبينى نطالب بالانفتاح للعائلة ياخي اذا ما تبي تهدي اهلك كف شرك عنهم
ولا تطقهم وتهوشهم...

لا تستغرب ان تكون ملجأ لبعض الوحوش لانها لم تجد اخيها يعاملها باحترام ويدلعها لانها بتروح لم عالم خربانه
ويبدا يلعب بعقله وين انتي به تراني ما زلت اسبح في بحر حبك واخاف من كثر هجرك اغرق في ذلك البحر ..
وينكب الطشت وتغرق المسيكينه على نياتها...والتسلب ذاك يتسذب عليها يوديها لعنيزة ويرجعها لبريده بكم كلمة حسبي الله عليه
ليش لانك حظرتك مسترجل على اهلك بـ وينك يا حيوانه انقلعي روحي صلحي غدا وين الشاهي حشى صارت خدامه وحتى الخدامه سبحان الله يا دلبي تنزل حنيتك عليها اما اهلك وين هي به ذي الحنية...

مشكلتنا هي اننا نتمضمض بكلمات الترحيب والحب ونقذفها في وجوه غير اهلنا ونجعلهم يستنشقون هواءها ..
اي نعم حرية البنت محدودة لانها آنثى قبل ان تكون بنت والبنت تتعرض للمنوعات اكثر بس لو البنت تفكر بايجابية اكثر وتاخد كل هالممنوعات هي طريقة للمحافظة عليها راح تكون انسانة واعية وذكيه

ما الذى يدفع البنات لقول يا ليتني ولــــد؟!؟

على سبيل المثال لا الحصر

1-الشباب اذا بغوا يطلعون يطلعون في اي وقت وعلى راحتهم ...!
اما البنت لازم تروح للوالده واذا وافقت (طبعاً بعد موووت وطلعة روح ) تروح.. (طبعا هذي للبنت اللي تكن احترام وتقدير لميمتها مو الي مطنشه )...!!!!
هذا سبب يخليها تقول ياليتني ولد ..!!!
( واحمد ربك انك ولد )

2- عندما تكون جاهزة و مستعدة للخروج و لم تجد من يوصلها للاسواق والأخوان مشغولين عندها تسمعها تقول
( يــا ليتني ولــد )

3- وأحيانا تعزم صديقاتها وتقول لهم بكل الفخر العشا علي ...لا ومن وين من احـــسن مطــعم. تتصل باخوانها فتجد
واحد مقفل جواله !!
والثاني برحلة مايوصل له الارسال !!
والثالث نايم ولا في امل يصحى !!
والرابع بالغرفة ...وقافل على نفسه الباب ...ويقول لا احد يزعجني !!
والخامس مع أولاد عمه!!

والاعذار تسكت بوجبات( بتوصيل منزلي) من بيتزا هت
واول مايطلعون تسمع صرخة بالحوش
( يـا ليتني ولـد )

4- ولما تكونين جالسة على النت و تريدين الدخول على منتداك المفضل و فجأة تجد اخوها واقف امامها
يقول قفلي النت ...
ليـــــش؟؟؟؟؟
بس بكيفي ....وثاني مرة لا عاد تشبكينه فاهمة !!!!اوكي
وليـش ما أشبكه؟!!!!
تجد الجواب اولاً أصراف ....ثانياً بنت ....ثالثاً وليش تشبكينه ...وش الفايدة...؟؟؟؟ماله داعي!!!
عطيني لاب توبك بفتشه احس فيه شئ.
( يــا ليتـنـــــــي ولــد )

اكيد هناك العديد من المواقف التى تدفع الفتاة الى قول هذه العبارة
و ما ذكرناه سابقا ليس الا امثلة بسيطة

فمــــــا السبب؟؟!!
من وجهة نظري السبب الاول والاخير اللي يخيلي البنت تقول هالكلمة هم الرجال
لان كل سبل الوناسه والحريه موفره لهم وليتهم بعد كافين شرهم عن خواتهم واهلهم

الموضوع باختصار كن لاهلك الاخ الطيب والاخ اللي ينفذ ما يريدون دون تظجر والاخ اللي يجيب لهم هدايا ( ايه هين كف شرك عنهم )

اتمنى انك تجلس جلسه بين نفسك وترتب افكارك وتنظف عقلك ترا يقولون فيه بعض الهدايا سعرها 10 و 20 ريال مادري هو صدق ولا لا < والله ما ينلام لان فيه ناااااس تسمع بالهديه

ما راح يفهم مضوعي بكل اريحية الا من له قلب وعقل بكل صراحه

مساكين ياويلي الله يجبر بخواطرهم

اخوكم/الكشميري707

[≈ Śķőőŋ »]

والله ماقلت ياليتني ولد الا يوم انا صغيره بس الحين الحمدلله ماعمري قلته

الحمدلله اني بنت

اقتباس: كن لاهلك الاخ الطيب والاخ اللي ينفذ ما يريدون دون تظجر والاخ اللي يجيب لهم هدايا ( ايه هين كف شرك عنهم )

كلام جميل بس مانبي هدايا
نبيهم يودوننا متى مابغينا موب على حسب مزاجهم


جزاك الله خير ماقصرت ..~

[>ريانه<]

فعلا ياليتهم بس يودوننا
ولا الحمد لله اني بنت
الف شكر لك

[شـموخ انـسـآنـہ]

آمممممم كذا وضعي عجبني ^_^
بس أتمنى أصير ولد عششآن أطلع بعثه لكندا بس هه
النت & الجوال ..الخ
^
كل ذولي حريه شخصيه للبنت وماجابته أمه يمنعنا .

شكراً لك .

[قرنااس الشمال]

[align=center]هذا المفترض وانا أخوك الشاب مفروض يكون صديق لأخته قبل كل شي لأنه بالحاله هذي راح يكسب أخت وصديقه تفضفض له كل شي وتكون معه بكل شي .....

مشكوووووره أختي ...[/align]

[الأرجوانه]

آلحمدلله آني بنت .. ق8


بس اللي يخلين بعض الاحيان اقول ياسعد العيآل .. انهم يطلعوون متى مابغوو .. وبأي وقت ..


حنآ لآ .. يعني لازم اذا جيت اطلع اقولهم من العصر عشان يتفضون لي .. وتصير امي متجهزه معي هع


...


تشكرآتي موضووع ولا أرووع ..

[الحبايب]

أعتقد أن تربية الأهل لها دور في هذه الكلمة (ليتني ولد)
لكن الأسرة الي تعطي كلن حقه ما أعتقد يظهر فيها
وتقوية الولد على البنت كذلك سبب
وتهميش رغبة البنت سبب
وعلو صوت الرجل ومقولة (عيبه بجيبه) هي أم الكارثة والسبب في طغيان بعض اللأولاد على خواتهم لا وأكثر يمكن على أمهاتهم

الله يهدينا

[يالبى قلبي]

جبتهـاع الجـرح صراحة ياسعد العيال طلعات وروحات وجيات وأهم شيء استراحــآـآآت ومع ذلك الحمــدلله أني بنت

أما بالنسبه لأخواني فهم الحمدلله ماقصروا معنا بشيء ولو أن بعض الأيـآم المزاج لكم عليه شووي .. بس ما أقوول إلا الله يخليهم لنا ..

[بنت السلطان]

يسلموووووووووو >موضوعك حلو ’’’

[زين الصبايا]

الحمد لله اني بنت

قد يتمنى بعض البنات انها ولد لان بعض الاهل تجعل للولد سلطه على اخته ممكن اكثر من الاب

لكن في نفس الوقت يوجد اهل يربوا اولادهم ان انت سند لاختك ولازم تلبي حاجاتها ولا تجعلها تحتاج غيرك..

طبعا نحن ندعوا الاهل انوا يكونوا من الفأهـ الثانيه

شكرا على طرح هذا الموضوع

[شعاع الكون]

اي والله ياسعد العيال طلعات وفله ووناسه واجتماعات
والبنات الله يخلف عليهن بين اربع جدران وياويله تقول ابروح لصديقتي

[| ~ ســمــو ~ |]

مشكــــــــــــــــور على احساسك بـ القوارير

بعيدا عن المثاليه مثل بعض الردود

وعععععع مانبي هدايا ولا نبيه يودي ويجيب .. الله يخلي السواق هو اخوي الصدزي ههههههه
<== ابي وجه سمح بسسسسس


الولد دايم حاطينه على كفوف الراحه وحنا فوق الواجبات المنزليه اللي تجيب الغم ما يتحقق اللي نبي بسهوله .....
و تطلع روحي قبل اطلع مع صديقتي

وبالبرد اذا صار فيه مطر والجو حلو >> اتمنى اتمشى بالسياره لحالي
واقول .. لــيــتــــي ولـــد

[شمعه مضيئه]

["] =" والله جبتها ع الجرح اخوي"]الله يرزقك الزوجه الصالحه والله دايم اقول ياليتني ولد اول شيء الولد مايحاسب آخذ الدنيا ع راحته يسوي اللي فباله ويسهر ويسافر ويروح مع اصحابه عاااااااااااااااااادي,,,وحنا يالبنات لو اقول ابروح لصديقتي انهبلوا انتن ماتجلسن بالبيت وشايفيننا سواقين البنت ماله الا بيته ...الخ وبنفس الوقت تلقى صاحبه ناصب سيارته ويقوله ابيك تودين مشوار تلقاه يدق الصدر سم وابشر,,
والبنات قبل الزواج كررررررررررف بالبيت ليش علشان اذا تزوجتي والولد لا يدلع لانه وده يرتاح قبل يتزوج شفتو شلون الدلع عينك عينك,,,,اخوي تحمل قرررقي الزااااااااايد بس شسوي اول مره اطلع اللي بقلبي ,,,او اول مره واحد يتكلم كذ "]تصدق وانا اقراء الموضوع خنقتني العبره فيه احد يفكر مثل تفكيرنا,,,,,,يعطيك الف الف الف عاااااااااااااااااااااااااااافيه ويحقق لك اللي ببالك...

[نبراس القصيم]

الحمدلله ما عمري أحتجت هذا الكلمة واقول ياليتني ولد


ربي يخليهم ما يقصرون


وفعلا فيه شباب نايمين بالأستراحات وأهلهم ينقلهم النقل الخاص


الله يهديم


ومشكور أخوي على الموضوع لعله يحرك ما هو ساكن


في قلوب بعض الشباب أتجاه أهليهم

[باسمة]

شكرا لك على هذا الموضوع