دكتورة تستحق التقدير والتكريم 00 حقا هي حاله نادره !

[صاحبة السموالفكري]

اقتباس:  المشاركة الأصلية كتبت بواسطة الحنتريش     [align=center] اختي نيابة عن الي انتي تعنين ابقول لتس يعلم الله اني احب له مااحبه لنفسي ولكن دامتس من المراجعات للدكتوره ابسالتس كم المده الي تجلسينه عنده بالعياده؟ وهل كله كشف وعلاج والا يتخلله سوالف ثانيه؟ تراه سؤال بالله واذا كنتي مراجعه عند طبيب او طبيبه غيره كم المده بعد؟ وعطين رايتس بالدكتورة ليلى الطويرب هل هي تستحق التكريم او لا؟ الموضوع مهو غيره بقدر ماهو النطق بالحق صح انتي لازم تدافعين عنه وخصوصا اذا انتس معلمه اكيد مستفيده منه اجازات بدويه او من قريه وجايتن لمستشفى يعني وش تبينه تلبس؟ احسن شي عنده ثوب تترو والا روز وغدفه بنات الخليج لكن سؤالي لتس وشوله المريضه لاراحت للمستشفى تميكج؟؟[/align]

على بالك احرجتن بأسئلتك يالحنتريش ؟!

بكل بساطة أجاوبك وبكل صدق وشفافية , فترة جلوسي عند الدكتورة تتراوح ما بين الربع للثلث ساعة , وأحيانا تزيد شوي إذا دخلن مراجعات للدكتورة يستفسرن عن العلاج أو غيره وأنا موجودة ..

يعني أحلا شي بالدكتورة ليلى والي أعتبره ميزة قليل ما نشوفها في الدكاترة حتى الي في مستشفيات خاصة أنها تعطي المريضة وقتها وتخليها على راحتها تسأل وتستفسر وما تطلع الا وهي فاهمة تفاصيل الحالة والعلاج .. مو زي بعض الدكتورات الي وأنا جالسة أسأل تقوم وتفتح الباب كأنها تقول لي : عرض اكتوفتس !!
والي يغثن ويلهدن اني أكون دافعة لها كشفية ومع ذلك أطلع وفي راسي ألف سؤال لكن ما تعطي مساحة للسؤال لأن هدفها تجاري بحت .. تبي بكل دقيقتين مريضة ! والحسابة بتحسب !!

أما مجال الكلام الي يجري بيني وبين الدكتورة ليلى فهو عن مشكلة المراجعة وأسبابها وكيفية الشفاء منها وعدم تكرارها , مع تفاصيل وصفة العلاج .. هذا كله بعد الكشف طبعا .. وبس .

ومو منطقي أبدا ان الدكتورة تجلس تتكلم بأشياء هامشية مالها علاقة بالمراجعة في الوقت الي عيادتها مزحوووووووومة بالمراجعات الي يطلبنها بالاسم لثقتهم بقراتها وكفاءتها بعد الله عز وجل ..

وبعدين هل أنت يالحنتريش راجعت عندها حتى تجي وتقول عنها هالكلام ؟ ؟؟؟؟؟

الزبدة انك مجرد ناقل لا أكثر ولا أقل !

وعن مين ؟ عن مره من هالنماين الي نشوفهن ما غير يتأففن عند العيادة ويبن الدنيا تجي على كيفهن , نماين للأسف ما عندها مبادئ احترام الغير ومبدأها بالحياة نفسي نفسي !
يتأففن ليش المراجعات الثانيات يتأخرن عند الدكتورة ولما يدخلن هن ما عاد يحسن بالوقت وكل وحدة منهن تبي حقها كامل مكمل من وقت الدكتورة !!

يعني باختصار ينسن احساسهن بالوقت الي قبل شوي كانن يتاففن فيه والحين بس صارن ما يحسن بالوقت ويبن يسألن الدكتورة عن كل التفاصيل الي تخص حالتهن !!

بالله مو هذي الأنانية بعينها وعلمها ؟؟؟؟؟؟؟


أما بالنسبة للي تقول جايات يبن يراجعن ووشوله يتمكيجن ويلبسن فأرد عليك بان الإنسان الناقص ما تخليه عقدة النقص يستر على حاله .. لكنها نفضحه لما من غير شعور يتكلم بدافع الغيرة والاحساس بالنقص فيبدأ ينتقص الآخرين على ( كمالهم ) !!

يعني ما كفاهن انهن جايات بشكل يقلب الكبد وناكس للفطرة الي انفطرن الحريم كلهن عليها , لكن بغباء منقطع النظير يجن ويسبن الدكتورة لأنها تتمكيج وتلبس !!!

لاحظ تتمكيج وتلبس بس .. يعني ما قالن تطلع على الرجال ولا ولا ولا .. طيب وش حارق رزكن ؟ وش الي رادكن لا تحسنن أشكالكن ؟

ناااااس مريضة بكل ما تحمله الكلمة من معنى .. وبس

أما سالفة الاجازات فيتحمل وزرها من ذكرها ..

وبالنسبة لي شخصيا فأنا موظفة وأقسم بالله أني لم آخذ اجازة من الدكتورة ليلى عامر الا يوما واحدا بعد اجراء أشعة صبغة بقيت أعاني من آثارها أسبوعا كاملا ..

علما بأنه من صلاحيات الدكتورة أن تمنح اجازة لمن يستحق ..وهذا أمر متعارف عليه وليس بالجديد في عرف المستشفيات .. وعلى من يدعي خلاف ذلك اظهار البينة !

وأما الدكتورة ليلى الطويرب التي تتحدث عنها فلا أعرفها ولم أتعامل معها لأحكم عليها , لكني جربن بعض الدكتورات الأخريات ولم أرتح لتعاملهن فحولت للدكتورة ليلى ووجدت عندها الكفاءة والخبرة والتعامل الرائع ..

أكرر تحيتي وإكباري وتقديري للدكتورة ليلى عامر متمنية أن تحذو الأخريات حذوها لتنتفع نساء المنطقة من المزيد من الكفاءات ..

وأتمنى أن تقل في مجتمعنا ظاهرة ( التقليل ) من شأن وانجازات ( الناجحين ) ! فقد باتت حقا ظاهرة مخجلة ومقلقة في الوقت ذاته !