[align=center]
مرّه عيطلي بيه وقلي قرّب يا ولد بدي خبرك شويه عن مشاكل البلد
وخبرني انو جدي مره عيطلو كمان وقلو قرب لحدي لخبرك عن لبنان
من زمان كتير كتير الله خلئ هالأكوان وخلئ هالبلد الزغير ونألو اسم لبنان
كان جو متل السحر وكانت رجال رجاله شو كان نضيف البحر ينّضف اجرين جباله كانت العيشه حلوه والرزقه يا ماشالله وكروم العنب بلوه تفاحا هيك اسم لله
يرمي الشبكه هالصياد تطلع مليانه الشبكه ما تخلص منو الاعياد الطئش والفئش والدبكه
من كتر ما تغرد الطيور تصفي اصواتا مبحوحه والناس تنام بهالليل تاركه بوابه مفتوحه
صداقه حب وامان محبه ونشاط وحركه كان طيّب الانسان ماشي وعايش عالبركه
توفى جدي هالمسكين وما كفالو الخبريه ومرئت عالخبريه سنيين وكفالي هي بيّه
قالي فجأه متل البرء صار بلد الازدهار اسمو صار سويسرا الشرق ليلو مضوي متل النهار
هالجاي وهالي رايح ليقضّي سهرات الكيف يجي لعنا السايح يبقى لاخر الصيف
العرق والكبه النيه التبوله والقطايف عيشه حلوه وهنيه لا اديان وطوايف
منتشاوف نحنا من هون هيدي النا البيوت ما ضل مطرب بالكون الا ما غنّا لبيروت
بيروت يا العيش الهني بيروت يا ست الدني بيروت يا مهد الحضاره شارع سرسق والمناره
بيروت امنا الحنونه عالروشه وعالزيتونه
وكتر ما غنو لبيروت طرئوها صيبت عين ما عادت تعرف بيروت القذايف عمتجي منين
يقعد حسن وبشاره مع بعضن عخطوط التماس فنجان قهوه وسيكاره يتسلّو ويحكو عالناس
ولمن يعطوهن اشاره يبلشو عبعضن قواص صفا في عندو بيتين بيملكون كل لبناني
بيتو الاول مدري وين والملجأ بيتو التاني وعالم صفت بلا بيوت لا تاني ولا اولاني
وناس ايّدو الطوتين وناس حتجّو وقالو لا ما نعرف الحق على مين وليش البلد هيك نشق
والحكام المرتشيين يحطو عغيرون الحق جوا جيابون ملهيين ونحنا عمناكل الدق
ودخل بيناتنا الغريب وداهمتنا اسرائيل وهيدا خي وهاي حبيب وهيدا صهر وهاي عديل
المهم خربو البلاد والامل صفا قليل بميه دولار البنزين بتحصل منه شي قليل
ولتحصل عالخبزات ساعه بالصف الطويل رجال ونسوان بهالصف بالشوبات وبالبرد واحد يخرئلك الصف عخصرو حامل فرد عايام جدك يبني بوابنا تضلا مشروعه
عايامي بعدا هيك بس هالمره مخلوعه ما بنسى هالخبريه وما بنسى بهاك اليوم
طفي السيكاره بيّه وقلي انا فايت عالنوم عد مده طويله ندهت لابني عشيه
لخبرو عالقليله الخبرني ياهن بيّه قلتلو وقف المدفع ما عرفنا كيف ولا ليه
تغلغل التفر فينا ورافقتنا المصايب حد ادنى ما بكفينا فوقو مندفع ضرايب
وخبريت المدارس هاي خبريت بريئ الزيت تا ابنك يبقى دارس بدك قبل تبيع البيت
الشعب عامل كريزا والحلم صفا فيزا تمنى بكرا يا بني تكفي القصه لابنك كمان
ما تكفيا بكندا كفيا هون بلبنان
صدقت آه يالبنان ..
[/align]
العرض الشجري