عنوان الموضوع اقتبست فكرتة من سلسلة فيلم الرعب الامريكي الشهير
I Know What You Did Last Summer
( عاطلين أول مرة يسافرون لأمريكا )
الصيف الماضي تقريبا مثل هالوقت قررت أنا و يوسف صديقي الذهاب الى خالد المبتعث لرسالة الماجستير بأمريكا بولاية فرجينيا ، فخالد لأكثر من مرة يلح علي بزيارته هناك و لكن كانت الماديات هي العائق بالنسبة لي و لكن عندما ضرب بي الملل و الطفش و الكسل و الهواجيس الذباحة قررت الذهاب و لكن أحتاج الى أحد معي فكلمت يوسف صديقي العاطل و قال / والله يا حمادة ما معي فلوس تكفي ، قلت /كم تقدر تدبر قال/ لو أعصر روحي عصر مع السلف ممكن أجمع 10.000 ريال قلت/ طيب بع الفورد قال / أنت مهبوول أنا ابسافر ولا ابهاجر قلت / خلاص ما عليك دبر المبلغ هذا وانا علي الباقي ( من باب العاطلين لبعضهم ) قال / طيب ما نعرف انجليزي قلت / يا ابن الحلال ما عليك انا اقدر امشيك هناك وخالد موجود والمترجم موجود يعني " ارقد وامن " ،،،
المهم المشوار قدامي أنا طويل جدا علشان أجمع فلوسي لانه مثل ما انتم عارفين لما ( العاطل ) يشحذ مبالغ كبيرة شوي من أهله يحتاج يكون نفسه طويل لأن تهم المخدرات و تهم السفر لتايلاند واندونيسيا و كل ما هو قبيح سوف يظن به ، ما لكم بالطويلة رحت للوالد وقلت / يبه انت خابر ان خالد مبتعث بأمريكا و قالي تعال انه فيه كثير من الشباب قبلوهم بس بعد ما يقابل القنصليه ويسوي اختبارات بالجامعات هناك ومجموعة افلام ووو..الخ المهم اخر شئ قال / الله لا يبارك بك ولا بالدولة اللي ما وظفتكم وورطتنا بكم ( قلت بنفسي الدولة ما لها دخل انت اللي حرم امي من حبوب منع الحمل ) المهم بدأ بالتعصيب بشكل متسارع و صرخ بوجهي وقال انقلع عني منيب معطيك ولا هلله ،،،
رحت لأمميتي وقلت / يمه انا يبي يجيني مرض نفسي و قصيت لها قصتي إني ابروح ادرس هناك و و ..الخ
بدأت المرحلة الثانية من تجميع المبلغ علبال المرحلة الاولى ما تجني ثمارها ، رحت لخواتي الثلاث و اخوي الكبير و قلت لهم / اني عندي مشروع صغير وناوي اتحرك و اكفي نفسي بدلا من شحاذة ابوي و امي المهم كان فيه تعاطف كامل من خواتي معي و استطعت اجمع منهن المقسوم أما أخي الكبير بعد تحقيق استمر لمدة يومين استطعت بالخروج منه بمبلغ مش بطال ،،،
كنت اجلس بالبيت و غرفتي كثير الفترة هذي و احافظ على صلاتي بمسجد الحارة حتى استطاعت الوالدة ان تقنع الوالد " أطال الله بأعمارهما جميعا " ، بالنهايه قدرت اجمع مبلغ و قدرة من الجميع و بدأت بإجراءت سفري و تطليع الفيزا،،،
خلصنا من جميع الاجراءت و حجزنا التذاكر( الرياض – جدة – واشنطن – ريتشموند ) و كان وقت الانتظار بمطار واشنطن بحدود 4ساعات، ركبنا الطيارة و نزلنا بمطار واشنطن لكي نركب على الرحلة الثانية لريتشموند ،،،
بمطار واشنطن بزعت و قلت خلنا نتمشى حول المطار علبال ما يجي وقت الرحلة و لكن صارت الطامة الكبرى و دخلنا بقضية خطيرة جدا >>>>>>>
العرض الشجري