ما يهمك ..؟؟
و من متى كانت سواليفي تهمك ؟
و من متى كانت عباراتي تهمك ؟
و من متى كان الشعر ولا أنا حتى أهمك ؟!
إكتشفت اليوم إني كنت ماضي
كنت شاعر يحترق .. يملا حياة إنسان فاضي
و إكتشفت إن الهوى ماهو بدمك ..
كان شي من الوهم .. كان إفتراضي
يعني في تعبير سطحي
كان سطحي ..!!
كان ممكن ينتهي ..
أو ما يهمك ؟
كان .. ياهي تتعب القلب و تعله
كان .. يعني العرش ما عاد بمحله
يعني دور لك مكان ..!!
يعني كل اللي حصل غلطة زمان ..
يعني شفلك تاج غير .. و صولجان
يعني مالك حق تشكي ..
يعني مالك حق تبكي ..
يعني غيب بهالعجاج ولا تبان
كان .. وعند الناس يعني كان
يعني موجود .. له أبعاد و حقيقة
له كيان ..
يعني نيران وغضب
ريح وعنفوان ..
و عندك أنتي كان
كلمة من بعض ما قال فمك
يعني من ذاك الكلام ..!!
اللي يعدّي بسلام
لا يهمك ..!!
عندك أنتي و الله إني ما ضعفت
بس عندي الحب من طبعي ضعيف
حبي ياللي فيه من قلب .. إعترفت
و غيره أوهام تخاف ولا تخيف
لا تقولي يا لطيف ..!!
شاعرك لو جاع يخبز من ألم جوعه رغيف
شاعرك لو شاف ضيف يصير عند الضيف ضيف
شاعرك وبل .. و رفيف
شاعرك من وين ما رحتي وليف ..
شاعرك من وين ما جيتي وليف ..
شاعرك حرّيف ..!!
أقصد إنه لا نوى الصعبة كسرها ..
و أقصد إن قذيلتك يعرف شعرها ..
لمّها ياما ..
و لو يبغى .. يلمّك
بعد هذا ما يهمك ..؟!
إستويتي و صار لك عنقود
يغري الأرض و يفجّر ضماها ..
إستويتي و صرتي أشهى
من عروق الذكريات و من صباها ..
إستويتي ...؟!
بس من ويت إرتويتي ؟
من سقى روحك حياة .. و رعاها ؟
من وصل فيك النجوم .. و تباهى ؟
من هذاك اللي على صدره غفيتي ؟
من يكون ..؟؟
الله أكبر ..!!
كيف عنّه ما دريتي
إستويتي .. و بان لي وجه الحصاد
اااهـ يا وجه الحصاد ..
اااهـ يا ذاك الشحوب اللي تلاطم بالسواد ..
اااهـ يا ذيك الخدود اللي يصفعها الرماد ..
ما وفت ..!!
أو ما وفيتي ..؟!
ما يهمني ..
و من يقول إن الوفى همّي و همّك ..؟؟
إرحلي .. ماني بيمّك ..
إرحلي كانك تبين .. لا يهمك ..!!
من متى كانت سواليفي تهمك ..؟؟
و من متى كانت عباراتي تهمك ..؟؟
و من متى كان الشعر ولا أنا حتى .. أهمك ..!!
د . صالح الشادي
العرض الشجري