يا آمان مع ديبا مافيه آمان ..! ( صورة )

[شاطئ الراحة]

يا آمان مع ديبا مافيه آمان ..!



مالي بطولة الهرج .. و لا لي بكثر الهمق و حقن المعلومة .. و لا عندي إستعداد أشرح أكثر من اللازم .. و لكن إطلالة على الصورة تخفس بأم أبو الي جاب التوقعات التعاونية و يا مدور الهيّن ترى ديبا مهب ليّن .. دغملت الهرج و القول و القيل مهب عاداتنا .. و الحبيان تحت الطاولة برضوا مهب تبعنا .. حنا ما نقول تعاقدنا مع الخميس أو التركي علشان نهبّل بالتعاونيين لا لا لا .. حنا عندنا لاعبين نثق بهم و بعزيمتهم و بإصرارهم على الفوز بإذن الله و ما يمنع نصور واحدن منهم و ننزل صورته ندفق به العقول .. و نقول يا منتج الإشاعات ترى إشاعاتكم قديمه تبي من يمحضه ..

بعدين أنت يا آمان قل لي بصراحة و منطقية ولنب معلمن أحد .. يومنك الآن صاير دفاع حاطن ببالك إن بيوم من الأيام يبي يطلع عليك كابوس ديبا .. يعني هل و كيف و يمكن خطر ببالك إنك ممكن تتصدى لهذا المملوح و الي ما يعرف من لغات العالم إلا بزخ الكورة بالمرمى ما شاء الله عليه .. و الكلام للثنيان الله يوفقه بزواجه و ييسر أموره هو حارس مبدع و صلب و ياما حمى شباك التعاون من الخمسات و الأربعات بس بعض المرات غصبن عليه تزل الكورة .. أنا ما أختلف مع التعاونيين إن صلاح أجودي و يبي يقهر الرايداويين هماوه عندنا و راح لهم أكيد نبي ننلهد .. بس هو يقدر يعمل حاقه في الديربي .. هل يقدر يوقف هالشوالتيه لاعبين الرائد و إلا تبي تصير السالفة توزيع إبتساماة و منابط من صلاح و عقب المباراة يقول جماهير التعاون الأولى بالمغرب .. تراوه يسويه و أكثر ..

إييييييه يا شاطئ .. وش تقول و وش تخلي .. وش لو أنت تعاوني تبي تذوق عينك النوم و هنا رايدن يدور القلهي ما يرحم و إلا تبي تمزمز على الخمسة الشهيرة أو تشغل السوني و تدعي ميلان زيطة علشانهم أحمر و أبيض و أسود .. إصحى يا نايم وحّد الدايم .. تراك ريداوي كثيرن همقك بس بك ميزه تختلف شوي إنك حاطن صورة ديبا نجدي العينين حجازي المنكبين سنغالي الطموح خلفية لجوالك .. كل ما شفته رحت تاخذ لك لفه عند الاستاد بك حماس و ثورة ديبائية ما تلاحن .. هذا و ديبا ريداوي أخرشن خرش يا عل عيني ما تبتسيه .. أجل وش لو أنا تعاوني تسد لي حاصبن راسي بنفود الثويرات ما أبي أدري وش يبي يسوي بنا ديبا هقونقااا أبدلـلـه أبكيفي ..

اسمعوا يا راعين العلوم الطيبة و الوجيه السفرة .. لا تقولون شاطئ وش الي جايه بهالليل يقول مالي بكثر الهمق و صارت السالفة له .. مسألة الحكم البحريني هذي ما خشت نفوخي يعني مستحيل إن الدعوى جت من الباب للطاقة و إنه حكم زين و من هالسباحين لا لا لا .. و إلا عندكم الإمارات و قطر أقوى دوري حكامهم يعكسون قوة الدوري .. أروح للبحرين أجيب منه حكم و عندي خليل جلال أزين منه ..!! تكفون و ترى تكفى تخرش الرجاجيل لا يجي ببال واحدن منكم إني سلمت المباراة للحكم و حطيت الحكم منفذ نو نو و لا شرليون بالمية .. و لكن حبيت أوضح وجهة نظري عن هاللعبة البحرينية و إن وجود الحكم البحريني عليه شرليون علامة إستفهام .. فالي بقوا من فاكس خربان من الطبيعي يفوزون بنكهة الحلاوة البحرينية ..

يا جماعة الخير ترى التعاون له كلمته بالاتحاد السعودي و إلا من يصدق إن أعظم شخصيتين رياضيتين في السعودية هم أقل من يصرح و يشارك إعلامياً وهما نواف بن محمد و الدهام .. هالشخصيتين طلعوا يبررون لعبة الفاكس خربان يوم سالفة نجران العام و عليييه ما شفناهم و لا حتى طلعوا قبل عن أي موقف من فترة طوووويلة .. شفتوا وشلون التعاون واصل بالاتحاد السعودي رغم ملل الاتحاد السعودي ظاهرياً منهم و لكن داخلياً لهم حساسيتهم .. يعني بالله عليكم يبون يقمروننا بالحكم البحريني إنه تجربه .. يحلمون و هذي وجهة نظر عندي إني ما أثق بالإدارة التعاونية أبداً و يستحيل أن يجي اليوم و أثق بإدارة تعاونية و سواياهم محفوظة .. و على لهجة البحارنة أقول : يودوا ديبا يا التعاونية يودوووه .. إن كان بكم حقيقة التنافس و التحدي ..

آسفين يا جنرالات طولنا عليكم و عندكم ويك إند مستهيش .. و لكن حبيت أعطيكم خلجات بالنفس و وجهات نظر .. لغديه توصل للهدف و إن ما وصلت للهدف تمقلوا بديبا زين و يجركم مع أذانكم للأهداف المرسومة .. أو عليااااااه خشيشته من مطخه وه بس ..


سلامووووووو...