مشاكل زوجة الاخ مع الخوات والا مع حماتها (زوجة اخ زوجها)!!!

[§¤~^~¤§ شوكلاته مالحه§¤~^~¤§]

مالي في هالسوالف ماجربت زوجه الاخو <<ماعندها اخوان


بس اتوقع ان العلاقه بينها وبين خوات زوجها تعتمد على خواته اكثر يعني حتى لو كانت طيبه ومحترمتهم بس مادخلت مزاجهم او كانو غثيثات ماراح ترتاح الا لما تبعد عنهم..

[دروب المجد]

موضوع قوي جدا يشكر كاتبة

أولاً الأم تتكاثر كل شيء على زوجة إبنها بعكس بناتها فمثلا عادي ابنها يسهر باستراحات حتى بعد منتصف الليل وهذه حرية شخصية لولدها بينما زوج ابنتها له العتاب وتوبيخ إن فكر أن يسهر ولو مرتين في الأسبوع فهذه هضم لحقوق ابنتها وتقصير معها

ومثلا ابنتها حكيمة ومدبرة عندما تخرج للسوق لتشتري أغراضها بينما زوجة ابنها على كيفها وتبالغ في الخروج للسوق وغير ذلك

كذلك زيارة بناتها لها واجب وهي أم ويجب أن تأتيها بناتها وتخرج محملة بما لذ وطاب لتسعدها . بينما زوجة الأبن حينما تفكر بزيارة أهلها فهي "مالها داعي" ولا له لازم وتوها جاية منهم وولدها خكري لأنها يوديها لأهلها !!!

هذه نقطة .

مرة أخرى

رد الذاهبه بدايته جيد لكنها ختمته بأن لا تشكي الزوجة لزوجها وهذه خطأ

لأسباب

المرأة كأئن ضعيف وله قدرة محددة للتحمل ولا بد لها من من تحكي له وتشكي

زوجها أقرب شخص لذلك

لأنه لن يكره أهله ولن تسعى أن تكرهه في أهله ( إذا هي بنت رجال وتخاف الله ) فشكواها من باب التخفيف على نفسها لا من باب الفتنة

ولأنها لو تكلمت مع غيره من صديقة أو جارة أو حماة فربما نقل الكلام للحمولة فتكبر المشكلة وتصبح قضي وربما قطيعة رحم

ولأنها لو شكت لأهلها فسوف يكرهون أهل زوج البنت ويكون هناك حقد وكلام يردد وربما مشاكل

الأمن أن يكون الزوج صديق وزوج للزوجة

وأن لا تتعمد في كل صغيرة وكبيرة أن تنقل المواقف أو أن تحملها بشيء من الضيق في نفسها

فعليها أن تروض نفسها أن يكون لكل موقف مبرر مقنع على الأقل لتخفيف أثرة على نفسها

( التمس لأخيك ألف عذر )

على كل زوجة أن تتذكر أن لها بنت وأبن يوما سيكون لهم زوجات وأزواج ما تفعله مع أهل الزوج ستراه في أبنائها

ولا ننسى أن الفتنة أشد من القتل وأن الله لا يضيع أجر المحسنين ومن الإحسان أن تسعى الزوجة لأن تحبب أهل زوجها فيها وفي أبنائها وتحبب الزوج في أهله عامة

[الحنتريش]

انت كبرك عقلك مب تسلمه تجيبك وتسلمه توديك
انت بين امك وخوتك وبين زوجك الي تشتكي لك قل له انا ابسوي واسوي همن تسكت
الذاهبه مير علمتينا ان روسكن كله شياطين

[وميضُ البرق]

لاننسى أن الزوجة هي أخت قبل كل شي!!
وعلى قولة العجز:ماسويت سوي بك ،والبر سلف!!يعني مايصير شي من الباب للطاقة على قولتهم.

[رومنسيه وكلي حنيه]

تسلمين يالذاهبه على هذا الشرح وكمان ابتسام ..
كفيتوا ووفيتوا الله يخليكم ..
عندي نقطه يا عاشق ..
أم الزوجه .. تلاحظ دائمآ الزوجه إذا كثرت مشاكلها معاك أو مع أهلك تأكد أن هذا كله بسبب أمها
الام هي المسيطره كليآ على عقلية بنتها سواء كان إجابي أو سلبي معاك ومع أهلك ..
فا يقولون إذا جيت تضمها أسأل عن أمها بالأول
فالأم شيء مهم عند زواجك للبعد عن المشاكل التي تحيط بالأسره

دمت

تحيتي والسلام ..

[الـ مها]

ايه لا لا مالنا حق


يامره اسكتي وخليتس تنهانين واخت زوجس كل ماله تزوده ولا اسكتي عشان زوجتس ايه ايه نسكت وراه لا


لو اخو زوجتك غلط عليك والله ان تقوم الدينا وتقعده


ماقول الا ماالت عليكم الفين


ومساله نحب عيال خواتنا اكثر من عيال اخواننا ذي ماتصير ولا بتصير لان كلهم واحد



صدق انك بايخ وماعندك سالفه

[M!Ss GreeN]

هذي ظاهره عندك الحالك

حنا يالله لك الحمد ماعندا هالظواهر

كالعاده مافي شئ جديد موضوع اسخف من السخيف

[دلـع]

انت قلتها بعظمة لسانك مشاكل الزوجة
يعني انت وش دخلك؟!!

موضوع تافه زي مواضيعك السابقة

[أبوفالح]

[align=center]

اقتباس:  المشاركة الأصلية كتبت بواسطة الذاهـبـة     مرحبا استاذ عاشق بريدة .. شوف يااستاذي نبي نتكلم بكل شفافية .. و لا تستغربون أنتم يالرجال .. ولا تقولون وع ذولا شياطين مو حريم ) !! من جد ترى أنتم قلوبكم طاهرة و طيبين جداً و لا عندكم حركات حريم و غيرة و نكد و كيد و قهر .. إلخ إلخ طبعاً ، شي طبيعي جداً أن الرجل _ أي رجل _ يشوف امه أطيب أم بالدنيا و يشوف خواته .. ياسلام وردات وردات و حمامات سلام .. و يشوف اهله بشكل عام .. أحسن و أطيب و أجدع أهل بالدنيا كلها ,, فيستغرب لما تجي زوجته و تقول : شفت أمك وش قالت لي .. ؟!! طبعاً هنا يكون في حيرة الرجل المسكين .. ! يصدق في امه الطيبة الحنون ؟؟ ولا يكذّب بنت الناس هذي اللي مفروض انه يعزها و يحترمها ؟! خذوها قاعدة : الحريم ما يجتمعون مع بعض في مكان واحد .. إلا : يختلفون مع بعض .. ولا يجتمعون في اسرة واحدة : إلا يختلفون مع بعض .. و أكثر ما يغيض الأم : اهتمام ابنها بزوجته .. أكثر ما يهتم فيها هي ,, بمعنى أن امه تشوف كيف يقدر زوجته و كيف يشتري لها و كيف يوديها و يجيبها ,, هنا تظن الوالده ان ولدها خلاااص عليه السلام نساها تماما و سرقته منها بنت الحرامية هذي !! فتبدأ الأم بممارسات الغيرة .. نفس الشيء من الأخوات .. بس مع الأخوات تزداد الحركات القرعا ,, يعني مثلاً ,, ياويل زوجتك لو شافوا عليها ( ساعة ) غالية .. أو ( فستان ) حلو .. أو ( صبغة و قصة جديدة ) و طبعاً تتفاوت درجة الحيا .. بعضهن ما تستحي خير شر ، فتطقها بوجه الزوجة : ( وعععععععع وش هالفستان يوحش .. شوفي كرشك تضحك ) .. و بعضهن تستحي شوي : ( فترمقها بالنظرات و التكشيرات .. و تجدع عليها كم كليمة خفيفة أجل ) .. و المشكلة العظمى .. إذا كانت الأخوات متزوجات .. بس بمستوى معيشي اقل من مستوى زوجتك .. يوووووووه !! تحل عليها اللعنة .. @.@ عموماً لكل قاعدة شواذ .. و الشواذ هنا : هم القلة القليلة اللي ربك راضي عليهن .. و متصافيات مع حمواتهن و خالاتهن و حمولتهن ,, و صايرة كأنها بنتهم صحيح .. مو ( ضرتهن ) .. !! نقاط سريعة على هامش القرق : * من واجبات الزوجة اللي تحب زوجها و تقدره ,, أنها تحترم اهله و تحشمهم .. سواء بالكلام او بالتصرفات ,, * أهم انسان لازم تحرص عليه الزوجة لما تدخل في عائلة زوجها هي ( التشبيك مع الخالة أم الزوج ) .. يعني لازم تتقرب لها بكل انواع التقرب ، و تهديها كل ما شافت زولها ، و تعطيها من الرخيص ,, انتي الغالية و انتي تاج روسنا .. و من هالحكي و الزعط اللي ما يعوّر أبد ولا يكلف .. و بكذا راح تحبها الأم و تعزها و تحط لها مكانة خاااااصة جداً بين الكنّات * خذيها قاعدة .. إذا خوات زوجك جدعوا عليك هرج ، أو تريقة ، او حتى تغافلوا يصبون لك قهوة .. أو ما عزموك على حفلة عندهم .. انتي خليك هاااااااااااادية ولا كأن شي صار ,, لا تفرحينهم و تزعلين !! ولا تفكرين تعاتبينهم .. لان هن بالأساس قليلات أدب .. ولا فيهن رجا حتى مع العتاب .. بس قولي لروحك : مراهقات أو صغيرات عقل .. ولا تشرهين !! * أهم نقطة : لاعمرك تشكين ام زوجك ولا خواته عند زوجك .. لأن هذا عيب في حقك .. و راح تضعين زوجك في موقف حرج ، و تكدرين عليه ..لكن مع الزمن هو يبي يعرف أنك ثقيلة و عاااقلة .. و هذا الأهم ! * و أخيراً أنتم يالرجال : إذا جتك المره تقول شفت امك شفت أختك .. ؟ قل لها : اقطعي و اخسي و اهلي ما تجيبين طاريهم على لسانك لا أقصه لك .. ترى إذا سمعت شكواها .. تبتل المره تحش و تسب في اهلك !! .. و تصير مع الزمن أنت ( حريمه ) مثلها تحب الهرج ..و الحش و النقنقة .. ! لذلك ريح راسك و خل الحريم يحلون مشاكلهم مع بعض ,, و العاقلة راح تكسب .. ! * انت يالرجل .. لاعمرك تجيب لزوجتك شي .. و اهلك يناظرون .. !! يا تجيب لهم كلهم .. يا أما ما تجيب شي قدامهم ,, بعد لاعمرك تغنجها قدام أهلك .. ترى حركة بايخة .. بس مو معناته تسفل في اهلها !! .. لا الاحترام و الاعتدال و التقدير هو المطلوب .. هذا و بالله التوفيق ..

بجد ... هذا كلام العقل .. هذا التصرف المعيشي .. هكذا تمسك العصا من المنتصف

شبابنا وفتياتنا بحاجة إلى مثل هذا الدرس البسيط والمباشر والصريح ومتأكد لو طبق اللي في المقتبس أعلاه راح تختفي الكثير من المشاكل

الذاهبة .. أعدك بطبع تعليقك وتوزيعة على كم عريس وعريسه .. هم في طريقهم إلى القفص[/align]

[•°تآلي حيآتي موت°•]

[align=center]




أخوي والله اذا ام و خوات زوجي حبوبين انا بكون حبووووووووبه

واذا العكس انا العكس يعــــــني ..

(( على قد ماتعطيني اعطيك وقد ماضحيت اضحي ))

واما عيال خواتي اغلا .. لأن اختي اغلا من اخوي ..

وليه اختي اغلا ..؟ لانها اقرب لي وتحس فيني اكثر من اخوي وتراعيني و و وإلخ

يعني بالعربي الاخت اغلا من الاخوا مب كلهن بس الاغلب ..

لذلك حبي لولدها من حبي لها .. ولا يهونون عيااال اخوي اللي زوجاته عسل ..

اقتباس: من جد ترى أنتم قلوبكم طاهرة و طيبين جداً و لا عندكم حركات حريم و غيرة و نكد و كيد و قهر .. إلخ إلخ

معين طييييييييبه .. كلهم شــــــــــر الا من رحم الله

شوفي المشاكل ومنو السبب .. الرجال لارحمه ولا عطف

متجبر ولا يعترف بخطاااااه لو مهما كاان .. وهذا الحق ..

اقتباس: طبعاً هنا يكون في حيرة الرجل المسكين .. !

ياقلبي على المسكين .. ماشا الله من متى ..؟!!

اقتباس: يصدق في امه الطيبة الحنون ؟؟ ولا يكذّب بنت الناس هذي اللي مفروض انه يعزها و يحترمها ؟!

لاحنونه ولا هم يحزنون .. حنوووونه مع ولدها اما مع بنت الناس غيررررررر..

اقتباس: خذوها قاعدة : الحريم ما يجتمعون مع بعض في مكان واحد .. إلا : يختلفون مع بعض .. ولا يجتمعون في اسرة واحدة : إلا يختلفون مع بعض ..

صح

اقتباس: و أكثر ما يغيض الأم : اهتمام ابنها بزوجته .. أكثر ما يهتم فيها هي ,, بمعنى أن امه تشوف كيف يقدر زوجته و كيف يشتري لها و كيف يوديها و يجيبها ,, هنا تظن الوالده ان ولدها خلاااص عليه السلام نساها تماما و سرقته منها بنت الحرامية هذي !! فتبدأ الأم بممارسات الغيرة .. نفس الشيء من الأخوات .. بس مع الأخوات تزداد الحركات القرعا ,, يعني مثلاً ,, ياويل زوجتك لو شافوا عليها ( ساعة ) غالية .. أو ( فستان ) حلو .. أو ( صبغة و قصة جديدة ) و طبعاً تتفاوت درجة الحيا .. بعضهن ما تستحي خير شر ، فتطقها بوجه الزوجة : ( وعععععععع وش هالفستان يوحش .. شوفي كرشك تضحك ) .. و بعضهن تستحي شوي : ( فترمقها بالنظرات و التكشيرات .. و تجدع عليها كم كليمة خفيفة أجل ) .. و المشكلة العظمى .. إذا كانت الأخوات متزوجات .. بس بمستوى معيشي اقل من مستوى زوجتك .. يوووووووه !! تحل عليها اللعنة .. @.@ عموماً لكل قاعدة شواذ .. و الشواذ هنا : هم القلة القليلة اللي ربك راضي عليهن ..

ماشفنا هاللي تقولين ..!! هن صح يغارن بس مايسووون كذااااااا ..

ماتوصل لهالدرجه من التفاهه ..

اقتباس: نقاط سريعة على هامش القرق : * من واجبات الزوجة اللي تحب زوجها و تقدره ,, أنها تحترم اهله و تحشمهم .. سواء بالكلام او بالتصرفات ,,

إذا احترمني واحترم اهلي احترمه ..

واذا مالقاني وجه لا انا ولا اهلي ..

اعطيه أشــــــكل .. واللي جابه يجيب مليون احسن منه

اقتباس: * أهم انسان لازم تحرص عليه الزوجة لما تدخل في عائلة زوجها هي ( التشبيك مع الخالة أم الزوج ) .. يعني لازم تتقرب لها بكل انواع التقرب ، و تهديها كل ما شافت زولها ، و تعطيها من الرخيص ,, انتي الغالية و انتي تاج روسنا .. و من هالحكي و الزعط اللي ما يعوّر أبد ولا يكلف .. و بكذا راح تحبها الأم و تعزها و تحط لها مكانة خاااااصة جداً بين الكنّات

امه على عيني وراسي اذا هي مقدرتني .. واكيد بحترمها ..

اقتباس: * خذيها قاعدة .. إذا خوات زوجك جدعوا عليك هرج ، أو تريقة ، او حتى تغافلوا يصبون لك قهوة .. أو ما عزموك على حفلة عندهم .. انتي خليك هاااااااااااادية ولا كأن شي صار ,, لا تفرحينهم و تزعلين !! ولا تفكرين تعاتبينهم .. لان هن بالأساس قليلات أدب .. ولا فيهن رجا حتى مع العتاب .. بس قولي لروحك : مراهقات أو صغيرات عقل .. ولا تشرهين !!

لا والله .. ما اشوفهن هن لو قلت لهن شي يقهرهن قالن اني مراهقه ..!!

يقومن الدنيا ولا يقعدنها اذا اخطات زوجة الولد ..

لا اعاملهن مثثثثثثثل مايعاملوني بالضبط ..

لأن بقولك معلومه مب مني من علماء النفس ..

إذا امامك طفل لاتعامله معاملة كبار فهذا خطأ ..

يجب عليك التنزل إلى مستواه حتى تجاريه في الطبع والتفكير ..

اقتباس: * أهم نقطة : لاعمرك تشكين ام زوجك ولا خواته عند زوجك .. لأن هذا عيب في حقك .. و راح تضعين زوجك في موقف حرج ، و تكدرين عليه ..لكن مع الزمن هو يبي يعرف أنك ثقيلة و عاااقلة .. و هذا الأهم !

لا ياعمري مب عيب ..

اذا اخطوا بحقي بقوله اكييييييييد .. وشو اضيق عليه ..

يأدب خواته عشان ما اضيق عليه .. اما اني اسكت عن حقي ..!! لا والف لا

اقتباس: * و أخيراً أنتم يالرجال : إذا جتك المره تقول شفت امك شفت أختك .. ؟ قل لها : اقطعي و اخسي و اهلي ما تجيبين طاريهم على لسانك لا أقصه لك .. ترى إذا سمعت شكواها .. تبتل المره تحش و تسب في اهلك !! ..

لا والله غرررررررريبه انتي ..

ليه طيب مالي اي حقوق عنده ..؟

وانا غبيه لدرجة اني اسب اهله وهم ماسوو لي شي ..؟

والرجل اللي يسوي مثل ماقلتي .. اعذريني مب رجل هذا ولا عنده اسلوب ..

اقتباس: * انت يالرجل .. لاعمرك تجيب لزوجتك شي .. و اهلك يناظرون .. !! يا تجيب لهم كلهم .. يا أما ما تجيب شي قدامهم ,, بعد لاعمرك تغنجها قدام أهلك .. ترى حركة بايخة ..

ليه مايجيب لهااااا عند اهله ..؟؟

ياخي أمه قبل مسوي فيها زوجها كذا ..

خواته بعدين يتزوجون ويسون فيهم رجالهم كذا ..

ليه حنا انانيين .. نبي يناتنا يستانسن مع رجالهن وحريم عيالنا لااااا ..

ترا الغيره الزايده والانانيه مب حلوه ..

وحب لأخيك ماتحب لنفسك ..


يعطيك العافيه أخـوي


لاتحرمنا من جديدكـ المميز

»-ღ تحياتــيღ-»

.•:*¨`*:•. .•:*¨`*:•.
::: تـاإأآإأآإأأآلــي :::
0..................0
*-:¦:-*





[/align]

[•°تآلي حيآتي موت°•]

[align=center]

اقتباس:  المشاركة الأصلية كتبت بواسطة صدى الصوت     لاتسكن زوجتك مع اهلك وتروح هالمشاكل ميزتنا القبيحه انا الواحد لاعرس جاب الخدامه قصدي زوجته وسكنه عند اهله ياخوي المشاكل تجي من ام الزوج هي راس البلاء تنكد على ولده وزوجته والمشكله انه يوم هو نشب بحلقه تقوله يوليدي اعرس واذا اعرس صارت مثل العجوز ام عصى اللي بأفلام كرتون بس تحوم بينهم تناظر وش يسوون وين يبي يروحون وتلقف بكل شي صراحه بعذر زوجت الولد اللي مانتحرت احيانا ام الزوج تحسف على القروش اللي يصرفه ولده على زوجته مادري هالعجوز من تبي يصرفه عليه مايحس بالجمره الا المتزوجين والمتزوجات هم اللي حاسين بهالشي وهاذا هو الكلام الواقعي لا للعموميه تحياتي اخوووووووووووووووووووي

لا الله يهديك انت ..

ماتعرف شي .. جب هالخدامه عفواً زوجتك وخلها بجلالها تكرررف لأهلك

وتحترم امك وتحب راسها صبح مساء <..<.. هذا واجب

ولاتزعل خواتك .. ولاتدلع زوجتك على حساب اهلك ..

إذا تبي اهلك يرضون عنك العن جدف زوجتك وترااااااهم بينبسطون كذا ..

هذا تفكيركم يالقصماااااااااااااااان ..

ما اقول الا الله ينصرنا عليكم ..

مشكـــــــــــور أخــــــوي ويا حظ من هو تحت ظلك انت واشكالك

اللي يعرفون حق الزوجه ويقدرونها .. الله يـوفقك دنيا وآخره ..

ويرزقك قد نيتك ..

واتوقع لك عرق انت ..

أما رجالنا البطوله انه يخلي زوجته بيد اهله وهنها تقول أأأأأأأأأأأأأ

وفيه العكس بس الله يكثرهم يااارب ..


»-ღ تحياتــيღ-»

[/align]