.
.
.
.
بسم الله
اشكر التوريطة للمرة الثانية من اخينا عبدالله 30
و اتمنى ان اكون ضيف خفيف على متن رحلة ايفل و سام
- مدينه تحب تزورها كثير ؟
مكة المكرمة
-شركة طيران ترتاح من خدماتها ؟
صراحة شركة طيران ارتحت من خدماتها الامارات
- اخر سفره كانت لوين ؟
لدبي
- هل تمتلك جواز سفر ؟
للأسف NO
- اختار لنا صوره(فوتوغرافيه) من سفراتك مازلت تحتفظ فيها ؟
سأرفق لكم صورة الليلة
- صوره(فوتوغرافيه اخرى) لدوله تتمنى تزورها ؟
امريكا بلا منازع
- طلعت خارج المملكه كم مره ؟
لم احاول حسابهن
-تــذكــار مازلت تحتفظ فيه واذكر لنا من اي دوله ومن متى محتفظ فيه(ورينا صورته)؟
و الله اجيب تذكارات كثيرة لكن و الله يضيعن لكن اللي محتفظ فية الى الان لوحة رسمت انا فيها و ما زلت احاول التخلص منها
- دوله او مدينه ماتمل من زيارتها ؟
القاهرة
- موقف محرج مر بك واخر مضحك<~ لاأحد يتهرب ؟
المواقف كثيرة لكن الابرز
بالنسبة للمحرج
اول يوم عديت فية السن القانوني لاصدار جواز مستقل رحت للجوازات و طلبت اصدار جواز و قالوا لي مرنا الساعة وحدة الظهر استلمة قلت اوكي رجعت على الموعد لأستلم الجواز وولد خالتي ينتظرن بالمواقف اول ما نخلص نبي نمشي من الجوازات علطوول لدبي المهم كانت الصالة مكتضة بالزقرت اللي ناوين يطلعون جوازات يوم جاء دوري و رحت استلم الجواز من الشباك الا يا جماعة فية واحد مسكن من عند علباتي يوم اللتفت علية و لا هذا ابووي ..!!! انا تصافقت رجليني و صرت كني شايف ملك المووت قدامي و قال لي وش عندك يا هالملعون بذا و المشكلة موظف الجوازات يقول لي خذ جوازك ( يعني اثبات الجريمة بالدليل ) انا تلعثمت و معطت الجواز من ايد الموظف و هجيت و انا اركض و اركب مع ولد خالتي و انا امشي مليونين و اقولة بسرررررررررررررررعة حط رجلك و هو طايرة بهوتة و يقول وش بك و انا اقووول امششششش ...الخ
بالنسبة للمضحك
اذكر كنا مجموعة شلة و مسافرين لأندونيسيا و كانت القطة مع سليمان ( الهر = الدب ) و سبب اختيارنا لسليمان لأنة محترف بالمكاسر و لا يمل و لا يكل المهم كنا ساكنين بالجبل الاخضر بأندونيسيا ( جبل يبعد عن جاكرتا بحدود 80 كلم ان لم تخني الذاكرة ) الحاصل اننا خرجنا من الصباح لأحد المناطق السياحية و عند المساء رجعنا تعبانين للكوخ و كنا مجتمعين بالصالة و نسولف عن الاحداث اللي صارت اليوم و كانت هناك تعليقات و ضحك و فجأة ..!!!!!!!
طبت علينا عصابة و كانت معهم سكاكين و سواطيير و اشكالهم الصراحة اشبهه مفرد شبهه يعني تخيلوا معي شعوور طويلة و ايدينهم كلها وشوم و وجيههم ملعوب بحسبتها تبون اريحكم تشوفون الصينين اللي يتهاوش معهم جاكي شان بالافلام عيال عمهم و عليكم الحساب
المهم الجماعة طبوا علينا و يقولون ( مني مني Mony Mony ) و كانوا يهرجون بعصبية عنيفة و كانوا يبربرون بيناتهم و اتوقع ان ترجمة كلامهم انهم يقولون شوفوهم عيااااال الحرام كل واحد اذرق من الثاني ، المهم سوينا فيها استعباط شوي و قعدنا نفرك بايدينا مثل ما تقولون ما فهمنا وش تبون ، طبعا معنا الاخ وليد حاول يهدي الموضوع و كان يقول هو ووجهه لهم انا مكة انا مدينة خخخ ، طبعا باثناء حديثنا معهم كانوا يصولون و يجلون بهالكوخ يدورون الدراهم المهم الموضوع طول و هم شكلهم ما توقع الموضوع يبي ياخذ كل هالوقت جاء رئيس العصابة و زعق ذيك الزعقة اللي اهتز لها الجبل كلة و ضرب بالساطور بالارض يوم تقربعت قرابيعنا و انحاست علوم المراجل عندنا و قال ( موني موني ) قام الهر سليمان و جدع علية رزمة فلووس هم ما صدقوا شافوهن اخذوهن و هجوا علطوول
حنا الصراحة ما بين مصدقيين و ما بين متسذبين عجزنا نستوعب الموقف المهم بعد ساعة و نصف بدت الروح ترجع لنا و بدنا نضحك على شوي شوي ثم جتنا حالة هستيرية من الضحك و قعدنا نتطنز بالهر و نقولة وشولة تعطيهم دراهمك يا الهدر و حنا ما حنا مسلفينك قال اصلا انا ما عطيتهم دراهمي انا معطيهم القطة كلها ..!!!
طبعا لا زلت كلما اتذكر وجية العيال ذيك الليلة امووت ضحك
- اقصر سفره لك لوين كانت ؟
كانت لمسقط بعمان طلعنا من دبي و خلصنا شغلة بمسقط و رجعنا خلال اقل من 24 ساعة مع العلم ان المسافة كانت طويلة
-متى تبداء بترتيبات السفر؟
بالنسبة للتذاكر و حجز الفندق من يوم اتخاذ القرار بالسفر
-سفره تندمت عليها؟
لا يوجد
-وسفره كانت ذكرياتها حلووه؟
كانت بالقاهرة ايام عيد الاضحى قبل سنتين
-شو وسيلة المواصلات الي تحب تروح عليها؟
غير الرياض و حائل و المدينة الطائرة هي الخيار الافضل
- وين ناوي تكون وجهتك السنه هذي ؟
مشوفين بأوروبا
- اختار عضوين من المنتدى تحب يكونو معك بالسفر ؟
انا راح اختار عضو واحد بس بعد اذنكم
بس ابغى فية المواصفات التالية
ابغاه يكون مثل صراحة عبدالله 30 و ابغاه يكون مثل سعة ادراك جلوي و ابغاه يصير راعي تحشيشات مثل اسئلة عاشق و ابغى بة ذرابة خربشات و ابغى به جرأة صاحي و ابغى بة طيبة عموري و ابغى بة قرامة بنت البدايع و ابغى بة راجحة عقل تو بي و جبل عمر و ابغى بة عربجة علشانك و المواصفات كثيرة ...
-سافرت لدوله ولاحظة عليهم طبايع غريبه!اذكرها؟
و الله ما اذكر شئ يستحق الغرابة الا ان الملاحظ ان شعوب شرق اسيا تعتمد بشكل كبير على المرأة في كل شئ تقريبا
- اذكر لنا ضروريات السفر ؟
بالنسبة لضروريات السفر بالنسبة لي التأكد من موعد اقلاع الرحلة و من وجود الجواز ومن وجود بطاقة الصراف الالي و التأكد من صلاحيتها و الامر الضروري بالنسبة لي تأمين سكن للمكان الذي سوف اذهب الية قبل ان اصل حتى لو ليلة وحدة بس علشان يرتاح الواحد اول ما يصل و هذا الامر اطبقة سواء داخل السعودية او بالخارج
- كلمه لقسم السفر والسياحه ؟
قسم السفر و السياحة من الاقسام ذات الحيوية و النشاط في المنتديات القريبة منا و لكن هنا يحتاج من الاعضاء و ليس المشرفين دعم القسم بصور و مواقع و اسماء فنادق و اخبار التخفيضات و المواسم لان الواحد منا لا يعلم اذا وضع موضوع حول فندق او حول موقع كشتة كيف ممكن يفيد الاخرين و احب لغير ما تحب لنفسك و الشغلة تراه كاميرا جوال و تنزيل موضوع و بس ..
وده تعرف من الي مشخمط على ويهه
العرض العادي
